14-1-2024 – ఆదివారం రెండవ ఆరాధన – దేవునియొక్క ప్రణాళిక నీలో నెరవేర్చబడటానికి

వారము కొరకైన వాక్యము

మన జీవితములలో మన శక్తిని బట్టి, మనము కలిగినదానిని బట్టి మనము చేసుకోలేనివి అనేకములు ఉన్నవి. అయితే దేవుని వాక్కును బట్టీ, ఆయాన్ సన్నిధిని బట్టి అనేకమైనవి మనము పొందుకోవచ్చు. మన దేవుడు తన వాక్కును పంపి మనము పడినగుంటలోనుండి లేపేవాడుగా ఉన్నాడు. అనగా మనము ఎక్కడైతే ఆగిపోయామో, అక్కడనుండి మనము లేపబడతాము. దేవుని వాక్కు జీవమును కలుగచేసేదిగా ఉంది.

ప్రతి ఆదివారము మన జీవితములకు దేవుడు ఇచ్చిన అపాయింట్మెంట్ దినము. ఆ దినమున మన ఆత్మకు అవసరమైన ప్రతీ విషయమును గూర్చి తన వాక్కును విడుదల చేసేవాడుగా ఉంటాడు గనక, ఆయన సన్నిధిలో ఉన్న మనము అందరమూ ధన్యులము. ఎక్కడ మరుగుచేయబడ్డారో, ఎక్కడ పడిపోయారో, ఎక్కడ ఆగిపోయారో అక్కడ నుండి ఆయన బలముచేత తిరిగి లేపుతున్నాడు.

గర్భఫలము దయచేసేది దేవుడే. గర్భఫలము ఇచ్చాడు అని చెప్పటానికి బాహ్యముగా ఏమీ కనపరచకపోయినప్పటికీ, ఒక చిన్న ఆధారము మొదటిగా కనపరచబడుతుంది. అయితే తొమ్మిది నెలల తరువాత అదే చిన్న ఆధారము, బిడ్డగా బయలుపరచబడుతుంది. మన జీవితములో కూడా ముగించబడవలసినదాని కొరకు ఆధారము ఈరోజే కనబడుతుంది. ఎలా అయితే గర్భఫలము విషయములో క్రమక్రమముగా ఆధారము బలపరచబడుతుందో, నీ జీవితములో ముగించబడవలసినదానికొరకు కూడా ముందుకు వెళ్ళుతుండగా బలమైనవి కనపరచబడతాయి.

ఈ వారము ఏ విషయములో ఆధారము కనపడుతుందో, కనిపెట్టండి. ప్రవక్త నోట దేవుడు పలికించినమాట నమ్మి కనిపెట్టండి.

ఈరోజు దేవుని ప్రణాళిక మన జీవితములో ఎలా నెరవేరుతుంది అని నేర్చుకుందాము. దేవుని ప్రణాళికలు మన అందరిపై ఉన్నాయి అని మనము అందరము నమ్ముతాము. అయితే దానిని అమలుపరచటములో దేవుని పద్ధతి ఎలా ఉంది అని లేఖనముల ద్వారా నేర్చుకుందాము.

యేసయ్య భూలోకములో “నశించినదానిని వెదకి రక్షించుటకు” అనే ప్రణాళిక కలిగి వచ్చాడు. జక్కయ కొరకు మాత్రమే కాదు గాని, జక్కయ్య ద్వారా మొత్థము గ్రామమును రక్షించాలి అనేది దేవుని ప్రణాళిక. సమరయ గ్రామమును రక్షించుట అనేది దేవుడి ఉద్దేశ్యము. అయితే ఆ ఉద్దేశ్యము నెరవేర్చుకొనుటకు సమరయ స్త్రీ ని ఏర్పరచుకున్నారు.

ఇక్కడ మనము గ్రహించవలసినది ఏమిటి అంటే లోకములో నశిచినదానిని వెదకి రక్షించుట అనేది దేవుని ఉద్దేశ్యము. ఆ ఉద్దేశ్యము కొరకు నిన్ను నన్ను ఏర్పాటుచేసుకున్నాడు. సమరయ గ్రామము విషయములో చూస్తే, ఒక స్త్రీ ని ప్రభువు మొదటిగా దర్శించాడు. అయితే ఆ స్త్రీ కి తనను దర్శిస్తున్నాడు అనిగానీ అసలు ఎందుకు దర్శిస్తున్నాడో అని గానీ తెలియదు.

ఆయన సమరయ మార్గమున వెళ్లవలసివచ్చెను గనుక౹ యాకోబు తన కుమారుడైన యోసేపుకిచ్చిన భూమి దగ్గరనున్న సమరయలోని సుఖారను ఒక ఊరికి వచ్చెను.౹ అక్కడ యాకోబు బావి యుండెను గనుక యేసు ప్రయాణమువలన అలసియున్న రీతినే ఆ బావి యొద్ద కూర్చుండెను; అప్పటికి ఇంచుమించు పండ్రెండు గంటలాయెను.౹ సమరయ స్త్రీ ఒకతె నీళ్లు చేదుకొనుటకు అక్కడికి రాగా యేసు–నాకు దాహమునకిమ్మని ఆమె నడిగెను.౹ -యోహాను 4:4-7

ఇక్కడ చూస్తే, సాధారణముగానే అక్కడ బావి వద్ద అలసిన రీతినే కూర్చున్నట్టుగానే కనపడుతుంది. అయితే దేవుని ప్రణాళిక వేరు. “ఆయన సమరయ మార్గమున వెళ్లవలసివచ్చెను” అనగా అటువైపు వెళ్ళుటకు ఒక కారణము ఉంది. అలాగే మన విషయములో కూడా మనము ఉన్న ప్రదేశములో ప్రభువు ప్రణాళిక నెరవేర్చుటకు మనలను ఏర్పరచుకున్నాడు. అయితే ఆ ప్రణాళిక నెరవేర్చుటకు మన వ్యక్తిగతమైన జీవితము కొనసాగించబడుతుండగా మనలను సాధారణమైన రీతిలోనే దర్శిస్తున్నాడు.

సమరయ స్త్రీతో కూడా సాధారణముగానే మాటలడుతూనే, తనను తాను బయలు పరచుకుంటున్నాడు. అలాగే మొదటగా దేవుడు మనలను దర్శిస్తాడు, ఆ తరువాత దేవుడు సిద్ధపరుస్తాడు. ఈ దినములలో మనపై దేవుని ప్రణాళిక ఉంది అని 90 శాతము అందరికీ తెలుసు గానీ, దేవుడు దాని కొరకు దర్శిస్తున్నాడు అనే సంగతి మాత్రము అనేకులకు తెలియదు. అయితే మనము జాగ్రత్తగా గమనిస్తే, మనలను దర్శిస్తున్నాడు అని, సిద్ధపరుస్తున్నాడు అని మనము తెలుసుకోగలము.

దావీదును చూస్తే, దావీదు పై దేవుని ప్రణాళిక ఏమిటి అంటే, సౌలుకు ప్రతిగా రాజుగా చేయడానికి దావీదును ఎన్నుకున్నాడు. అలా ఎన్నుకున్నాక, దావీదును సిద్ధపరచాడు. ఎలా అంటే, మొదట ఒక గొర్రెల మందను కాపాడుట అనే బాధ్యత దావీదుకు ఇచ్చాడు. ఎలుగుబంటి నోటనుండి, సింహము నోటనుండి దేవుడే తప్పించి దావీదును సిద్ధపరచాడు. తద్వారా ఆ పోరాటము ద్వారా మంచి యోధునిగా మలచుచున్నాడు. అలా సిద్ధపరచి తరువాత ఇశ్రాయేలీయుల వద్దకు తీసుకువెళ్ళాడు.

ఈ విషయము గ్రహించేవరకు దేవుడు తనను తాను కనపరచుకునేవాడుగా ఉన్నాడు. ఈరోజునుండి సమస్యలు ఒకదానినుండి మరొకటి వస్తుందా, నీవు పోరాటయోధుడవు. దేవుని రాజ్యములో నీవు ఒక సైనుకునిగా ఉన్నావు అని గ్రహించు. ఎలా నీ సమస్యలను జయించాలో ప్రభువు నేర్పుతున్నాడు. మొదట ఎలుగుబంటి, తరువాత సింహము, తరువాత గొల్యాతు ఇలా అనేకమైన పోరాటములకొరకు సిద్ధపరచేవాడుగా దేవుడు ఉన్నాడు. ఆ విషయము గుర్తించిన దావీదు నా వేళ్ళకు పోరాటము నేర్పుము అని అడిగాడు. అలాగే మనము కూడా ఎందుకు మనలను ఏర్పరచుకున్నాడో మనము గ్రహించినపుడు మనము కూడా సిద్ధపడగలుగుతాము.

మనము దేవుని చేత సిద్ధపరచబడినవారము. మన జీవితములు చూసుకుంటే ఏ విషయమైనా సరే చివరికి దేవునితోనే ముడిపడి ఉంటుంది. దేవుడు సిద్ధపరచిన తరువాత ఏమి జరుగుతుంది అని చూస్తే –

అప్పుడా స్ర్తీ–అయ్యా, నీవు ప్రవక్తవని గ్రహించుచున్నాను.౹ -యోహాను 4:19

ఆ స్త్రీ తనకుండ విడిచిపెట్టి ఊరిలోనికి వెళ్లి౹ –మీరు వచ్చి, నేను చేసిన వన్నియు నాతో చెప్పిన మనుష్యుని చూడుడి; ఈయన క్రీస్తుకాడా అని ఆ ఊరివారితో చెప్పగా౹ -యోహాను 4:28-29

గ్రహించిన తరువాత ఊరులోనికి వెళ్ళి యేసయ్య చెప్పమనకుండానే, ఆ స్త్రీ తనపై ఉన్న ఉద్దేశ్యము కొరకు తాను పని ప్రారంభించిన దానిగా ఉంది.

ఇంతలో ఆయన శిష్యులు వచ్చి ఆయన స్ర్తీతో మాటలాడుట చూచి ఆశ్చర్యపడిరి గానినీకేమికావలెననియైనను, ఈమెతో ఎందుకు మాటలాడుచున్నావని యైనను ఎవడును అడుగలేదు.౹ -యోహాను 4:27

అయితే శిష్యులకు మాత్రము ఎందుకు యేసయ్య ఆ స్త్రీతో మాట్లాడుతున్నాడో ఎవరికీ తెలియదు. కానీ ఒకరోజు మాత్రము దేవుని ఉద్దేశ్యము బయలుపరచబడుతుంది.