17-12-2023 – ఆదివారం మొదటి ఆరాధన

ఆరాధన వర్తమానము

మనలను తన సన్నీధిలో నిలబెట్టిన ఆ దేవదేవునికే మహిమ స్తోత్రము కలుగును గాక! దేవుని ప్రేమించేవారు, వాక్యము చేత నేర్చుకున్నవారు దేవుని స్తుతించేవారిగా ఉంటారు. మన దేవుడు స్తుతులకు అర్హుడైనవాడు. ఏ విధముగా అర్హుడు అయి ఉన్నాడో తెలుసుకుందాము.

కృతజ్ఞతార్పణలు చెల్లించుచు ఆయన గుమ్మములలో ప్రవేశించుడి కీర్తనలు పాడుచు ఆయన ఆవరణములలో ప్రవేశించుడి ఆయనను స్తుతించుడి ఆయన నామమును ఘనపరచుడి. -కీర్తనలు 100:4

మనము దేవుని సన్నిధికి, ఆయన ఆవరణములోనికి వెళ్ళునప్పుడు, కృతజ్ఞతార్పణలు చెల్లించాలి అని వాక్యము తెలియచేస్తుంది.

మరియు కోరదగినదిగాను చూడముచ్చటయైనదిగాను నాకు కనబడినది ఏదనగా, దేవుడు తనకు నియమించిన ఆయుష్కాల దినములన్నియు ఒకడు అన్నపానములు పుచ్చుకొనుచు తన కష్టార్జితమంతటివలన క్షేమముగా బ్రదుకుచుండుటయే, ఇదియే వానికి భాగ్యము.౹ -ప్రసంగి 5:18

సొలొమోను మహా జ్ఞానము కలిగినవాడై ఈ మాటలు చెప్పుచున్నాడు. దేవుడు తనకు నియమించిన ఆయుష్కాలమంతా అన్నపానములు పుచ్చుకొనుచు, తన కష్టర్జితమంతటివలన క్షేమముగా బ్రదుకుటయే కోరదగినది మరియు భాగ్యముతో కూడినది.

మరియు దేవుడు ఒకనికి ధనధాన్యసమృద్ధి ఇచ్చి దానియందు తన భాగము అనుభవించుటకును, అన్నపానములు పుచ్చుకొనుటకును, తన కష్టార్జితమందు సంతోషించుటకును వీలు కలుగజేసినయెడల అతనికి ఆ స్థితి దేవుని ఆశీర్వాదమువలన కలిగినదనుకొనవలెను.౹ -ప్రసంగి 5:19

మనము దేవునికి కృతజ్ఞతలు అర్పించడానిక్ ఒక కారణము మనము క్షేమముగా ఉండుట, ఈ దినము అన్నపానములు పుచ్చుకొనుట. మనమున్న కాలములో అందుబాటులో ఉన్నాసరే తినలేని ఆరోగ్యపరిస్థితులు. దీనినిబట్టి దేవుడు వీలు కలుగచేస్తే గానీ మనము కలిగిన దానిచేత తృప్తి చెందలేము అనే సత్యము మనము గ్రహించాలి. మనకు ధనధాన్య సమృద్ధి ఇచ్చువాడు దేవుడే.

ఏలయనగా ఆకాశమందున్నవియు భూమియందున్నవియు, దృశ్యమైనవిగాని, అదృశ్యమైనవిగాని, అవి సింహాసనములైనను ప్రభుత్వములైనను ప్రధానులైనను అధికారములైనను, సర్వమును ఆయనయందు సృజింప బడెను, సర్వమును ఆయనద్వారాను ఆయననుబట్టియు సృజింపబడెను.౹ ఆయన అన్నిటికంటె ముందుగా ఉన్నవాడు; ఆయనే సమస్తమునకు ఆధారభూతుడు.౹ -కొలొస్సయులకు 1:16-17

అనగా మనకు ధనధాన్య సమృద్ధి ఆయనను బట్టియే కలుగుతుంది. దేవుడు నిర్ణయము ప్రకారమే మన జీవితములు వృద్ధిలోనికి తీసుకురాబడతాయి. ఉదాహరణకు దేవుడు దావీదును నిర్ణయించుకున్నాడు అయితే దావీదుకు గల అర్హతలు ఏమిటి? ఎటువంటి తర్ఫీదు రాజు అగుటకొరకు దావీదు పొందలేదు, గానీ దేవుని ఏర్పాటు మాత్రమే తనకు కలిగిన అర్హత.

దావీదు గొర్రెల కాపరిగా ఉన్నప్పుడు, సింహములనుండి ఎలుగుబంటులనుండి తన మందను కాపాడుకున్నాడు. ఈ మృగములకు ఎంతో బలముకలిగి ఉంటాయి అటువంటి బలము కలిగిన వాటి చేతిలోనుండి దేవుడే రక్షించాడు అని దావీదు చెప్పుచున్నాడు. వాటిని జయించుటకు కావలసిన బలము దేవుడు అనుగ్రహించాడు.

గొల్యాతు బలాఢ్యుడు మాత్రమే కాదు గానీ, మనుష్యుడు గనుక యుక్తి కలవాడు. యుద్ధములో నేర్పరి అనే మాట అతనిగూర్చి వ్రాయబడింది. అయితే దావీదు తన బలమును ఉపయోగించలేదు గానీ, అతనని ఎదుర్కోవడానికి కావలసిన జ్ఞానమును అనుగ్రహించాడు. గొల్యాతు దగ్గరకు వెళ్ళకుండానే, దూరమునుండి వడిసెల రాయితో జయించే జ్ఞానము దేవుడిచ్చాడు. గొల్యాతు యొక్క బలము దావీదుమీద ప్రభావము చూపకుండానే జయించే కృప దేవుడు దావీదునకు ఇచ్చాడు.

దేవుని యదార్థముగా వెంబడిస్తే చాలు, తన యొక్క సామర్థ్యము దెవుడు నీకు అనుగ్రహిస్తాడు. నీవున్న పరిస్థితులకు తగినట్టుగా ఆ సామర్థ్యము అనుగ్రహిస్తాడు. గనుకయే మన దేవునికి కృతజ్ఞతార్పణ తప్పక చెల్లించాలి. దేవుడిచ్చిన క్షేమము, సమృద్ధి చేతనే మనము తృప్తి కలిగి ఉండగలుగతాము.

కొలొస్సయులకు 1:16-17 లో మనము చదివిన భాగములో మన జీవితము గూర్చిన సత్యము ఏమైనా ఉందా అని మనము గమనించాలి. ఆకాశమందున్నవియు భూమియందున్నవియు, దృశ్యమైనవిగాని, అదృశ్యమైనవిగాని ఆయనయందు ఆయనద్వారాను ఆయననుబట్టియు సృజింపబడెను.

ఆకాశమందున్నవియు అనగా పరలోక సంబంధమైన ఆశీర్వాదము అనగా నిత్యజీవము యేసయ్య ద్వారానే కలుగుతుంది. ఇంతవరకు అనుభవించిన భూసంబంధమైన ఆశీర్వాదము దృశ్యమైనవిగానూ, దేవుని చేత నిర్ణయించబడి ఇంతవరకు అనుభవించని ఆశీర్వాదాలు అదృశ్యమైనవిగాను మనము అర్థము చేసుకోవచ్చు. గనుక ఈరోజు వరకు నేను అనుభవిస్తున్న దానిని బట్టి దేవానీకు స్తోత్రము, ఇకముందు నాకొరకు నియమించబడిన ఆశీర్వాదముల కొరకు నీకు స్తోత్రము అని చెప్పగలగాలి.

సింహాసనములైనను ప్రభుత్వములైనను ప్రధానులైనను అధికారములైనను, సర్వమును ఆయనయందు సృజింప బడెను, సర్వమును ఆయనద్వారాను ఆయననుబట్టియు సృజింపబడెను. అనగా,

సింహాసనము అనేది ఒక స్థానము. యేసయ్యను బట్టి ఆ స్థానము అనుగ్రహించబడుతుంది. ప్రభుత్వము అనగా పరిపాలన చేయుట. ప్రధానులుగా ఉండుట అనగా ఒక మంచి హోదా కలిగి ఉండుట. అలాగే అధికారము కలిగి ఉండుట ఇవన్నీ, ప్రభువు చేత, ప్రభువును బట్టి మన జీవితములో కలుగుతుంది. ఇప్పుడు జ్ఞానము లేకుండా ఉన్నాసరే, ఒక దినము నీకు జ్ఞానము అనుగ్రహించబడుతుంది. ఉన్నదానికి బట్టి కృతజ్ఞతా స్తుతులు చెల్లించునపుడు, ఏమి జరుగుతుంది అని ఆలోచిస్తే. అదృశ్యమైనదానిని దృశ్యమైనదానిగా మార్చేది సమయము. ఈ సమయమును సద్వినియోగపరుచుకుంటే అదృశ్యమైనవి దృశ్యమైనవిగా మార్చబడతాయి.

యేసయ్య 5000 వేల మందికి ఆహారము పెట్టిన సందర్భములో, కలిగినదాని బట్టి కృతజ్ఞత చెల్లించినప్పుడు, 5000వేల మందికి ఆహారము తయారు చేయడానికి పట్టే సమయము, కృతజ్ఞతా చెల్లించడము ద్వారా మార్చబడింది. మనము చెల్లించే కృతజ్ఞత ప్రభువు మనకొరకు నిర్ణయించినదానిని పొందుటకు అవసరమైన సమయము మార్చబడి త్వరగా సమకూర్చబడుతుంది. అందుకే దేవుని స్తుతించుట ఎంతో మంచిది, ధన్యకరమైనది.

రొట్టె తయారు చేయాలి అంటే, పిండి తయారుచేయాలి, దానిని ఒత్తి ఒక రూపములోనికి తీసుకురావాలి, తరువాత కాల్చాలి. అప్పుడు ఒక రొట్టె తయారు అవుతుంది. అయితే మనము చేసే కృతజ్ఞతలు చెల్లించినపుడు సూపర్నేచురల్ గా సిద్ధపరచబడుతుంది. ఇది ఒక నియమము. అది చదువులో అయినా, ఉద్యోగములో అయినా ఎక్కడ అయినా ఈ నియమము వర్తిస్తుంది.

ఈరోజు తెలుసుకున్న సత్యములను బట్టి మనము దేవునిని స్తుతిద్దాము.

ఆరాధన గీతము

లెక్కించలేని స్తోత్రముల్
దేవా ఎల్లప్పుడూ నే పాడెదన్
దేవా ఎల్లప్పుడూ నే పాడెదన్
ఇంత వరకు నా బ్రతుకులో
నువ్వు చేసిన మేళ్ళకై

ఆకాశ మహాకాశముల్
వాటియందున్న సర్వంబును
భూమిలో కనబడునవన్ని
ప్రభువా నిన్నే కీర్తించున్

నీటిలో నివసించు ప్రాణుల్
ఈ భువిలోన జీవ రాసులు
ఆకాశమున ఎగురునవన్ని
ప్రభువా నిన్నే కీర్తించున్