7-1-2024 – ఆదివారం మొదటి ఆరాధన – ఆనందించండి

ఆరాధన వర్తమానము

ఈ 2024 సంపూర్ణమైన సంవత్సరము. యెహోషువ సంవత్సరము అనగా ముగింపు సంవత్సరము. మన జీవితములో ఉన్న ప్రతీ శ్రమకు, పరిస్థితికీ ముగింపు సంవత్సరము. ఆమేన్!

ఈ సంవత్సరము 12 గంపలు, 12 నెలలు, 12 రాళ్ళు అనే ప్రవచనాత్మక వాక్కు ప్రభువు ఇచ్చారు. 12 గంపలు జీవముచే సిద్ధపరచబడిన 12 నెలలు మరియు 12 రాళ్ళు 12 సాక్ష్యములు. ఈ సంవత్సరము ప్రతీ నెల ప్రతి గంపలోని జీవమును అనుభవించి మనము ప్రతీ నెల సాక్ష్యముగా ఉందుము గాక!

మన దేవుని యొక్క శక్తి ప్రతీ శ్రమను ముగించడానికి, ప్రతి ఇబ్బందిని ముగించడానికి మన జీవితమును వెంబడిస్తుంది. గనుక ఈ సంవత్సరము ఆశగా మన్ము జీవితమును కొనసాగిద్దాము. ఈ సత్యమును నీవు నమ్మితే, ప్రతీ దినము సంతోషించేవాడివిగా ఉంటావు.

దేవుని సన్నిధిలో ఉత్సాహముగా ఉండాలి అని మనము అంటుంటాము. అయితే ఎందుకు ఉత్సాహముగా ఉండాలి? మన దేవుడు సమస్తమును మార్చేదేవుడు అయి ఉన్నాడు. దేవుని సన్నిధిలో నీ దుఃఖము సంతోషముగా మార్చబడుతుంది. ఇప్పటికే సంతోషముగా ఉన్నావా? నీ సంతోషము పొంగి పొర్లుతుంది.

ఇది యెహోవా ఏర్పాటు చేసిన దినము దీనియందు మనము ఉత్సహించి సంతోషించెదము. -కీర్తనలు 118:24

మనము తండ్రి సన్నిధిలో ఉన్నాము. ఆయన సన్నిధిలో మనకు స్వాతంత్ర్యము ఉంది. ఆయనను మనము హత్తుకోగలము. ఈ దినము దేని కొరకు ఏర్పాటు చేయబడింది? ఈ వారము దినాలు ఎక్కడెక్కడో తిరిగాము. ఏమేమో అంటించుకుని వచ్చాము. స్కూల్ లో చదివే పిల్లలను గమనిస్తే స్కూల్ నుంచి వచ్చేసరికి వాడు దుమ్ము ధూళితో నిండి ఉంటాడు. వెంటనే మనము స్నానము చేయమని పంపిస్తాము. మన తండ్రి కూడా ఈ లోకములో తిరిగి తిరిగి అంటించుకున్న ప్రతీ అశుభ్రతనుండి మనలను శుద్ధిచేయడానికి ఈ దినమును ఏర్పాటు చేసారు.

మనము దేవుని సన్నిధిలో ఉన్నప్పుడు మన ఆత్మ ఎదుగుటకు అవసరమైన వాతావరణము ఉంటుంది. మనము వారమంతా లోకములో ఉన్నాము. ఈ లోకములో ఉన్నదంతా మాలిన్యమే. మనము తెలిసో తెలియకో లోకములో ఉన్న పాపముతో కూడిన విషయములలో మలినపడిపోతాము. అటువంటి పరిస్థితిలో దేవుని సన్నిధికి ఆదివారము రానప్పుడు, మన ఆత్మ రోజు రోజుకు బంధించబడి, కృంగిపోయి కృశించిపోతుంది. అదే మనము దేవుని సన్నిధిలో ఆదివారము గనుక ఉంటే ఆయన వాక్యము చేత శుద్ధిచేయబడి రాబోయే ఆరు రోజులు అపవాది ఉచ్చులు ఎదుర్కోవడానికి సిద్ధపరచబడుతుంది.

మన దేవుడు మన ఆత్మను ఒక ఆయుధముగా చేయాలి అనే ఆశ కలిగి ఉన్నాడు. అలా నిన్ను నీ ఆత్మను ఆయుధముగా చేసి, అపవాదిని వాడి కార్యములను ఓడించడానికి నిన్ను సిద్ధపరుస్తున్నాడు. గనుక నీకు నీ ఆతము దేవుని సన్నిధే శరణాగతిగా ఏర్పాటుచేయబడింది. దేవుడు మనలను పరిశుద్ధపరచి విజయము కొరకు సిద్ధపరుస్తున్నాడు.

నీకు తెలిసిన దేవుని సత్యము నిన్ను ఒక విషయములో స్వతంత్రునిగా చేస్తుంది. అలాగే సత్యము పై సత్యము నీవు తెలుసుకొనే కొలదీ అనేక విషయములలో నీవు స్వతంత్రునిగా మారగలుగుతావు. ప్రభువు యొక్క ఆశ కష్టముతో, శ్రమతో కూడిన నీ జీవితమును సూపర్ నేచురల్ గా మార్చాలి అనే. నీ జీవితమును సూపర్ నేచురల్ గా మార్చడానికి ఈ దినమును ప్రభువు ఏర్పాటుచేసాడు. రేపు ఏమి జరుగుతుందో మనకు తెలియదు. అయితే సత్యమైన దేవుని వాక్కుని మనము ఆధారము చేసుకున్నప్పుడు, అదే వాక్యము వెలుగై ఉన్నది గనుక, చీకటి గుండా నీవు సత్యపు వెలుగులో ధైర్యముగా నడువగలుగుతావు.

ఈ సంవత్సరము యెహోషువా సంవత్సరము అనగా వాక్కు చేత పట్టుకుని యెహోషువ వెళ్ళినట్టు మనము కూడా వాక్కును పట్టుకును విజయకరమైన సాక్షులుగా ఈ సంవత్సరము ఉందాము. దేవుని యొక్క కార్యములు నీ ఊహకు మించినవే.

నీవు నా దేవుడవు నేను నీకు కృతజ్ఞతాస్తుతులు చెల్లించెదను నీవు నా దేవుడవు నిన్ను ఘనపరచెదను. -కీర్తనలు 118:28

ఇది నన్ను పరిశుద్ధపరచాడినికి, సిద్ధపరచడానికి, విజయము అనుగ్రహించడానికి ఏర్పాటు చేసిన దినముగా నీవు నమ్మితే, ప్రభువును స్తుతించు. రాబోయే వారము దినములలో ఎటువంటి ఆటంకమైనా నిలువదు.

ఈ సత్యమును నీవు నమ్మితే ఉత్సహించి బిగ్గరగా ఆమేన్, హల్లెలూయా స్త్రోత్రము దేవా అని చెబుతావా! నీ సంతోషము దాచకుండా వ్యక్తపరచు.

ఈ వారము మనము విజయకరముగా ముగించుదుము గాక! మన ముందు ఏదీ నిలువదు. ఆమేన్! అందుకే ఈ దినము ఏర్పాటు చేయబడినది.

యెహోవా దయాళుడు ఆయన కృప నిరంతరము నిలుచుచున్నది ఆయనకు కృతజ్ఞతాస్తుతులు చెల్లించుడి. -కీర్తనలు 118:29

మన దేవుడు దయాళుడు ఆయన దయ నాపై నిలిచేదిగా ఉంది. అందుకే ఈ దినమును మనకొరకు ఏర్పాటుచేసాడు.

యెహోవా, నీవే నా దేవుడవు నేను నిన్ను హెచ్చించెదను నీ నామమును స్తుతించెదను నీవు అద్భుతములు చేసితివి, సత్యస్వభావము ననుసరించి నీవు పూర్వకాలమున చేసిన నీ ఆలోచనలు నెరవేర్చితివి -యెషయా 25:1

“నీవే నా దేవుడవు నీవు అద్భుతములు చేసితివి” అని ఈ వాక్యములో చూస్తున్నాము. ఆయన దేవుడు గనుక ఆయన స్వభావమును బట్టి పూర్వకాలములో అద్భుతములు చేసాడు. ఆయన ఇప్పుడు కూడా దేవుడు గనుక ఆయన దయ కలవాడు గనుక ఇప్పుడు కూడా ఆయన అద్భుతములు చేసేవాడుగా ఉన్నాడు. వాటిచేత నీ స్థితిని మార్చేవాడుగా ఉన్నాడు.

భీకరుల ఊపిరి గోడకు తగిలిన గాలివానవలె ఉండగా నీవు బీదలకు శరణ్యముగా ఉంటివి దరిద్రులకు కలిగినశ్రమలో వారికి శరణ్యముగాను గాలివాన తగులకుండ ఆశ్రయముగాను వెట్ట తగుల కుండ నీడగాను ఉంటివి. -యెషయా 25:3

బీదలు అనగా బలము లేనివారు. ధనము విషయములో గానీ, ఎదుర్కోనే పరిస్థితులలో గానీ బలహీనముగా ఉన్నవారు బీదలుగా చూడవచ్చు. ఇటువంటి పరిస్థితిలలో ఉన్నవారికి శరణ్యముగా దేవుడున్నాడు. ఆధారముగా ఆయనే ఉన్నాడు. చాలా సందర్భములలో మనము ఎదుర్కొంటున్న పరిస్థితిలలో మన బలము సరిపోదు. ఒకవేళ మనకే బలముంటే మనము సులభముగానే జయించేవారము. అయితే బలము లేని కారణాన అదే పరిస్థితిలో కొనసాగించబడుతున్నాము. అయితే దేవుడు తానే నీకు శరణ్యముగా ఉన్నాడు అని చెప్పుచున్నాడు.

దారిద్ర్యము అనగా మనమున్న పరిస్థితులను జయించుటకు బలము చాలని స్థితి, బలము లేని స్థితి అని అర్థము చేసుకోవచ్చు. అటువంటి పరిస్థితిలో ఆశ్రయముగా, నీడగా దేవుడే ఉన్నాడు అని ఆయనే తెలియచేస్తున్నాడు. గనుక మన దేవునిని బట్టి మనము ఎంతో సంతోషించేవారిగా ఉండాలి. మన బలము, మన ధైర్యము ఆయనే!

ఆయన మనకు నీడగా ఉన్నాడు అంటే మనకు విశ్రాంతిస్తాడు అని అర్థము. నీ ఉద్యోగములోనో, కుటుంబములోనో ఇంక నీకొచ్చిన సమస్య ఏమీ లేదు. రాబోయె ఏడు దినములు సంతోషముతోనే మనము ముగిస్తాము. ఆమేన్, హల్లెలూయా!

ఆరాధన గీతము

యెహోవా దయాళుడు సర్వ శక్తిమంతుడు
ఆయన కృప నిత్యముండును
ఆయనే బలవంతుడు – ఆయనే యుద్ధ వీరుడు
యెహోవా నాకు తోడుండగా – నాకు భయమే లేనే లేదు
యెహోవా నాకు తోడుండగా – నాకు దిగులే లేనే లేదు
జై జై యేసు రాజా – జయ యేసు రాజా

సేనా దయ్యమును పందులలోకి పంపిన వారాయనే
మృతుడైన లాజరును మరణము నుండి లేపిన వారాయనే

దావీదు వంశమును ఇల చిగురింప చేసిన వారాయనే
విలువైన రక్షణలో నను కడ వరకు నడిపించు వారాయనే

దావీదు వంశమును చిగురింపచేసిన వాడు. అనగా పూర్వకాలమున ఆయన అద్భుతములు చేసి నడిపించాడు.అయితే ఇప్పుడు మనము వర్తమానములో ఉన్నాము. యెహోవా దయాళుడు, సర్వశక్తిమంతుడు అని మనము ప్రకటిస్తున్నాము. దావీదు ఈ సత్యమును ప్రకటించినప్పుడు ఆయన వంశమంతా ఆశీర్వదించబడింది. ఇప్పుడు మనము కూడా ప్రకటిస్తుండగా మనము మన రాబోయే తరములు కూడా ఆశీర్వదించబడేవిగా ఉన్నాయి. గనుక సత్యమును ఎరిగి నమ్మి, ఆయన దయాళుడు, సర్వ శక్తిమంతుడు, యుద్ధవీరుడు అని సంతోషముతో ప్రకటించు.