28-04-2024 – ఆదివారం మొదటి ఆరాధన – ఎల్లప్పుడు జీవముతో ఉండడానికి

వారము కొరకైన వాక్యము

ఈరోజు “ఎల్లప్పుడూ జీవముతో ఉండటానికి” మనము ఏమి చెయ్యాలి అనేది నేర్చుకుందాము.

శరీర సంబంధమైన సాధకము కొంచెముమట్టుకే ప్రయోజనకరమవును గాని దైవభక్తి యిప్పటి జీవము విషయములోను రాబోవు జీవము విషయములోను వాగ్దానముతోకూడినదైనందున అది అన్ని విషయములలో ప్రయోజనకరమవును.౹ -1 తిమోతికి 4:8

ఇప్పటి జీవము, రాబోవు జీవము అనగా ఎల్లప్పుడూ జీవము కలిగి ఉండుటకు దైవభక్తిని సాధకము చేయాలి. శరీర సంబంధమైన సాధకము కొంతమట్టుకే అనగా ఆ శరీరమునకు సంబంధించిన విషయములో మాత్రమే ప్రయోజనము చేకూరుస్తుంది.

దేవుడు అనగా తండ్రి, కుమారుడు, మరియు పరిశుద్ధాత్ముడు. శరీరము కొరకు చేసిన సాధకము ఆరోగ్యమును దయచేస్తుంది. అదే దైవభక్తి అనే సాధకము మనకు జీవమును దయచేస్తుంది.

వెంటనే నేను ఆత్మ వశుడనైతిని. అదిగో పరలోకమందు ఒక సింహాసనము వేయబడి యుండెను. సింహాసనమునందు ఒకడు ఆసీసుడై యుండెను,౹ ఆసీనుడైనవాడు, దృష్టికి సూర్యకాంత పద్మరాగములను పోలినవాడు; మరకతమువలె ప్రకాశించు మేఘధనుస్సు సింహాసనమును ఆవరించియుండెను.౹ సింహాసనముచుట్టు ఇరువది నాలుగు సింహాసనములుండెను, ఈ సింహాసనములందు ఇరువదినలుగురు పెద్దలు తెల్లని వస్త్రములు ధరించుకొని, తమ తలలమీద సువర్ణ కిరీటములు పెట్టుకొన్నవారై కూర్చుండిరి.౹ ఆ సింహాసనములోనుండి మెరుపులును ధ్వనులును ఉరుములును బయలు దేరుచున్నవి. మరియు ఆ సింహాసనము ఎదుట ఏడు దీపములు ప్రజ్వలించుచున్నవి; అవి దేవుని యేడు ఆత్మలు.౹ మరియు ఆ సింహాసనము ఎదుట స్ఫటికమును పోలిన గాజువంటి సముద్రమున్నట్టుండెను. ఆ సింహాసనమునకుమధ్యను సింహాసనము చుట్టును, ముందు వెనుక కన్నులతోనిండిన నాలుగు జీవులుండెను.౹ మొదటి జీవి సింహమువంటిది; రెండవ జీవి దూడవంటిది; మూడవ జీవి మనుష్యుని ముఖము వంటి ముఖముగలది; నాలుగవ జీవి యెగురుచున్న పక్షిరాజువంటిది.౹ ఈ నాలుగు జీవులలో ప్రతి జీవికి ఆరేసి రెక్కలుండెను, అవి చుట్టును రెక్కల లోపటను కన్నులతో నిండియున్నవి. అవి–భూతవర్తమాన భవిష్యత్కాలములలోఉండు సర్వాధికారియు దేవుడునగు ప్రభువు పరిశుద్ధుడు, పరిశుద్ధుడు, పరిశుద్ధుడు, అని మానక రాత్రింబగళ్లు చెప్పుచుండును.౹ -ప్రకటన 4:2-8

తండ్రితో సహవాసము చేయడానికి ఒక మాదిరి ఈరోజు మనకు దేవుడు తెలియచేస్తున్నారు. పై వాక్యములో మనము చూసిన జీవులు చూస్తే, అనునిత్యము తండ్రిని స్తుతిస్తూ ఉన్నారు. భూతవర్తమాన భవిష్యత్కాలములలోఉండు సర్వాధికారియు దేవుడునగు ప్రభువు పరిశుద్ధుడు, పరిశుద్ధుడు, పరిశుద్ధుడు, అని మానక రాత్రింబగళ్లు స్తుతిస్తున్నారు.

అనగా తండ్రిని స్తుతించుట ద్వారా ఆయనతో సహవాసము చేయగలుగుతాము. మనము అను నిత్యము తండ్రిని ఈ విధముగా స్తుతించి కీర్తించుట ద్వారా ఏమి జరుగుతుంది? ఇప్పటి జీవము విషయములోనూ, రాబోవు జీవము విషయములోనూ ప్రయోజనమవుతుంది.

దైవభక్తి అనగా తండ్రి, కుమార, పరిశుద్ధాత్మ త్రియేక దేవుని యెడల మనము చూపించే భక్తి. శరీర వ్యాయమము చేసేవాడు మొదట సన్నగా ఉంటాడు, కండలు ఉండవు. అదే దినదినము ఆ సాధకము చేయడము ద్వారా వాడి శరీరము కండలు తిరిగి, బలముగా ఉంటుంది.

మనము ఎక్కడ ఉన్నా సరే, తండ్రిని స్తుతించుట మనము మర్చిపోకూడదు. ఒక్క సారి మనము చేయలేకపోయినసరే, ఏదో కోల్పోయిన ఆలోచన మనము కలిగి ఉండేంతగా మనము సిద్ధపడాలి.

స్తుతించుట అంటే ఆయన ఏమి అయి ఉన్నాడో దానిని ఒప్పుకోవడమే. ఆ జీవులు, భూతవర్తమాన భవిష్యత్కాలములలోఉండు సర్వాధికారియు దేవుడునగు ప్రభువు అని ఒప్పుకుంటున్నారు. నీ జీవితములో నీవు తండ్రిని గూర్చి ఏమి తెలుసుకున్నావో, అనుభవించావో దానిని ఒప్పుకోవడమే స్తుతించుట.

అతని మనోభీష్టము నీవు సఫలము చేయుచున్నావు అతని పెదవులలోనుండి వచ్చిన ప్రార్థన నీవు మానక అంగీకరించుచున్నావు. -కీర్తనలు 21:2

అతని పెదవులలోనుండి వచ్చిన ప్రార్థన తప్పకుండా అంగీకరించబడుతుంది. అంటే ఎన్ని సార్లు ప్రార్థన చేసినా సరే అది తప్పకుండా అది అంగీకరించబడుతుంది అని అర్థము చేసుకోగలము.

స్తుతి ఎలా అయితే తండ్రితో సహవాసము చేయడానికి ఒక మాదిరి అయి ఉందో, ప్రార్థన కూడా ఆయనతో సహవాసము చేయడానికి ఒక మాదిరి అయి ఉంది.

ప్రార్థనలో మనము తండ్రితో సహవాసము చేసినపుడు, ఇప్పటి జీవము విషయములోనూ, రాబోవు ప్రార్థన విషయములోనూ మనకు ప్రయోజనకరమైనది గా ఉంటుంది.

పైనున్న వాటిమీదనేగాని, భూసంబంధమైనవాటిమీద మనస్సు పెట్టుకొనకుడి; ఏలయనగా మీరు మృతిపొందితిరి, మీ జీవము క్రీస్తుతోకూడ దేవునియందు దాచబడియున్నది.౹ -కొలొస్సయులకు 3:2

మనము దేవుని సన్నిధిలో ప్రతీ దినము తండ్రితో సహవాసము స్తుతించుట ద్వారా, ప్రార్థన ద్వారా కలిగి ఉంటున్నాము అనుకోండి. అప్పుడు ఆ ప్రార్థన ఎలా ఉండాలి అంటే, పరలోక సంబంధమైన విషయముల గురించి అడిగేవారిగా మన ప్రార్థన ఉండాలి. పరలోక సంబంధమైనది ఏమిటి అని చూస్తే, అది దేవుని కృపయే!

మరొక సత్యము – పరసంబంధమైనది భూసంబంధమైనదానిని నడిపించేదిగా ఉంటుంది.

ఉదయమున నీ కృపతో మమ్మును తృప్తిపరచుము అప్పుడు మేము మా దినములన్నియు ఉత్సహించి సంతోషించెదము. -కీర్తనలు 90:14

దేవుని కృప పరసంబంధమైనది గనుక, ఆయన కృప కొరకు మనము కనిపెట్టుకొని ఆయనను అడిగేవారిగా మనము సిద్ధపడాలి. అప్పుడు ఆయన కృపనుబట్టి మనము మన దినములలో మనకు అవసరమైన సమస్తము అనుగ్రహించబడి మనము సంతోషము కలిగినవారిగా ఉంటాము.

పౌలు జీవితములో ఒక ముల్లు ఉంచబడింది. అయితే దానిని తీసివేయమని మూడు మారులు ప్రార్థించినప్పుడు, “నా కృప నీకు చాలును” అని ప్రభువు చెప్పాడు. అప్పటినుండి, ఆయన కృపను బట్టి సమస్తము చేయగలను అనే స్థితిలోనికి పౌలు మారాడు. అందుకే మనము ఆయన కృప కొరకు మనము కనిపెట్టుకోవాలి.

మనలను సరైన మార్గములో నడిపించేవాడు పరిశుద్ధాత్మ దేవుడు. తండ్రితో మనము ఈరోజు నేర్చుకున్న విషయముల ప్రకారము సహవాసము కలిగి ఉన్నప్పుడు ఇప్పటి జీవము విషయములోనూ, రాబోవు జీవము విషయములోను మనకు ప్రయోజనముగా ఉంటుంది.

ఇంతవరకు తండ్రితో సహవాసము ఎలా చేయాలో నేరుచుకున్నాము. ఇప్పుడు కుమారుడైన యేసుక్రీస్తుతో ఎలా సహవాసము చేయ్యాలో నేర్చుకుందాము.

జీవవాక్యమునుగూర్చినది, ఆదినుండి ఏది యుండెనో, మేమేది వింటిమో, కన్నులార ఏది చూచితిమో, ఏది నిదానించి కనుగొంటిమో, మా చేతులు దేనిని తాకి చూచెనో, అది మీకు తెలియజేయుచున్నాము.౹ -1 యోహాను 1:1

కన్నులార ఏది చూచితిమో, ఏది నిదానించి కనుగొంటిమో, మా చేతులు దేనిని తాకి చూచెనో, అనే మూడు విషయాలను చూస్తే. చూచుట, కనుగొనుట, తాకుట.

శిష్యులు ఏమి విన్నారో దానిని చూడటానికి వారు సహవాసము కలిగి ఉన్నారు. ఏమి చూచారో, దాని గురించి లోతైన సత్యములను కనుగొనటానికి వారు సహవాసము కలిగి ఉన్నారు. ఏమి కనుగొన్నారో దానిని తాకారు అనగా అనుభవించడానికి వారు సహవాసము కలిగి ఉన్నారు.

ఇలా సహవాసము చేయడము బట్టి, ఇప్పటి జీవము విషయములోను, రాబోవు జీవము విషయములోను ప్రయోజనము చేకూరుస్తుంది.

ఉదాహరణకు యేసయ్యలో సమృద్ధి అయిన జీవము ఉంది అని విన్నాము అనుకోండి. అప్పుడు వాక్యమును ధ్యానము చేయడము ద్వారా ఆ సత్యమును మనము ఖచ్చితముగా కనుగొంటాము. ఆ సత్యములో నిలబడటము ద్వారా కనుగొన్న దానిని అనుభవించేవారిగా ఉంటాము.

ఆకాశము భూమి గతించినను, నా మాటలు గతించవు అని వాక్యము సెలవిస్తుంది. అయితే వాక్యమును మనకు అనుగుణముగా మార్చుకోకూడదు. అయితే ఆ వాక్యమునకు అనుగుణముగా మనమే మార్చుకోవాలి.

మన పౌరస్థితి పర లోకమునందున్నది; అక్కడనుండి ప్రభువైన యేసుక్రీస్తు అను రక్షకుని నిమిత్తము కనిపెట్టుకొనియున్నాము.౹ సమస్తమును తనకు లోపరచుకొనజాలిన శక్తినిబట్టి ఆయన మన దీనశరీరమును తన మహిమగల శరీరమునకు సమ రూపము గలదానిగా మార్చును. -ఫిలిప్పీయులకు 3:20-21

యేసుక్రీస్తు అనగా వాక్యము అయి ఉన్నారు. అనగా మనము వాక్యములో కనిపెట్టినపుడు. సమస్తమును తనకు లోపరచుకొనజాలిన శక్తినిబట్టి, ఒక మంచి జీవితము అంటే ఎలా ఉంటుందో, ఆ మంచి స్థితిలోనికి మన స్థితి మార్చబడుతుంది. నీ జీవితమును మార్చగలిగిన శక్తి దేవుని వాక్యములో ఉంది.

తండ్రి కుమార పరిశుద్ధాత్మ దేవునితో ఖచ్చితముగా మనము సహవాసము కలిగి ఉండాలి.