21-07-2024 – ఆదివారం మొదటి ఆరాధన

వారము కొరకైన వాక్యము

వాక్యము ప్రకారము, దుర్గములో మనము ఉన్నపుడు ప్రకటించబడిన మాటల యొక్క శక్తి ఎరిగినవారమైతే ఖచ్చితముగా ఆ మాటలు పట్టుకొని నిలబడేవారిగా మనము ఉంటాము. దేవుని మాటలు విత్తనముతో పోల్చబడినవి.

ఇదిగో విత్తువాడు విత్తుటకు బయలువెళ్లెను. వాడు విత్తుచుండగా కొన్ని విత్తనములు త్రోవప్రక్కను పడెను. పక్షులువచ్చి వాటిని మ్రింగివేసెను. కొన్ని చాల మన్ను లేని రాతినేలను పడెను; అక్కడ మన్ను లోతుగా ఉండ నందున అవి వెంటనే మొలిచెను గాని సూర్యుడు ఉదయింపగానే అవి మాడి, వేరులేనందున ఎండిపోయెను. కొన్ని ముండ్లపొదలలో పడెను; ముండ్లపొదలు ఎదిగి వాటిని అణచివేసెను గనుక అవి ఫలింపలేదు. కొన్ని మంచినేలను పడెను; అవి మొలిచి పెరిగి పైరై ముప్పదంతలుగాను అరువదంతలుగాను నూరంతలుగాను ఫలించెను. –వినుటకు చెవులుగలవాడు వినునుగాక అని చెప్పెను. -మార్కు 4:3-9

వినుటకు చెవులుగలవాడు వినునుగాక అంటే, నీ ఆత్మీయ చెవులను గూర్చి దేవుడు చెప్పుచున్నాడు. ఆత్మ బయలుపరిచితేనే గానీ నీ మనసులో సంగతి ఎవరికీ తెలియదు. దేవుని ఆత్మ కార్యములను మనము శరీరముతో గ్రహించలేము. దేవుడు మన ఆత్మతో మాట్లాడేవాడు గా ఉంటాడు.

ఈ లోకము చూస్తే, పాపముతో నింపబడింది. అటువంటి సమయములో దేవుని కృప మరి ఎక్కువగా కనపరచబడుతుంది. ఎలా అంటే, ప్రకటింపబడిన వాక్యము స్థిరపరచబడునట్లుగా దేవుని కృప కనపరచబడుతుంది. ఈ పరిస్థితులలో మన హృదయములను స్థిరపరచుకోవాలి.

వాడు విత్తుచుండగా కొన్ని విత్తనములు త్రోవప్రక్కను పడెను. పక్షులువచ్చి వాటిని మ్రింగివేసెను. -మార్కు 4:4

దేవుడు ఆశీర్వదించే దేవుడే, తన ఆశీర్వాదములను పంపిస్తున్నాడు గానీ, త్రోవ పక్కన ఉండటమును బట్టి పక్షులు ఎత్తుకుపోయేవి గా ఉంటున్నాయి. ఈలోకములో రెండే దారులు, ఒకటి దేవునిదైన మంచి దారి, అపవాది యొక్క చెడు దారి. త్రోవ అంటే ఏమిటి అని ఆలోచిస్తే, ఒక పొలములో చుట్టూ చిన్నగా దాని ఉంటుంది. విత్తనములు పొలములో పడవలిసినవి అయితే ఆ విత్తనములు గట్టు మీద పడితే వాటిని పక్షులు ఎత్తుకుపోతాయి.

దేవుని త్రోవ వెలుగుమయమై ఉంటుంది, జీవ మార్గమై ఉంటుంది. దాని పక్కన ఉండటము అంటే వెలుగుకు పక్కగా ఉండటము, జీవముకు దగ్గరగా ఉండటము. అయితే త్రోవలో లేని దానిని బట్టి, అపవాది వాటిని దొంగిలించే విధముగా మన పరిస్థితి ఉంటుంది.

ఆశీర్వాదము కనబడి తప్పిపోతుంటే, మన జీవితమును పరీక్షించుకోవాలి. ఎక్కడ నేను దేవుని త్రోవలో లేని పరిస్థితిలో ఉంటున్నామో పరీక్షించుకోవాలి. చీకటి ప్రవేశించలేని, అధికారము వెలుగుకు ఉన్నది.

ఒకప్పుడు త్రోవ పక్కన ఉన్నామేమో గానీ, ఇప్పుడైతే త్రోవలో ఉండవలసినవారము, నిలువవలసినవారము. త్రోవలో ఉన్నప్పుడు అపవాది మన ఆశీర్వాదమును దొంగిలించలేదు. అంటే నీ జీవితమును పట్టుకోవడానికి ప్రయత్నించినప్పటికీ, అపవాది నీ జీవితమును మాత్రము పట్టలేదు.

మీరు కుడి తట్టయినను ఎడమ తట్టయినను తిరిగినను –ఇదే త్రోవ దీనిలో నడువుడి అని నీ వెనుకనుండి యొక శబ్దము నీ చెవులకు వినబడును. -యెషయా 30:21

మన మార్గములో కుడికి గానీ, ఎడమకు గానీ తిరగనవసరము ఉండదు గానీ అది తిన్నని మార్గము అయి ఉంది. మనము సరైన మార్గములో ఉంటే నీ ఆశీర్వాదము దొంగిలించడానికి ఎవ్వరికీ అవకాశము ఉండదు.

నీతిమార్గమునందు జీవము కలదు దాని త్రోవలో మరణమే లేదు. -సామెతలు 12:28

మరణమే లేదు అంటే, దేవుని మార్గములో నిలిచి నడచినపుడు, ఆశీర్వాదము దొంగిలించబడదు అని అర్థము. పరిశుద్ధమైన జీవితములో మరణమునకు తావు లేదు. పరిశుద్ధమైన జీవితములో ఉన్నపుడు కుడికి గానీ, ఎడమకుగానీ తిరుగ కూడదు.

పరిశుద్ధమైన జీవితమును ఎలా జీవించగలము? వాక్యము ఏమైతే నిర్ణయించిందో అదే నా నిర్ణయము. వాక్యము బోధించినదే నా జీవితము అనే విధముగా జీవించడము. అటువంటి జీవితము పరిశుద్ధమైన జీవితము. నా మాటలు సత్యమును , జీవమునై ఉన్నయి అని యేసయ్య చెప్పుచున్నాడు.

దేవుని వాక్యములోని సత్యము స్వతంత్రులుగా చేస్తుంది. అంటే వాక్యము మనలను బంధింపబడనియ్యదు.

మరియు ఆయన–ఒక మనుష్యుడు భూమిలో విత్తనము చల్లి, రాత్రింబగళ్లు నిద్రపోవుచు, మేల్కొనుచు నుండగా, వానికి తెలియని రీతిగా ఆ విత్తనము మొలిచి పెరిగినట్లే దేవుని రాజ్యమున్నది. భూమి మొదట మొలకను తరువాత వెన్నును అటుతరువాత వెన్నులో ముదురు గింజలను తనంతటతానే పుట్టించును. -మార్కు 4:26-28

భూమి విత్తనమును మొలకెత్తిస్తుంది. మొదట మొలకను, మొదట మొలకను తరువాత వెన్నును అటుతరువాత వెన్నులో ముదురు గింజలను తనంతటతానే పుట్టించును . పరిశుద్దమైన జీవితమును మనము జీవించినపుడు ఆ పరిశుద్ధమైన జీవితమే మనకు ఇవ్వబడిన వాక్యము ఫలింపచేస్తుంది.

నీవు భూమిని దర్శించి దాని తడుపుచున్నావు దానికి మహదైశ్వర్యము కలుగజేయుచున్నావు దేవుని నది నీళ్లతో నిండియున్నది నీవు భూమిని అట్లు సిద్ధపరచిన తరువాతవారి ధాన్యము దయచేయుచున్నావు. దాని దుక్కులను విస్తారమైన నీళ్లతో తడిపి దాని గనిమలను చదును చేయుచున్నావు. వాన జల్లులచేత దానిని పదునుచేయుచున్నావు అది మొలకెత్తగా నీవు దాని నాశీర్వదించుచున్నావు. -కీర్తనలు 65:9-10

మనము పరిశుద్ధమైన జీవితమును దేవుడు ఎలా సిద్ధపరుస్తున్నాడు అని ఈ వాక్యము మనకు తెలియచేస్తుంది. మొదట దర్శించి మనము ఎలా ఉండాలో, ఎలా ఉండకూడదో అనే ఆలోచనల చేత మనలను దర్శించి మహదైశ్వర్యము కలుగుచేయుచున్నావు. అటువంటి జీవితములో పడిన దేవుని వాక్యమనే విత్తనము ఖచ్చితముగా ఫలిస్తుంది. ఈ ఆశీర్వాదము మొదట మొలక ఆ తరువాత కొంతకాలమునకు వెన్ను కూడా కనపడుతుంది. మనము స్వీకరించిన వాక్యము ఖచ్చితముగా ఫలిస్తుంది. అయితే నీవు మాత్రము త్రోవలో నిలిచి ఉండాలి అంటే పరిశుద్దముగా జీవించాలి.

వర్షమును హిమమును ఆకాశమునుండి వచ్చి అక్కడికి ఏలాగు మరలక భూమిని తడిపి విత్తువానికి విత్తనమును భుజించువానికి ఆహారమును కలుగుటకై అది చిగిర్చి వర్ధిల్లునట్లు చేయునో ఆలాగే నా నోటనుండి వచ్చువచనమును ఉండును -యెషయా 55:10

దేవుని మాట ఎలా ఉంది అంటే, విత్తువానికి విత్తనము దయచేయబడుతుంది. ఆ వాక్యము విత్తబడిన తరువాత. భుజించువానికి ఆహారము కలుగుటకై అది చిగిర్చి ఫలించును. గనుక మనము పరిశుద్ధమైన జీవితమును కలిగి ఉండుట ఎంతో ఆవశ్యకము. కొంచెముగా విత్తువాడు, కొంచెముగానే పంట కోయును, విస్తారముగా విత్తువాడు విస్తారముగా పంట కోయును.

యెహోవా ధర్మశాస్త్రమునందు ఆనందించుచు దివారాత్రము దానిని ధ్యానించువాడు ధన్యుడు. అతడు నీటికాలువల యోరను నాటబడినదై ఆకు వాడక తన కాలమందు ఫలమిచ్చు చెట్టువలెనుండును అతడు చేయునదంతయు సఫలమగును. -కీర్తనలు 1:2-3

ఆకు వాడక తన కాలమందు ఫలమిచ్చు చెట్టువలెనుండును అనే స్థితి దేనిని బట్టి కలుగుతుంది అంటే, దేవుని మాటను బట్టి ఆనందించుచుండగా, ఆ మాట పరిశుద్ధమైన జీవితములో విత్తబడి, తన కాలమందు అనగా, ఈ జీవితములో వేర్వేరు సమయములో అవసరమైన ఫలము మన జీవితములో అనుభవించులాగున ఉంటుంది. అయితే మనము ఒకటే పరీక్షించుకోవాలి, పరిశుద్ధమైన జీవితమును జీవిస్తున్నామా లేదా అనేదే!