14-04-2024 – ఆదివారం రెండవ ఆరాధన

ఆరాధన వర్తమానము

దేవుని స్తుతించడానికి, ఆరాధించడానికి మరొక అవకాశము దేవుడు మనకు దయచేసాడు. దానిని బట్టి మనము సంతోషించాలి. ఉదయకాల సమయములో ఆదివారము యొక్క ప్రాముఖ్యత తెలియచేయబడింది.

నా విశ్రాంతిదినమున వ్యాపారము చేయకుండ నాకు ప్రతిష్ఠితమైన దినమని నీవు ఊరకుండినయెడల విశ్రాంతిదినము మనోహరమైనదనియు యెహోవాకు ప్రతిష్ఠితదినమనియు ఘనమైనదనియు అనుకొని దాని ఘనముగా ఆచరించినయెడల నీకిష్టమైన పనులు చేయకయు వ్యాపారము చేయ కయు లోకవార్తలు చెప్పుకొనకయు ఉండినయెడల నీవు యెహోవాయందు ఆనందించెదవు దేశముయొక్క ఉన్నతస్థలములమీద నేను నిన్నెక్కించెదను నీ తండ్రియైన యాకోబు స్వాస్థ్యమును నీ యనుభవములో ఉంచెదను యెహోవా సెలవిచ్చిన వాక్కు ఇదే. -యెషయా 58:13-14

ఈ విశ్రాంతి దినము దేవునికి ప్రతిష్టిత దినము అనుకొని, సిద్ధపడి వస్తారో, వారిని ఉన్నతమైన స్థితిలో ప్రభువు పెడతారు. వారి కొరకు ప్రభువు సిద్ధపరచినది నీవు పొందుకుంటావు. అంతే కాక, నీకున్న లోటు సైతము పూడ్చబడుతుంది.

–యెహోవా, ప్రభువా సైన్యములకధిపతియగు యెహోవా అను పేరు వహించువాడా, శూరుడా, మహాదేవా, నీ యధిక బలముచేతను చాచిన బాహువుచేతను భూమ్యాకాశములను సృజించితివి, నీకు అసాధ్యమైనదేదియు లేదు.౹ నీవు వేవేలమందికి కృపచూపుచు, తండ్రుల దోషమును వారి తరువాత వారి పిల్లల ఒడిలో వేయువాడవు.౹ ఆలోచన విషయములో నీవే గొప్పవాడవు, క్రియలు జరిగించు విషయములో శక్తి సంపన్నుడవు, వారి ప్రవర్తనలనుబట్టియు వారి క్రియా ఫలమునుబట్టియు అందరికి ప్రతిఫలమిచ్చుటకై నర పుత్రుల మార్గములన్నిటిని నీవు కన్నులార చూచుచున్నావు.౹ నీవు ఐగుప్తుదేశములో చేసినట్టు నేటివరకు ఇశ్రాయేలు వారిమధ్యను ఇతర మనుష్యులమధ్యను సూచక క్రియలను మహత్కార్యములను చేయుచు నేటి వలె నీకు కీర్తి తెచ్చుకొనుచున్నావు.౹ -యిర్మీయా 32:17-20

ఇప్పుడు చదివిన మాటలలో దేవుని గూర్చి చెప్పబడుతుంది. ఆయన గొప్పతనము, ఆయన ఐగుప్తులో చేసిన క్రియలు గురించి చెప్పబడుతుంది. అయితే ఈ మాటలు ఎందుకు చెప్పుచున్నాడు?

ఐగుప్తుదేశములో చేసినట్టు నేటివరకు…సూచక క్రియలను మహత్కార్యములను చేయుచు నేటి వలె నీకు కీర్తి తెచ్చుకొనుచున్నావు… నేడు అనేది నీ జీవితము మరియు నా జీవితము గనుక.

నీ దేవుడు ఏమై ఉన్నాడో నీవు గుర్తెరగాలి. ఆలోచన విషయములో గొప్పవాడు. మనము వెళ్ళే పరిస్థితి మాత్రమే మన కళ్ళ ముందు ఉంటుంది గానీ, అసలు మన కళ్ళముందు ఉండవలసినది, మన దేవుడు ఏమై ఉన్నాడో అనే సంగతి.

మన దేవుని గూర్చి చెప్పబడుతున్న వాస్తవము నిత్యము ఏకరీతిగా ఉంటుంది. అయితే మన కళ్ళముందు ఉండే వాస్తవమైన పరిస్థితి మార్చబడుతుంది.

మన జీవితము దేనిని ఆధారము చేసుకుని ఉంది? దేవుని అధారము చేసుకొని ఉంది. మనము ఒక విషయములో పోగొట్టుకున్నాము, అయితే నీ దేవుడి గూర్చి చెప్పబడుతున్న సత్యమే నిలిచేది. ఎందుకంటే, దేవుని గూర్చి చెప్పబడుతున్న సత్యము నీ వాస్తవాన్ని మార్చగలుగుతుంది.

“ఐగుప్తుదేశములో చేసినట్టు నేటివరకు…”- ఐగుప్తులో ఏమి చేసాడు ప్రభువు? వారి కన్నీరు, బాధ, శ్రమ చూసిన దేవుడు మోషేను పిలిచి వారిని విడిపించాలి అనే ఆలోచనను బయలుపరచారు. ఈరోజు కూడా నీమీద, నా మీద ఆయన ఆలోచన కలిగి ఉన్నాడు. దానిని బట్టి నీ, నా జీవితములో ఆయన మహిమ పొందేవాడుగా ఉన్నాడు.

సూచక క్రియలను మహత్కార్యములను జరిగించుచు మహా బలముకలిగి, చాపిన చేతులు గలవాడవై మహాభయము పుట్టించి, ఐగుప్తు దేశములోనుండి నీ ప్రజలను రప్పించి మీ కిచ్చెదనని వారి పితరులకు ప్రమాణముచేసి, పాలు తేనెలు ప్రవహించు ఈ దేశమును వారి కిచ్చితివి.౹ -యిర్మీయా 32:21-22

మన ప్రభువైన యేసే మనకు వాగ్దానమై ఉన్నాడు. ఆ యేసయ్యను బట్టి మన జీవితములో విడుదల పొందుకుంటాము. అందుకే క్రీస్తు యేసునందు ఉన్నవారికి ఏ శిక్షావిధిలేదు. ఈరోజు ఐగుప్తు దేశములో జరిగించిన విడుదల కార్యము నీ, నా జీవితములో చేయాలి అనే ఆశ కలిగి ఉన్నాడు. ఈ సత్యము విన్న మనము నమ్మి స్తుతిస్తే, ఆ కార్యము త్వరపడి మన జీవితములో జరుగుతుంది.

నీ జీవితములో దేవుడు కీర్తి తెచ్చుకుంటాడు. ఈ సత్యమును పట్టుకొని నిలబడితే, ఈ సత్యము ప్రత్యక్షపరచబడుతుంది. సూచక క్రియలు, మహాశ్చర్య కార్యములు జరిగించి, కీర్తి తెచ్చుకుంటాడు.

మన జీవితములు సూపర్ నేచురల్ జీవితములు, ఈ సత్యము మనము మర్చిపోకూడదు. మనలో ఆత్రుత ఆసక్తి లేని దానిని బట్టి, అనేకమైన ఆశ్చర్య కార్యములు మన జీవితములలో పోగొట్టుకునేవారిగా అయిపోతున్నాము.

నీ నెగటివ్ వాస్తమును మార్చడానికి ఈరోజు చెప్పబడిన సత్యము నీ జీవితమును మారుస్తుంది.

ఆరాధన గీతము

నిన్నే ప్రేమింతును నిన్నే ప్రేమింతును యేసు
నిన్నే ప్రేమింతును నే వెనుదిరుగా

నీ సన్నిధిలో మోకరించి నీ మార్గములో సాగెదా
నిరసించక సాగెదా నే వెనుదిరుగా

నిన్నే పూజింతును నిన్నే పూజింతును యేసు
నిన్నే పూజింతును నే వెనుదిరుగా

నీ సాక్షిగా జీవించి నీ మహిమకై ఉండెదన్
నిరసించక సాగెదా నే వెనుదిరుగా

నిన్నే కీర్తింతును నిన్నే కీర్తింతును యేసు
నిన్నే కీర్తింతును నే వెనుదిరుగా

నీ సాక్షిగా జీవించి నీ మహిమనై ఉండెదా
నిరసించక సాగెదా నే వెనుదిరుగా

====================

హల్లెలూయ స్తుతి మహిమ
ఎల్లప్పుడు దేవుని కిచ్చెదము
ఆ… హల్లెలూయా హల్లెలూయా హల్లెలూయా

అల సైన్యములకు అధిపతియైన
ఆ దేవుని స్తుతించెదము
అల సంద్రములను దాటించిన
ఆ యెహోవాను స్తుతించెదము

ఆకాశమునుండి మన్నాను పంపిన
దేవుని స్తుతించెదము
బండనుండి మధుర జలమును పంపిన
ఆ యెహోవాను స్తుతించెదము

నిన్ను తరుముతున్న శత్రువు చేతికి నీవు దొరకకుండా, ఆ ఐగుప్తులో చేసిన మహత్కార్యములు, ఆశ్చర్యకార్యములు మరలా చేస్తాను అని ప్రభువు సెలవిస్తున్నాడు.