28-04-2024 – ఆదివారం రెండవ ఆరాధన – ఆత్మబలము కలిగివుండడానికి

వారము కొరకైన వాక్యము

యేసయ్య భూలోకములో ఉన్నప్పుడు చాలామంది వెంబడించారు. వారిలో అనేకులు ఇహలోకములో భోజనము గురించి వెంబడించారు. అయితే మనము పలలోక సంబంధమైన భోజనము గురించి వెంబడించేవారిగా ఉందాము.

అక్కడ సందర్భములో ఇహలోక భోజనము కొరకు వచ్చినవారు ఆయన మాటలకు నొచ్చుకొని వెళ్ళిపోయారు. ప్రభువు శిష్యులను అడిగినపుడు పేతురు ఎక్కడికి వెళతాము దేవా అని చెప్పగలిగాడు అంటే, వారు పరలోక సంబంధమైన ఆహారము కొరకే వెంబడించారు.

అప్పుడు యేసు, ఆత్మ బలముతో గలిలయకు తిరిగి వెళ్లెను; ఆయననుగూర్చిన సమాచారము ఆ ప్రదేశమందంతట వ్యాపించెను. -లూకా 4:14

యేసయ్య జీవితము మన జీవితమునకు ఒక మాదిరిగా ఉంది. ఆయన ఎలా అయితే ప్రవర్తించాడో, మనము కూడా అదే విధానములో ప్రవర్తించులాగున మాదిరిగా ఇవ్వబడింది. యేసయ్య ఎలా ఉన్నాడు అని చూస్తే, ఆత్మ బలముతో జీవించినవాడుగా ఉన్నాడు.

పై వాక్యములో చూస్తే, “అప్పుడు” యేసు ఆత్మబలముతో తిరిగి వెళ్ళెను అని వ్రాయబడింది. ఎప్పుడు అని ధ్యానిస్తే –

యేసు బాప్తిస్మము పొందిన వెంటనే నీళ్లలోనుండి ఒడ్డునకు వచ్చెను; ఇదిగో ఆకాశము తెరవబడెను, దేవుని ఆత్మ పావురమువలె దిగి తనమీదికి వచ్చుట చూచెను. -మత్తయి 3:16

యేసయ్య బాప్తీస్మము తీసుకున్నపుడు యేసయ్య మీదకు దేవుని ఆత్మ దిగి వచ్చింది. ఆ తరువాత అరణ్యములో శోధించబడ్డాడు,
ఆ సమయములో ఆత్మలో కొనసాగాడు. ఆ శోధన ముగించబడిన తరువాత ఆత్మలో బలము పొందుకున్నవాడుగా ఉన్నాడు.

మనము కూడా బాప్తీస్మము తీసుకున్నాము, పరిశుద్ధాత్మను పొందుకున్నాము. అయితే యేసయ్య వలే ఆత్మ బలమును మాత్రము కలిగి ఉండలేకపోవడానికి కారణము ఏమిటి? యేసయ్యను చూస్తే, అపవాది వలన ఎదురైన ప్రతీ సందర్భమును ఆయన ఎదుర్కొన్నారు.

బాప్తీస్మము తీసుకున్నపుడు నూతన ఆరంభము కలిగింది. ఆరంభములోనే అపవాది యేసయ్యను శోధించడము మొదలుపెట్టాడు. అయితే ఆరంభములోనే యేసయ్య అపవాదిని ఓడించడముకూడా మొదలుపెట్టాడు. యేసయ్య భూలోకములో ఉన్నంతకాలము అపవాదిని ఓడిస్తూనే ఉన్నాడు.

నలువది దినములు నలువదిరాత్రులు ఉపవాసముండిన పిమ్మట ఆయన ఆకలి గొనగా ఆ శోధకుడు ఆయనయొద్దకు వచ్చి నీవు దేవుని కుమారుడవైతే ఈ రాళ్లు రొట్టెలగునట్లు ఆజ్ఞాపించు మనెను -మత్తయి 4:2-3

బాప్తీస్మము తరువాత 40 రోజుల ఉపవాసము తరువాత యేసయ్యకు ఆకలి కలిగింది. ఆ ఆకలితో ఉన్నప్పుడు అపవాది యేసయ్యను రాళ్ళను రొట్టెలుగా మర్చుకొమ్మని చెప్పి శోధిస్తున్నాడు. నిజానికి ఆకలి తీర్చడానికి రొట్టె ఒక ఆధారము. ఆ రొట్టె ద్వారా ఆకలి తీర్చబడి బలము పుంజ్కుని, జీవము కలుగుతుంది.

అయితే ఈ సందర్భములో యేసయ్య చెప్పుచున్న మాటలు చూస్తే –

అందుకాయన –మనుష్యుడు రొట్టెవలన మాత్రము కాదుగాని దేవుని నోటనుండి వచ్చు ప్రతిమాటవలనను జీవించును అని వ్రాయబడియున్నదనెను. -మత్తయి 4:4

యేసయ్య మనుష్యకుమారుడుగా ఉంటున్నాడు అయినప్పటికీ, మనుష్యులవలే ఆలోచించడంలేదు. మనుష్యుల ఆలోచనలను బట్టి చూస్తే, ఆకలి తీర్చబడటానికి రొట్టే అవసరము గనుక దానికొరకే ఆలోచన కలిగినవారుగా ఉంటారు. అయితే యేసయ్య మాత్రము అలా ఆలోచించటం లేదు.

అంటే మనము కలిగి ఉన్న అవసరము తీర్చబడటానికి అనేకమైన సొల్యూషన్స్ ఉంటాయి, అయితే దేవుని ప్రేమించే మనకు మాత్రము, దేవుని ద్వారా దయచేయబడే సొల్యూషన్ మాత్రమే గురి అయి ఉండాలి.

మన పౌరస్థితి పర లోకమునందున్నది; అక్కడనుండి ప్రభువైన యేసుక్రీస్తు అను రక్షకుని నిమిత్తము కనిపెట్టుకొనియున్నాము.౹ -ఫిలిప్పీయులకు 3:20

మనము భారతీయులము గనుక, భారత ప్రభుత్వము మనలను పరిపాలిస్తుంది. అయితే యేసయ్య తన పౌరసత్వము పరలోకమందున్నది అని గ్రహించాడు గనుక, దేవుని మాట కొరకు, చిత్తము కొరకు మాత్రమే చూసినవాడుగా ఉన్నాడు.

ఇక్కడ ఉన్న సందర్భములో ఆకలి గురించి వ్రాయబడింది. దీనిని ఏ అవసరములో ఉన్న పరిస్థితికి అయినా వర్తింపచేయవచ్చు. అందుకే మనము కలిగి ఉన్న అవసరములో దేవుని మాట వలన దొరికే సొల్యూషన్ మాత్రమే ఎంతో విలువైనది.

ఆ లోగా శిష్యులు–బోధకుడా, భోజనము చేయుమని ఆయనను వేడుకొనిరి.౹ అందుకాయన–భుజించుటకు మీకు తెలియని ఆహారము నాకు ఉన్నదని వారితో చెప్పగా౹ శిష్యులు–ఆయన భుజించుటకు ఎవడైన నేమైనను తెచ్చెనేమో అని యొకనితో ఒకడు చెప్పు కొనిరి.౹ యేసు వారిని చూచి–నన్ను పంపినవాని చిత్తము నెరవేర్చుటయు, ఆయన పని తుదముట్టించుటయు నాకు ఆహారమై యున్నది.౹ -యోహాను 4:31-34

మనము ఆత్మలో బలము పొందుకోవాలి అంటే యేసయ్య ఎలా ఉన్నాడో, మనము కూడా అలాగే ఉండాలి. దేని కొరకు ఈ భూలోకములోనికి వచ్చాడో, దానిని గూర్చి మాత్రము మర్చిపోయినవాడు కాదు.

మన జీవితము కూడా ప్రభువు చేత, ప్రభువు కొరకు సృష్టించబడింది. ఈ లోకములో ఉన్న దానితో మనము తృప్తిపరచబడము గానీ, ప్రభువు మాటలు, కార్యములను బట్టే తృప్తి చెందుతాము.

యేసయ్య లోకములో ఉన్నప్పుడు మిగతా మనుష్యులవలెనే ఉంటాడు అని అపవాది అనుకున్నాడు. అయితే యేసయ్య దేవుని సంగతులను మాత్రమే ఆలోచించేవాడుగా ఉన్నాడు. మనము కూడా ఆత్మలో బలము కలిగి ఉండాలి అంటే, మనము ఆత్మ సంబంధులుగానే జీవించాలి. అలా ఉండాలి అంటే, దేని కొరకు ఈ భూమి మీదకు వచ్చామో మనము గ్రహించాలి.

మన ఆలోచన దేవుని సంగతులే అయి ఉడాలి. ఉదాహరణకు మనము ధనము అవసరము ఉంది అనుకోండి. అప్పుడు అపవాది మోసపూరితమైన ఆలోచనలతో ప్రేరేపించి పడగొట్టడానికి ప్రయత్నిస్తాడు. అయితే అప్పుడు అలా పడిపోక, దేవుని సంగతుల గురించి ఆలోచించేవాళ్ళం అయితే, నా అక్కరకు రాకమునుపే ఆయనకు ముందే తెలుసు గనుక, నా అవసరము తీర్చబడుటకు సిద్ధపరచాడు అని నమ్మి, నిలిచే వారముగా ఉంటాము.

సత్యము ఎరిగి సత్యములో నిలబడితే, మనము ఖచ్చితముగా మనకు విజయమే!

మనము చాల జాగ్రత్తగా గుర్తుపెట్టుకోవలసిన సత్యము – “మనకు ఎక్కడ అవసరమో, అక్కడ అపవాది ఖచ్చితముగా ప్రేరేపిస్తాడు. అయితే మనము మాత్రము దేవుని మాటలోని సత్యమును గ్రహించి, నిలబడాలి”.

అంతట అపవాది పరిశుద్ధ పట్టణమునకు ఆయనను తీసికొనిపోయి, దేవాలయ శిఖరమున ఆయనను నిలువబెట్టి –నీవు దేవుని కుమారుడ వైతే క్రిందికి దుముకుము – ఆయన నిన్నుగూర్చి తన దూతల కాజ్ఞాపించును, నీ పాదమెప్పుడైనను రాతికి తగులకుండ వారు నిన్ను చేతులతో ఎత్తికొందురు అని వ్రాయబడియున్నదని ఆయనతో చెప్పెను. అందుకు యేసు – ప్రభు వైన నీ దేవుని నీవు శోధింపవలదని మరియొక చోట వ్రాయబడియున్నదని వానితో చెప్పెను. -మత్తయి 4:5-7

ఇక్కడ చూస్తే, అపవాది వాక్యమునే చూపించి యేసయ్యతో మాట్లాడుతున్నాడు. అయితే యేసయ్య సమాధానము చూస్తే – “ప్రభువైన నీ దేవుని నీవు శోధింపవలదని” వ్రాయబడింది అని చెప్పాడు.

అనగా అపవాది వాక్యమును సరైన విధానములో కాక మనకు నచ్చిన రీతిలో తీసుకోవడము కొరకు ప్రేరేపిస్తాడు. అయితే దేవుని ప్రేమించేవారిగా మనము వాక్యములోని సరైన సత్యమును ఆధారము చేసుకొని నిలబడాలి.

అపవాది చెప్పిన అదే మాటలు గ్రంథమునుండి చూస్తే –

నీ మార్గములన్నిటిలో నిన్ను కాపాడుటకు ఆయన నిన్నుగూర్చి తన దూతలను ఆజ్ఞాపించును నీ పాదములకు రాయి తగులకుండవారు నిన్ను తమ చేతులమీద ఎత్తి పట్టుకొందురు -కీర్తనలు 91:11-12

ఈ వాక్యములో “నీ మార్గములన్నిటిలో ” అని చెప్పుచున్నది. అయితే అపవాది కొండ శిఖరము మీదకు తీసుకువెళ్ళి “నీవు క్రిందకు దుముకు”, వాక్యము ప్రకారము నిన్ను రక్షించడానికి దేవదూతలు ఎత్తి పట్టుకుంటారు అని శోధించాడు.

అపవాది యొక్క ఉద్దేశ్యము యేసయ్య గ్రహించినవాడు గనుకనే అక్కడ గద్దించినవాడుగా ఉన్నాడు. మన జీవితములలో కూడా వాక్యమును సరైన విధానములో తీసుకోవడము అనే విషయములో జాగ్రత్త కలిగి ఉండాలి.

మరల అపవాది మిగుల ఎత్తయిన యొక కొండమీదికి ఆయనను తోడుకొనిపోయి, యీ లోక రాజ్యములన్నిటిని, వాటి మహిమను ఆయనకు చూపి –నీవు సాగిలపడి నాకు నమస్కారము చేసినయెడల వీటినన్నిటిని నీకిచ్చెదనని ఆయనతో చెప్పగా యేసు వానితో–సాతానా, పొమ్ము – ప్రభు వైన నీ దేవునికి మ్రొక్కి ఆయనను మాత్రము సేవింపవలెను అని వ్రాయబడియున్నదనెను. -మత్తయి 4:8-10

మనమందరము ఈ పరిస్థితి గుండా వెళతాము. అపవాదికి మొక్కడము అంటే, అపవాది ఆధీనములో ఉండి అపవాది ప్రేరేపించిన క్రియలు చేయడమే. అయితే యేసయ్య సమాధానము చూస్తే – “సాతానా, పొమ్ము – ప్రభు వైన నీ దేవునికి మ్రొక్కి ఆయనను మాత్రము సేవింపవలెను”. అంటే ప్రభువుకే లోబడాలి తప్ప ఇంక దేనికీ లోబడి ఉండకూడదు అని దీని అర్థము.

లోబడి ఉండటము అంటే, ఏమి చెప్తే ఆ ప్రకారము చేయడమే. మన జీవితములో ఎన్నిసార్లు ఎవరూ చూడట్లేదు అని చెప్పి, దేవునికి లోబడకుండా అపవాదికి లోబడినవారిగా ఉంటున్నాము. దేవునికి ఇష్టము లేనిది చేస్తున్నాము అంటేనే, అపవాదికి నచ్చినది చేస్తున్నాము అని అర్థము.

అపవాది మొదట నిన్ను ఆకర్షించి, దేవునికి విరోధముగా ఉండునట్లు నిన్ను ప్రేరేపిస్తాడు. అయితే, దేవునికి వ్యతిరేకమైన ఆలోచన అని గ్రహించి, ఎదిరించి నిలబడగలగాలి. అప్పుడు నీవు దేవునికే మొక్కినవాడిగా ఉండగలుగుతావు.

అపవాది ఈ లోక మహిమలు చూపిస్తాడు. అవి ఎంతో ఆకర్షణీయముగా కనబడేలా చూపిస్తాడు. అయితే నేను ప్రత్యేకమైన వాడను, ప్రత్యేకమైన దానిని అనే ఆలోచన మనము కలిగి ఆ ఆకర్షణను తిప్పికొట్టి నిలబడినప్పుడు, మనము ఆత్మలో బలము పొందుకొని నిలబడ గలుగుతాము.

దినము వెంబడి దినము ఎదురయ్యే ప్రతిదానిలో అపవాదిని ఓడిస్తూ నడిస్తే, నీవు ఆత్మలో బలము క్రమక్రమముగా పొందుకుంటావు.

యేసయ్య ఒకసారి ఆత్మలో బలము పొందుకున్న తరువాత యేసయ్య వెళ్ళిన ప్రతి చోట అపవాదిని జయించాడు. ఎంతమంది జీవితములను అపవాది కబళించాడో, ఆ ప్రతీ ఒక్కరి జీవితములలో అపవాదిని జయించాడు.

అపవాదిని ఓడించడానికే నీన్ను దేవుడు సృష్టించాడు. కృప వెంబడి కృప ఎలా అయితే కలుగుతుందో, విజయము వెంబడి విజయము కలుగుతుంది.

ఆత్మ బలము మనము పొందుకున్నప్పుడు ఏమి జరుగుతుంది అంటే –

అప్పుడు యేసు, ఆత్మ బలముతో గలిలయకు తిరిగి వెళ్లెను; ఆయననుగూర్చిన సమాచారము ఆ ప్రదేశమందంతట వ్యాపించెను. -లూకా 4:14
చీకటిలో కూర్చుండియున్న ప్రజలును గొప్ప వెలుగు చూచిరి. మరణ ప్రదేశములోను మరణచ్ఛాయలోను కూర్చుండియున్న వారికి వెలుగు ఉదయించెను-మత్తయి 4:12

నిన్ను ఆత్మ బలముతో నింపి, చీకటిలో ఉన్నవారికి వెలుగుగా చేయడమే, ఆశీర్వాదముగా చేయడమే దేవుని ఉద్దేశ్యము.