29-10-2023 – ఆదివారం రెండవ ఆరాధన

వారము కొరకైన వాక్యము

నీ నా జీవితములలో ఆయన అద్భుతం చేయాలనుకుంటున్నాడు. అయితే ఎందుకు ఆయన అద్భుతము చేయాలి అనుకుంటున్నాడు? ఆ అద్భుతము పొందుకొనుటకు మనము అర్హులమేనా అనే సంగతి ఈరోజు తెలుసుకుందాము.

అటుతరువాత యేసు తిబెరియ సముద్రము, అనగా గలిలయ సముద్రము దాటి అద్దరికి వెళ్లెను.౹ రోగుల యెడల ఆయన చేసిన సూచక క్రియలను చూచి బహుజనులు ఆయనను వెంబడించిరి.౹ -యోహాను 6:1-2

రోగుల యెడల ఆయన చేసిన సూచక క్రియలను చూచి బహుజనులు ఆయనను వెంబడించిరి. అయితే వారు ఎందుకు వెంబడించారు? అని ఆలోచిస్తే, కొంతమంది అద్భుతములు చూడాలి అని, కొంతమంది ఆ అద్భుతములు పొందుకోవడానికి వెళ్ళి ఉంటారు. అనగా ఆయన శక్తిని తెలుసుకోవడానికి గానీ, శక్తిని అనుభవించడానికి గానీ ఈరోజు ప్రభువు సన్నిధినిలోనికి వచ్చారో వారు ఖచ్చితముగా దానిని పొందుకుంటారు.

అప్పుడు పస్కా అను యూదుల పండుగ సమీపించెను.౹ కాబట్టి యేసు కన్నులెత్తి బహుజనులు తనయొద్దకు వచ్చుట చూచి–వీరు భుజించుటకు ఎక్కడనుండి రొట్టెలుకొని తెప్పింతుమని ఫిలిప్పు నడిగెను గాని౹ యేమి చేయనై యుండెనో తానే యెరిగియుండి అతనిని పరీక్షించుటకు ఆలాగడిగెను.౹ -యోహాను 6:4-6

ఈ బహుజనులు అందరూ యేసయ్య చేసే అద్భుతములు గూర్చి తెలుసుకొనే ఆయనను వెంబడించి వచ్చారు. అయితే “యేమి చేయనై యుండెనో తానే యెరిగియుండి” యేసయ్య అక్కడ ఉన్నారు. అనగా వచ్చినవారు యేసయ్య చేసిన అద్భుతములు చూసి వచ్చినవారుగా ఉన్నారు అని యేసయ్య ఎరిగి ఇక్కడ ఉన్న అవసరములో కూడా ఒక అద్భుతము చేయడానికి ఆయన మనసు కలిగి ఉన్నారు.

ఆయన శిష్యులలో ఒకడు, అనగా సీమోను పేతురు సహోదరుడైన అంద్రెయ౹ –ఇక్కడ ఉన్న యొక చిన్నవానియొద్ద అయిదు యవల రొట్టెలు రెండు చిన్న చేపలు ఉన్నవి గాని, యింత మందికి ఇవి ఏమాత్రమని ఆయనతో అనగా౹ -యోహాను 6:8-9

ఈ భాగమును ఆలోచిస్తే, యేసయ్య అయితే ఏమి చేయాలో ఎరిగినవాడై ఉన్నాడు. అయితే ఫిలిప్పును ఎందుకు అడిగాడు అని ఆలోచిస్తే,

మరునాడు ఆయన గలిలయకు వెళ్లగోరి ఫిలిప్పును కనుగొని–నన్ను వెంబడించుమని అతనితో చెప్పెను.౹ ఫిలిప్పు బేత్సయిదావాడు, అనగా అంద్రెయ పేతురు అనువారి పట్టణపు కాపురస్థుడు.౹ ఫిలిప్పు నతనయేలును కనుగొని – ధర్మశాస్త్రములో మోషేయు ప్రవక్తలును ఎవరిని గూర్చి వ్రాసిరో ఆయనను కనుగొంటిమి; ఆయన యోసేపు కుమారుడైన నజరేయుడగు యేసు అని అతనితో చెప్పెను.౹ అందుకు నతనయేలు – నజరేతులోనుండి మంచిదేదైన రాగలదా అని అతని నడుగగా–వచ్చి చూడుమని ఫిలిప్పు అతనితో అనెను.౹ యేసు నతనయేలు తన యొద్దకు వచ్చుట చూచి–ఇదిగో యితడు నిజముగా ఇశ్రాయేలీయుడు, ఇతనియందు ఏ కపటమును లేదని అతనిగూర్చి చెప్పెను.౹ –నన్ను నీవు ఏలాగు ఎరుగుదువని నతనయేలు ఆయనను అడుగగా యేసు–ఫిలిప్పు నిన్ను పిలువకమునుపే, నీవు ఆ అంజూరపు చెట్టు క్రింద ఉన్నప్పుడే నిన్ను చూచితినని అతనితో చెప్పెను – యోహాను 1:43-51

ఫిలిప్పుకూ నతానియేలుకూ మధ్య జరిగిన సంభాషణలో యేసయ్య వారి వద్ద లేరు. అయితే గడచిన ఆ సందర్భమును గూర్చిన విషయము యేసయ్య ఎరిగే ఉన్నాడు. అలాగే ఇప్పుడు తన వద్దకు వచ్చిన జనులు అద్భుతము చూడాలి అనే వచ్చారు అని యేసయ్య ఎరిగే ఉన్నాడు. గనుక వారున్న అవసరములో దేవుడు అద్భుతమును చేయాలి అనుకుంటున్నాడు. అలాగే ఈరోజు నీవు కూడా ఈ టైటిల్ చూసి దేవుడు నా జీవితములో అద్భుతము చేయాలి అని ఆశ కలిగి వస్తే, వారు అద్భుతమును పొందుకుంటారు.

నీవు ఈరోజు కలిగి ఉన్నా చిన్న స్థితిలోనే ప్రభువు అద్భుతము చేయాలి అని ఉద్దేశ్యము కలిగి ఉన్నాడు. నీవు చేసే చేతిపని విషయములో దేవుడు ఆశీర్వదించేవాడిగా ఉన్నాడు. దేవుని ఆశీర్వాదము ఎలా మన జీవితములో కనపరచబడుతుంది? మృతమైన దానిలో జీవము పుడుతుంది. అనగా ఉన్నది గానీ ఏమాత్రము సరిపోయేదిగా లేదు. దాని విషయములో వృద్ధి కలిగించడము ద్వార దేవుడు ఆశీర్వదిస్తాడు. మరొకటి చూస్తే లేని దానిని ఉన్నట్టుగా చేసేవాడు. అనగా ఏమీ అవకాశములేని చోట నూతన మార్గము కలుగుతుంది.

మనము చదివిన భాగములో అయిదు చిన్న రొట్టెలు, రెందు చిన్న చేపలు మాత్రమే ఒక చిన్నవాని వద్ద ఉన్నాయి. అయితే ఆ ఉన్నవాటినే ఆశీర్వదించాలి అని దేవుడు ఉద్దేశ్యము కలిగి ఉన్నాడు. తద్వారా వచ్చిన ప్రతి ఒక్కరూ ఆయన చేసిన అద్భుతమును చూసారు. ఈరోజు నీవు కూడా ఆయన అద్భుతమును చేస్తాడు అని నమ్మి వస్తే, నీకున్న చిన్న పరిస్థితిలోనే ఆశీర్వదించేవాడిగా ఉన్నాడు.

ప్రభువు అద్భుతములు చేయడానికి, స్వస్థత చేయడానికి, సూచక క్రియలు చేయడానికి కారణము ఏమిటి? దేవుడు మనకొరకు ఉద్దేశ్యము కలిగిన జీవితము అధికారము కలిగినదిగా ఉంది. యేసయ్యను అంగీకరించిన వారు దేవుని కుటుంబములో చేర్చబడ్డారు, వారి జీవితములో దేవుని అధికారము కనపరచబడుతుంది. అది ఈ సమయములో కూడా, ఈ రోజులలో కూడా, తన అధికారముచేత నీ జీవితమును మహిమకరముగా మార్చాలి అనే ఉద్దేశ్యము కలిగి ఉన్నాడు. తద్వారా నీవు ఆయనను వెంబడించాలి అని ఆయన చిత్తము.

ఒక ఆత్మీయ నియమము ఏమిటి అంటే, నీ వద్ద ఉన్న దానిని దేవుడు ఆశీర్వదిస్తాడు. మనము చదివిన భాగములో ఇదే సంగతి చూసాము. ఎర్ర సముద్రము వద్ద కూడా మోషే దగ్గర ఉన్న చిన్న కర్రనే వాడుకొని అద్భుతము దేవుడు చేసాడు.

మనము చదివిన భాగములో గంపలో ఉన్న రొట్టెలు ఒకటి వడ్డించగానే ఆ స్థానములో మరొకటి వచ్చి ఉన్నది. అలాగే మోషే కర్ర పైకెత్తితే ఎర్ర సముద్రము విడిపోవడము ఎంత ఆశ్చర్యకరము? వీరే కాదు గానీ, ఏలియా జీవితములో చూస్తే, సారెఫతు విధవరాలి వద్ద ఉన్న దానినే, దేవుడు ఆశీర్వదించాడు.

అంతట ప్రవక్తల శిష్యులలో ఒకని భార్య–నీ దాసుడైన నా పెనిమిటి చనిపోయెను; అతడు యెహోవాయందు భక్తిగలవాడై యుండెనని నీకు తెలిసేయున్నది; ఇప్పుడు అప్పులవాడు నా యిద్దరు కుమారులు తనకు దాసులుగా ఉండుటకై వారిని పట్టుకొనిపోవుటకు వచ్చియున్నాడని ఎలీషాకు మొఱ్ఱపెట్టగా ఎలీషా–నా వలన నీకేమి కావలెను? నీ యింటిలో ఏమి యున్నదో అది నాకు తెలియ జెప్పుమనెను. అందుకామె–నీ దాసురాలనైన నా యింటిలో నూనెకుండ యొకటి యున్నది; అది తప్ప మరేమియు లేదనెను.౹ -2 రాజులు 4:1-2

ఇక్కడ గమనిస్తే, ఆ స్త్రీ వద్ద నూనె కుండ తప్ప మరేమీ లేదు. అలాగే ఆమె ఎలీషా వద్దకు ఎందుకు వచ్చింది అని ఆలోచిస్తే, ఎలీషా దేవుని ఆత్మను కలిగినవాడు. అలాగే ఆమె భర్త ఎలీషా వద్ద శిష్యునిగా ఉన్నాడు. అనగా ఆ ప్రవక్త ఎటువంటివాడో ఆమె ఎరిగి ఉన్నది. ఆమె అద్భుతమును ఆశించి ఎలీషా వచ్చింది. అలాగే ఎలీషా కూడా ఆమె కోరుకున్న అద్భుతమును దేవుని ద్వారా జరిగించాడు.

అయితే దేవుని వాక్యమును ఎంతగా తెలుసుకుంటే, అంతగా ప్రభువును యెరుగగలుగుతావు. అప్పుడు ఆయన ఏమి చేయగలడో తెలిసి ఆయన వద్దకు సరైన ఆశ కలిగి వెళ్ళగలుగుతాము. గనుక దేవుని వాక్యమును లోతుగా ఎరిగి ఉండుట మహాభాగ్యము. అయితే మనము గమనించవలసినది ఏమిటి అంటే, అద్భుతము చేయడానికి యేసయ్య సిద్ధమే, అయితే ఆయన చెప్పిన మాటలు నమ్మి అదే ప్రకారము చేయడానికి సిద్ధపడగలవా? నువ్వు నమ్మగలిగితే నీ జీవితము అద్భుతముగా మార్చబడుతుంది. నీ ఊహకు అందితే అద్భుతము ఎలా అవుతుంది? అందుకె నీ ఊహకు మించిన కార్యము నీ దేవుడు చేస్తాడు. అయితే దానికి ప్రాముఖ్యమైనది ఆయన చేయగలడు అనే నీ నమ్మిక. మరొక ప్రాముఖ్యమైన సంగతి, దేవుని అద్భుతము చూడాలి అంటే, నీ జ్ఞానము పనిచేయకూడదు.

అందుకు యెహోవా–నీవు కష్టపడకుండను పెంచకుండను ఒక రాత్రిలోనే పుట్టి పెరిగి ఒక రాత్రిలోగానే వాడిపోయిన యీ సొరచెట్టు విషయములో నీవు విచారపడుచున్నావే;౹ అయితే నూట ఇరువదివేలకంటె ఎక్కువై, కుడియెడమలు ఎరుగని జనమును బహు పశువులునుగల నీనెవె మహాపురము విషయములో నేను విచారపడవద్దా? అని యోనాతో సెలవిచ్చెను. -యోనా 4:10-11

ఈ వాక్యములో దేవుని హృదయము మనము అర్థము చేసుకోవచ్చు. దేవుడు కేవలము మన జీవితములను గూర్చి మాత్రమే కాదు గానీ, మనము కలిగిన దాని విషయములో కూడా ఆలోచన కలిగిఉన్నాడు. అందుకే దేవుడు ఏమి చెప్తే ఆ ప్రకారము చేయడానికి నీవు సిద్ధపడితే, కాలాలు మారినా యుగాలు మారిన మారనివాడు మన దేవుడు గనుక, నీ జీవితములో అద్భుతమును ఖచ్చితముగా పొందుకుంటావు