08-01-2023 ఆదివారం మొదటి ఆరాధన – మీరు ధన్యులు

ఆరాధన వర్తమానం

సోమవారము నుండి శనివారము వరకు లోకానికి ప్రాముఖ్యమైన దినములు. ఈ రోజులన్నీ కూడా ఉద్యోగాలకొరకు, చదువులకొరకు ఇతర పనులకొరకు చాలా ముఖ్యమైనవి. అందుకనే పరిస్థితులు అనుకూలముగా ఉన్నా లేకపోయినా కూడా ఎదో ఒకలాగా ఆ పని కొరకు ప్రయాసపడుతాం. మనకు మాత్రము ఆదివారము ఎంతో ప్రాముఖ్యము. ఈ దినము ప్రభువు ఏర్పాటుచేసిన దినము. ఈ దినమును గనుక ప్రభువుకు మహిమకరముగా, ఆయన సన్నిధిలో గడిపినట్టయితే, మిగతా అన్ని దినములు ఆ ప్రభువు ప్రభావము కనుపరచబడేదిగా ఉంటుంది.

లోకానుసారముగా ఉద్యోగదినములన్నీ, వారి జ్ఞానానుసారముగా వారి ఉద్యోగము సరియైన విధానములో చెయ్యడానికి ఎంతో ప్రయాస పడతారు. అయితే మనము ఈ ఆదివారము మనము ప్రభువు సన్నిధిలో ఆరాధించడానికి కూడుకున్నట్టయితే, మిగతా అన్ని దినములకు కావలసిన కృపను మనకొరకు కురిపించేవాడుగా ఉన్నాడు.

సర్వశక్తుడగు దేవుడు మహాత్మ్యముగలవాడు. ఆయన మనకు అగోచరుడు. న్యాయమును నీతిని ఆయన ఏమాత్రమును చెరుపడు. అందువలన నరులు ఆయనయందు భయభక్తులు కలిగి యుందురు – యోబు 37:23

దేవునిలో ఉన్న మహాత్మ్యము, దేవుని సన్నిధిలో నీవు ఉన్నప్పుడు, నీ జీవితములో ఆయన కృప విడుదల అయ్యి ఆ కృపామహదైశ్వర్యము స్థిరపరచబడుతుంది. ఉదాహరణకు నీ ఉద్యోగ జీవితములో, నీ రాకపోకలలో ప్రతి అపాయము, ప్రతి అపజయము నుండి విడుదలచేసేది నీ దేవుని నుండి విడుదల అయ్యి నీ జీవితములో స్థిరపరచిన ఆయన కృపయే.

దేవుడు మనకొరకు సమస్తము సిద్ధపరచినవాడుగా ఉన్నాడు. సమస్తము అనే మాటకు, అర్థము ఏమిటి? సమస్తము అంటే, మన జీవితమునకు కావలసిన సమస్తము ఒకేసారి ఇవ్వడు గాని, ఏ దినమునకు కావలిసిన సమస్తము ఆ దినము కొరకు దయచేస్తాడు. మన దేవుడు సమస్తము కలిగినవాడు గనుక, వట్టి చేతులతో ఉండడు, ఎప్పుడైతే మనము ఆయన సన్నిధిలో గడుపుతామో, అప్పుడు ఆయన ప్రేమతో మన జీవితములో ఎక్కడైతే లేమి ఉందో, ఖాళీగా ఉందో ఆ ప్రతి పరిస్థితి నింపబడుతుంది. నీ జీవితములో ఎప్పుడైనా ఖాళీగా ఉన్న పరిస్థితి ఉంది అని అనిపిస్తే దేవుని సన్నిధిలో నీవు గడుపు, ఖచ్చితముగా నీ ఖాళీ నింపబడుతుంది. ఉదాహరణకు, వాటర్ ట్యాంకును చూస్తే, అది నింపబడినతరువాత, ఎక్కడ నీళ్ళ కొరత ఉందో అక్కడికే వెళ్ళి ఆ నీళ్ళను అందుబాటులోనికి తెస్తుంది. ఆ ట్యాంకర్ లో నీళ్ళు అయిపోయాక అది మరలా నింపబడుతుంది. ఎందుకోసమంటే, ఎక్కడైతే నీళ్ళకొరత ఉందో అక్కడ నీళ్ళు సమకూర్చడానికి. అదే దాని ఉద్దేశ్యము. అలాగే దేవుని సన్నిధి ఉన్నదే నీలోని లేమిని, నీలోని ఖాళీలను, బలహీనతలను తొలగించి నిన్ను నిండుగా చేసి, బలపరచి ధన్యుడుగా జేయుటకే.

నీ జీవితములో దేవుని సన్నిధిలోనికి వచ్చిన ప్రతిసారీ ఆశీర్వాదమే! మన జీవితాలు గడ్డిపువ్వు వంటి జీవితాలు. అనగా అల్పమైన జీవితములు. అయితే అటువంటి అల్పమైన జీవితములకు ఆయనే ఆధారము అవాలి అని ఆయన కోరుకుంటున్నాడు. నీలో బలము కలిగించడానికి, శక్తిసామర్థ్యములు కలుగచేయడానికి ఆయన ఇష్టపడుతున్నాడు. ఉపవాసముతోనే వారిని పంపివేసినట్టయితే మార్గమధ్యములో మూర్ఛపోదురేమో అని ప్రభువు ఆలోచించేవాడుగా ఉన్నాడు. నీలో ఉన్న ఖాళీను పూడ్చడానికి, నీలోని బలహీనతను తొలగించడానికి ఆయన సిద్ధముగా ఉన్నడు, అయితే నీవు ఆయన సన్నిధిలో నీవు కనపడకపోతే, నీలోని ఖాళీ, బలహీనత అలాగే ఉండిపోతాయి.

ఒకరోజు నీవు మిస్స్ అయిపోతే, ఆరోజు నింపబడవలసినది నింపబడదు. అది అలాగే ఖాళీగా ఉండిపోయి, తరువాత నీవు నింపబడే విషయాలకు బీటలువారే పరిస్థితి వస్తుంది. అందుకే మనకు ప్రభువు దినమైన ఆదివారము ఎంతో ప్రాముఖ్యమైనది. ఈ దినము ప్రభువు సన్నిధిలో నీవు గడిపే సమయమును బట్టి విడుదల అయ్యే ప్రభావము, మిగతా ఆరు దినములలో కూడా ప్రత్యక్షపరచబడుతుంది.

జ్ఞానశౌర్యములు ఆయనయొద్ద ఉన్నవిఆలోచనయు వివేచనయు ఆయనకు కలవు – యోబు 12:13

దేవుడు కలిగిన జ్ఞానము, శౌర్యము, బలము ఎవరికోసము వెల్లడిపరుస్తున్నారు? నీ జీవితము, నా జీవితములో వెల్లడిపరుస్తున్నారు. ఈ సత్యము మనము గ్రహించాలి. ఆయన జ్ఞానము చొప్పున నీ జీవితము స్థిరపరచబడుతుంది. దేవుని చిత్తము జరిగే విధముగా నీవు ప్రార్థించాలి. ఉదయకాల సమయములో లేవగానే ఆయన కృపను వేదుకోవాలి. ఆయన చిత్తము నెరవేరునట్టుగా వేడుకోవలి. ఎవరు కోరుకుంటారు అంటే, దేవుని జ్ఞానమును బట్టే నా జీవితములో దేవుని చిత్తము నెరవేరుతుంది అని ఎరిగినవారు మాత్రమే!

నీకు ఉన్న ప్రతి అవసరతలో జ్ఞానము కొరకైనా, ఆలోచన కొరకైనా, ఆర్థిక అవసరతల కొరకైనా, బలము కొరకైనా ప్రభువును అడగటమే. ఒక ధనవంతుడు ఉన్నాడు అనుకోండి. వాడు ఎందుకు సంపాదిస్తున్నాడు? వాడి ఆలోచన ఎంతవరకు ఉంటుంది? వాడు సంపాదించింది, వాడు తృప్తిగా తినాలి, అలాగే వాడి తరువాత తరముకూడా తృప్తిగా తినగలుగులాగున సంపాదిస్తాడు. అలాగే నిన్ను కనిన తండ్రియైన దేవుడు, నీ తరతరములు ఆశీర్వదించబడునట్టుగా ఆయన ఐశ్వర్యము కలిగి ఉన్నాడు.

బలమునే నడికట్టుగా కట్టుకొనినవాడై తన శక్తిచేత పర్వతములను స్థిరపరచువాడు ఆయనే – కీర్తనే 65:6

ఆయన కలిగిన ఆ బలము ఎందుకోసము ఉంది? ఆ బలము ప్రత్యక్షపరచబడటానికి, స్థిరపరచబడటానికి. ఎక్కడ? నీ జీవితములో. ఈరోజు నీ జీవితములో ఎక్కడ ఖాళీ గా ఉందో అది నింపబడుతుంది. ఆమేన్! ఈ సత్యము స్థిరపరచబడాలి అంటే, నీవు చెయ్యవలసినది ఒకటి ఉంది. అదే ఆరాధన. నీవు ఆరాధించినప్పుడు రక్షణమార్గము సిద్ధపరచుకుంటాడు.

స్తుతియాగము అర్పించువాడు నన్ను మహిమ పరచు చున్నాడు నేను వానికి దేవుని రక్షణ కనుపరచునట్లు వాడు మార్గము సిద్ధపరచుకొనెను – కీర్తన 50:23

అందుకే ఈరోజు నీవు ఆరాధించు, దేవుని నామమును మహిమపరచు. దేవుని చిత్తము, ఆయన జ్ఞానము, బలము, శౌర్యము నీ జీవితములో స్థిరపరచబడును గాక. ఆమేన్!

ఆరాధన గీతము

మేలు చేయక నీవు ఉండలేవయ్య – ఆరాధించక నేను ఉండలేనయ్య || 2 ||
యేసయ్యా యేసయ్యా || 2 || || మేలు చేయక ||

నిన్ను నమ్మినట్లు నేను – వేరే ఎవరిని నమ్మలేదయ్యా
నీకు నాకు మధ్య దూరం – తొలగించావు వదిలుండలేక
నా ఆనందం కోరేవాడా – నా ఆశలు తీర్చేవాడా
నా ఆనందం కోరేవాడా – నా ఆశలు తీర్చేవాడా
క్రియలున్న ప్రేమా నీదీ – నిజమైన ధన్యతనాది || యేసయ్యా ||

ఆరాధించే వేళలందు – నీ హస్తములు తాకాయి నన్ను
పశ్చాతాపము కలిగే నాలో – నేను పాపినని గ్రహింయిన్చగానే
నీ మేళ్లకు అలవాటయ్యి – నీ పాదముల్ వదలకుంటిన్
నీ మేళ్లకు అలవాటయ్యి – నీ పాదముల్ వదలకుంటిన్
నీ కిష్టమైన దారి – కనుగొంటిని నీతో చేరి || యేసయ్యా ||

పాపములు చేసాను నేను – నీ ముందర నా తల ఎత్తలేను
క్షమియించగల్గే నీ మనసు – ఓదార్చింది నా ఆరాధనలో
నా హృదయము నీతో అంది – నీకు వేరై మనలేనని
నా హృదయము నీతో అంది – నీకు వేరై మనలేనని
అతిశయించెద నిత్యమూ – నిన్నే కలిగి ఉన్నందుకు || యేసయ్యా ||