28-1-2024 – ఆదివారం మొదటి ఆరాధన

వారము కొరకైన వాక్యము

2024 అనుభవముతో కూడినది అయి ఉంది గనుక ఆచారయుక్తమైన భక్తి మన జీవితములో ఇక ఉండదు. ప్రతీ అడుగులో, ప్రతి సమస్యలో దేవుని అనుభవమును కలిగినవారిగా ఉంటాము. మన కళ్ళముందు ఉన్న పరిస్థితి ఎలాంటిది అయినా సరే వాటిని మార్చగలిగిన శక్తి కలవాడు మన దేవుడు. ఈ సంవత్సరము యేహోషువ సంవత్సరము అనగా విజయకరమైన సంవత్సరము.

ఈరోజు “ఆయన విషయమై అభ్యంతరపడవద్దు” అనే సంగతి గూర్చి నేర్చుకుందాము. మన వ్యక్తిగతమైన జీవితములలో అనేకమైనవి మనకు మనమే కోల్పోయినవారిగా ప్రవర్తిచేవారిగా ఉంటాము.

యేసు, వాడు పడియుండుట చూచి, వాడప్పటికి బహుకాలమునుండి ఆ స్థితిలోనున్నాడని యెరిగి–స్వస్థపడ గోరుచున్నావా అని వానినడుగగా -యోహాను 5:6

యేసయ్య అతనిని చూచి, అతను ఆ పరిస్థితులలో 38 సంవత్సరములనుండి ఉన్నాడు అని యెరిగినప్పటికీ, యేసయ్య అతనిని ఎందుకు స్వస్థపడ గోరుచున్నావా? అని అడుగుతున్నాడు.

ఆ వ్యాధికలిగినవాడు ఎవడైనా వచ్చి ఆ కోనేటిలో దించుతాడేమో అని చూస్తున్నాడు.

ఆయన యింట ప్రవేశించిన తరువాత ఆ గ్రుడ్డివారు ఆయనయొద్దకు వచ్చిరి. యేసు–నేను ఇది చేయగలనని మీరు నమ్ముచున్నారా? అని వారి నడుగగా -మత్తయి 9:28

అక్కడ యాయెరు ఇంటిలో జరిగిన అద్భుతము చూసే యేసయ్య వద్దకు వచ్చారు. ఆ సంగతి కూడా ప్రభువైన యేసయ్యకు తెలిసే ఉంది. అయినప్పటికీ యేసయ్య అడగటానికి కారణము ఏమిటి? ఈ సత్యము తెలియకుండా మనము యేసయ్య వద్దకు వస్తే దాని వలన ప్రయోజనము లేదు.

మూడవసారి ఆయన–యోహాను కుమారుడవైన సీమోనూ, నన్ను ప్రేమించుచున్నావా? అని అతనిని అడిగెను. – నన్ను ప్రేమించుచున్నావా అని మూడవసారి తన్ను అడిగినందుకు పేతురు వ్యసనపడి–ప్రభువా, నీవు సమస్తము ఎరిగినవాడవు, నిన్ను ప్రేమించుచున్నానని నీవే యెరుగుదువని ఆయనతో చెప్పెను.౹ -యోహాను 21:17

మన అందరం యేసయ్య చెయ్యగలడు అని నమ్మే వచ్చాము, అయితే ఇంక లోతైన సత్యము మనము యెరిగిఉండాలి. ఈ ధ్యానము ద్వారా దేవుని నియమము మనము ఎరిగి ఉండాలి.

అదేమనగా–యేసు ప్రభువని నీ నోటితో ఒప్పుకొని, దేవుడు మృతులలోనుండి ఆయనను లేపెనని నీ హృదయమందు విశ్వసించినయెడల, నీవు రక్షింపబడుదువు.౹ ఏలయనగా నీతి కలుగునట్లు మనుష్యుడు హృదయములో విశ్వసించును, రక్షణ కలుగునట్లు నోటితో ఒప్పుకొనును.౹ -రోమా 10:9-10

నీతి కలగాని అంటే నీ హృదయమందు విశ్వసించాలి, రక్షణ కలగలి అంటే నోటితో ఒప్పుకోవాలి. బేతెస్ద కోనేరు వద్ద ఉన్న వ్యక్తి హృదయమందు విశ్వసించినవాడుగా ఉన్నాడు, గుడ్డివారు విశ్వసించినవారుగా ఉన్నాడు. ఆ విశ్వసించిన దానిని పలికినప్పుడు రక్షణ కలుగుతుంది, అనగ విడుదల కలుగుతుంది.

నేను ఇది చేయగలనని మీరు నమ్ముచున్నారా? అని వారి నడుగగా వారు–నమ్ముచున్నాము ప్రభువా అని ఆయనతో చెప్పిరి. అప్పుడాయన వారి కన్నులు ముట్టి–మీ నమ్మికచొప్పున మీకు కలుగుగాక అని చెప్పినంతలో వారి కన్నులు తెరువబడెను. -మత్తయి 9:28-30

మన వ్యక్తిగతమైన జీవితములలో మనం హృదయమందు విశ్వసించేవారముగా ఉన్నాము గానీ, ప్రకటిస్తున్నామా?

–విశ్వసించితిని గనుక మాటలాడితిని అని వ్రాయబడిన ప్రకారము అట్టి విశ్వాసముతోకూడిన ఆత్మగలవారమై, ప్రభువైన యేసును లేపినవాడు యేసుతో మమ్మును కూడ లేపి, మీతోకూడ తన యెదుట నిలువ బెట్టునని యెరిగి, మేమును విశ్వసించుచున్నాము గనుక మాటలాడుచున్నాము. -2 కొరింథీయులకు 4:14

దేవుని కార్యముల విషయములలో మనము కేవలము విశ్వసించుట మాత్రమే కాదు గానీ, ఆ విశ్వాసమును బట్టి ప్రకటించేవారుగానూ, మాటలాడేవారుగానూ ఉండాలి. “ప్రభువైన యేసును లేపినవాడు యేసుతో మమ్మును కూడ లేపి” అనగా పరిస్థితి ఏదైనా, ప్రభువ్హు మనలను ఖచ్చితముగా లేపువాడు.

ఎటుబోయినను శ్రమపడుచున్నను ఇరికింపబడువారము కాము; అపాయములోనున్నను కేవలము ఉపాయము లేనివారము కాము;౹ -2 కొరింథీయులకు 4:8

ఈ సత్యము ఎరిగినవాడిగా పౌలు అనేక సందర్భాలలో తాను ఎరిగిన దేవుని సత్యమును ప్రకటించినవాడుగా ఉన్నాడు. మనము ఆరాధించిన సత్యము – “నా భారము వహియించు యేసు నా కొరకై మరణించె యేసు”. నా కొరకు యేసయ్య మరణించాడు, ఆ మరణములోనుండి నాకు జీవము ఇవ్వబడింది. ఆ జీవమును బట్టే మన పరిస్థితిలలో జీవము స్థిరపరచబడుతుంది.

“ప్రభువైన యేసును లేపినవాడు” ఎటువంటి పరిస్థితులలోనుండి లేపాడు? మరణములోనుండి లేపాడు. గనుక మనము మరణకరమైన పరిస్థితులలో ఉన్నప్పటికీ, మనలను సహితము లేపగలిగినవాడు.

“మీతోకూడ తన యెదుట నిలువ బెట్టునని యెరిగి, మేమును విశ్వసించుచున్నాము గనుక మాటలాడుచున్నాము” అనగా ఖచ్చితముగా మేము ప్రకటించినదానికి సాక్ష్యముగా ఉంటాము అని అర్థము.

మనము కూడా దేవుని కార్యము జరగడానికి ప్రార్థన చేస్తున్నాము. అయితే కేవలము ప్రార్థన చేయడమే కాదు గానీ, ఏ సత్యము నీవు నమ్మావో, ఆ సత్యమును నీవు ప్రకటించాలి. షద్రకు మేషాకు అబెద్నగో అనువారు దేవుని గూర్చి విశ్వసించినదానిని రాజు ముందు ప్రకటించారు. ఆ ప్రకటించినదానిని బట్టి, జనముల ముందు సాక్ష్యముగా నిలబడ్డారు.

యేసయ్య కూడా ఇదే నియమము పాటించాడు. మనము కూడా అదే నియమమును పాటించాలి. “విశ్వసించితిని గనుక మాటలాడితిని అని వ్రాయబడిన ప్రకారము” మనము ధైర్యము కలిగి మనము విశ్వసించినదానిని ప్రకటిద్దాము.

విశ్రాంతిదినము వచ్చినప్పుడు ఆయన సమాజమందిరములో బోధింపనారంభించెను. అనేకులు ఆయన బోధ విని ఆశ్చర్యపడి–ఈ సంగతులు ఇతనికి ఎక్కడనుండి వచ్చెను? ఇతనికియ్యబడిన ఈ జ్ఞానమెట్టిది? ఇతని చేతుల వలన ఇట్టి అద్భుతములు చేయబడుచున్నవి? ఇదేమి? ఇతడు మరియ కుమారుడు కాడా? ఇతడు యాకోబు, యోసే, యూదా, సీమోను అనువారి సహోదరుడగు వడ్లవాడు కాడా? ఇతని సోదరీమణులందరు మనతో నున్నారు కారా? అని చెప్పుకొనుచు ఆయన విషయమై అభ్యంతరపడిరి. -మార్కు 6:2-3

ఇక్కడ ఉన్నవారు యేసయ్యను నమ్మని వారుగా ఉన్నారు. ఆయన గూర్చి అభ్యంతరపడినవారుగా ఉన్నారు. గనుక ఏమి జరిగింది అంటే,

అందువలన కొద్దిమంది రోగులమీద చేతులుంచి వారిని స్వస్థపరచుట తప్ప మరి ఏ అద్భుతమును ఆయన అక్కడ చేయజాలకపోయెను. ఆయన వారి అవిశ్వాసమునకు ఆశ్చర్యపడెను. -మార్కు 6:5

విశ్వాసము ఉన్న చోటనే ప్రకటించగలిగిన ధైర్యము ఉంటుంది. అదే విశ్వాసము లేకపోతే, నోటివెంట దేవుని నమ్మినట్టుగా నీవు మాటలాడలేవు.

పునాది వేయబడిన నాటి నుండి 5 రకములుగా దేవుడు ఆశీర్వదిస్తాను అని ప్రభువు చెప్పారు. ఇది మందిరము కొరకైన ఆసక్తి కలిగి ఆ మందిరపనిలో చేయి వేసిన ప్రతి ఒక్కరి జీవితములో కలుగుతుంది. అవేవనగా

1. భాగ్యవంతమైన జీవితము
2. ఫలభరితమైన జీవితము
3. ఆరోగ్యవంతమైన జీవితము
4. ఘనమైన జీవితము
5. పరిశుద్ధమైన జీవితము

అయితే ఇవి పొందాలి అంటే, దేవుడు ఈ ఆశీర్వాదములు ఇస్తాను అన్నాడు కాబట్టి, ఒకవేళ ఆ ఆశీర్వాదమునకు సంబంధించిన సూచన ఏమీ కనపరచనిదానిని బట్టి మనము అభ్యంతరపడకూడదు. అయితే మనము విశ్వసించినదానిని బట్టి అదే ఆశీర్వాదమును ప్రకటించాలి. అప్పుడు ఆ ఆశీర్వాదము నీవు పొందటానికి అవసరమైన కార్యము దేవుడు జరిగించేవాడుగా ఉంటాడు.

గనుక దేవుని కొరకైన సాక్షులుగా ఉండులాగున మనము విశ్వసించినదానిని ప్రకటిద్దాము.