21-1-2024 – ఆదివారం మొదటి ఆరాధన – మీరు తీగలు

వారము కొరకైన వాక్యము

ఈరోజు “మీరు తీగెలై ఉన్నారు” అనే విషయమును గూర్చి నేర్చుకుందాము.

ద్రాక్షావల్లిని నేను, తీగెలు మీరు. ఎవడు నాయందు నిలిచియుండునో నేను ఎవనియందు నిలిచి యుందునో వాడు బహుగా ఫలించును; నాకు వేరుగా ఉండి మీరేమియు చేయలేరు.౹ -యోహాను 15:5

తీగెలు మీరు అనే ప్రకటన ఇక్కడ జరిగింది. అనగా ద్రాక్షావల్లిలో ఉన్న జీవము నీలో ప్రవహిస్తుంది అనే సత్యము నీవు గుర్తించాలి. మనము తీగెలు గనుక ఆయనలోని జీవము మనలో ప్రవహించి మన జీవితము ఫలించే జీవితముగా ఉంటుంది.

అయితే మనము ఎలా ఉంటే యేసయ్య అనే ద్రాక్షవల్లికి తీగెగా ఉండగలము? భౌతికముగా ఒక ద్రాక్షావల్లిని చూసినప్పుడు దాని ఫలమును బట్టే అది ద్రాక్షతీగెగా మనము గుర్తిస్తాము. అలాగే మనము కనపరచే ఫలములను బట్టే మనము తీగెలుగా గుర్తించబడతాము.

మనము ఈరోజున పరీక్షించుకోవాలి. తీగెగా ప్రకటించబడిన మనలో పనికిరానివి ఏమైనా ఉన్నాయా? ద్రాక్షావల్లి, మరియు తీగెలను గమనిస్తే, వల్లిలో ఉన్నది తీగెలలోనికి వెళ్ళి ఆ తీగెలను ఫలింపచేసేదిగా ఉంది. యేసయ్య ద్రాక్షావల్లిగా మనము తీగెలుగా ఉన్నాము కాబట్టి, యేసయ్యలో ఏముంది మనము ఎలా ఉండాలి అనేది గ్రహించినప్పుడు మన జీవితములు ఫలభరితముగా మార్చబడతాయి.

అయితే మీరు చీకటిలోనుండి ఆశ్చర్యకరమైన తన వెలుగులోనికి మిమ్మును పిలిచిన వాని గుణాతిశయములను ప్రచురముచేయు నిమిత్తము, ఏర్పరచబడిన వంశమును, రాజులైన యాజకసమూహమును, పరిశుద్ధ జనమును, దేవుని సొత్తయిన ప్రజలునై యున్నారు.౹ -1 పేతురు 2:9

పిలిచిన వాని గుణాతిశయములను ప్రచురముచేయుట అనగా యేసయ్య యొక్క గుణములను కలిగి ఉన్నాడో అదే గుణములను ప్రచురము చేయుటకు తీగెగా చేయబడ్డాము.

ఆయన పరిశుద్ధుడు గనుక ఆయనలో తీగెగా ఉన్న మనలో పరిశుద్ధత కనపరచునట్లుగా మన జీవితము ఉండాలి. మనమున్నవి చివరి ఘడియలు గనుక సత్యమును గ్రహించి మనలను మనమే సిద్ధపరచుకోవాలి.

ద్రాక్షావల్లిని నేను, తీగెలు మీరు. ఎవడు నాయందు నిలిచియుండునో నేను ఎవనియందు నిలిచి యుందునో వాడు బహుగా ఫలించును; అనగా ఆయన పరిశుద్ధుడు గనుక మనము పరిశుద్ధత కలిగి జీవిస్తే మనము బహుగా ఫలిస్తాము. అయితే మనము ఆయనవంటి పరిశుద్ధత కలిగిఉండకుండా అడ్డుగా, దేవునికి మహిమకరము కానిది ఏమైనా ఉంటే అది సరిచేసుకోవాలి. అలా కాని యెడల పరిశుద్ధతను మనము కోల్పోతాము తద్వారా ఫలము పోగొట్టుకొనేవారముగా అయిపోతాము.

చాలా సందర్భాలలో, మంచి జీవితముగా దేవునిచేత ప్రకటించబడిన మనము మన ఫలమును పోగొట్టుకొనే రీతిలో ఉండిపోతున్నాము. దానికి కారణము ఆయన గుణములను మన జీవితము ద్వారా కనుపరచాలి అనే విషయము మనము ఎరిగి ఉండకపోవడమే! అయితే ఈరోజు దేవుడు జ్ఞాపకము చేసినదానిని బట్టి సరిచేసికొందాము.

క్రీస్తుయేసునకు కలిగిన యీ మనస్సు మీరును కలిగియుండుడి -ఫిలిప్పీయులకు 2:5

ఆయన వల్లిగా ఉన్నాడు, మనము తీగెలుగా ఉన్నాము. వల్లిగా ఆయన ఒక మనస్సు కలిగి ఉన్నాడు గనుక తీగెలుగా ఉన్న మనము కూడా అదే మనస్సు కలిగి ఉండాలి.

ఆయన దేవుని స్వరూపము కలిగినవాడైయుండి, దేవునితో సమానముగా ఉండుట విడిచిపెట్టకూడని భాగ్యమని యెంచుకొనలేదు గాని౹ మనుష్యుల పోలికగా పుట్టి, దాసుని స్వరూపమును ధరించుకొని, తన్ను తానే రిక్తునిగా చేసికొనెను.౹ మరియు, ఆయన ఆకారమందు మనుష్యుడుగా కనబడి, మరణము పొందునంతగా, అనగా సిలువమరణము పొందునంతగా విధేయత చూపినవాడై, తన్నుతాను తగ్గించు కొనెను.౹ -ఫిలిప్పీయులకు 2:6-8

ఆయన మనస్సు ఎటువంటిది? తగ్గింపు కలిగిన మనస్సు, విధేయత కలిగిన మనస్సు. మనము కూడా తగ్గింపు కలిగి, విధేయయ కలిగి ఖచ్చితముగా ఉండాల్సిందే. పరలోకములో ఉన్న 24 పెద్దలు మంచి జీవితములు జీవించినటువంటివారు పరలోకములో వారి కిరీటములను దేవుని యెదుట పడవేసి సాగిలపడ్డారు.

మన పితరులు దేవుని మాటకు విధేయత చూపినదానిని బట్టే వారి జీవితములు శ్రమలగుండా వెళ్ళారు. మనము ఎలా ఉంటున్నాము? మన ఆత్మలో వినబడుతున్న గద్దింపు వాక్కును త్రోసివేస్తున్నామా? అయితే మనం ఫలింపును కోల్పోతున్నాము. అయితే మనము ఖచ్చితముగా దేవుని మాటకు విధేయత చూపించవలసినదే. యేసయ్య మనసులో దేవుని మాట మాత్రమే ఆఖరు. అలాగే యేసయ్య తగ్గింపు కలిగినవాడుగా ఉన్నాడు. ఇదే గుణలక్షణములు మనము కలిగి ఉండాలి.

తండ్రియందు నేనును నాయందు తండ్రియు ఉన్నామని నీవు నమ్ముటలేదా? నేను మీతో చెప్పుచున్న మాటలు నా యంతట నేనే చెప్పుట లేదు, తండ్రి నాయందు నివసించుచు తన క్రియలుచేయుచున్నాడు.౹ తండ్రియందు నేనును నాయందు తండ్రియు ఉన్నామని నమ్ముడి; లేదా యీ క్రియల నిమిత్తమైనను నన్ను నమ్ముడి.౹ -యోహాను 14:10-11

యేసయ్య తండ్రితో ఏకమైనవాడుగా ఉండే గుణము కలిగినవాడు. మనము యేసయ్యకు తీగెగా ఉన్నాము. యేసయ్య లో తండ్రితో ఏకమై ఉండే జీవము ఉంది. మనము కూడా యేసయ్యతో ఏకమై ఉండే జీవితము కలిగి ఉండాలి.

యేసయ్య తన తండ్రి క్రియలు జరిగించునట్లు యేసయ్య జీవితము ఉంది. యేసయ్యను అంగీకరించిన మన జీవితములో కూడా దేవుని కార్యములు జరిగించబడవలసిన విధముగా మనము ఉండాలి. తండ్రి క్రియలు అన్నీ సూపర్ నేచురల్ క్రియలు. యేసయ్య జీవితములో సూపర్ నేచురల్ క్రియలే జరిగించాడు. ఆయనలో ఉన్న మన ద్వారా కూడా దేవుని సూపర్ నేచురల్ కార్యములు మన జీవితము ద్వారా జరగాలి! ద్రాక్షావల్లి వలే తీగెలుగా ఉన్న మన జీవితములో అదే లక్షణము కనబడాలి. ఒకవేళ సూపర్ నేచురల్ కార్యములు జరగట్లెడు అంటే, ఆయనతో ఏకమైన జీవితము లేదు అని అర్థము. అయితే ఆ పనికిరానిది తీసివేద్దాము.

నేను ఈ లోకములో ఉన్నప్పుడు లోకమునకు వెలుగునని చెప్పెను.౹ -యోహాను 9:5
మీరు లోకమునకు వెలుగైయున్నారు; కొండమీదనుండు పట్టణము మరుగై యుండనేరదు. -మత్తయి 5:14

యేసయ్య లోకమునకు వెలుగై ఉన్నారు. ఆయనలో తీగెలుగా ఉన్న మనము కూడా వెలుగై ఉండాలి. కొండమీద ఉండే పట్టణము మరుగై ఉండనేరదు. అనగా మన జీవితము మరుగున పడే జీవితము కాదు గానీ, ఉన్నతమైన స్థానములో ఉండవలసినదే అయితే దానికి ఏమి చేయాలి అంటే, “వెలుగు గా ఉండాలి”. లోకము అంతటా చీకటి ఉంది. ఆ చీకటిలో వెలుగా మనము కనపడాలి గానీ ఆ చీకటిలో కలిసిపోకూడదు. చీకటి పరిస్థితులలో మనము ఎలా నిలబడతామో అనే పరీక్ష ప్రభువు పెడతాడు. ఆ పరీక్ష లో మనము ఉత్తీర్ణులమైనప్పుడు ఖచ్చితముగా వెలుగుగా కనపరచబడతాము.

వాక్యమే వెలుగు, మనము ఉన్న చీకటి పరిస్థితిలో మనము వాక్యము ప్రకారము నిలబడటమే వెలుగును కనపరచడమే. మనలను పరీక్షించుకుందాము. దేవుని సమయమును దొంగిలించే పనికిరాని తీగె ఏముంది నీ జీవితములో? మన జీవితము కొండమీద ఉండే పట్టణము అనగా ఉన్నతమైన ఉద్దేశ్యము కొరకు ఇవ్వబడిన జీవితము. గనుక వాక్యమునకు వ్యతిరేకముగా పనిచేసే ప్రతీదీ తీసివేద్దాము.

• మనము పరిశుద్ధత కలిగి ఉండాలి

• విధేయత మరియు తగ్గింపు కలిగి ఉండాలి

• తండ్రితో ఏకమై ఉండాలి

• తండ్రి క్రియలు జరిగేలా జీవితమును సిద్ధపరచుకోవాలి.

• యేసయ్య వెలుగుగా ఉన్న విధముగా మనము కూడా చీకటి పరిస్థితులలో వెలుగును కనబరచాలి.