13-10-2024 – ఆదివారం మొదటి ఆరాధన

వారము కొరకైన వాక్యము

దేవుని వాక్కు వినబడే స్థలమున్నీ దీవించబడినవే. దేవుని వాక్కు వెలుగు అయి ఉన్నది గనుక, ఆ వాక్కును స్వీకరించినపుడు మన జీవితములో ఉన్న చీకటి పారద్రోలబడుతుంది.

ప్రభువైన యేసు ఈలోకములో ఉన్నపుడు, మనకు ఒక మాదిరిగా జీవించారు. యేసును వెంబడిస్తున్న శిష్యులను మాటిమాటికీ గమనిస్తూ ఉన్నాడు. ఉదాహరణకు ఫిలిప్పును, పేతురును గూర్చి జ్ఞాపకము చేసుకున్నాము. అలాగే మనము కూడా ఆయనను వెంబడిస్తున్నాము గనుక ఆయన మన ఆత్మీయమైన జీవితము గూర్చిన విషయమును గమనించి పరీక్షించేవాడిగా ఉంటాడు.

ప్రభువు శిష్యులను అనేకసార్లు ప్రశ్నలు అడిగాడు, ఆ ప్రశ్నలే మనలను అడిగితే మన జవాబు ఏమిటి అనేది మనము తెలుసుకొని సిద్ధపడదాము.

యేసు ఫిలిప్పుదైన కైసరయ ప్రాంతములకు వచ్చి–మనుష్యకుమారుడెవడని జనులు చెప్పకొనుచున్నారని తన శిష్యులను అడుగగా, వారు కొందరు బాప్తిస్మ మిచ్చు యోహాననియు, కొందరు ఏలీయా అనియు, కొందరు యిర్మీయా అనియు లేక ప్రవక్తలలో ఒకడనియు చెప్పుకొనుచున్నారనిరి. అందుకాయన మీరైతే నేను ఎవడనని చెప్పుకొనుచున్నారని వారి నడిగెను. అందుకు సీమోను పేతురు నీవు సజీవుడగు దేవుని కుమారుడవైన క్రీస్తువని చెప్పెను. – మత్తయి – 16:13-16

యేసయ్యను గూర్చి ప్రజలు ఏమి అనుకుంటున్నారు అని శిష్యులను అడిగినపుడు, వారు విన్నదానిని బట్టి రకరకములుగా జవాబు ఇచ్చారు. అప్పుడు మీరేమనుకుంటున్నారు అని శిష్యులను అడిగాడు. ఈరోజు అదే ప్రశ్న, అనేక సంవత్సరములుగా వెంబడిస్తున్న మిమ్మల్ని అడిగితే మీరేమంటారు? పేతురైతే నీవు సజీవుడగు దేవుని కుమారుడవైన క్రీస్తువని చెప్పాడు. ఈ సమాధానమును ప్రభువు అంగీకరించాడు.

ఏలయనగా ఆకాశమందున్నవియు భూమియందున్న వియు, దృశ్యమైనవిగాని, అదృశ్యమైనవిగాని, అవి సింహాసనములైనను ప్రభుత్వములైనను ప్రధానులైనను అధికారములైనను, సర్వమును ఆయనయందు సృజింప బడెను, సర్వమును ఆయనద్వారాను ఆయననుబట్టియు సృజింపబడెను – కొలస్సీ 1:16

యేసయ్యలో సర్వము దాచబడి ఉన్నవి. బుద్ధిజ్ఞాన సర్వసంపదలు ఆయన యందే ఉన్నవు. కొంతమంది బాప్తీస్మమిచ్చు యోహాను అనుకున్నారు. ఎందుకంటే, బాప్తీస్మమిచ్చు యోహాను ఏ సువార్త ప్రకటించాడో, అదే సువార్త ప్రకటించాడు. మరికొంతమంది ఏలియా అనుకున్నారు. ఎందుకంటే, సారెఫతు విధవరాలి ఇంటి వద్ద పిండి దినదినము పెరుగుతూ వచ్చింది. అలాగే యేసయ్య కూడా 5000 మందికి రొట్టెలు పంచిపెట్టాడు. మరికొంతమది హెచ్చరికలు చేసినదానిని బట్టి యిర్మీయాగా అనుకున్నారు.

అయితే పేతురు మాత్రము సజీవుడైన దేవుని కుమారుడు అని పేతురు చెప్పాడు. అనగా ఎదో ఒకటి కాదు గానీ, పాపములను క్షమించడానికి, బోధించడానికి, సృష్టించడానికీ, సమస్తమునకు ఆధికారము కలిగినవాడు అని గుర్తించాడు గనుక యేసయ్య ఆ సమాధానమును అంగీకరించాడు, పేతురుని ఆశీర్వదించాడు.

నేను క్రీస్తుతోకూడ సిలువ వేయబడియున్నాను; ఇకను జీవించువాడను నేను కాను, క్రీస్తే నాయందు జీవించుచున్నాడు. నే నిప్పుడు శరీరమందు జీవించుచున్న జీవితము నన్ను ప్రేమించి, నా కొరకు తన్నుతాను అప్పగించుకొనిన దేవుని కుమారుని యందలి విశ్వాసమువలన జీవించుచున్నాను – గలతీయులకు 2:20

ప్రభువు పరిపూర్ణుడు అయి ఉన్నాడు. ఆ పరిపూర్ణుడైన వ్యక్తిని నీవు సంపూర్ణముగా తెలుసుకోవాలి. ఈ దినమున నీవు ఆ ప్రభువును ఎలా స్వీకరిస్తున్నావు? సంపూర్ణముగా స్వీకరిస్తున్నావా? లేక ఏదో ఒక విషయములోనే స్వీకరిస్తున్నావా?

మీరింకను గ్రహింపలేదా? – మత్తయి 16:9

ఈ ప్రశ్నను యేసయ్య శిష్యులను అడిగాడు. అదే ప్రశ్న మనలను అడిగితే, మన జవాబు ఏమిటి? “మీరింకను గ్రహింపలేదా?” అనే ప్రశ్నలో అర్థము ఏమిటి అంటే – ఇన్నిసార్లు అనుభవము అయినా సరే ఇంకా గ్రహించలేదా?

ఆయన శిష్యులు అద్దరికి వచ్చి రొట్టెలు తెచ్చుటకు మరచిరి. అప్పుడు యేసు–చూచుకొనుడి, పరిసయ్యులు సద్దూకయ్యులు అనువారి పులిసిన పిండినిగూర్చి జాగ్రత్త పడుడని వారితో చెప్పెను. కాగా వారు మనము రొట్టెలు తేనందున గదా (యీ మాట చెప్పెనని) తమలో తాము ఆలోచించుకొనుచుండిరి – మత్తయి 16:5-7

వారి వద్ద రొట్టెలు లేనపుడు అనగా జీవము లేనపుడు, యేసయ్య అడిగిన ప్రశ్నకు, వారి స్థితిని మాత్రమే చూసి వారు ఆలోచించేవారిగా ఉంటున్నారు. అయితే అద్భుతము చేయగలవాడే వారి వద్ద ఉన్నపుడు జీవములేని స్థితిలో జీవము కలుగచేసేవాడుగా ఆయన ఉంటాడు అనే సత్యము వారు గ్రహించలేకపొయారు. అనుభవపూర్వకముగా అనేకమందికి యేసయ్య చేసిన అద్భుతములను చూసినవారు. అంతేకాక 5000 మందికి 5 రొట్టెలు పంచిపెట్టిన యేసయ్య, రొట్టెలు లేని సమయములో శిష్యులకు సహితము ఇవ్వగలడు అనే సత్యము గ్రహించాలి అని యేసయ్య ఆశిస్తున్నాడు.

యేసు అది యెరిగి–అల్పవిశ్వాసులారా మనయొద్ద రొట్టెలు లేవని మీలో మీరెందుకు ఆలోచించుకొనుచున్నారు? మీరింకను గ్రహింపలేదా? అయిదు రొట్టెలు అయిదువేలమందికి పంచిపెట్టినప్పుడు ఎన్ని గంపెళ్లు ఎత్తితిరో అదియైనను ఏడు రొట్టెలు నాలుగు వేలమందికి పంచిపెట్టినప్పుడు ఎన్ని గంపెళ్లు ఎత్తితిరో అదియైనను మీకు జ్ఞాపకము లేదా – మత్తయి 16:8-10

దోనెలో వారు వచ్చినపుడు వారి వద్ద ఒక్క రొట్టే కూడా లేదు. ఒకవేళ వారు యేసయ్య ఏమి చేయగలడో గ్రహించి ఉంటే, శూన్యములో సమస్తము సృష్టించగల సమర్థుడు అనే అద్భుతమునకు సాక్షులుగా ఉండే అవకాశము పొందుకొనేవారు. వారు గ్రహించని కారణాన ఆ అవకాశము కోల్పోయారు. ఈ దినమున వేరేవారి జీవితములో ప్రభువు చేసిన అద్భుతమునకు సాక్ష్యము ఇచ్చిన నీవు, నీ పరిస్థితిలో సహితము ఆయన అద్భుతము చేయగల సమర్థుడు అని గ్రహించు.

అలాగే “వీరందరి కంటే ఎక్కువగా నన్ను ప్రేమిస్తున్నావా అని” అని పేతురును అడిగాడు. ఈ ప్రశ్న మనలను అడిగితే మన సమాధానము ఏమిటి? ఆయనను ప్రేమించేవాడు ఏమి చేస్తాడు? ఆయన ఆజ్ఞలను పాటిస్తాడు. అందరికంటే ఎక్కువగా ప్రేమించాలి అంటే, అందరికంటే ఎక్కువగా ఆజ్ఞలను పాటించేవారిగా మనము ఉండాలి. అనగా ఆయన వాక్యము ప్రకారముగా మన జీవితమును సరిచేసుకోవాలి, సిద్ధపరచుకోవాలి. అందరికంటే నిన్ను ప్రభువు ప్రేమిస్తునాడు గనుకనే ఈ దినము నీతో మాట్లాడుతున్నాడు.

వారు భోజనముచేసిన తరువాత యేసు సీమోను పేతురును చూచి–యోహాను కుమారుడవైన సీమోనూ, వీరికంటె నీవు నన్ను ఎక్కువగా ప్రేమించుచున్నావా? అని అడుగగా అతడు–అవును ప్రభువా, నేను నిన్ను ప్రేమించుచున్నానని నీవే యెరుగుదువని ఆయనతో చెప్పెను; యేసు–నా గొఱ్ఱెపిల్లలను మేపుమని అతనితో చెప్పెను – యోహాను 21:15

నీవే ఎరుగుదువు ప్రభువా అని పేతురు చెప్పుచున్నాడు. పేతురును ఎరిగినవాడు గనుక, యేసయ్య గొర్రెపిల్లలను మేపుము అని పేతురుతో చెప్పాడు. గొర్రెల మంద అనేది సంఘమును సూచిస్తుంది. గనుక దేవునినిని అందరికంటే ఎక్కువగా ప్రేమిస్తే, ఆయన సంఘము యొక్క విషయములలో బాధ్యత ఇస్తున్నాడు.

1. నీకు యేసయ్య ఎవరు? – ఈ జవాబుకు ఒక అధికారము ఇవ్వబడుతుంది.
2. నీవు యేసయ్యను గూర్చి గ్రహించావా? – ఈ జవాబుకు అద్భుతమును పొందుకుంటారు
3. నీవు అందరికంటే ఎక్కువగా యేసయ్యను ప్రేమిస్తునావా? – ఈ జవాబుకు దేవునికి సంబంధించిన దానిలో పాలు ఉంటుంది.