08-10-2023 – ఆదివారం మొదటి ఆరాధన – ఆలస్యం వెనుక దేవుని ఉద్దేశ్యం

వారము కొరకైన వాక్యము

చాలా సందర్భాలలో మన వ్యక్తిగతమైన జీవితములలో ఆలస్యము అనేది అనేకమైన సార్లు అనుభవించిన వారిగా ఉన్నాము. ప్రత్యేకించి అసాధ్యముగా కనబడే విషయములో ఆలస్యము అయినప్పుడు నిరాశ నిస్పృహలు కలిగి దానిని వదిలిపెట్టేసేవారిగా ఉంటాము. అయితే మన జీవితములు ఎంతో శక్తివంతమైనవి, మన జీవితముల ద్వారానే దేవుని మహిమ లోకమునకు చాటింపబడుతుంది. అందుకే వాక్యము స్వీకరించుటలో మన ఆశీర్వాదము దాగిఉంది. “నా జీవితము దేవుని శక్తి వెల్లడిపరచబడటానికి ఒక మార్గము అయి ఉన్నది” అని జ్ఞాపకము పెట్టుకోండి.

మరియ, ఆమె సహోదరియైన మార్త, అనువారి . గ్రామమైన బేతనియలోనున్న లాజరు అను ఒకడు రోగియాయెను.౹ ఈ లాజరు ప్రభువునకు అత్తరుపూసి తల వెండ్రుకలతో ఆయన పాదములు తుడిచిన మరియకు సహోదరుడు.౹ అతని అక్కచెల్లెండ్రు – ప్రభువా, యిదిగో నీవు ప్రేమించువాడు రోగియై యున్నాడని ఆయనయొద్దకు వర్తమానము పంపిరి.౹ -యోహాను 11:1-3

“యిదిగో నీవు ప్రేమించువాడు రోగియై యున్నాడు” అని యేసయ్యకు వర్తమానము పంపబడింది.

యేసు అది విని–యీ వ్యాధి మరణముకొరకు వచ్చినదికాదు గాని దేవుని కుమారుడు దానివలన మహిమ పరచబడునట్లు దేవుని మహిమకొరకు వచ్చినదనెను.౹ యేసు మార్తను ఆమె సహోదరిని లాజరును ప్రేమించెను.౹ అతడు రోగియై యున్నాడని యేసు వినినప్పుడు తానున్నచోటనే యింక రెండు దినములు నిలిచెను.౹ -యోహాను 11:4-6

మార్త, మరియ లాజరు కుటుంబమును యేసయ్య ఎంతో ప్రేమిచాడు. అటువంటి కుటుంబములో ఒక వ్యాధి వచ్చింది. అయితే ఒక విషయము మనము జ్ఞాపకము చేసుకోవాలి, యేసయ్యను అంగీకరించినవారి జీవితములో వ్యాధి, రోగము శ్రమ కలగవు అని ఎక్కడా ప్రభువు చెప్పలేదు గానీ, దాని ప్రభావము నీలో, నీపై నిలువదు అని యెరిగి ఉండాలి.

“యీ వ్యాధి మరణముకొరకు వచ్చినదికాదు గాని దేవుని కుమారుడు దానివలన మహిమ పరచబడునట్లు దేవుని మహిమకొరకు వచ్చినదనెను.” అనగా కొన్ని శ్రమలు మన ద్వారా దేవుడు మహిమపరచబడటానికి కలిగేవిగా ఉన్నాయి. అనేకసార్లు మనము చేసిన తప్పును బట్టి శ్రమకలిగింది అనుకుంటాము అయితే ప్రతీ శ్రమ అటువంటిదే కాదు. అందుకే శ్రమ కలిగినప్పుడు అది ఎందుకు కలిగింది అని దేవుని సన్నిధిలో కనిపెట్టాలి.

ఇక్కడ చదివిన భాగములో మార్త, మరియలు విశ్వాసము కలిగినవారై ఉన్నారు.

మార్త యేసుతో–ప్రభువా, నీవిక్కడ ఉండినయెడల నా సహోదరుడు చావకుండును.౹ -యోహాను 11:21

అనగా యేసయ్య గనుక లాజరు చనిపోకముందు దగ్గర ఉండివుంటే ఖచ్చితముగా లాజరు బ్రతికేవాడు అని విశ్వాసము కనపరిచింది.

అంతట మరియ యేసు ఉన్న చోటికి వచ్చి, ఆయనను చూచి, ఆయన పాదములమీద పడి–ప్రభువా, నీవిక్కడ ఉండినయెడల నా సహోదరుడు చావకుండుననెను.౹ -యోహాను 11:32

మరియ కూడా అదే విశ్వాసము కనపరచినది. తన సహోదరుడు చనిపోక ముందు గనుక యేసయ్య వస్తే ఖచ్చితముగా బ్రతుకుతాడు అని నమ్మారు. అయితే తాను చనిపోయాక ఇంక విశ్వాసము విడిచిపెట్టారు. అనగా విశ్వసించిన విషయము దొరకక ముగించబడినప్పుడు మన విశ్వాసము విడిచిపెట్టే స్థితిలోనికి మనము వెళతాము. అయితే మనము నమ్మిన దేవుడు అన్యాయస్థుడు కాదు గనుక విశ్వాసమును విడిచిపెట్టక కనిపెట్టి ఉండుట నేర్చుకుందాము.

లాజరు రోగిగా ఉన్నాడు. రోగిగా ఉన్నప్పుడే యేసయ్యకు వర్తమానము పంపిచారు. వర్తమానము అందిన తరువాత రెండు రోజులు యేసయ్య ఆలస్యము చేసారు. దానిని బట్టి, కనిపెట్టినవారు ఆలస్యమైపోయింది అని ఆశ కోల్పోయినవారుగా అయిపోయారు. అయితే ప్రభువు చేసిన ఆలస్యము వెనుక ఒక ఉద్దేశ్యము ఉంది.

దేవుని కృప నాకు కనపరచబడాలి అని నీవు కనిపెట్టుకుని ఉంటే, నీకు కనపరచబడకుండా ఆయన కృప ఎలా మిస్ అవుతుంది? దేవుని కార్యము గూర్చి నీవు విశ్వాసము కలిగి ఎదురు చూస్తుండగా, ఆ కార్యము నెరవేరకుండా ఎలా తప్పిపోతుంది? ఈ సత్యము ఎరిగి ఉండాలి.

అయితే దేవుడు ఆలస్యము చేయుట వెనుక ఉద్దేశ్యము ఏమిటి అంటే, దేవుడు కార్యము ఎలా చేయగలుగుతాడో అనే సత్యము, దేవుని యొక్క సూపర్ నేచురల్ శక్తికి సాక్ష్యముగా నీ జీవితము ఈ లోకము యెదుట కనబడుటయే!

అయితే ఈ అనుభవము మనము కలిగి ఉండాలి అంటే, ప్రార్థన చేయాలి, విశ్వాసము కూడా కనపరచాలి.

ఆయన యీ మాటలు చెప్పిన తరువాత–మన స్నేహితుడైన లాజరు నిద్రించుచున్నాడు; అతని మేలుకొలుప వెళ్లుచున్నానని వారితో చెప్పగా౹ -యోహాను 11:11

ఏ విషయము గూర్చి నీవు ప్రార్థన చేస్తూ, విశ్వాసము కనుపరుస్తూ ఉన్నావో ఆ విషయము ఆలస్యము అగుట అనేది నిద్రించుచున్న స్థితిలో ఉన్నదానిని సూచిస్తుంది. అది నిద్రించుచున్నదే గానీ, చనిపోయిన స్థితికాదు. అనగా అది ముగించబడలేదు, నెరవేరబడవలసినదే!

ఆయన సముద్రతీరమున నుండగా సమాజమందిరపు అధికారులలో యాయీరను నొకడు వచ్చి, ఆయనను చూచి ఆయన పాదములమీదపడి –నా చిన్నకుమార్తె చావనై యున్నది; అది బాగుపడి బ్రదుకునట్లు నీవు వచ్చి దానిమీద నీచేతులుంచవలెనని ఆయనను మిగుల బతిమాలుకొనగా ఆయన అతనితోకూడ వెళ్లెను; బహుజనసమూహమును ఆయనను వెంబడించి ఆయన మీద పడుచుండిరి. -మార్కు 5:22-24

ఆయన ఇంకను మాటలాడుచుండగా, సమాజమందిరపు అధికారి యింటనుండి కొందరు వచ్చి–నీ కుమార్తె చనిపోయినది; నీవిక బోధకుని ఎందుకు శ్రమ పెట్టుదు వనిరి. యేసు వారు చెప్పినమాట లక్ష్యపెట్టక–భయపడకుము, నమ్మిక మాత్రముంచుమని సమాజమందిరపు అధికారితో చెప్పి -మార్కు 5:35-36

లోపలికిపోయి– మీరేల గొల్లుచేసి యేడ్చుచున్నారు? ఈ చిన్నది నిద్రించు చున్నదేగాని చనిపోలేదని వారితో చెప్పెను. అందుకు వారు ఆయనను అపహసించిరి. అయితే ఆయన వారినందరిని బయటకు పంపివేసి, ఆ చిన్నదాని తలిదండ్రులను తనతో ఉన్నవారిని వెంటబెట్టుకొని, ఆ చిన్నది పరుండి యున్న గదిలోనికి వెళ్లి ఆ చిన్నదాని చెయిపెట్టి– తలీతాకుమీ అని ఆమెతో చెప్పెను. ఆ మాటకు చిన్నదానా, లెమ్మని నీతో చెప్పుచున్నానని అర్థము. వెంటనే ఆ చిన్నది లేచి నడవసాగెను; ఆమె పండ్రెండు సంవత్సరముల ప్రాయము గలది. వెంటనే వారు బహుగా విస్మయమొందిరి. -మార్కు 5:39-42

ఇక్కడ కూడా, యాయీరు జీవితములో భౌతికముగా చనిపోయింది అయితే ఆత్మీయముగా నిద్రించునున్నదే అని ప్రభువు చెప్పుచున్నారు. అయితే ఈ అనుభవము ఎవరి జీవితములో అంటే, నీవు ప్రార్థించి, విశ్వసించిన వారి జీవితములో.

లాజరు జీవితములో కూడా అంతే, ఆలస్యము ద్వారా దేవుని శక్తి కనపరచబడటానికి ప్రభువు ఉద్దేశ్యము కలిగి ఉన్నాడు. అంతే కాక అబ్రహాము జీవితములో కూడా, చూస్తే, “దహన బలికి అవసరమైన గొర్రెపిల్లను దేవుడే చూసుకుంటాడు” అని విశ్వాసము కనపరచాడు. ఆ విశ్వాసము ప్రకారము అక్కడ గొర్రెపిల్ల దేవుడు ఏర్పాటుచేసాడు.

నీవు నేను కూడా విశ్వాసము కలిగి కనిపెట్టి ఉన్నయెడల ఎన్నడునూ సిగ్గుపరచబడము.

కావున యేసు–లాజరు చనిపోయెను, మీరు నమ్మునట్లు నేనక్కడ ఉండలేదని మీ నిమిత్తము సంతోషించుచున్నాను; అయినను అతనియొద్దకు మనము వెళ్లుదము రండని స్పష్టముగా వారితో చెప్పెను.౹ -యోహాను 11:14

ఒకవేళ యేసయ్య లాజరు వద్ద ఉండి ఉంటే, శిష్యులు వేరేచోట ఉండేవారు. అయితే యేసయ్య గనుక లాజరు వద్ద ఉంటే, లాజరు ఎలాగూ బ్రతుకుతాడు అయితే, శిష్యుల యెదుట ఈ కార్యము జరిగేది కాదు. అయితే ఇప్పుడు శిష్యుల ఎదుట ఆ కార్యము జరుగుటను బట్టి, ఆ శిష్యులు భూమిని తల్లకిందులు చేసే వారిగా సిద్ధపరచబడ్డారు.

అనగా దేవుడు ఆలస్యము చేయుటలో ఒక ఉద్దేశ్యము దేవుని శక్తి మన జీవితము ద్వారా లోకమునకు చాటి చెప్పుట, మరొకటి ఆ కార్యము ద్వారా దేవుని పని కొరకు మరొకరిని లేవనెత్తి సిద్ధపరచుట.