10-03-2024 – ఆదివారం మొదటి ఆరాధన – యెహోవానుబట్టి సంతోషించుడి

వారము కొరకైన వాక్యము

దేవుని యొక్క ప్రేమ నీపై నిలిచినంత కాలము నీవు దేనికీ భయపడనవసరము లేదు. ఆయన ప్రేమ మారనిది. ఇహలోకములో ఉన్న ప్రేమకు, దేవుని ప్రేమకు తేడా ఏమిటి అంటే, ఇహలోకములో ఉన్న ప్రేమ పరిస్థితి బట్టి మారిపోతుంది. అయితే దేవుని ప్రేమ మారనిది.

మనము పాపిగా ఉన్నపుడు ఆయన తన ప్రేమను ప్రాణము పెట్టుట ద్వారా కనపరచారు. అలాగే మనము పరిశుద్ధులుగా చేయబడిన తరువాత ఆయన ప్రేమను బట్టి తన శక్తిని మనలో కనపరుస్తున్నారు.

భూలోకములో ఉన్న ప్రతీదీ ఆయన ప్రేమను బట్టియే సృష్టించబడ్డాయి. దేవుడు మొదట సమస్త సృష్టిని ముగించిన తరువాత ఆదామును సృష్టించాడు. కొంచెము జాగ్రత్తగా ఆలోచిస్తే, ఆదాముకు అవసరమైన సమస్తము ముందుగా దేవుడు సృష్టించాడు. ఇది దేవుని ప్రేమకు ఉదాహరణ. అందుకే దేవుని ప్రేమను ఎప్పుడూ మనము జ్ఞాపకము చేసుకోవాలి.

మన మినిస్ట్రీ పేరే “జీసర్ కేర్స్ యూ”, ఆయన కేర్, ప్రేమను కనుపరచడానికే ఈ మినిస్ట్రీని ఏర్పాటు చేసుకున్నారు. మన దేవుడు మనలను ప్రేమిస్తూనే ఉంటారు, ఆ ప్రేమలో బలము ఉంది.

ఈరోజు మనము “యెహోవాను బట్టి సంతోషించుడి” అనే విషయము గూర్చి తెలుసుకుందాము. సంతోషించండి అంటున్నారు అంటేనే మన జీవితములో దుఃఖకరమైన పరిస్థితి ఏదో ఉంది అని అర్థము చేసుకోవచ్చు.

మన జీవితములలో ఏదైనా జరిగితేనే సంతోషముగా ఉంటాము. అయితే వాక్యము చెప్తున్న విషయము, జరగకుండానే మనము సంతోషము వ్యక్తపరచాలి. మనము సూపర్నేచురల్.

మనము పరిస్థితులను చూసి డీలపడిపోయేవారిగా ఉంటాము. పేతురు నీళ్ళ మీద నడిచినప్పుడు, యేసయ్యను చూసినంతసేపు చక్కగా నడిచాడు. ఎప్పుడైతే పక్కన ఉన్న పరిస్థితిని చూసాడో, ములిగిపోసాగాడు.

మనము కూడా మన పరిస్థితిలో చుట్టో జరుగుతున్న వాటిని చూస్తే, మనము భయపడి, నీరుగారి పోతాము. అయితే అప్పుడు కూడా మనము దేవునివైపే చూస్తూ విశ్వాసముతో నిలబడితే, మనము ఖచ్చితముగా సూపర్నేచురల్ కార్యములు చూస్తాము.

ఏలియా నిర్ణయించుకున్నట్టు మనము కూడా నిర్ణయించుకోవాలి. యెహోవా వైపు ఉంటావా? లోకములో వైపు ఉంటావా?

నీతిమంతులారా, యెహోవానుబట్టి సంతోషించుడి ఉల్లసించుడి యథార్థహృదయులారా, మీరందరు ఆనందగానము చేయుడి. -కీర్తనలు 32:11

దేవుని అంగీకరించినవారికి, దేవుని బిడ్డలైన మనకు ఈ మాట చెప్పబడింది.

ఒక దైవజనుడు తన పరిస్థితి వ్యతిరేకముగా ఉన్నప్పుడు తన గదిలోనికి వెళ్ళి దేవుని సన్నిధిలో సంతోషముతో నాట్యమాడేవాడిగా ఉన్నారు అని తన సాక్ష్యము చెప్పారు.

ఆత్మీయముగా మనము చిన్న బిడ్డలుగా ఉన్నపుడు కష్టము కలిగినపుడు దేవుని సన్నిధిలో ఏడ్చి మొరపెట్టేవారము. అయితే వాక్యములో ఎదిగినపుడు మన తండ్రి ఏమి అయి ఉన్నాడో, ఏమి చెయ్యగలడో ఎరిగినవారై సంతోషముతో నిలబడేవారిగా ఉండాలి.

మనము దుఃఖకరమైన పరిస్థితిలో ఉన్నపుడు, మన నోటివెంట దేవునికి వ్యతిరేకమైన మాటలు సాధారణముగా వచ్చేస్తాయి. అయితే ఆత్మీయముగా ఎదుగుతున్న మనము మన నోటివెంట వ్యతిరేకమైన మాట ఒక్కటైనా రాకుండా జాగ్రత్తపడాలి

మనకు వ్యతిరేకముగా పరిస్థితి ఉన్నపుడు, కఠినముగా ఉన్నపుడు మనము విశ్వాసము కనపరచాలి. అబ్రహాము తన జీవితములో వ్యతిరేకమైన ఆలోచనలు వచ్చినప్పుడు దానికి లోబడక, తనను బలపరచే దేవుని బట్టే బలము పొందుకుని నిలబడ్డాడు.

అలాగే మనకు ఆలోచన కలిగిన వెంటనే అమలుపరచకుండా, అసలు అది ప్రభువుకు మహిమకరమైనదా కాదా అని కొన్ని నిమిషములు జాగ్రత్తగా గమనించడము అలవాటు చేసుకోవాలి.

మన యొక్క ముఖ్యమైన లోపము, వాక్యము వినేవారముగా ఉంటాము గానీ, ఆ విన్న దానిని అమలుపరచడములో విఫలమవుతాము. అయితే ఇకనుండి సరిచేసుకుందాము.

యెహోవానుబట్టి సంతోషించుము ఆయన నీ హృదయవాంఛలను తీర్చును. -కీర్తనలు 37:4

ఒక దుఃఖకరమైన పరిస్థితిలో మన హృదయవాంఛ ఎలా ఉంటుంది? ఇది జరిగితే బాగుండు అనేది మన ఆలోచన. అయితే అనేకసార్లు ఇటువంటి సందర్భములలో అదే దుఃఖములో నిండిపోయి అసలు దేవుని గురించే ఆలోచించరు. అయితే “యెహోవానుబట్టి సంతోషించుము ఆయన నీ హృదయవాంఛలను తీర్చును” ఇది ఒక మర్మము.

యెహోవా రాజ్యము చేయుచున్నాడు, భూలోకము ఆనందించునుగాక ద్వీపములన్నియు సంతోషించునుగాక. -కీర్తనలు 97:1

యెహోవా మనలో ఉండి రాజ్యము చేయాలి అనుకుంటున్నాడు. మన జీవితములో ఉండి, మన జీవితములో సమస్తమును పరిపాలించాలి అనే ఆశ కలిగి ఉన్నాడు. మన జీవితములో దుఃఖపరిస్థితిలో కన్నీరు కార్చక, నీవు కలిగిన దేవునిని బట్టి సంతోషము కలిగి యదార్థముగా ఉంటే, ఖచ్చితముగా ఆ దుఃఖపరిస్థితి మార్చబడుట కొరకు ఆజ్ఞలు జారీ చేస్తాడు.

ద్వీపము నిజానికి భూమిపైనే ఉంది, కానీ చుట్టూ సముద్రము ఉంది. యెహోవా రాజ్యము చేసినపుడు భూలోకము ఆనందించును అలాగే ద్వీపములు కూడా సముద్రముచేత చుట్టబడినప్పటికీ సంతోషించును.

అనగా మనమున్న దుఃఖపరిస్థితిలో ఎటుచూసినా నష్టమే కానీ, ఒక్క అవకాశము కూడా లేని పరిస్థితిని ద్వీపము సూచిస్తుంది. అటువంటి పరిస్థితిలో మన దేవుడు సంతోషింపచేస్తాడు అంటే, ఆ దుఃఖపరిస్థితి మార్చబడటానికి ఏమి అవసరమో అది జరిగిస్తాడు అని అర్థము. ఇదే యెహోవా రాజ్యము చేయుట!

యెహోవా, నీతిమంతులను ఆశీర్వదించువాడవు నీవే కేడెముతో కప్పినట్లు నీవు వారిని దయతో కప్పెదవు కావున నీ నామమును ప్రేమించువారు నిన్నుగూర్చి ఉల్లసింతురు. -కీర్తనలు 5:12

యెహోవా మాత్రమే ఆశీర్వదించువాడు అనే సత్యము ఎరిగినవాడు ధన్యుడు. అటువంటి వాడు తన పరిస్థితిలో ఆయన దయను పొందుకొనేవాడిగా ఉంటాడు. ఎందుకంటే ఆయనలోనుండి ఆశీర్వాదము బయలుదేరుతుంది.

కేడెముతో కప్పబడుట అనగా యుద్ధ పరిస్థితిలో ఉన్నాము అని అర్థము. అటువంటి పరిస్థితిలో ఆయన తన దయచేత కప్పి రక్షించువాడిగా ఉన్నాడు. ఈ దయను పొందుకున్నవారు ఆయనను బట్టి సంతోషించేవారుగా ఉంటారు.

యెహోవా నాకు వెలుగును రక్షణయునైయున్నాడు, నేను ఎవరికి భయపడుదును? యెహోవా నా ప్రాణదుర్గము, ఎవరికి వెరతును? -కీర్తనలు 27:1

ఈ మాటలు మనము అస్సలు మర్చిపోకూడదు. వాక్యము ఎక్కడ ఉంటే అక్కడ జీవము. ఆ వాక్యము నీలో ఉంది అంటే, నీలో జీవము ప్రత్యక్షపరచబడవలసినదే.

వెలుగు యొక్క శక్తి చీకటిని పారద్రోలుట. యెహోవా వెలుగై ఉన్నాడు అంటే ఆ వెలుగును బట్టి నీ జీవితములో ఉన్న చీకటి స్థితిని మార్చగల శక్తి ఆయనలో ఉంది. అసలు మన దేవుడు మార్చలేనిది ఏమి లేదు. అయితే ఇది నీ జీవితములో అనుభవించాలి అంటే, నీవు నీతిమంతునిగా జీవించాలి. పాపములో జీవిస్తూ దేవుని శక్తి అనుభవించాలి అంటే కుదరని పని.

పాపానికి మూలకారణము మన చూపే! అందుకే మనము వాక్యము ప్రకారము మన జీవితము కట్టుకోవాలి. ఆదాము హవ్వలు పాపము చేసినప్పుడు, అంతవరకు ఉన్న సూపర్నేచురల్ కళ్ళు, లోకానుసారముగా మారిపోయాయి.

ఇప్పుడున్న పరిస్థితిలో మొబైల్ ఎంతో వ్యసనముగా మారిపోయింది. మనము చూడాలి అనుకోకపోయినా సరే అనుకోకుండా మన కళ్ళముందు వచ్చినపుడు దానిని చూసామా, అపుడే మన పతనము ప్రారంభమవుతుంది. మొదట చిన్నగానే ఉన్నప్పటికీ చివరికి ఎందుకూ పనికిరాని స్థితిలోనికి మనలను తీసుకువెళుతుంది.

యెహోవాను కల్గినవారు ధన్యులు. అనగా సంతోషముగా జీవిస్తారు. మనలను కోల్పోవడానికి మన దేవుడు ఇష్టపడట్లేదు. నీతిమంతులుగా మనము ముద్రించబడ్డాము. ఆ ముద్రను బట్టే అనేకమైన ఆశీర్వాదములు మనకు సిద్ధపరచబడ్డాయి.

మన తండ్రి మన జీవిత కాలమంతా, మనము సంతోషముగా ఉండటానికి అవసరమైన సమస్తము సంపాదించి సమకూర్చి ఉంచినపుడు, ఒకేసారి అన్నీ ఇవ్వబడవు. కానీ, ఏ సమయమునకు ఏది అవసరమో అది అనుగ్రహిస్తాడు.

యవ్వనస్తుడిగా ఉన్నప్పుడు వివాహము కొరకు సిద్ధపరచాడు. ఆ తరువాత పిల్లలను సిద్ధపరిచాడు అలా జీవితమంతా అనేకమైన విషయాలకొరకు దేవుడు సిధ్దపరచాడు. అవన్నీ అనుభవించి దేవునిని మహిమపరచేవారిగా మనము ఉండాలి. నీతిమంతునిగా మనము జీవిస్తే ఇది అనుభవించగలుగుతాము.