25-02-2024. – ఆదివారం మొదటి ఆరాధన – నీకోసం పరలోక రాజ్యము పనిచేయును

ఆరాధన వర్తమానము

మన దేవుడు మంచి దేవుడుగా ఉంటున్నాడు. ఆయనే మహిమ ఘనత కలుగును గాక! దేవుని కలిగిన మన అందరి జీవితములు ధన్యములు.

యెహోవా తమకు దేవుడుగాగల జనులు ధన్యులు. ఆయన తనకు స్వాస్థ్యముగా ఏర్పరచుకొను జనులు ధన్యులు. -కీర్తనలు 33:12

ధన్యులు అనే మాటకు అర్థము సంతోషముగా జీవించువారు. మన జీవితములో ఆయనను కలిగి ఉండటమే మహాభాగ్యము. మనము కొనసాగిస్తున్న జీవితము ఎంతో ప్రత్యేకమైనది. ఆ దేవుడు ఏమి కలిగి ఉన్నాడో అదే మన జీవితము అయి ఉన్నది. గనుకనే మన జీవితము ఎంతో ప్రాముఖ్యము అయినదిగా ఉంది.

ఇశ్రాయేలూ, నీ భాగ్యమెంత గొప్పది యెహోవా రక్షించిన నిన్ను పోలినవాడెవడు? ఆయన నీకు సహాయకరమైన కేడెము నీకు ఔన్నత్యమును కలిగించు ఖడ్గము నీ శత్రువులు నీకు లోబడినట్లుగా వారు వేషము వేయుదురు నీవు వారి ఉన్నతస్థలములను త్రొక్కుదువు. -ద్వితీయోపదేశకాండము 33:29

దేవుని కలిగి ఉన్నవారి జీవితము వంటి జీవితము మరెవ్వరికీ లేదు అనే సత్యము గ్రహిస్తే, అప్పుడు మనము కలిగిన జీవితమును బట్టి దేవుని స్తుతించేవారిగా ఉండగలుగుతాము. ఈ సత్యము ఎరగని వారు దేవుని కలిగనప్పటికీ మనము కలిగిన జీవితము యొక్క విలువ గ్రహించలేక, పాడు జీవితము అని వారికి వారే శాప వచనములు పలుకుతారు. అయితే మనకు ఇవ్వబడిన జీవితము విలువ గ్రహించాలి.

మన జీవితములకు ఆయన సహాయకరమైన కేడెముగాను, మన జీవితము యొక్క విలువ పెంచేవాడుగాను ఉన్నాడు. మనము ఆయనను దేవుడుగా కలిగి ఉన్నాము కాబట్టే, మనము ధన్యులము. మన జీవిము ఎంతో విలువైనది ఆ జీవితమును ఇచ్చిన దేవునిని ఎల్లప్పుడు మనము స్తుతించాలి, మహిమపరచాలి.

అడ్డంకులు ఖచ్చితముగా వస్తాయి, శ్రమలు కూడా వస్తాయి అయితే మన జీవితము మన దేవుని సహాయముచేత నడిపించబడేది గనుక ధన్యకరముగానే కొనసాగించబడుతుంది, సమాధానకరముగానే ఉంటుంది.

నాయందు మీకు సమాధానము కలుగునట్లు ఈ మాటలు మీతో చెప్పుచున్నాను. లోకములో మీకు శ్రమ కలుగును; అయినను ధైర్యము తెచ్చుకొనుడి, నేను లోకమును జయించియున్నాననెను. -యోహాను 16:33

మన దేవుడు లోకములోని శ్రమను జయించినవాడు గనుక జయించినవాడిని మనము కలిగి ఉన్నాము.

అయితే మీరు చీకటిలోనుండి ఆశ్చర్యకరమైన తన వెలుగులోనికి మిమ్మును పిలిచిన వాని గుణాతిశయములను ప్రచురముచేయు నిమిత్తము, ఏర్పరచబడిన వంశమును, రాజులైన యాజకసమూహమును, పరిశుద్ధ జనమును, దేవుని సొత్తయిన ప్రజలునై యున్నారు.౹ -1 పేతురు 2:9

ఆయన గుణములను ప్రచురముచేయు నిమిత్తము మనము పిలువబడి ఏర్పరచబడిన వారముగా ఉన్నాము. మన దేవుడు జయించినవాడుగా ఉన్నాడు. ఇప్పుడు ఆయన యొక్క గుణము అనగా జయించగలుగుట అనే గుణము మన జీవితము ద్వారా ప్రచురము చేయబడాలి. అందుకే దేవుడు ఏమై ఉన్నాడో అదే మన జీవితము అయి ఉన్నది గనుకనే ఆయనను కలిగి ఉన్నవారు ధన్యులు అని చెప్పగలము.

మనము శ్రమ వచ్చినప్పుడు, ఇబ్బందిలో ఉన్నప్పుడు అపవాదికి సరైన సమయము. మనము అదే సమయములో దేవుని వాక్యము చెంతకు చేరాలి. దావీదు కూడా శ్రమ వచ్చిన ప్రతీసారీ దేవుడే నా ఆశ్రయము, కోట అని ఆయన చెంతకే చేరేవాడు. మనము కూడా అదే విధముగా ఉండాలి .

దేవుడు నాకు ఎత్తయిన కోటగాను కృపగల దేవుడుగాను ఉన్నాడు నా బలమా, నిన్నే కీర్తించెదను. -కీర్తనలు 59:17

మన దేవుని గూర్చి తెలిసినవాడు ఎవ్వడూ ఆయనను విడిచిపెట్టడు. మన దేవుడు ఎత్తయిన కోటగాను కృపగల దేవుడుగాను ఉన్నాడు. బలమైన దేవుడై ఉన్నాడు. అందుకే మనం జీవితము గూర్చి శాప వచనములను ఏనాడు పలుకవద్దు. ఏ స్థితిలో ఉన్నా సరే, ఎంత శ్రమ అయినా సరే, నీ జీవితముయొక్క ధన్యతను గూర్చిన సత్యము ఎరిగినవారిగా నిలబడితే, మన జీవితము యొక్క నిజమైన స్థితి ప్రత్యక్షపరచబడుతుంది. అనగా దేవుని సహాయము అందించబడి, ఆయన శక్తి, బలము అందించబడి ఆయన మహిమ ప్రత్యక్షపరచబడుతుంది.

అందుకే మన జీవితము సాధారణమైన జీవితము కాదు. మన జీవితము ముందు ఏదీ నిలబడలేదు. మనలను బట్టి కాదు గానీ, లోకములోని శ్రమను జయించినవానిని బట్టి, మన ముందు ఏదీ నిలబడలేదు.

చాలా సందర్భాలలో మన నోరు మూతబడిపోతుంది. అయితే మనము శ్రమలలో ఉన్నప్పుడు ఆ శ్రమను గూర్చిన బాధ, వేదన బట్టి వచ్చే శాపకరమైన మాటలకు నోరు మూతబడే ఉండాలి. అయితే అదే పరిస్థితిలో దేవుని స్తుతించడానికి మాత్రము నోరు తెరవగలగాలి. ఈ జీవితము మనది కాదు గానీ దేవుని సొత్తు.

మన దేవుడు జయించినవాడు గనుక మనము కూడా మన ముందు ఉన్న దానిని జయించేవారిగా ఉంటాము.

ఇశ్రాయేలూ, నీ భాగ్యమెంత గొప్పది యెహోవా రక్షించిన నిన్ను పోలినవాడెవడు? ఆయన నీకు సహాయకరమైన కేడెము నీకు ఔన్నత్యమును కలిగించు ఖడ్గము -ద్వితీయోపదేశకాండము 33:29

మన జీవితము యొక్క విలువను పెంచేవాడుగా మన దేవుడు ఉన్నాడు. శత్రువు అనగా మనకు వ్యతిరేకమైన పరిస్థితులు. ఆ పరిస్థితిలో దేవుని శక్తి ప్రత్యక్షపరచబడుతుంది. తద్వారా దేవుని నామము మహిమపరచబడుతుంది. గనుకనే మన జీవితము విలువైనది.

ఇంత శ్రేష్ఠకరమైన జీవితమును మనకు దేవుడు ఇవ్వడానికి మనలను వెతికి రక్షించాడు. దేవుడే మనకు సహకారిగా లేకపోతే, మనము వెళ్ళే సందర్భములో అనేకసార్లు మన జీవితములను మనమే శపించుకొని, నాశనము చేసుకొనేవారమే, అయితే దేవునికే మహిమ కలుగునుగాక! ఆయన మనలను వెతికి రక్షించి ఆయన సొత్తుగా చేసుకున్నారు.

దేవుడు నాకు ఎత్తయిన కోటగాను కృపగల దేవుడుగాను ఉన్నాడు నా బలమా, నిన్నే కీర్తించెదను. -కీర్తనలు 59:17

ఎత్తయిన కోట అనే దానిని కొంచెము ఆలోచిస్తే, ఎత్తైన కోట మీద కూడా శత్రువు ప్రయత్నిస్తాడు గానీ, ఆ ప్రయత్నాలు నిలబడవు. అనేకమైనవి మన జీవితములో ప్రవేశించడానికి ప్రయత్నములు జరుగుతాయి కానీ, వాటి ప్రయత్నములు నెరవేరవు. ఆయన మన పక్షముగా ఉండగా, మనకు విరోధి ఎవరు?

అప్పుడతడు నాతో ఇట్లనెను–జెరుబ్బాబెలునకు ప్రత్యక్షమగు యెహోవా వాక్కు ఇదే; శక్తిచేతనైనను బలముచేతనైననుకాక నా ఆత్మచేతనే ఇది జరుగునని సైన్యములకు అధిపతియగు యెహోవా సెలవిచ్చెను. గొప్ప పర్వతమా, జెరుబ్బాబెలును అడ్డగించుటకు నీవు ఏమాత్రపు దానవు? నీవు చదునుభూమి వగుదువు; –కృప కలుగును గాక కృప కలుగునుగాక అని జనులు కేకలువేయగా అతడు పైరాయి తీసికొని పెట్టించును.౹ -జెకర్యా 4:6

గొప్ప పర్వతమా అనగా మనము వెళుతున్న శ్రమ, మన కళ్ళముందు ఉన్న పరిస్థితి చాలా గొప్పదిగాను, అసాధ్యమైనదిగాను ఉన్నదేమో, అయితే జెరుబ్బాబెలును అడ్డగించడము దానికి సాధ్యము కాదు. అనగా ఏర్పాటు చేయబడిన వారైన మనలకు అడ్డుగా రావడానికి ఏ పరిస్థితికీ ఏ శ్రమకూ సాధ్యము కాదు, అనుమతి లేదు.అది ఎంత ఎత్తైనదైనాసరే చదును భూమిగా మారవలసిందే. అనగా మన ఎదురుగా ఎంత ఎత్తుగా శ్రమ రేగినా సరే, అది మన కాళ్ళ వద్దకు తగ్గించబడవలసినదే గనుకనే మన జీవితము ధన్యకరమైనది.

అందుకే మన జీవితములో దేవునిని విడిచిపెట్టకూడదు. ఆయనను దేవునిగా కలిగినవారు ధన్యులు. అటువంటివారి జీవితములో ఏ శ్రమ వచ్చినా సరే, అది దేవుని మహిమ కొరకే! అందుకే ఆ శ్రమ సమయములో దేవుని ఆశ్రయించేవారిగా ఉండాలి. ఒంటరిగా ఆయన సన్నిధిలో కనిపెట్టుకున్నప్పుడు, మనము సహాయము, సమాధానము పొందుకోగలుగుతాము.

ఈ సత్యమును ఎరిగి, అటువంటి జీవితమును మనకు ఇచ్చినందుకు మన దేవునిని స్తుతించి మహిమపరుద్దాము.

ఆరాధన గీతము

నిన్నే ప్రేమింతును నిన్నే ప్రేమింతును యేసు
నిన్నే ప్రేమింతును నే వెనుదిరుగా

నీ సన్నిధిలో మోకరించి నీ మార్గములో సాగెదా
నిరసించక సాగెదా నే వెనుదిరుగా

నిన్నే పూజింతును నిన్నే పూజింతును యేసు
నిన్నే పూజింతును నే వెనుదిరుగా

నీ సాక్షిగా జీవించి నీ మహిమకై ఉండెదన్
నిరసించక సాగెదా నే వెనుదిరుగా

నిన్నే కీర్తింతును నిన్నే కీర్తింతును యేసు
నిన్నే కీర్తింతును నే వెనుదిరుగా

నీ సాక్షిగా జీవించి నీ మహిమనై ఉండెదా
నిరసించక సాగెదా నే వెనుదిరుగా