30-Oct-2022 – ఆదివారము ఆరాధన – అంగీకరించే మనసు కలిగి ఉండుట

Main Message | మెయిన్ మెసేజ్

“అంగీకరించే మనస్సు” అనేది మన అధ్యాత్మిక జీవితములో అత్యంత ప్రాముఖ్యమైనది. అంగీకరించే మనస్సు లేకుండా ప్రభువు కార్యములు మన జీవితములో చూడలేము.

ఏలీయా దినములయందు మూడేండ్ల ఆరు నెలలు ఆకాశము మూయబడి దేశమందంతటను గొప్ప కరవు సంభవించినప్పుడు, ఇశ్రాయేలులో అనేకమంది విధవరాండ్రుండినను, ఏలీయా సీదోనులోని సారెపతు అను ఊరిలో ఉన్న యొక విధవరాలియొద్దకే గాని మరి ఎవరి యొద్దకును పంపబడలేదు – లూకా 4:25-26.

ఆ ఊరిలో అంతమంది ఉండగా ఆమె యొద్దకే ఏలియాను దేవుడు పంపాడు? ఆమె ధనవంతురాలా? దేవునికి ఆమె స్థితి తెలియదా? ఈరోజు ఈ విషయము ధ్యానము చేద్దాము.

అంతట యెహోవా వాక్కు అతనికి ప్రత్యక్షమై యీలాగు సెలవిచ్చెనునీవు సీదోను పట్టణ సంబంధ మైన సారెపతు అను ఊరికి పోయి అచ్చట ఉండుము; నిన్ను పోషించుటకు అచ్చటనున్న యొక విధవరాలికి నేను సెల విచ్చితిని. 1 రాజులు 17:8,9

ఇక్కడ ఆ విధవరాలైన స్త్రీకి ఈ సంగతులు అనగా దేవునికి ఏలియాకు మధ్య జరిగిన సంభాషణ తెలియదు. అయితే ఆమె స్థితి మార్చడానికి ప్రభువు ఆలోచన కలిగి ఉన్నాడు.

అందుకామె నీ దేవుడైన యెహోవా జీవముతోడు తొట్టిలో పట్టెడు పిండియు బుడ్డిలో కొంచెము నూనెయు నాయొద్దనున్నవే గాని అప్పమొకటైన లేదు, మేము చావకముందు నేను ఇంటికి పోయి వాటిని నాకును నా బిడ్డకును సిద్ధము చేసికొనవలెనని కొన్ని పుల్లలు ఏరుటకై వచ్చితిననెను. – 1 రాజులు 17:12.

“నీ దేవుడైన యెహోవా జీవముతోడు” అని ఆమె ఎందుకు చెప్పింది? ఏమి ఉద్దేశ్యము కలిగి ఆ మాట చెప్పింది. ఈమె దేవుని యందు భయము కలిగినది గనుక, జీవము గలిగిన దేవుడైన యెహోవా, సమస్తము ఎరిగిన యెహోవా ఎదుట సత్యమే చెప్పుచున్నాను కానీ అబద్ధమాడుటలేదు అని అర్థము. దీనిని బట్టి “దేవుని యందు భయము కలిగినది” అని మనము గమనించవచ్చు.

మన జీవితములో దేవుని కార్యము జరగాలి అనే ఆశ ఉంటుంది కానీ దేవుని యందలి భయము కలిగి ఉండము. అయితే దేవుని వాక్యము ఇలా సెలవిస్తుంది –

వారికిని వారి సంతాన మునకును నిత్యమును క్షేమము కలుగునట్లు వారు నాయందు భయభక్తులు కలిగి నా ఆజ్ఞలన్నిటిని అనుసరించు మనస్సు వారికుండిన మేలు. – ద్వితీయోపదేశకాండము 5:29.

మీరు యెహోవా యందు భయభక్తులు కలిగి ఆయన మాటను విని ఆయనను సేవించి ఆయన ఆజ్ఞను భంగముచేయక మీరును మిమ్మును ఏలు రాజును మీ దేవుడైన యెహోవాను అనుసరించినయెడల మీకు క్షేమము కలుగును. – 1 సమూయేలు 12:14.

ఆ సారెఫతులోని విధవరాలి జీవితములో క్షేమము కలగటానికి కారణము దేవునియందలి భయము కలిగి ఉండుటయే. ఏలియా అంతకుముంది ఎరిగిన వాడుకాడు. పోని ముందుగా చెప్పి వచ్చిన వ్యక్తి కూడా కాదు. అయినా కూడా ఆ స్త్రీ దేవుని యెదుట భయము సత్యముగా కలిగి ఉంది.

యేలియా ఆత్మీయమైన కొనసాగింపు అవరసము కలిగినవాడు మరియు ఆ విధవరాలు శారీరకమైన కొనసాగింపు అవరము కలిగినది. ఆత్మీయముగానైనా శారీరకముగానైనా మన దేవుడే చెయ్యగలడు. దీనికై మనము ఆయనయందు భయము కలిగి ఉండుట అవసరమైనది.

అలాగే ఈ స్త్రీలో రెండవ లక్షణము “యదార్థత”. యేలియా తనను అప్పము అడిగినప్పుడు, తన వద్ద ఏమి ఉందో ఎంత ఉందో దాచక యేలియాకు తెలియజేసింది. ఊరికే చెప్పలేదు గానీ యేలియా దేవుని ప్రవక్త అని ఎరిగినదై, “నీ దేవుడైన జీవము తోడు… ” అని చెప్పినది.

నా దేవా, నీవు హృదయ పరిశోధనచేయుచు యథార్థవంతులయందు ఇష్టపడుచున్నావని నేనెరుగుదును; నేనైతే యథార్థహృదయము గలవాడనై యివి యన్నియు మనఃపూర్వకముగా ఇచ్చి యున్నాను; ఇప్పుడు ఇక్కడనుండు నీ జనులును నీకు మనఃపూర్వకముగా ఇచ్చుట చూచి సంతోషించుచున్నాను – 1 దినవృత్తాంతములు 29:17.

దేవుని యందలి భయము కలిగి యదార్థత కలిగి ఉన్నట్టయితే ఆయన మనయందు ఇష్టము కలిగినవాడై ఉంటాడు. ఈ స్త్రీ కూడా అదేవిధముగా ఉంది అందుకే దేవుడు ఆమె యందు ఇష్టము కలిగినవాడై, ఆమె స్థితి మార్చుటకై ఏలియాను ఆమె యొద్దకు పంపాడు.

అందుకతడు లేచి సారెపతునకు పోయి పట్టణపు గవినియొద్దకు రాగా, ఒక విధవరాలు అచ్చట కట్టెలు ఏరుచుండుట చూచి ఆమెను పిలిచి త్రాగుటకై పాత్రతో కొంచెము నీళ్లు నాకు తీసికొనిరమ్మని వేడుకొనెను. ఆమె నీళ్లు తేబోవుచుండగా అతడామెను మరల పిలిచినాకొక రొట్టెముక్కను నీ చేతిలో తీసికొని రమ్మని చెప్పెను… అప్పుడు ఏలీయా ఆమెతో ఇట్లనెనుభయపడవద్దు, పోయి నీవు చెప్పినట్లు చేయుము; అయితే అందులో నాకొక చిన్న అప్పము మొదటచేసి నాయొద్దకు తీసికొనిరమ్ము, తరువాత నీకును నీ బిడ్డకును అప్పములు చేసికొనుము. – 1 రాజులు 17:10,11,13.

ఇక్కడ మొదట ఏలియా నీళ్ళు అడిగాడు ఆ తరువాత అప్పము అడిగాడు. అప్పుడు తన స్థితిని చెప్పినప్పుడు, ఏలియా మొదటి అప్పము తనకు ఇచ్చి తరువాత వారికొరకై చేసుకొమ్మని చెప్పగా, ఆమె అంగీకరించింది. నీవు నేను అయితే మాకే లేదంటే ముందు నీకు చెయ్యాలా అనే ఆలోచన కలిగి ఉంటాము లేదా మనము మాటలుకూడా అంటాము.

అయితే ఏలియా మాట అంగీకరించింది. ఎందుకంటే ఏలియా దేవునికి సంబంధించినవాడు అని ఎరిగినదై, దేవుని యెదుట యాదర్థముగా ప్రవర్తించింది. అలాగే దేవుని కార్యముగా ఆమె ఏలియాను అంగీకరించింది. దేవుని మాటలో జీవమే గాని నాశనము లేదు. ఆ జీవమే ఆమె జీవితములో ఆశ్చర్యకార్యము జరిగించబడింది. మరి ముఖ్యముగా ఇచ్చే విషయములో దేవుని మాటకు లోబడుట అత్యంత ప్రాముఖ్యము.

భూమిమీద యెహోవా వర్షము కురిపించువరకు ఆ తొట్టిలో ఉన్న పిండి తక్కువకాదు, బుడ్డిలో నూనె అయిపోదని ఇశ్రాయేలీయుల దేవుడైన యెహోవా సెలవిచ్చియున్నాడు అనెను. అంతట ఆమె వెళ్లి ఏలీయా చెప్పిన మాటచొప్పున చేయగా అతడును ఆమెయు ఆమె యింటి వారును అనేకదినములు భోజనముచేయుచు వచ్చిరి – 1 రాజులు 17:14,15.

ఇదంతా ఎప్పుడు జరిగింది? “దేవుని వలన బయలుపరచబడిన మాట ప్రకారము చేసినప్పుడు” జరిగింది.

సారెఫతు విధవరాలి జీవితములో మనము చూసిన లక్షణాలు

1. దేవుని యందలి భయము
2. దేవుని యెదుట యదార్థత
3. దేవుని మాట అంగీకరించుట
4. దేవుని మాట ప్రకారము చేయుట

నీవు నేను కూడా అదేవిధముగా మన జీవితాలను సిద్ధపరచుకుంటే మన శారీరకమైన ఆశీర్వాదములు, ఆత్మీయమైన ఆశీర్వాదములు పొందుకునేవారిగా ఉండి ప్రభువు నామమును మహిమ పరచగలుగుతాము.

దేవుడు ఏలియాతో “నేను సెలవిచ్చితిని” అని చెప్పాడు. అయితే ఆమెతో ఏమి చెప్పలేదు. కానీ ఆమె హృదయమును ఆమె లక్షణములు ఎరిగినవాడు గనుక ఏలియాతో అలా చెప్పాడు. ఏ నమ్మకమైతే దేవుడు ఆమె మీద ఉంచాడో ఆ నమ్మకాన్ని వమ్ము చెయ్యలేదు. ఆమె దేవుని పని జరుగుటలో ఆమె నమ్మకముగా ఉండగలిగింది అలాగే ఆమె దేవుని యెదుట సాక్ష్యముగా ఉండగలిగింది. మనము కూడా అలాగే సిద్ధపడదాము.