17-09-2023 – ఆదివారం రెండవ ఆరాధన

వారము కొరకైన వాక్యము

కోల్పోయినదానిని తిరిగి సంపాదించుకొనుట అనే విషయమును గూర్చి తెలుసుకుందాము. “నీ ఆత్మ వర్థిల్లుతున్న ప్రకారముగా నీవు అన్ని విషయములలో అభివృద్ధి చెంది వర్థిల్లుతావు” అని వాక్యము సెలవిస్తుంది కదా! మనము ఆశీర్వాదము వెంబడి వెళ్ళడము కాదు గానీ కీర్తనలలో చూసినట్టు శ్రేష్టమైన ఆశీర్వాదములే మనలను ఎదుర్కోవాలి.

కోల్పోయినదానిని తిరిగి సంపాదించుకోవాలి అంటే మన ఆత్మీయ స్థాయిని నిలబెట్టుకోవాలి, అభివృద్ధి చేసుకోవాలి. దాని కొరకు మత్తయి సువార్తలోని భాగము ద్వారా నేర్చుకుందాము.

పరలోకరాజ్యము, తమ దివిటీలు పట్టుకొని పెండ్లికుమారుని ఎదుర్కొనుటకు బయలుదేరిన పదిమంది కన్యకలను పోలియున్నది. -మత్తయి 25:1

ఇది ఒక ఉపమానము. ఇక్కడ పది మంది కన్యకలు అని వ్రాయబడి ఉన్నది. పెండ్లి కుమారుని ఎదుర్కోవడానికి దివిటీలు పట్టుకొని వారు బయలుదేరినారు. అయితే కన్యకలు మాత్రమే ఇక్కడ ప్రస్తావించబడ్డారు ఎందుకు అని ఆలోచిస్తే, కన్యకలు అనగా పురుషుని ఎరుగని వారు పవిత్రమైన వారుగా పరిశుద్ధమైనవారుగా మనము చూడవచ్చు. అనగా పిలువబడినవారు పరిశుద్ధులుగా ఉన్నారు అని అర్థము చేసుకోవచ్చు. మనము పరలోకరాజ్యమును చేరడానికి పిలువబడ్డాము. మనము యేసయ్యను బట్టి పరిశుద్ధమైన జీవితమును పొందుకున్నాము.

వీరిలో అయిదుగురు బుద్ధిలేని వారు, అయిదుగురు బుద్ధిగలవారు. -మత్తయి 25:2

ఇక్కడ చూస్తే, ఇక్కడ బుద్దిగలిగినవారుగా, బుద్ధిలేనివారుగా ఎలా చెప్పబడుతున్నారు? అది వారికి కలిగిన జ్ఞానమును బట్టి ఆ సాక్ష్యము వచ్చిందా? వారి క్రియలను బట్టి వచ్చిందా? ఈ సత్యమును మనము కూడా గ్రహించాలి. యేసయ్యను అంగీకరించిన మనము పరిశుద్ధతను ధరించుకొనే ఉన్నాము. అయితే సమయము వచ్చినప్పుడు చేసే క్రియలను బట్టి మనకు సాక్ష్యము స్థిరపరచబడుతుంది.

బుద్ధి లేనివారు తమ దివిటీలు పట్టుకొని తమతోకూడ నూనె తీసికొనిపోలేదు. బుద్ధిగలవారు తమ దివిటీలతోకూడ సిద్దెలలో నూనె తీసి కొనిపోయిరి. -మత్తయి 25:3-4

ఈ పదిమంది వద్ద దివిటీలు ఉన్నాయి. ఈ పది మంది కూడా పెండ్లికుమారుడికొరకు ఎదురుచూస్తూ ఉన్నారు. అయితే నూనె తీసుకువెళ్ళిన కన్యకలు ఏమి ఆలోచన కలిగి తీసుకెళ్ళారు? నూనె తీసుకుని వెళ్ళని కన్యకలు ఏమి ఆలోచన కలిగి తీసుకువెళ్ళారు?

ఒకవేళ పెండ్లి కుమారుడు వచ్చేసరికి ఈ దివిటీ ఆరిపోతే, నూనె గనుక దగ్గర ఉంటే, మరలా వెలిగించుకోవచ్చు అని బుద్ధిగలిగిన కన్యకలు ఆలోచించారు. నూనె అనేది పరిశుద్ధాత్మకు నిదర్శనము. పరిశుద్ధాత దేవుడు మనలో ఉన్నంతకాలము మన జీవితములు ప్రకాశిస్తాయి, వెలుగుమయముగా ఉంటాయి. అయితే ఎలా అయితే, “నూనె ఉంటేనే గానీ దివిటి వెలగదు” అని బుద్ధిగలిగిన వారు గ్రహించారో, మనము కూడా పరిశుద్ధాత్మ దేవుడు మనలో లేకుండా మనము ప్రకాశించలేము.

పెండ్లికుమారుడు ఆలస్యము చేయగా వారందరు కునికి నిద్రించుచుండిరి. అర్ధరాత్రివేళ– ఇదిగో పెండ్లికుమారుడు, అతనిని ఎదుర్కొన రండి అను కేక వినబడెను. అప్పుడు ఆ కన్యకలందరు లేచి తమ దివిటీలను చక్కపరచిరి గాని బుద్ధిలేని ఆ కన్యకలు– మా దివిటీలు ఆరిపోవుచున్నవి గనుక మీ నూనెలో కొంచెము మాకియ్యుడని బుద్ధిగలవారినడిగిరి. -మత్తయి 25:5-8

ఇక్కడ చూస్తే, బుద్ధిలేని వారి దివిటీలు ఆరిపోతున్నాయి, తిరిగి వెలిగించుకోవడానికి వారి వద్ద నూనె లేదు. అనగా వారు నిర్లక్ష్యముగా ఉన్నట్టుగా మనము చూడవచ్చు. బుద్ధిగలిగినవారుగా నూనె సిద్ధపరచుకొన్నట్టు, మన జీవితములో నిత్యము పరిశుద్ధాత్ముడు మనలోనే నిత్యము ఉండాలి అంటే ఏమి చేయాలి?

ప్రజలందరును బాప్తిస్మము పొందినప్పుడు యేసు కూడ బాప్తిస్మము పొంది ప్రార్థన చేయుచుండగా ఆకాశము తెరవబడి పరిశుద్ధాత్మ శరీరాకారముతో పావురమువలె ఆయనమీదికి దిగి వచ్చెను. అప్పుడు–నీవు నా ప్రియ కుమారుడవు, నీయందు నేనానందించుచున్నానని యొక శబ్దము ఆకాశమునుండి వచ్చెను. -లూకా 3:21-22

మనలో పరిశుద్ధాత్ముడు మనలో ఉండాలి అంటే ఏమి చేయాలి? బాప్తీస్మము అంటే ఏమిటి? మన పాపములు సమాధిచేయబడి ఉండుట, నూతనమైన వ్యక్తిగా తిరిగి లేచుట అనేదానిని సూచిస్తుంది. అంటే, పాపము విషయములో సమాధిచేయబడినవారుగా ఉన్నప్పుడు పరిశుద్ధాత్మ మనమీదికి దిగివచ్చి, మనలో ఉండేవారుగా ఉంటారు. మనము దేనికొరకు తిరిగి లేచాము అంటే, నూతమైన పరిశుద్ధత కలిగి జీవించే వ్యక్తిగా తిరిగి లేచాము. నూనెను చూస్తే, అగ్నిని రగిలించగలిగే శక్తి కలిగి ఉంటుంది. అలాగే పరిశుద్ధాత్మకు కూడ ఒక శక్తి ఉంది.

మృతులలోనుండి యేసును లేపినవాని ఆత్మ మీలో నివసించినయెడల, మృతులలోనుండి క్రీస్తుయేసును లేపినవాడు చావునకు లోనైన మీ శరీరములను కూడ మీలో నివసించుచున్న తన ఆత్మ ద్వారా జీవింపజేయును. -రోమా 8:11

పరిశుద్ధాత్మకు ఉన్న ఆ శక్తి ఏమిటి అని చూస్తే, “మృతమైనదానిని జీవింపచేయుట”. అయితే పరిశుద్ధాత్మ దేవుడు ఉండాలి అంటే, పాపము విషయములో మృతమైపోవాలి. అయితే నేను పరిశుద్ధాత్మను కలిగి కొనసాగించాలి అనే బలమైన ఆలోచన కలిగి ఉండాలి. అయితే అలాకాక నిర్లక్ష్యముగా ఉన్నట్టయితే, మధ్యలోనే ఆయనను పోగొట్టుకొనేవారిగా అయిపోతాము. గనుక మనము ఈ సత్యమును ఎరిగినవారిగా సిద్ధపడదాము.

ఇక్కడ మనము చూస్తే, దివిటీలలో ఉన్న నూనె సమయము గడిచేకొద్దీ అయిపోతుంది. మరి మనము పరిశుద్ధత్మను ఎలా దూరము చేసుకుంటాము? ఇది అర్థము చేసుకోవడానికి కొన్ని వచనాలు చూద్దాము.

లోకము ఆయనను చూడదు, ఆయనను ఎరుగదు గనుక ఆయనను పొంద నేరదు; మీరు ఆయనను ఎరుగుదురు. ఆయన మీతోకూడ నివసించును, మీలో ఉండును.౹ -యోహాను 14:17

పాపము విషయములో మృతమైనప్పుడు పరిశుద్ధాత్మ మనలో ఉంటాడు. అయితే మనము ఏ పాపమును విడిచిపెట్టి ఒప్పుకున్నామో అదే పాపమును మరలా తిరిగి చేయుటకు బయలుదేరితే, పరిశుద్ధాత్మ దేవుడు నీలో ఉండడు గానీ, నీతో ఉండి నీవు చేసేది తప్పు అని నిన్ను పాపమును గూర్చి ఒప్పించేవాడుగా ఉంటాడు. ఈ హెచ్చరికలను ఖాతరు చేయక ముందుకు వెళ్ళేవారు క్రమక్రమంగా పరిశుద్ధాత్మ దేవునిని కోల్పోయేవారిగా ఉంటారు.

బుద్ధిలేని ఆ కన్యకలు– మా దివిటీలు ఆరిపోవుచున్నవి గనుక మీ నూనెలో కొంచెము మాకియ్యుడని బుద్ధిగలవారినడిగిరి. అందుకు బుద్ధిగల కన్యకలు మాకును మీకును ఇది చాలదేమో, మీరు అమ్మువారియొద్దకు పోయి కొనుక్కొనుడని చెప్పిరి. -మత్తయి 25:8-9

ఈ భాగములో చూస్తే, పెండ్లి కుమారుడు వచ్చాడు అనే పిలుపు వచ్చింది అప్పుడు బుద్ధిలేనివారు సరిచేసుకోవడానికి సిద్ధపడుతున్నారు. మన జీవితములో చూస్తే, మనము ఆత్మీయ జీవితములో పడిపోయిన స్థితిలో ఉంటే, తిరిగి నిలబెట్టుకోవడానికి ఒక అవకాశము ఉంది. “అమ్మువాని యొద్దకు పోయి కొనుక్కోవాలి” అంటే ఏమిటి? పరిశుద్ధత్మను అమ్మువాడు ఎవరు? పరిశుద్ధాత్మ దేవుడే నూనెను అమ్మువాడు. అయితే ఎలా కొనాలి? నీ దగ్గర ఉన్నది ఇచ్చి, ఆయన వద్ద ఉన్నది కొనాలి. అయితే మన దగ్గర ఏమి ఉంది? మనము చేసిన పాపమే ఉంది. ఆ పాపమును ఒప్పుకొనుటయే ఆయనకు ఇచ్చుట, అప్పుడు ఆయన వద్ద ఉన్న పరిశుద్ధతను మనకు దయచేసేవాడుగా ఉంటాడు. ఎప్పుడైతే నీలో ఉన్న పాపమును విడిచిపెట్టేవానిగా సిద్ధపడతావో, అప్పుడు నీతో ఉన్న పరిశుద్ధాత్ముడు, నీలోనికి వచ్చేవాడుగా ఉంటాడు.

తప్పిపోయిన కుమారుని ఉపమానములో చూస్తే, తప్పిపోయిన కుమారునికి బుద్ధివచ్చినప్పుడు వాడు కూడ సరిచేయబడటానికి సిద్ధపడుతున్నాడు. ఎలా సిద్ధపడుతున్నాడో చూస్తే,

అయితే బుద్ధి వచ్చినప్పుడు వాడు–నా తండ్రియొద్ద ఎంతోమంది కూలివాండ్రకు అన్నము సమృద్ధిగా ఉన్నది, నేనైతే ఇక్కడ ఆకలికి చచ్చిపోవు చున్నాను. నేను లేచి నా తండ్రియొద్దకు వెళ్లి–తండ్రీ, నేను పరలోకమునకు విరోధముగాను నీ యెదుటను పాపము చేసితిని; ఇకమీదట నీ కుమారుడనని అనిపించుకొనుటకు యోగ్యుడను కాను; నన్ను నీ కూలి వారిలో ఒకనిగా పెట్టుకొనుమని అతనితో చెప్పుదుననుకొని, లేచి తండ్రియొద్దకు వచ్చెను. -లూకా 15:17-19

మనము చేసే క్రియలలో ఆత్మీయమైన విషయములు మిళితమై ఉన్నాయి గనుక, మనము భౌతికముగా పాపము చేసినప్పటికీ పరలోకమునకు వ్యతిరేకముగా పాపము చేసేవారిగా అయిపోతాము. ఇది మనము తెలుసుకోవలసిన సత్యము. ఎప్పుడైతే బుద్ధివచ్చి తండ్రిదగ్గరకు వచ్చాడో ఏమి జరిగింది?

వాడింక దూరముగా ఉన్నప్పుడు తండ్రి వానిని చూచి కనికరపడి, పరుగెత్తి వాని మెడమీదపడి ముద్దుపెట్టుకొనెను. అప్పుడు ఆ కుమారుడు అతనితో–తండ్రీ, నేను పరలోకమునకు విరోధముగాను నీ యెదుటను పాపము చేసితిని; ఇకమీదట నీ కుమారుడనని అనిపించుకొనుటకు యోగ్యుడను కాననెను. -లూకా 15:20-21

చిన్న కుమారుడు తండ్రి వద్దకు వచ్చి తన తప్పును ఒప్పుకోగానే, తండ్రి తన ప్రేమను కనపరచాడు. ఎలా అంటే, తాను పోగొట్టుకొన్న సమస్తము తిరిగి సంపాదించుకొన్నవాడిగా మారిపోయాడు.

అయితే తండ్రి తన దాసులను చూచి –ప్రశస్త వస్త్రము త్వరగా తెచ్చి వీనికి కట్టి, వీని చేతికి ఉంగరము పెట్టి, పాదములకు చెప్పులు తొడిగించుడి; క్రొవ్విన పశువును తెచ్చి వధించుడి, మనము తిని సంతోషపడుదము; -లూకా 15:22-23

మనము కూడా మనము చేసిన తప్పును ఒప్పుకొని విడిచిపెట్టి ఆ పాపమునకు మృతుడవుగా నీవు ఎంచుకొని జీవిస్తే మరలా నీవు పరిశుద్ధాత్మను నీలో నివసించులాగున ఆయన మరలా నీలో నివసిస్తాడు. అందుకే పరిశుద్ధాత్మను నేను కలిగి ఉండాలి అనే బలమైన బుద్ధిపూర్వకమైన ఆలోచన నిత్యము కలిగి ఉండాలి అలా కాని యెడల మన నిర్లక్ష్యము మన జీవితాలను నాశనము చేస్తుంది.

వస్త్రము రక్షణ, ఉంగరము అధికారము, చెప్పులు సమాధాన సువార్తకు సూచనగా ఉన్నాయి. ఎప్పుడైతే నీవు మరలా వెనక్కి వెళ్ళి చేసిన పాపములను విడిచిపెట్టినయెడల తిరిగి నీవు రక్షణ, అధికారము, సువార్త కొరకు పరిచర్యకొరకు తిరిగి వాడబడే స్థితిలోనికి మరలా రాగలుగుతావు.

పరిశుద్ధాత్ముడు నీలో ఉన్నప్పుడు నీలో జీవము కలిగినవాడిగా నీవుంటావు. అలాగే నీ యెదుట వ్యతిరేకమైనది నిలబడినప్పుడు, పరిశుద్ధాత్ముడు వాటిని దహించేవాడుగా ఉంటాడు. మనలను మనమే సిద్ధపరచుకుందాము.