11-02-2024 – ఆదివారం మొదటి ఆరాధన

ఆరాధన వర్తమానము

లేఖనములు మనకు తెలియచేస్తున్న మాట – “ఆయనను స్తుతించుట మంచిది”. మన వ్యక్తిగతమైన జీవితములు దేవునిని ఆధారము చేసుకునే ఉన్నాయి ఈ సత్యము గుర్తించినవారు తమ దేవుని స్తుతించడానికి ఖచ్చితముగా వస్తారు.

ఒక్క క్షణము ఆయన మౌనముగా ఉంటే, మన జీవితములు ఎప్పుడో నాశనము అయిపోయేవి. దేవుని మనసు గురించి దావీదు కనుగొనగలిగాడు. అలాగే యోనా కూడా దేవుని మనస్సుని ఎరిగి ఉన్నాడు. “ఒకవేళ నినెవే ప్రజలు పశ్చాత్తాపం పడితే దేవుడు చేయ దలచిన నాశనము చెయ్యడు అని యోనా దేవుని మనసును ఎరిగి ఉన్నాడు”.

ఈరోజు దేవుని ఆరాధించడానికి, మనము కూడా దేవుని గూర్చిన సత్యము ఎరిగి ఉండాలి. సత్యము ఎవరికైతే తెలియచేయబడుతుందో, వారు స్వతంత్రులుగా చేయబడతారు. మన దేవుడు ఏమై ఉన్నాడు? అనే ప్రశ్న మన ప్రతీ సందర్భములో మన ముందు ఉంటే, మన దేవుని గూర్చిన సత్యమును గ్రహించగల స్థితిలో ఉంటాము.

రాజైన దావీదుకూడను బహుగా సంతోషపడి, సమాజము పూర్ణముగా ఉండగా యెహోవాకు ఇట్లు స్తోత్రములు చెల్లించెను–మాకు తండ్రిగానున్న ఇశ్రాయేలీయుల దేవా యెహోవా, నిరంతరము నీవు స్తోత్రార్హుడవు.౹ -1 దినవృత్తాంతములు 29:10

ఈ మాట మన జీవితములలో ఎంతో ప్రాముఖ్యమైనది. మన జీవితములు దేవుని మహిమ కొరకు సృష్టించబడ్డాయి. “చింతలన్ని కలిగిననూ నిందలన్ని నన్ను చుట్టినా సంతోషముగ నేను నా యేసయ్యా నిన్నే వెంబడింతును” అనే అనుభవము మనము అందరము కలిగి ఉండాలి. అప్పుడే నిరంతరము స్తోత్రార్హుడవు అనే మాటకు అర్థము ఉంటుంది.

మన జీవితములో ఎటువంటి పరిస్థితులు ఉన్నా సరే నా జీవితములో దేవుడు నిరంతరము స్తోత్రార్హుడు అనే ఆలోచన కలిగి ఉండాలి. దేవుని స్తుతించుట మనకే మంచిది. కష్టమైనా నష్టమైనా నా జీవితములో దేవుడు స్తోత్రార్హుడు.

మన ప్రభువైన యేసుక్రీస్తుయొక్క తండ్రియగు దేవుడు స్తుతింపబడును గాక. ఆయన క్రీస్తునందు పరలోకవిషయములలో ఆత్మసంబంధమైన ప్రతి ఆశీర్వాదమును మనకనుగ్రహించెను.౹ -ఎఫెసీయులకు 1:3

మన ఆశీర్వాదమునకు ఆత్మీయ విషయములు ముడిపడి ఉన్నాయి. అనగా ఆశీర్వాదము వెనుక మనము పరిగెట్టవలసిన అవసరము లేదు గానీ, ఆత్మీయముగా మనము ఎదిగినపుడు ఆ ఆశీర్వాదములు మన వెంటే వస్తాయి.

అత్మీయముగా ఎదగటము అంటే ఏమిటి? దేవుని గురించిన సత్యము తెలుసుకోవడమే! వాక్యానుసారముగా నడవడము అంటే, దేవుని మాట ప్రకారము నడవటమే. భయభక్తులు కూడా దేవుని యందు కలిగి ఉండుటయే. ఆజ్ఞలు కూడా దేవుడు ఇచ్చినవే. గనుక దేవుని గూర్చి తెలుసుకోవడమే మనము ఆత్మీయముగా ఎదుగుట.

ఎందుకు మన జీవితములలో ఆయన నిరంతరము స్తోత్రార్హుడు అని చూస్తే –

యెహోవా, భూమ్యాకాశములయందుండు సమస్తమును నీ వశము; మహాత్మ్యమును పరాక్రమమును ప్రభావమును తేజస్సును ఘనతయు నీకే చెందుచున్నవి; యెహోవా, రాజ్యము నీది, నీవు అందరిమీదను నిన్ను అధిపతిగా హెచ్చించుకొని యున్నావు.౹ ఐశ్వర్యమును గొప్పతనమును నీవలన కలుగును, నీవు సమస్తమును ఏలువాడవు, బలమును పరాక్రమమును నీ దానములు, హెచ్చించు వాడవును అందరికి బలము ఇచ్చువాడవును నీవే.౹ -1 దినవృత్తాంతములు 29:11-12
మాకు తండ్రివి నీవే, అబ్రాహాము మమ్ము నెరుగక పోయినను ఇశ్రాయేలు మమ్మును అంగీకరింపకపోయినను యెహోవా, నీవే మా తండ్రివి అనాదికాలమునుండి మా విమోచకుడని నీకు పేరే గదా. -యెషయా 63:16

“అనాదికాలమునుండి మా విమోచకుడని నీకు పేరే గదా” అంటే మన జీవితములో చూస్తే, మనము భూమి మీదకి వచ్చినప్పటినుండి ఆయనే మనకు తండ్రి. అబ్రహాము విశ్వాసులకు తండ్రి, ఇశ్రాయేలు ప్రజలు దేవుడు ఏర్పాటు చేసుకున్న ప్రజలు. విమోచకుడు అంటే పరిస్థితులు బాగోనపుడు ఆ పరిస్థితినుండి విడిపించేవాడు.

నేను పుట్టినప్పటినుండి ఆయన నాకు విమోచకుడుగా ఉన్నాడు. ఆయన యందు నేను విశ్వాసము ఉంచకమునుపు, ఆయన సొత్తుగా నేను మారకమునుపు కూడా ఆయనే నన్ను విమోచించినవాడుగా ఉన్నాడు.

దేవుడైన యెహోవా ఇశ్రాయేలుయొక్క దేవుడు స్తుతింపబడును గాక ఆయన మాత్రమే ఆశ్చర్యకార్యములు చేయువాడు. -కీర్తనలు 72:18

మన జీవితములు ఆశ్చర్య కార్యములతో నిండి ఉంటాయి. ఎందుకంటే ఆయన ఆశ్చర్య కార్యములు చేయువాడు.

స్తుతియాగము అర్పించువాడు నన్ను మహిమ పరచుచున్నాడు నేను వానికి దేవుని రక్షణ కనుపరచునట్లు వాడు మార్గము సిద్ధపరచుకొనెను. -కీర్తనలు 50:23

స్తుతియాగము అర్పించడము అంటే ఆయనను ఆరాధించడము. ఆయనను ఆరాధించినపుడు ఆయనకు మహిమ కలుగుతుంది. ఆయన ఆశ్చర్యకార్యములు జరిగించువాడు అని ఒప్పుకొని, ఆ సత్యముపై నిలబడుటను బట్టి ఆయనకు మహిమ కలుగుతుంది. దానిని బట్టి మన ప్రతీ పరిస్థితిలో దేవుని యొక్క రక్షణ అనగా కాపుదల, విడుదల ఇలా మనము తప్పించబడుట కొరకు అవసరమైన ప్రతీ కార్యము ఆయన జరిగించేవాడుగా మన దేవుడు ఉన్నాడు, దానికొరకైన మార్గము దేవుడు తెరిచేవాడుగా ఉన్నడు. అందుకే నిజమైన ఆరాధన ఎంతో ప్రాముఖ్యమైనది.

నాయందు నిలిచియుండుడి, మీయందు నేనును నిలిచియుందును. తీగె ద్రాక్షావల్లిలో నిలిచి యుంటేనేగాని తనంతట తానే యేలాగు ఫలింపదో, ఆలాగే నాయందు నిలిచియుంటేనేకాని మీరును ఫలిం పరు.౹ ద్రాక్షావల్లిని నేను, తీగెలు మీరు. ఎవడు నాయందు నిలిచియుండునో నేను ఎవనియందు నిలిచి యుందునో వాడు బహుగా ఫలించును; నాకు వేరుగా ఉండి మీరేమియు చేయలేరు.౹ -యోహాను 15:4-5

ఎవడు నాయందు నిలిచి ఉండునో, అనగా మనము వాక్యమందు నిలిచి ఉంటే, మనము ఖచ్చితముగా ఫలిస్తాము. ఆయనకు వేరుగా ఉండి అనగా ఆయన వాక్యమునకు వేరుగా ఉండి మనము ఏమీ చేయలేము. మనము నిలబడితే చాలు ఆయన మనయందు నిలిచి ఉండుటకు ఇష్టము కలిగి ఉన్నాడు. గనుక ఆయనయందు నిలిచి ఉండుట ఎంతో ప్రాముఖ్యమైనది.

యెహోవా, భూమ్యాకాశములయందుండు సమస్తమును నీ వశము – 1 దినవృత్తాంతములు 29:11.

మన జీవితములలో ప్రతీ చిన్న దాని విషయములో కూడా మన దేవుడు మనలను తృప్తిపరచాలి అని కోరుకుంటాడు. మన ఆలోచనలు మనముకలిగి ఉన్న వనరులపై ఆధారపడి ఉంటుంది గానీ, దేవుడు మాత్రము ఆశ్చర్య కార్యములు చేసేవాడు.

నాయందు మీరును మీయందు నా మాటలును నిలిచియుండినయెడల మీకేది యిష్టమో అడుగుడి, అది మీకు అనుగ్రహింపబడును.౹ -యోహాను 15:7

మనము ఆయనయందు నిలిచి అప్పుడు మనము ఆయనను ఏమి అడిగినా సరే ఆయన దయచేసేవాడుగా ఉంటాడు. ఆయన యందు నిలిచి ఉండటము అంటే, దేవుడు ఏది సరియైనది కాదు అని ప్రభువు తెలియచేస్తాడో, దానిని సరిచేసుకుని ముందుకువెళ్ళడమే. అనగా దేవునికి ఏది ఇష్టమో తెలుసుకుని ఆ ప్రకారము మనలను మనమే సిద్ధపరచుకోవడమే ఆయనయందు నిలిచి ఉండటము.

ఆరాధన గీతము

నా ప్రియ యేసు పదివేలలో అతి సుందరుడా…సుందరుడా…
యేషువా..ఆ…ఆ..ఆ..ఆ…ఆ…ఆ..
యేషువా..ఆ…ఆ..ఆ..ఆ…ఆ…ఆ.. ఆ

నీదే రాజ్యము – నీదే బలము నీకె మహిమ – కలుగును ఆమెన్
యేషువా..ఆ…ఆ..ఆ..ఆ…ఆ…ఆ..
యేషువా..ఆ…ఆ..ఆ..ఆ…ఆ…ఆ.. ఆ