24-03-2024 – ఆదివారం రెండవ ఆరాధన

వారము కొరకైన వాక్యము

ఆయన సన్నిధిలో నిలబడే భాగ్యము మనకు దేవుడిచ్చాడు దానిని బట్టి ప్రభువుకే స్తోత్రములు. అందుకే మన జీవితములు ధన్యకరములైనవి.

ఒకవేళ మన వద్ద డబ్బు ఉంది, కారు కొనుక్కొందాము అనుకున్నావు, సంతోషముగా వెళ్ళి కొనుక్కుంటావు సంతోషిస్తావు. ఒకవేళ మన దగ్గర తగినంత డబ్బు లేదు, కానీ కారు కొనుక్కోవాలి అనే ఆశ మాత్రం ఉంది అనుకోండి, అయినప్పటికీ నీవు కారు సొంతం చేసుకోగలిగితే, అది ఇంకా ఎంత సంతోషము కలిగిస్తుంది.

మన దగ్గర ఉన్న ధనమును బట్టి సమకూర్చుకొన్నప్పుడు, నా కష్టార్జితము అని మనలను మనమే మహిమ పరచుకుంటాము. అదే మన దగ్గర ఉన్నదాని బట్టి కాక, సూపర్ నేచురల్ గా మనము సంపాదించుకుంటే, ఖచ్చితముగా మనము దేవునినే మహిమపరచేవారముగా ఉంటాము. మన జీవితములు కూడా దేవునిని మహిమపరచడానికే ఏర్పరచుకున్నాడు.

దేవుని దగ్గరనుండి వచ్చిన ప్రతీ మాట, నీకు క్షేమమును కలుగచేసేదే! అందుకే దేవుడు తన వాక్కును ఎప్పుడూ విడుదల చేసేవాడుగా ఉన్నాడు. ఆయన వాక్కు మన దినములు కొనసాగించేదిగా ఉంటుంది.

అపవాది ఎప్పుడు మ్రింగుదునా అని ప్రతిదినము కాచుకుని కూర్చుంటుంది. అయినప్పటికీ మన దినములు క్షేమముగా కొనసాగించబడుతున్నాయి, అపవాది ప్రయత్నములనుండి ఎలా తప్పించబడుతున్నాము అంటే, దాని అర్థము దేవుడు మనలను కాపాడుకుంటూ వస్తున్నాడు.

నిన్ను కాపాడువాడు కునుకడు నిద్రపోడు అంటే, అపవాది నీ జీవితమును లాక్కుపోవడానికి, నష్టపరచడానికి, ప్రతీ క్షణము ప్రయత్నిస్తుంటే, ఆ ప్రతీ క్షణమూ దేవుడు కంటికి రెప్పలా కాపాడుకుంటూ వస్తున్నాడు.

ఆయన ఒలీవలకొండదగ్గరనున్న బేత్పగే బేతనియ అను గ్రామముల సమీపమునకు వచ్చినప్పుడు, తన శిష్యుల నిద్దరిని పిలిచి –మీరు ఎదుటనున్న గ్రామమునకు వెళ్లుడి; అందులో మీరు ప్రవేశింపగానే కట్టబడియున్న ఒక గాడిద పిల్ల మీకు కనబడును; దానిమీద ఏ మనుష్యుడును ఎన్నడు కూర్చుండలేదు; దానిని విప్పి తోలుకొని రండి. -లూకా 19:29-30

ఈ మాటలలో మన జీవితమును మనము చూడవచ్చు. ఈ భాగములో యేసయ్యను గూర్చిన సత్యము ఏమిటి అంటే, “ఆయన వెదకి రక్షించేవాడు”. అక్కడ ఉన్న గాడిద స్థితి, అది ఎక్కడ ఉందో అనే విషయము యేసయ్య వెతికి తెలుసుకున్నవాడు గనుకనే శిష్యులకు చెప్పుచున్నాడు.

ఆ గాడిదను చూస్తే, దానిమీద ఇంతవరకు ఎవరూ కూర్చోలేదు అంటే, ఇంతవరకు అది కట్టబడే ఉంది అని అర్థము. మన దేవుడు నాశనము అయిపోయేదానిని వెదకి రక్షించేవాడు. నశించిపోయే పరిస్థితులలో విడిపించడానికే ఆయన వెతుకుతున్నాడు అనే సత్యము మనము గ్రహించాలి.

ఎవరైననుమీరెందుకు దీని విప్పుచున్నారని మిమ్ము నడిగినయెడల–ఇది ప్రభువునకు కావలసియున్నదని అతనితో చెప్పుడని చెప్పి వారిని పంపెను. -లూకా 19:31

అనేకమైన గాడిదలు ఉండగా, కట్టబడిన దాని విషయములోనే, ఇది ప్రభువునకు కావలసి ఉన్నది అని ప్రభువు చెప్పుచున్నాడు. ఎందుకంటే ఇంతవరకు ఎవరూ దానిని విప్పలేదు.

అలాగే సమాధుల వద్ద సేన అనే దెయ్యము పట్టినవాడు కూడా నశించిపోయిన స్థితిలో ఉండగా, వాడిని బాగుచేయడానికే యేసయ్య వెతుకుతూ వెళ్ళాడు. యేసయ్య వెళ్ళిన ప్రతిచోట నాశనకరమైన పరిస్థితి మార్చబడింది. దానిని బట్టి దేవుడు మహిమ పరచబడ్డాడు.

దేవుడు బుద్ధిహీనులకు కనపరచుకోవడానికి కారణము, జ్ఞానము లేని కారణమున వారి నశించిపోక, దేవుని జ్ఞానముచేత స్థిరపరచబడాలి అనే ఆశ కలిగి ఉండటమే.

అలాగే సమరయ స్త్రీ జీవితములో చూస్తే, యేసయ్యే ఆమెను వెతుకుతూ వెళ్ళాడు తప్ప ఆ స్త్రీ వెతకలేదు. అందుకే సమరయ గ్రామమునకు వెళ్ళవలసి వచ్చింది అని వ్రాయబడింది.

ఈ అన్ని సందర్భములలో వారిని ప్రభువుకొరకు వాడుకున్నాడు. వారిని విడిపించిన తరువాత వారి నాశనమైన స్థితి మార్చబడి, మహిమకరమైన స్థితిగా మార్చబడినది.

సమరయ స్త్రీని చూస్తే, ఊరంతా ఆమెను వ్యభిచారిగా చూసారు, అయితే తాను మార్చబడిన తరువాత ఆమె మాటలు అంగీకరించారు. ఏమి జరిగి ఉంటుంది? కట్టబడి ఉన్నప్పుడు, అనగా పరిస్థితుల ప్రభావముచేత బంధించబడిన స్థితిలో ఆమె జీవితము వేరు, అనగా వ్యభిచారిగా ఉంది.

అప్పుడు యేసయ్య వెతికి వెళ్ళి ఆమెను విడుదల చేసాడు. అప్పుడు ఆమె పరుగు పరుగున వెళ్ళి గ్రామములోని ప్రజలవద్దకు వెళ్ళి, నేను చేసినవన్నీ నాతో చెప్పిన ఈయన క్రీస్తు కాడ? అని ప్రకటించింది. అనగా తన బంధకములనుండి విడుదల పొందుకుని, తనను విడిపించిన యజమానిని ప్రకటించింది.

చీకటి క్రియలు అన్నీ కూడా అపవాదికి సంబంధించినవి. అపవాది యొక్క బంధకములలో ఉన్నప్పుడు, ఆ క్రియలే మన జీవితములలో కనపరచబడతాయి. అయితే నిన్ను వెతుకుతున్న యేసయ్య నిన్ను ఆ అపవాది బంధకములనుండి విడిపించాలి అనే ఆశ కలిగి ఉన్నాడు. ఎప్పుడైతే, నీవు విడిపించబడతావో, అప్పుడు నీవు కూడా అపవాది బంధకములనుండి, అధికారమునుండి విడిపించబడి, ప్రభువు పని కొరకు సిద్ధపరచబడతాము.

అందుకే మన ధైర్యము ఆయనే, మనము ఏ నాశనకరమైన స్థితిలో ఉన్నప్పటికీ, మన గురించి వెతికి రక్షించేవాడుగా ఉన్నాడు. అప్పుడు మన జీవితము ప్రభువునకు మహిమకరముగా మార్చబడుతుంది. దుఃఖమునుండి ఆనందమునకు జీవితము మారుతుంది .

జక్కయ్యను జ్ఞాపకము చేసుకుంటే, తనుకూడా బంధకములలో ఉన్నాడు. అన్యాయముగా ధనము సంపాదించుకోవాలి అనే అపవాది బంధకములలో అతడు బంధించబడ్డాడు. అయితే యేసయ్య అతడిని రక్షించిన తరువాత వెంటనే అన్యాయముగా తీసుకున్న ధనమునకు రెండంతలు, మూడంతలు తిరిగి ఇచ్చేవాడుగా మార్చబడ్డాడు.

అందుకే మన యేసయ్య నశించిపోవుదానిని వెతికి రక్షించేవాడు. నీ జీవితములో కూడా నిన్ను రక్షించినతరువాత, నీ ద్వారా తన పని జరిగించుకుంటాడు. జక్కయ్య జీవితములో చూస్తే, ఘోరపాపిగా లోకము చూసిన వ్యక్తిని ప్రభువు క్షమించినవాడుగా ఉన్నాడు.

నిన్ను నన్ను కూడా నశించిన స్థితిలో ఉన్న సమయములో ప్రభువు మనలను రక్షించాడు. అంటే మనలను కూడా ప్రభువు తన పని కొరకు వాడుకుంటాడు.

నీ జీవితము అనేకమందికి అద్భుత సువార్త అవ్వవచ్చు, లేదా నీన్ను ప్రత్యక్ష పరిచర్యలోనైనా వాడుకోవచ్చు, అది ప్రభువు ఇష్టము. కానీ మనము ప్రభువు పనికే అనేది స్పష్టము.