12-11-2023 – ఆదివారం మొదటి ఆరాధన

వారము కొరకైన వాక్యము

ప్రతి ఆదివారము ప్రభువు శరీరాన్ని, రక్తాన్ని మనము స్వీకరిస్తున్నాము. అయితే కొంతమందికి ఈ అవకాశము ఉండదు. మరి వారి పరిస్థితి ఏమిటి? తీసుకునే వారి పరిస్థితి ఏమిటి? అనేది నేర్చుకుందాము.

నేను మీకు అప్పగించిన దానిని ప్రభువువలన పొందితిని. ప్రభువైన యేసు తాను అప్పగింపబడిన రాత్రి యొక రొట్టెను ఎత్తికొని కృతజ్ఞతాస్తుతులు చెల్లించి౹ దానిని విరిచి–యిది మీకొరకైన నా శరీరము; నన్ను జ్ఞాపకము చేసికొనుటకై దీనిని చేయుడని చెప్పెను.౹ ఆప్రకారమే భోజనమైన పిమ్మట ఆయన పాత్రను ఎత్తికొని–యీ పాత్ర నా రక్తమువలననైన క్రొత్తనిబంధన; మీరు దీనిలోనిది త్రాగునప్పుడెల్ల నన్ను జ్ఞాపకము చేసికొనుటకై దీనిని చేయుడని చెప్పెను.౹ -1 కొరింథీయులకు 11:23-25

ప్రతీ వారము ఈ వాక్య ప్రకారము మనము ప్రభువు బల్లలో పాలుపంపులు కలిగి ఉంటున్నాము. ఆయన శరీరములో ఏముంది ఆ శరీరము విరవబడటము ద్వారా ఏమి జరిగింది అనేది మనము తెలుసుకుందాము.

ఆ వాక్యము శరీరధారియై, కృపాసత్యసంపూర్ణుడుగా మనమధ్య నివసించెను; తండ్రివలన కలిగిన అద్వితీయకుమారుని మహిమవలె మనము ఆయన మహిమను కనుగొంటిమి౹ -యోహాను 1:14

వాక్యము శరీరధారియై మన మధ్య నివాసము చేసెను. ఆ శరీరములో ఏముంది? “ఆయనలో జీవముండెను; ఆ జీవము మనుష్యులకు వెలుగైయుండెను.౹ -యోహాను 1:4”. అయితే ఈ శరీరము విరువబడింది, ఎందుకు అని చూస్తే, “బదులుగా” జరిగిన కార్యముగా మనము చూడవచ్చు. అనగా మనము పాపమును బట్టి మరణించవలసిన పరిస్థితిలో ఆ శరీరము విరువబడింది ఆయన శరీరములోని జీవము విడిచిపెట్టినాడు. దానిని బట్టి మన పాపములకు ప్రాయశ్చిత్తము జరిగింది, పరిశుద్ధులుగా చేయబడ్డాము.

దీనిని తినువాడు చావకుండునట్లు పరలోకమునుండి దిగివచ్చిన ఆహారమిదే.౹ పరలోకమునుండి దిగి వచ్చిన జీవాహారమును నేనే. ఎవడైనను ఈ ఆహారము భుజించితే వాడెల్లప్పుడును జీవించును; మరియు నేనిచ్చు ఆహారము లోకమునకు జీవముకొరకైన నా శరీరమే అని మీతో నిశ్చయముగా చెప్పుచున్నాననెను. -యోహాను 6:50-51

మన జీవితములో అనారోగ్యముగా ఉన్న పరిస్థితులలో మనము వైద్యుని వద్దకు వెళ్ళినప్పుడు ఆయన ఇచ్చిన మందుల ద్వారా ఆ అనారోగ్యము నివారించబడుతుంది. మనము తీసుకుంటున్న ఆయన శరీరము, మనము నిత్యము జీవించులాగున పరలోకమునుండి ఇవ్వబడిన ఆహారము అయి ఉన్నది. అనగా మన జీవితములో నిత్యము జీవింపచేయబడే లాగున సూపర్నేచురల్ ఆధారముగా ఆయన శరీరము ఉన్నది. అందుకే మనము బల్లలో చేయివేసినప్పుడు ఆయన శరీరము నా కొరకు ఇవ్వబడిన జీవము అని ఎరిగి స్వీకరించాలి. ఆ శరీరమును స్వీకరించునపుడు జీవము మనలో ప్రవేశిస్తుంది. అయితే ఈ విషయమును గ్రహించినపుడే దానిని అనుభవించగలుగుతాము.

నా శరీరము తిని నా రక్తము త్రాగువాడు నాయందును నేను వానియందును నిలిచియుందుము.౹ జీవముగల తండ్రి నన్ను పంపెను గనుక నేను తండ్రి మూలముగా జీవించుచున్నట్టే నన్ను తినువాడును నా మూలముగా జీవించును.౹ -యోహాను 6:56-57

అనగా ఆయనను బట్టే మన జీవితములు కొనసాగించబడతాయి గానీ, మనము కలిగి ఉన్న సామర్థ్యమును బట్టి కాదు అని అర్థము చేసుకోగలము. “నా మూలముగా జీవించును” అనగా “నేను వానియందును నిలిచియుందును” అని చెప్పిన ప్రభువు మనలో ఉండి నన్ను జీవింపచేసేవాడిగా ఉంటాడు. అనగా ప్రభువుతో మనము ఏకమైపోతాము.

ఆయన అన్నిటికంటె ముందుగా ఉన్నవాడు; ఆయనే సమస్తమునకు ఆధారభూతుడు.౹ సంఘము అను శరీరమునకు ఆయనే శిరస్సు; ఆయనకు అన్నిటిలో ప్రాముఖ్యము కలుగు నిమిత్తము, ఆయన ఆదియైయుండి మృతులలోనుండి లేచుటలో ఆదిసంభూతుడాయెను.౹ ఆయనయందు సర్వసంపూర్ణత నివసింపవలెననియు, ఆయన సిలువరక్తముచేత సంధిచేసి, ఆయనద్వారా సమస్తమును, అవి భూలోకమందున్నవైనను పరలోకమందున్నవైనను, వాటినన్నిటిని ఆయనద్వారా తనతో సమాధానపరచుకొనవలెననియు తండ్రి అభీష్టమాయెను.౹ -కొలొస్సయులకు 1:17-19

సమస్తమునకు ఆధారభూతుడైన వాడు ఇప్పుడు మనలో ఉంటున్నాడు. కలిగి ఉన్నదేదియూ ఆయన లేకుండ కలుగలేదు, అటువంటివాడు మనలో ఉంటున్నాడు. ఒకవేళ అనారోగ్యమునుబట్టి జీవించలేని స్థితిలో ఉన్నట్టయితే, ఆయనను బట్టి మనలో జీవము కలుగుతుంది. ఒకవేళ ఆర్థికమైన పరిస్థితులలో మరణకరమైన స్థితిలో ఉంటే, ఆయనలో సర్వసంపదలు ఉన్నవి గనుక మన ఆర్థిక పరిస్థితి మెరుగుపడుతుంది.

కాగా దేవుడు తన ఐశ్వర్యము చొప్పున క్రీస్తుయేసునందు మహిమలో మీ ప్రతి అవ సరమును తీర్చును.౹ -ఫిలిప్పీయులకు 4:19

ఆయన శరీరమును రక్తమును స్వీకరించునపుడు ఆయనను జ్ఞాపకము చేసుకోవాలి. ఎందుకు ఆ శరీరము విరువబడింది? అనే సత్యము ఎరిగి ఉండాలి. మనము పరిశుద్ధముగా ఉండుటకు ఆయన శరీరము విరువబడింది, రక్తము చిందించబడింది. గనుక మనము పాపములో ఉంటూ ఆయన శరీరములో చెయ్యివేస్తే, అది మనకు మేలు చేయకపోగా, కీడుకొరకే మనము పాలుపంపులు కలిగి ఉన్నట్టుగా అవుతుంది.

సిలువ రక్తముచేత సంధి చేయబడింది. అనగా పరలోకమందున్నవైనా, భూలోకమందున్నవైనా పొందునట్లుగా ఆయన రక్తము సిలువలో చిందించబడింది. అయితే పరిశుద్ధమైన జీవితము ద్వారా మాత్రమే వీటిని పొందుకోగలము.

అందుకు యేసు వారితో ఇట్లనెను–జీవాహారము నేనే; నాయొద్దకు వచ్చువాడు ఏమాత్రమును ఆకలిగొనడు, నాయందు విశ్వాసముంచు వాడు ఎప్పుడును దప్పిగొనడు. తండ్రి నాకు అనుగ్రహించువారందరును నాయొద్దకు వత్తురు; నాయొద్దకు వచ్చువానిని నేనెంతమాత్రమును బయటికి త్రోసివేయను.౹ నా యిష్టమును నెరవేర్చు కొనుటకు నేను రాలేదు; నన్ను పంపిన వాని చిత్తము నెరవేర్చుటకే పరలోకమునుండి దిగి వచ్చితిని.౹ -యోహాను 6:35, 37-38

తండ్రి చిత్తము ప్రకారమే యేసయ్య తన వద్దకు వచ్చువారిని త్రోసివెయ్యట్లేదు అని ప్రభువు చెప్తున్నాడు. అయితే తండ్రి చిత్తము ఏమై ఉంది? మనము తృప్తి కలిగి ఉండుట అనేది ఆయన చిత్తము. ఆయన మన కాపరి గనుక మనకు లేమి కలుగదు. అనగా ఎప్పుడైతే ఆహారము తక్కువయ్యేటప్పటికే, ఆహారము లభించే మరొక చోటు సిద్ధపరుస్తాడు. ఆహారము అనగా మనము జీవము కలిగి ఉండునట్లుగా ఇవ్వబడేది. ఏ ఏ పరిస్థితులలో జీవము కోల్పోయేదిగా ఉంటుందో, ఆ పరిస్థితిలో జీవము నింపబడుతుంది. అనారోగ్యమును బట్టి జీవము కోల్పోతుంటే, ఆరోగ్యము దయచేయుటనుబట్టి జీవము ఇవ్వబడుతుంది. ఇది మనలో నిలిచిఉన్న ప్రభువును బట్టి కలిగే మహిమను బట్టి సూపర్ నేచురల్ గా జరుగుతుంది.

కాబట్టి ఆ పిల్లలు రక్తమాంసములుగలవారైనందున ఆప్రకారమే మరణముయొక్క బలముగలవానిని, అనగా అపవాదిని మరణముద్వారా నశింపజేయుటకును, జీవితకాలమంతయు మరణభయముచేత దాస్యమునకు లోబడినవారిని విడిపించుటకును, ఆయన కూడ రక్తమాంసములలో పాలివాడాయెను.౹ -హెబ్రీయులకు 2:13

అపవాది యొక్క బలము మరణము. ఆ మరణాన్ని జయించడానికి యేసయ్య శరీరములో, రక్తములో పాలివాడైనాడు. అపవాది మన జీవితమును పాపముకొరకు ప్రేరేపించే శక్తి కలిగినది. మనకే తెలియకుండా మన జీవితములో అపవాదిచేత పాపము చేయునట్లుగా ప్రేరేపించినపుడు, ప్రభురక్తములో పాలుపంపులు కలిగి ఉన్నమనలోని యేసయ్య మహిమ ఆ శక్తిని జయించేవారిగా చేస్తుంది.

అయితే ఒకవేళ ప్రభుబల్లలో చేయివేసే అవకాశము లేకపోతే ఎలా? వాక్యము శరీరధారియై వచ్చెను గనుక, వాక్య ప్రకారము జీవించుటయే ఆయన శరీరములో రక్తములో పాలుకలిగి ఉండుట.

యేసుయొక్క జీవము మా శరీరమందు ప్రత్యక్షపరచబడుటకై యేసుయొక్క మరణానుభవమును మా శరీరమందు ఎల్లప్పుడును వహించుకొని పోవుచున్నాము.౹ -2 కొరింథీయులకు 4:10

మరణానుభవమును అనగా ఎందుకు యేసయ్య శరీరము, రక్తము దేనికొరకు అర్పించబడిందో ఎరిగి ఉండే అనుభవములోనికి వెళ్ళుట. అప్పుడు ఆయన శరీరరము, రక్తములో ఉన్న జీవము, మహిమ మనలో ప్రత్యక్షపరచబడుతుంది.

ప్రభువు శరీరమని వివేచింపక తిని త్రాగువాడు తనకు శిక్షావిధి కలుగుటకే తిని త్రాగుచున్నాడు.౹ -1 కొరింథీయులకు 11:29

ఈ సత్యమునుకూడా మనము ఎరిగి ఉండాలి. ప్రభువు శరీరము అని ఎరిగి, అనగా ఎందుకొరకు ఆ శరీరము విరువబడిందో, ఆ శరీరమును బట్టి మనకు ఏమి ఇవ్వబడిందో, అనే సత్యము ఎరిగినవాడిగా జీవించుటను బట్టి గాక, ఇష్టారీతిగా పాపములోనే ఉంటూ పాలుకలిగి ఉన్నట్టయితే అది శిక్షావిధికి కారణము అవుతుంది. ఒకవేళ తప్పుచేసినట్టయితే ఒప్పుకొని క్షమాపణ పొందుకొని బల్లలో చేయివేయండి.