05-05-2024 – ఆదివారం మొదటి ఆరాధన

వారము కొరకైన వాక్యము

మన అందరికీ ఆయన వాక్యమును వినే అవకాశము ఇచ్చాడు. గత వారము తండ్రితో, కుమారునితోను ఎలా సహవాసము కలిగి ఉండాలో నేర్పించాడు. ప్రభువు నేర్పినదాని ప్రకారము నడవడానికి సిద్ధపడినప్పుడు మాత్రమే ఆ నేర్చుకున్నదాని యొక్క ఫలము కనబడుతుంది.

దానికొరకు ఉజ్జీవము మనము కలిగి ఉండాలి. ఉజ్జీవము, ఆసక్తి లేని యెడల ప్రభువు నేర్పినదాని ప్రకారము మనము జీవించలేము. అసలు ఒక సత్యము మనము గ్రహించాలి. ప్రభువు ఏ సత్యము అయితే నీ వద్దకు తీసుకువస్తున్నాడు అంటే, ఆ సత్యమును బట్టి నీ జీవితము మార్చబడాలి, మహిమపరచబడాలి అనేది ఆయన కోరిక.

దేవుడు మనలను ఆయన కొరకైన సాక్షిగా నిలబెట్టడానికే ఏర్పరుచుకున్నాడు. అసాధ్యమైనది సాధ్యమగునట్లుగా మన జీవితములో కార్యములు జరిగించి, వీరి దేవుడు సమర్థుడు అనే సాక్ష్యము ప్రకటించబడాలి అనేది ఆయన కోరిక. మన జీవితమును కట్టువాడు ఆయనే.

దావీదు గొర్రెలు కాసుకోనేవాడు అయితే సింహాసనముపై కూర్చున్నాడు. ఆ సింహాసనము కొరకు దావీదు ఏ ప్రయత్నమూ చేయలేదు గానీ, ప్రభువే తన కార్యము జరిగించాడు.

అలాగే నీయెడల కూడా ప్రభువు తన ఉద్దేశ్యము కలిగి ఉన్నాడు. ఆయన ఏ ఉద్దేశ్యము అయితే కలిగి ఉన్నాడో, దాని కొరకు నీవు చేయవలసినది, ఆయన యందు కనిపెట్టడమే.

శరీర సంబంధమైన సాధకము కొంచెముమట్టుకే ప్రయోజనకరమవును గాని దైవభక్తి యిప్పటి జీవము విషయములోను రాబోవు జీవము విషయములోను వాగ్దానముతోకూడినదైనందున అది అన్ని విషయములలో ప్రయోజనకరమవును.౹ -1 తిమోతికి 4:8

మన జ్ఞానము ప్రకారము మనము చేసినపుడు కొంతవరకే దాని ప్రయోజనము. అయితే దేవుని మాటను బట్టి, ఆయన రివలేషన్ బట్టి నీవు వెళ్ళినపుడు, ఇప్పటి జీవము కొరకు, రాబోయే జీవము కొరకు ప్రయోజనకరముగా ఉంటుంది.

దైవము అనగా తండ్రి, కుమార పరిశుద్ధాత్మ అయి ఉన్నారు. దైవభక్తి అంటే తండ్రి, కుమార, పరిశుద్ధాత్మల యెడల భక్తి కనపరచాలి అనేది మనము నేర్చుకున్నాము.

ఈరోజు పరిశుద్ధాత్ముడి తో ఎలా సహవాసము చేయాలో నేర్చుకుందాము.

పరిశుద్ధాత్ముడు ఒక శక్తిగా చూస్తుంటాము గానీ ఒక వ్యక్తిగా చూడలేకపోతుంటాము. అయితే ఆయన ఒక వ్యక్తి అయి ఉన్నాడు.

నేను తండ్రిని వేడుకొందును, మీయొద్ద ఎల్లప్పుడు నుండుటకై ఆయన వేరొక ఆదరణకర్తను, అనగా సత్యస్వరూపియగు ఆత్మ ను మీకనుగ్రహించును.౹ లోకము ఆయనను చూడదు, ఆయనను ఎరుగదు గనుక ఆయనను పొంద నేరదు; మీరు ఆయనను ఎరుగుదురు. ఆయన మీతోకూడ నివసించును, మీలో ఉండును.౹ -యోహాను 14:16-17

మనము బాప్తీస్మము తీసుకున్నపుడు ఒక నూతనమైన జీవితము అనుగ్రహించబడుతుంది. ఆ జీవితములో పరిశుద్ధాత్ముడు నివాసము చేసేవాడుగా ఉంటున్నాడు. అందుకే నీ దేహము పరిశుద్ధాత్మకు ఆలయము అయి ఉన్నది.

లోకము ఆయనను చూడదు గనుక ఆయనను ఎరుగదు, గనుక ఆయనను పొందలేదు. అయితే మీరు ఆయనను ఎరుగుదురు. ఆయన మీలో ఉంటాడు. దానిని బట్టి సూపర్నేచురల్ కార్యములు మీ జీవితములో జరుగుతాయి.

వీరందరును, వీరితోకూడ కొందరు స్త్రీలును, యేసు తల్లియైన మరియయు ఆయన సహోదరులును ఏకమనస్సుతో ఎడతెగక ప్రార్థన చేయుచుండిరి. -అపొస్తలుల కార్యములు 1:14
పెంతెకొస్తను పండుగదినము వచ్చినప్పుడు అందరు ఒకచోట కూడియుండిరి.౹ అప్పుడు వేగముగా వీచు బలమైన గాలివంటి యొకధ్వని ఆకాశమునుండి అకస్మాత్తుగా, వారు కూర్చుండియున్న యిల్లంతయు నిండెను.౹ మరియు అగ్నిజ్వాలలవంటి నాలుకలు విభాగింపబడి నట్టుగా వారికి కనబడి, వారిలో ఒక్కొక్కని మీద వ్రాలగ౹ అందరు పరిశుద్ధాత్మతో నిండినవారై ఆ ఆత్మ వారికి వాక్‌శక్తి అనుగ్రహించినకొలది అన్యభాషలతో మాటలాడసాగిరి. -అపొస్తలుల కార్యములు 2:1-4

ఇక్కడ ఉన్న శిష్యులు దేనికొరకు ఎడతెగక ప్రార్థిస్తున్నారు అంటే, “నావలన వినిన తండ్రియొక్క వాగ్దానముకొరకు కనిపెట్టుడి” అని యేసయ్య వారితో చెప్పాడు.

అలా వారు ప్రార్థనలో ఉన్నప్పుడు మొదట ఒక ధ్వని తో వారున్న ఇల్లంతా వినబడింది. అగ్నిజ్వాలల వంటి నాలుకలు విభాగించబడినట్టుగా కనబడింది.

దానిని బట్టి, “అందరు పరిశుద్ధాత్మతో నిండినవారై ఆ ఆత్మ వారికి వాక్‌శక్తి అనుగ్రహించినకొలది అన్యభాషలతో మాటలాడసాగిరి”.

దీనంతటనీ గమనిస్తే, పరిశుద్ధాత్ముడు నూతనముగా సృష్టించగల సమర్థుడై ఉన్నాడు. యేసయ్య జననము చూస్తే, అంతవాకు ఎప్పుడూ, అటువంటి విధానములో జననము కలుగలేదు కానీ, పరిశుద్దాత్ముడి శక్తిని బట్టి కన్యక గర్భవతియై కుమారుని కన్నది.

“మీరు ఆయనను ఎరుగుదురు” అనే సత్యమును మనము గ్రహించాలి. అంటే, మీరు పరిశుద్ధాత్మ కొరకు కనిపెట్టినపుడు, ఖచ్చితముగా నీవు ఎరుగులాగున నీకు తెలియచేయబడుతుంది. గనుకనే మనము పరిశుద్ధాత్మ విషయములో, ప్రార్థించినపుడు పట్టుదల ఏక మనసు కలిగి ఉండాలి.

ఇలా అనుదినము ప్రార్థనలో పరిశుద్ధాత్మతో సహవాసము కలిగిఉన్నప్పుడు, ఎలా మనతో ఆయన మాట్లాడుతున్నాడో మనకు ఒక గుర్తు స్పష్టముగా తెలుస్తుంది.

గనుక మొదట మనము తండ్రిని స్తుతించాలి, వాక్యమును ధ్యానించాలి, అప్పుడు మనము స్తుతిలో ఒప్పుకున్నది, వాక్యములో గ్రహించినది ప్రత్యక్షపరచబడునట్లు పరిశుద్ధత్మదేవుడు పనిచేసేవాడుగా ఉంటాడు.

అయితే ఆయన, అనగా సత్యస్వరూపియైన ఆత్మ వచ్చినప్పుడు మిమ్మును సర్వసత్యములోనికి నడిపించును; ఆయన తనంతట తానే యేమియు బోధింపక, వేటిని వినునో వాటిని బోధించి సంభవింపబోవు సంగతులను మీకు తెలియజేయును.౹ -యోహాను 16:13

సర్వసత్యములోనికి నడిపించడానికే పరిశుద్ధాత్మ దేవుడు బోధించేవాడుగా ఉంటున్నాడు. అలాగే ఎల్లప్పుడు మనలో, మనతో ఉంటాడు.

సహవాసము అనేది ఎల్లప్పుడు ఆయనతో మనము చెయ్యగలుగుతాము. మామూలుగా ఉన్న సమయములో కూడా ఆయనతో సహవాసము చేయగలుగుతాము. మనలో చెడ్డ ఆలోచన పుట్టినపుడు మనతో పరిశుద్ధాత్ముడు ఉన్నాడు అని గుర్తించినపుడు, ఆ చెడ్డ ఆలోచనను మనము వెంటనే విడిచిపెడతాము.

పరిశుద్ధాత్ముడితో సహవాసము అంటే, ఆయనతో మనము ఏకమైపోవడమే. అలా ఉన్నప్పుడు నీ మాట ఏదో, అదే పరిశుద్ధాత్మ మాట అయి ఉంటుంది. అలాగే ఆయన మాట ఏమి అయి ఉంటుందో, అదే నీ మాట అయి ఉంటుంది.

నేను క్రీస్తుతోకూడ సిలువ వేయబడియున్నాను; ఇకను జీవించువాడను నేను కాను, క్రీస్తే నాయందు జీవించుచున్నాడు. నే నిప్పుడు శరీరమందు జీవించుచున్న జీవితము నన్ను ప్రేమించి, నా కొరకు తన్నుతాను అప్పగించుకొనిన దేవుని కుమారుని యందలి విశ్వాసమువలన జీవించుచున్నాను.౹ -గలతీయులకు 2:20

అంటే, నా జీవితము వాక్యము ఏమి చెప్తుందో ఆ ప్రకారమే ఉంటుంది. నా ఆలోచన, జ్ఞానము ఇంక ఉండదు.

పరిశుద్ధాత్ముడు మనలో ఉండి ఆ వాక్యమునే జ్ఞాపకము చేస్తాడు. మనము తప్పుగా చేస్తున్నపుడు, ఇది సరైనది కాదు అనే హెచ్చరిక ఇచ్చేవాడుగా ఉన్నాడు. ఆ మాటకు లోబడితే, నీ జీవితము జీవముతో ఉంటుంది. అలా కాని యెడల, ఆయన దుఃఖించేవాడిగా ఉంటాడు.

పరిశుద్ధాత్మ దేవునితో సహవాసము అంటే, మన జీవితము కొనసాగించబడుతున్నపుడు ఆయన అవును అంటే చేస్తూ, కాదు అంటే వదిలిపెడుతూ గనుక ప్రతీ కార్యమును జరిగించినపుడు, నిజమైన సహవాసము చెయ్యగలుగుతాము.

శరీరానుసారులు శరీరవిషయములమీద మనస్సునుంతురు; ఆత్మానుసారులు ఆత్మవిషయములమీద మనస్సునుంతురు; శరీరానుసారమైన మనస్సు మరణము;౹ -రోమా 8:5

పరిశుద్ధాత్మదేవునితో సహవాసం చేయాలి అంటే, ఆత్మ విషయములమీద మనసు ఉంచాలి. ఆత్మ సంబంధమైన విషయములు అంటే ఏమిటి? దేవునికి సంబంధించినవి.

ఉపవాసము ఆత్మీయమైనది ఎందుకంటే, శరీరము కృశించిననూ, ఆత్మ వృద్ధిచేయబడుతుంది.

ఒకరిగురించి మాట్లాడుకోవడము కాక, వారి నిమిత్తము ప్రార్థన చేయడము అనేది ఆత్మానుసారమైంది.

ఇలా ప్రతి విషయములో శరీరమునకు సంబంధించిన దాని ప్రకారము కాకుండా పరిశుద్ధాత్మ బోధించిన ప్రకారము మనముచేయగలగాలి. ఇచ్చేవిషయములో, చూసే విషయములో, చేసే విషయములో అన్ని విషయములలో ఆత్మ సంబంధమైన జీవితమును కనపరచాలి.

మనము ఇతరుల గురించి ప్రార్థించినపుడు, యేసయ్యకు పరిచారము చేసినట్టే అని యేసయ్య చెప్పాడు. ఈ మాటకు సాక్ష్యమివ్వడానికే పరిశుద్ధాత్ముడు ఉన్నాడు. గనుకనే ఆత్మ యందు తీవ్రత కలిగి ఉండమని ప్రభువు చెప్పుచున్నాడు

ఆసక్తి విషయములో మాంద్యులు కాక, ఆత్మయందు తీవ్రతగలవారై ప్రభువును సేవించుడి.౹ -రోమా 12:11