05-11-2023 – ఆదివారం రెండవ ఆరాధన

వారము కొరకైన వాక్యము

మన ఆత్మీయ జీవితము ఎంతో ప్రాముఖ్యమైనది. ఇదే మన భౌతికమైన వ్యక్తిగత జీవితములకు ఆధారమైనది. అయితే చాలా మంది ఈ ఆత్మీయ జీవితములలో పడిపోతున్నారు, లేస్తున్నారు, మరలా పడిపోతున్నారు. అయితే మన ఆత్మీయమైన జీవితము స్థిరముగా ఎప్పుడు ఉంటుంది?

అప్పటినుండి ఆయన శిష్యులలో అనేకులు వెనుకతీసి, మరి ఎన్నడును ఆయనను వెంబడింపలేదు.౹ -యోహాను 6:66

ఈ శిష్యులు ఎటువంటివారు? అని చూస్తే, “కాబట్టి యేసును ఆయన శిష్యులును అక్కడ లేకపోవుట జనసమూహము చూచి నప్పుడు వారా చిన్న దోనెలెక్కి యేసును వెదకుచు కపెర్నహూమునకు వచ్చిరి – యోహాను 6:24” అనగా యేసయ్యను వెతుకుతూ ఉన్నవారు. ఈ మాటలు మన జీవితమును సూచిస్తున్నాయి. మనము కూడా దేవుని అంగీకరించినవారమే, ఆయన కొరకు నిలబడినవారమే. అయినప్పటికీ పడిపోయినవారిగా ఉంటున్నాము. దానికి కారణము ఏమిటో తెలుసుకుందాం. ఏమి చేస్తే స్థిరముగా ఉంటామో కూడా తెలుసుకుందాం.

పరలోకమునుండి దిగి వచ్చి, లోకమునకు జీవము నిచ్చునది దేవుడనుగ్రహించు ఆహారమై యున్నదని మీతో నిశ్చయముగా చెప్పుచున్నానని వారితో చెప్పెను.౹ కావునవారు–ప్రభువా, యీ ఆహారము ఎల్లప్పుడును మాకు అనుగ్రహించుమనిరి.౹ -యోహాను 6:33-34

ఇక్కడవరకు బాగానే ఉంది జనులు ఎంతో ఆసక్తితో ఆ ఆహారము దయచేయుము అని ప్రభువును అడిగారు. అయితే యేసయ్య తరవాత ఏమి చెప్పాడో చూస్తే –

అందుకు యేసు వారితో ఇట్లనెను–జీవాహారము నేనే; నాయొద్దకు వచ్చువాడు ఏమాత్రమును ఆకలిగొనడు, నాయందు విశ్వాసముంచు వాడు ఎప్పుడును దప్పిగొనడు.౹ -యోహాను 6:35

ఈ మాటలు వినగానే వారి హృదయము కఠినము అయ్యింది. అప్పుడు వారు, “ఆయననుగూర్చి సణుగుకొనుచు–ఈయన యోసేపు కుమారుడైన యేసు కాడా?౹ ఈయన తలిదండ్రులను మన మెరుగుదుము గదా? –నేను పరలోకమునుండి దిగి వచ్చియున్నానని ఈయన ఏలాగు చెప్పుచున్నాడనిరి.౹ -యోహాను 6:41-42”.

ఈ ఆత్మీయమైన జీవితము బలముగా స్థిరముగా ఉండాలి అంటే, నీ జ్ఞానము చొప్పున ఆలోచించకూడదు. జనులు కేవలము మానవరీతిగానే ఆలోచిస్తున్నారు గానీ యేసయ్య మాటలలోని ఆంతర్యము అర్థము చేసుకోలేకపోయారు. అందుకే వారి హృదయములు ఎరిగిన యేసయ్య వారితో ఇలా అన్నాడు.

యేసు –మీరు సూచనలను చూచుటవలన కాదు గాని రొట్టెలు భుజించి తృప్తి పొందుటవలననే నన్ను వెదకుచున్నారని మీతో నిశ్చయముగా చెప్పుచున్నాను.౹ -యోహాను 6:26

మన ఆత్మీయమైన జీవితము దేవునిని మాటల ప్రకారము జీవించాలి. మన మానవ స్వభావముతో ఏమీ అర్థము చేసుకోలేము. ప్రకృతి సంబంధియైన మనుష్యుడు దేవుని ఆత్మ విషయములను అంగీకరింపడు, అవి అతనికి వెఱ్ఱితనముగా ఉన్నవి, అవి ఆత్మానుభవముచేతనే వివేచింపదగును గనుక అతడు వాటిని గ్రహింపజాలడు.౹ -1 కొరింథీయులకు 2:14. మనము దేవుని ఆత్మ కలిగి ఉంటేనే గానీ దేవుని విషయములు మనము గ్రహించలేము.

కాబట్టి యేసు–మీరు కూడ వెళ్లిపోవలెనని యున్నారా? అని పండ్రెండుమందిని అడుగగా౹ సీమోను పేతురు– ప్రభువా, యెవనియొద్దకు వెళ్లుదుము? నీవే నిత్యజీవపు మాటలు గలవాడవు;౹ నీవే దేవుని పరిశుద్ధుడవని మేము విశ్వసించి యెరిగియున్నామని ఆయనతో చెప్పెను.౹ -యోహాను 6:67-69

పేతురు ఈ మాటలు చెప్పగలగడానికి కారణము ఏమిటి? మిగతా శిష్యులు ఆత్మీయముగా పడిపోయి ఉన్నారు. పేతురు మాత్రము ఆత్మీయముగా నిలబడి ఉన్నాడు. ఎనుదుకు?

సీమోను – ఏలినవాడా, రాత్రి అంతయు మేము ప్రయాసపడితిమి గాని మాకేమియు దొరకలేదు; అయినను నీ మాటచొప్పున వలలు వేతునని ఆయనతో చెప్పెను. -లూకా 5:5

ఈ పేతురు జాలరి. చేపలు పట్టడములో విశేష అనుభవము కలిగినవాడు. అయినప్పటికీ, యేసయ్య లోతుగా వెళ్ళి వల వెయ్యమని చెప్పినప్పుడు, తన జ్ఞానము ప్రకారము బదులు ఇవ్వలేదు గానీ, యేసయ్య చెప్పిన మాట ప్రకారమే చేస్తాను అని ముందుకు సాగాడు.

వారాలాగు చేసి విస్తారమైన చేపలు పెట్టిరి, అందుచేత వారి వలలు పిగిలిపోవుచుండగా వారు వేరొక దోనెలోనున్న తమ పాలివారు వచ్చి తమకు సహాయము చేయవలెనని వారికి సంజ్ఞలు చేసిరి; వారు వచ్చి రెండు దోనెలుమునుగునట్లు నింపిరి. -లూకా 5:6-7

“నీవే నిత్యజీవపు మాటలు గలవాడవు” అని పేతురు ఎందుకు చెప్పగలిగాడు అని చూస్తే, ఈ భాగములో పేతురు అనుభవించిన ఆశ్చర్య కార్యము గూర్చిన అనుభవము. ఎంతగా శ్రమపడినా చేపలు పడలేదు, ఇక చేపలు పడే సమయము కూడా అయిపోయింది. అయినప్పటికీ “యేసయ్య మాట చొప్పున వలలు వేసాడు” ఇదే చాలా ప్రాముఖ్యమైనది. దానిని బట్టి, ఇంతకు మునుపు ఎన్నడూ జరగినిది ఇప్పుడు జరిగింది.

అలాగే మనము కూడా ప్రభువు మాట చొప్పున స్థిరముగా నిలబడితే, ఇంతవరకు నీ ప్రయత్నము సఫలము అవ్వకపోతే, నీవు నిలబడినదానిని బట్టి, ఇప్పుడు అది సఫలం అవుతుంది. ఇటువంటి అనుభవములచేత నీ జీవితము కొనసాగించబడితే నీ ఆత్మీయ జీవితము నిలబడుతుంది, అప్పుడు దేవుని చేత భళా మంచి దాసుడా అనే సాక్ష్యము పొందుకుంటావు. అనుభవము లేకుండా నీ ఆత్మీయ జీవితము నిలబడదు గానీ పడుతూ లేస్తూ ఉన్న స్థితిలోనే ఉంటుంది.

అయితే ఏమి చేస్తే మనము దేవుని యొక్క అనుభవములు పొందుతాము? దావీదు అనుభవమునుంది ధ్యానిద్దాము.

సింహముయొక్క బలమునుండియు, ఎలుగుబంటియొక్క బలమునుండియు నన్ను రక్షించిన యెహోవా ఈ ఫిలిష్తీయుని చేతిలోనుండికూడను నన్ను విడిపించుననియు చెప్పెను. అందుకు సౌలు–పొమ్ము; యెహోవా నీకు తోడుగానుండునుగాక అని దావీదుతో అనెను. -1 సమూయేలు 17:37

దావీదు దేవునిని కలిగి ఉన్నవాడు. ఇశ్రాయేలు ప్రజలు కూడా దేవునిని కలిగినవారే. ఫిలిష్తీయుల గుంపులోనుండి వచ్చిన బలఢ్యునిని చూసి ఇశ్రాయేలు ప్రజలు అందరూ వెనుకకు వెళుతుంటే, దావీదు మాత్రము ముందుకు వచ్చాడు. ఎందుకు అని చూస్తే, దావీదు మాటలలో – “ఇంతకు ముందు గొర్రెలు కాస్తున్నప్పుడు ఒకసారి ఎలుగుబంటి, ఒకసారి సింహము వచ్చినప్పుడు వాటి బలమునుండి విడిపించిన దేవుడే ఈ ఫిలిష్తీయుని చేతినుండి విడిపిస్తాడు”.

యెహోవా ఉత్తముడని రుచి చూచి తెలిసికొనుడి ఆయనను ఆశ్రయించు నరుడు ధన్యుడు. -కీర్తనలు 34:8

రుచి చూడకుండా, అనుభవించకుండా నా దేవుడు ఉత్తముడు అని ఎవరూ చెప్పలేరు. గాఢాంధకారములోనికి నేను వెళ్ళిపోయినప్పటికీ అక్కడనుండి నన్ను తిరిగి తీసుకురాగలిగినవాడు నా దేవుడు అనే సత్యము మనము ఎరిగి ఉండాలి. అనుభవములతో మనము సిద్ధపడాలి. దానికొరకు వచ్చిన అవకాశమును వదలకూడదు. దేవుని గూర్చిన అనుభవము కొరకు వచ్చిన అవకాశమును మనము వదిలిపెట్టకూడదు. అది మొదటి మెట్టు. అలా మనము కూడగట్టుకున్న అనుభవములు దేవుడు ఏమి చేయగలడో అనే దానికి నీ జీవితాన్ని సాక్ష్యముగా సిద్ధపరుస్తుంది. ఇంతకు ముందు నీ జీవితములో కార్యము జరిగించిన దేవుడు ఇప్పుడు కూడా కార్యము జరిగిస్తాడు. అయితే మనలో ఆసక్తే అసలు కావలసినది. దావీదు రోషము చూస్తే, “జీవము గల దేవుని సైన్యమును ఎదిరించుటకు ఈ సున్నతి లేని ఈ ఫిలిష్తీయుడు ఏపాటి వాడు?” అని చెప్పగలుగుతున్నాడు.

ఇశ్రాయేలూ, నీ భాగ్యమెంత గొప్పది యెహోవా రక్షించిన నిన్ను పోలినవాడెవడు? -ద్వితీయోపదేశకాండము 33:29

మనము కూడా అలా దేవుని కార్యములయందు, దేవుని అనుభవములయందు ఆసక్తి కలిగి ఉన్నట్టయితే, మన గూర్చికూడా ఇలాంటి సాక్ష్యము పొందగలుగుతాము.

ఏలియా దేవుని శక్తి కనపరచబడునట్లుగా ప్రార్థన చేసాడు, దేవుని శక్తి కనపరచబడింది. ఆ తరువాత సారెఫతు వెళ్ళిన తరువాత ఆ విధవరాలి ఇంటివద్ద ఏమిచేసాడు? ఇంతకు ముందు తాను పొందిన కెరీతువాగు అనుభవము ద్వారా దేవుని కార్యము కొరకు నిలబడ్డాడు. వారి సమయము అయిపోయింది. ఇప్పుడు నీ సమయము, నా సమయము. నీవు సిద్ధమైతే దేవుని గూర్చిన అనుభవము సంపాదించు.

దేవుని గూర్చిన అనుభవము ఎలా సంపాదించాలి? ఏ మాట అయితే చెప్పబడిందో, ఆ మాటను నమ్మి నిలబడటము ద్వారా అనుభవమును పొందుకుంటావు. నీ పరిస్థితులు మారుతున్నప్పటికీ దేవుని మాట మాత్రము మారనిది. ఉదాహరణకు మన జీవితములలో అనారోగ్యములు వస్తూనే వుంటాయి అయితే దేవుని మాట మాత్రము మారనిది. ఆయన పొందిన దెబ్బల చేత స్వస్థత కలిగింది. ఈ మాట నమ్మి, నీ అనారోగ్య పరిస్థితిలో ప్రార్థనాపూర్వకముగా నిలబడు. ఇలా అనేకమైన పరిస్థితిలలో ఇలాగే దేవుని మాటను బట్టి నిలబడటము మొదట ప్రారంభించాలి. దానికొరకు నీ జ్ఞానము పనిచెయ్యకూడదు. నీవు ఆశ కలిగి ఉంటే, దేవుడు ప్రత్యక్షపరచుకోవడానికి సిద్ధముగా ఉన్నాడు. మనము ఆశకలిగి దేవుని వెంబడించేవారిగా సిద్ధపడదాము. ఆత్మీయ జీవితము స్థిరముగా ఉండులాగున సిద్ధపడదాము.