09-06-2024 – ఆదివారం మొదటి ఆరాధన – నీ దు:ఖము సంతోషమగును

వారము కొరకైన వాక్యము

మన జీవితములో సీజన్స్ ఉంటాయి. దుఃఖ సమయము ఒక సీజన్ అయితే, సంతోషించే సీజన్ కూడా మనకోసము ఉంది. మన కష్ట సమయములో, నష్టసమయములో మనలను పడిపోకుండా, ఆయనను విడిచిపెట్టకుండా నిలబడ్డాము అంటే, అది దేవుని కృపయే.

మన కష్ట సమయములో మనకు తోడుగా ఉంటూ, ఆయన మంచిని అనుభవించి సంతోషించునట్టు, మంచి సమయములోనికి మనలను దేవుని కృప తీసుకువెళ్ళింది. ఈరోజు నీ దుఃఖము సంతోషముగా మారును అనే విషయము గూర్చి తెలుసుకుందాము.

మన జీసస్ కేర్స్ యూ మినిస్ట్రీస్ కి ఒక ప్రత్యేకమైన బాధ్యత ప్రభువు ఇచ్చాడు. అది జయకరమైన జీవితము. అనగా మన జీవితములోని అన్ని విషయములలో మనము జయకరముగా, ప్రభువుకు సాక్షిగా నిలబడే స్థితి. దీనికొరకే ప్రభువు మనతో ఈ మినిస్ట్రీ ద్వారా మాట్లాడతాడు.

దుఃఖముగా ఉన్న పరిస్థితి సంతోషముగా ఎలా మారుతుంది? అని తెలుసుకోవడానికి ఒక వాక్యము చూద్దాము.

నా ప్రాణమా, నీవు ఏల క్రుంగియున్నావు? నాలో నీవేల తొందరపడుచున్నావు? దేవునియందు నిరీక్షణ యుంచుము. ఆయనే నా రక్షణకర్త అనియు నా దేవుడనియు చెప్పుకొనుచు ఇంకను నేను ఆయనను స్తుతించెదను. -కీర్తనలు 42:5

లోకములో చూస్తే, మనకు ఏమైనా కష్టము వచ్చినపుడు, నష్టము వచ్చినపుడు పక్కవారితో చెప్పుకున్నపుడు బాధ తగ్గుతుంది అని చెప్తారు. అయితే, ఇక్కడ కీర్తనాకారుడు తనకు తానుగా సిద్ధపరచుకుంటున్నాడు.

మన దుఃఖము సంతోషముగా మార్చబడాలి అంటే, మొదటిగా మనలను మనమే సిద్ధపరచుకోవాలి. కీర్తనాకారుడు ఎలా సిద్ధపరచుకుంటున్నాడు? “నా దేవుడే నా రక్షణకర్త” అని సిద్ధపరచుకుంటున్నాడు. ప్రభువు ఇచ్చే సంతోషమును అనుభవించాలి అంటే, ఈ సిద్ధపాటు ఎంతో ప్రాముఖ్యము. ఈరోజు ఎటువంటి పరిస్థితి అయినా సరే, మొదటిగా నీ హృదయమును సిద్ధపరచుకో, “నా ప్రాణమునకు నా దేవుడే రక్షణకర్త” అని సిద్ధపరచుకోవాలి.

రక్షణకర్త అనే ఏమిటి? కర్త అంటే సృషించేవాడు, అనగా నా ప్రాణము దేనిని బట్టి రక్షించబడాలో, దానిని సృష్టించగలవాడు మన దేవుడు. ఒకవేళ నీ ప్రాణము నశించిపోయే స్థితిలో ఉన్నాసరే, నీవు నీ దేవుని గూర్చి నీవిచ్చే డిక్లరేషన్ నిన్ను నిలబెడుతుంది. నీవు డిక్లేర్ చేస్తున్నావు అంటే, నీవు నీ దేవునిని గూర్చి ఒప్పుకుంటున్నావు అని అర్థము. నీవు కృంగిపోయినపుడు మనుష్యుల ఓదార్పు మాటలవరకే, దేవుని ఓదార్పు క్రియలతో కూడినదై ఉంటుంది.

హాగరు దుఃఖములో ఉంది ఎందుకంటే, తన కుమారుడు నీళ్ళు లేక చనిపోయే పరిస్థితిలో ఉంది. అయితే అబ్రహామును బట్టి, అక్కడ నీటి ఊటలు సృష్టించబడ్డాయి. అలాగే మనము కూడా దుఃఖములో ఉన్నపుడు నూతన సృష్టి చేయబడుతుంది. దీనికొరకు మనలను మనము సిద్ధపరచుకోవాలి.

ప్రభువును వెంబడించడములో మన మొదటి ప్రేమ ఎక్కడ వుంది? గతవారమునుండి, ఈ వారమువరకు మన జీవితము ఎలా ఉంది? ప్రభువును అంగీకరించినపుడు ఉన్న ఉజ్జీవము మరలా కలిగి ఉండుటకు సిద్ధపరచుకున్నావా?

మొదటిగా ప్రభువు అంగీకరించినపుడు నీవు దేవునితో చేసుకున్న తీర్మానమును నెరవేర్చుటకు, నీవు ఇప్పుడు మరలా సిద్ధపడతావా? ఈరోజు దేవుడు నీకు ఇచ్చిన మరొక అవకాశమును స్వీకరిస్తావా?

దేవునిని వెంబడించడానికి ఏది అడ్డంకి ఉన్నా సరే, దానిని విడిచిపెడతావా? దేవునిని వెంబడించాలి అనే ఆశ మనకు కలగాలి, ఆయనను మహిమపరచాలి అనే కోరిక మనము కలిగి ఉండాలి. నిన్ను నీవు సిద్ధపరచుకున్నపుడే నీవు దేవునిని వెంబడించగలుగుతావు.

ఆమె యేసునుగూర్చి విని–నేను ఆయన వస్త్రములు మాత్రము ముట్టిన బాగుపడుదుననుకొని, జనసమూహములో ఆయన వెనుకకు వచ్చి ఆయన వస్త్రము ముట్టెను. -మార్కు 5:27

ఈ స్త్రీ యేసునుగూర్చి విని, తన పరిస్థితిని బట్టి తనను తాను సిద్ధపరచుకుంటుంది. అంతకుముందు అనేకమైన వైద్యులవద్దకు వెళ్ళింది. మనము కూడా మన జీవితమును బాగుచేసుకోవడానికి అనేకమైన ప్రయత్నములు మనము చేసుకుంటాము. అయితే ఆ స్త్రీ, యేసయ్య గురించి విని, విశ్వాసముతో సిద్ధపరచుకుంది. ఇప్పుడు మన జీవితములో కూడా, ప్రభువు చెప్పిన మాటల మీద విశ్వాసము కలిగి మనము సిద్ధపరచుకోవాలి.

దేవుడు మీ జీవితముల గురించి మాట్లాడాడు అని మీరు నమ్ముతున్నారా? అయితే దేవుని మాట తన కార్యము ముగించకుండా తిరిగి వెళ్ళదు. అయితే అనేకమైన మాటలు ఎందుకు నెరవేరకుండా ఆగిపోయాయి. పైన చూసిన స్త్రీ, యేసును గూర్చి విన్న మాటల పై విశ్వాసము కనపరచడానికి తనను తాను సిద్ధపరచుకుంది. నీవు సిద్ధపరచుకుని, నిశ్చయించుకున్న దాని ప్రకారము నీకు జరుగుతుంది.

అబ్రహాము కూడా తన కుమారుని అర్పించమని చెప్పినపుడు, తనను తాను సిద్ధపరచుకున్నాడు అందుకే, మేము తిరిగి వస్తాము అని చెప్పగలిగాడు.

అయితే బుద్ధి వచ్చినప్పుడు వాడు–నా తండ్రియొద్ద ఎంతోమంది కూలివాండ్రకు అన్నము సమృద్ధిగా ఉన్నది, నేనైతే ఇక్కడ ఆకలికి చచ్చిపోవు చున్నాను. నేను లేచి నా తండ్రియొద్దకు వెళ్లి–తండ్రీ, నేను పరలోకమునకు విరోధముగాను నీ యెదుటను పాపము చేసితిని; ఇకమీదట నీ కుమారుడనని అని పించుకొనుటకు యోగ్యుడను కాను; నన్ను నీ కూలి వారిలో ఒకనిగా పెట్టుకొనుమని అతనితో చెప్పుదుననుకొని, లేచి తండ్రియొద్దకు వచ్చెను. -లూకా 15:17-19

ఇక్కడ ఉన్నతమైన స్థానములో ఉన్నవాడైన చిన్న కుమారుడు, తన జీవితమంతా పోగొట్టుకున్నాడు. అయినప్పటికీ, తన తండ్రి ఇంట కూలివానికి కలిగిన జీవితమును గూర్చి తాను ఎరిగిన సత్యమును బట్టి, తనను తాను సిద్ధపరచుకున్నదానిని బట్టి, శూన్యమైన పరిస్థితిలోనుండి తాను మార్చబడ్డాడు. కూలివానిగా ఉండటానికి సిద్ధపడి వెళితే, కుమారుడిగా స్వీకరించబడ్డాడు.

నిన్ను నీవు సిద్ధపరచుకుని దేవుని సన్నిధికి వెళ్ళాలి అనుకున్నపుడు, నీవు ఊహించినదానికంటే ఎక్కువగా దేవుడు చేసేవాడిగా ఉన్నాడు. తప్పిపోయిన కుమారుడు తండ్రి దగ్గరకు రాక ముందు, వాడు తినడానికి ఏమీ లేని స్థితిలో ఉన్నాడు. అయితే ఎప్పుడైతే, తండ్రి దగ్గరకు వచ్చాడో, అప్పుడు తనను బట్టి అనేకులకు విందు భోజనము సిద్ధపరచబడింది.

తప్పిపోయిన కుమారుడు పందులను కాసే కూలివాడివలే జీవించాడు, ఎప్పుడైతే సిద్ధపరచుకుని తండ్రి వద్దకు వెళ్ళాడో, అప్పుడు తనను బట్టి, అనేకమైన కూలివాళ్ళు విందులో పాలు కలిగి సంతోషించారు.

నీవు కూడా, నిన్ను బట్టి అనేకులు జీవించునట్లు, సాక్షిగా ఉండునట్లు సిద్ధపరచుకుంటావా?

తప్పిపోయిన కుమారుడు తండ్రి వద్దనుండి బయటకు వచ్చి, సమస్తము పోగొట్టుకొని, ఒక పందుల యజమానుడి వద్ద చేరిన తరువాత, ఆ పందుల యజమానుడు అతని జీవితము బాగాచేయలేకపోయాడు. అయితే ఎపుడైతే తన తండ్రి వద్ద అనేకులు జీవము కలిగి ఉన్నారు అనే సంగతి ఎరిగి తిరిగి వచ్చాడో, అతని జీవితము మారిపోయింది.

నీ క్షేమము నీ తండ్రి యొద్దనే! నీ దుఃఖము సంతోషముగా మరునట్లు నీవు సిద్ధపరచుకో!