03-09-2023 – ఆదివారం మొదటి ఆరాధన

వారము కొరకైన వాక్యము

ద్రాక్షావల్లిని నేను, తీగెలు మీరు. ఎవడు నాయందు నిలిచియుండునో నేను ఎవనియందు నిలిచి యుందునో వాడు బహుగా ఫలించును; నాకు వేరుగా ఉండి మీరేమియు చేయలేరు.౹ -యోహాను 15:5

మన జీవితములలో ఫలింపు కొరకు ఎంతో ప్రయత్నిస్తాము, కష్టపడతాము. అయితే వాక్యము చెప్పుచున్న సత్యము – “ఎవడు నాయందు నిలిచియుండునో, నేను ఎవని యందు నిలిచి ఉందునో”. అప్పుడు వచ్చే ఫలింపు సామాన్యమైనది కాదు గానీ, బహుగా ఫలింపు.

ఆ దినమున దావీదు దేవుని విషయమై భయమొంది–దేవుని మందసమును నాయొద్దకు నేను ఏలాగు తీసికొని పోవుదుననుకొని, మందసమును తన యొద్దకు దావీదు పురమునకు తీసికొనిపోక, దానిని గిత్తీయుడైన ఓబేదెదోము ఇంటిలోనికి కొనిపోయెను.౹ దేవుని మందసము ఓబేదెదోము ఇంటిలో అతని కుటుంబమునొద్ద మూడు నెలలుండగా యెహోవా ఓబేదెదోము ఇంటి వారిని అతని సొత్తంతటిని ఆశీర్వదించెను. -1 దినవృత్తాంతములు 13:12-14

ఒబెదెదోము దేవుని యందు ఎంతో ఆసక్తి గలిగినవాడు. దేవుని మందసమునకు కాపలాదారునిగా ఉన్నాడు. దేవుని మందిరములో వాయిద్యకారుడుగా ఉన్నాడు. “ఎవడు నాయందు నిలిచియుండునో, నేను ఎవని యందు నిలిచి ఉందునో” అనే నియమము ప్రకారము ఒబెదెదోము తన జీవితమును సిద్ధపరచుకున్నాడు.

ఉదాహరణకు మన ఉద్యోగములను ఆలోచిస్తే, 24 గంటలు పని 3 షిఫ్ట్స్ గా ఉంటాయి. ఒబెదెదోము ఒక 8 గంటలు కాపలాదారునిగా పనిచేసి తరువాత వాయిద్యకారునిగా పని చేస్తున్నాడు. అంటే దేవుని పని కొరకు తాను ఎంత ఆసక్తి కలిగి ఉన్నాడో అర్థము చేసుకోవచ్చు. మనము కూడా అదే విధానములో మన జీవితాన్ని కట్టుకోవాలి. అప్పుడు నీ జీవితము ఆశ్చర్యకరముగా మారుతుంది. అయితే, వాక్యమును నీవు వెంబడించే రీతిపై అది ఆధారపడి ఉంటుంది.

“ద్రాక్షావల్లిని నేను, తీగెలు మీరు” ఇది ఒక నియమము. ఒక ద్రాక్షావల్లిని చూసినప్పుడు, దానికి అనేకమైన తీగెలు ఉంటాయి. ఆ తీగెలు ఆ ద్రాక్షావల్లిలో ఉన్న జీవమును బట్టి ప్రారంభమయ్యి ఎదుగుతాయి.

అయితే మీరు చీకటిలోనుండి ఆశ్చర్యకరమైన తన వెలుగులోనికి మిమ్మును పిలిచిన వాని గుణాతిశయములను ప్రచురముచేయు నిమిత్తము, ఏర్పరచబడిన వంశమును, రాజులైన యాజకసమూహమును, పరిశుద్ధ జనమును, దేవుని సొత్తయిన ప్రజలునై యున్నారు.౹ -1 పేతురు 2:9

మనము పిలువబడిన పిలుపును చూస్తే, “మిమ్మును పిలిచిన వాని గుణాతిశయములను ప్రచురముచేయు నిమిత్తము మీరు ఉన్నారు”. అంటే ఆయన ద్రాక్షావల్లి అయితే ఆ ద్రాక్షావల్లి యొక్క గుణములను కలిగి ఉండాలి ఆ విధముగా మనము ఆయన గుణములను ప్రచురము చేస్తాము.

దేవుని మొదటి గుణము, “పరిశుద్ధత”. మనము కూడా ఆ పరిశుద్ధత కలిగి ఉండాలి. అపవాది కూడా మన పరిశుద్ధతను పాడుచేయటానికి అనేమైన ఉచ్చులు పన్నాగములు, ప్రయత్నములు చేస్తాడు. ఎందుకంటే, పరిశుద్ధత లేకుండా ఎవడును దేవుని సంతోషపరచలేడు.

మన అవయవములన్నీ నిజానికి నీతిసాధనములుగా ఉండటానికి ఇవ్వబడ్డాయి కానీ, మన అవయవములు పాపమునకు ఉపయోగిస్తున్నాము. మన కన్నులు చూస్తే, పాపము విషయములో తిప్పుకోలేని బలహీనత. ఈరోజు గనుక చూస్తే, మొబైల్లోనే మన జీవితము గడిచిపోతుంది. కామెడీ షో యే కదా అని చూస్తున్నాము, కానీ అపహాస్యము చేసేవారితో మనము కలిసి సంతోషిస్తున్నాము. మనము చివరి దినములలో ఉన్నాము గనుక సమయమును పోనివ్వద్దు.

ఈరోజు నీవు నేను తీగెగా ఉన్నామో లేదో మనలను మనమే పరీక్షించుకోవచ్చు. ఆయన తీగెలుగా మనము ఉంటే, ఆయన జీవము, వెలుగు మనలో కూడా ఉంటుంది. మన దేవుడు చీకటిలో ఉన్నవారికి వెలుగుగా ఉన్నాడు. ఆయనలోని తీగెలుగా మనము కూడా వెలుగువలే ఉంటున్నామా? ఈరోజు దేవుడు నీతో నాతో మాట్లాడుతున్నాడు. పరిశుద్ధత ఖచ్చితముగా కలిగి ఉండాలి. మన కళ్ళు, చేతులు, నోరు, కాళ్ళు అన్నీ నీతి సాధనములుగా చేసుకుందాము. పాపము ఉన్న చోటికి నా కాళ్ళు వెళ్ళనివ్వను, పాపము చెయ్యడానికి నా చెయ్యి తియ్యను, పాపము మాటలాడుటకు నా నోరు తెరువను అని తీర్మానము చేసుకుందాము. షద్రకు, మేషాకు మరియు అబెద్నెగోలు నిలబడ్డట్టుగా మనము కూడా దేవుని పరిశుద్ధతను ప్రచురపరచే విధానములో సిద్ధపరచుకుందాము.

యేసు దేవాలయములో ప్రవేశించి క్రయవిక్రయములు చేయువారినందరిని వెళ్లగొట్టి, రూకలు మార్చువారి బల్లలను గువ్వలమ్మువారి పీఠములను పడద్రోసి– నా మందిరము ప్రార్థన మందిరమనబడును అని వ్రాయబడియున్నది, అయితే మీరు దానిని దొంగల గుహగా చేసెడివారనెను. -మత్తయి 21:12-13

ఇక్కడ మనము యేసయ్య ఎలా ఉన్నాడో గమనిద్దాము. దేవుని మందిరము ఆలయముగా లేదు గానీ, ఒక వ్యాపార గృహముగా మార్చపడింది. ఆ స్థితిలో ఉన్న ఆలయము చూసినప్పుడు రోషము కలిగి రగిలి, అవన్నీ పడద్రోసినవాడుగా లేడా? మరి ఆయనలోని తీగెలుగా ఉన్న మనము మన దేహమనే ఆలయము, హృదయమనే ఆలయము, లోకములోని విషయాలతో పాడు అవుతున్న సమయములో, అదే రోషము కలిగి మనము కూడా ఆ ఆలయమును సరిచేయాలి కదా! అప్పుడే మనము ఆయనలోని తీగెలుగా ఉండగలము. మందిరమునకు ప్రార్థనా మందిరము అనే టైటిల్ ఉంది, మనకైతే దేవుని ప్రియమైన కుమారుడు అనే టైటిల్ ఉంది. గనుక మనము కూడా రోషము కలిగి, పాడుచేసే ప్రతీదానినీ తీసివేసి, నేను దేవుని లోని తీగెనే అని ప్రకటిద్దాము.

ఆయన ఏమై ఉన్నాడో అదే విధముగా మనలను సిద్ధము చేసుకొనుటద్వారా మనము ఆయన తీగెలుగా ఉండగలుగుతాము. అయితే “ద్రాక్షావల్లిని నేను” అని చెప్పడానికి ఒక కారణము ఉంది. “ద్రాక్షావల్లి” అనగా ఇశ్రాయేలు సంతతిని సూచిస్తుంది. అయితే ఆ నాటిన ఇశ్రాయేలు కారు ద్రాక్షలను ఇచ్చింది.

నా ప్రియునిగూర్చి పాడెదను వినుడి అతని ద్రాక్షతోటనుబట్టి నాకిష్టుడైనవానిగూర్చి పాడెదను వినుడి. సత్తువ భూమిగల కొండమీద నా ప్రియుని కొక ద్రాక్షతోట యుండెను ఆయన దానిని బాగుగా త్రవ్వి రాళ్లను ఏరి అందులో శ్రేష్ఠమైన ద్రాక్షతీగెలను నాటించెను దానిమధ్యను బురుజు ఒకటి వేయించి ద్రాక్ష తొట్టిని తొలిపించెను. ద్రాక్షపండ్లు ఫలింపవలెనని యెదురు చూచుచుండెను గాని అది కారుద్రాక్షలు కాచెను -యెషయా 5:1-2

అయితే ఇప్పుడు యేసయ్య “నేను నిజమైన ద్రాక్షావల్లిని” అని చెప్పుచున్నాడు. ఈ ద్రాక్షావల్లి మంచి ఫలాలను ఇచ్చేది అని అర్థము. మనము కూడా అదేవిధముగా ఫలించుటకు ఆ ద్రాక్షావల్లికి తీగెలుగా చేయబడ్డాము.

మీరు నన్ను ఏర్పరచుకొనలేదు; మీరు నా పేరట తండ్రిని ఏమి అడుగుదురో అది ఆయన మీకనుగ్రహించునట్లు మీరు వెళ్లి ఫలించుటకును, మీ ఫలము నిలిచియుండుటకును నేను మిమ్మును ఏర్పరచుకొని నియమించితిని.౹ -యోహాను 15:16

అంటే, ఆ ద్రాక్షావల్లికి తీగెలుగా ఉన్న మనము, మంచి ఫలములనే ఫలిస్తాము. అయితే మన జీవితమును దానికొరకు మనము సిద్ధపరచుకోవాలి. అప్పుడు మనము ఫలిచెడికొమ్మగానే ఉంటాము. అప్పుడు నీ ఫలమును ఎవ్వరూ రాల్చలేరు.

యేసయ్య నిలబడ్డ ప్రతి స్థలములోనైనా మార్పు అనేది కనబడుతూనే వచ్చింది. మార్కు 8 వ అధ్యాయములో చూస్తే,

ఆ దినములలో మరియొక సారి బహుజనులు కూడి రాగా, వారికి తిననేమియు లేనందున యేసు తన శిష్యులను తనయొద్దకు పిలిచి –జనులు నేటికి మూడుదినముల నుండి నాయొద్దనున్నారు; వారికి తిననేమియు లేనందున, నేను వారిమీద కనికరపడుచున్నాను; -మార్కు 8:1-2

అక్కడ ఉన్న జనములు మాకు ఆకలి అవుతుంది అని ఎవరూ అడగలేదు. అయినప్పటికీ యేసయ్య తనకు తానుగా వారి మీద కనికరపడి వారి ఆకలి తీర్చడానికి సిద్ధపడ్డాడు. అదేవిధముగా ఆయన నీలో, నాలో గనుక ఉన్నట్టయితే మనము అడగకమునుపే మనమున్న పరిస్థితిని బట్టి కనికరపడేవాడుగా ఆయన ఉంటాడు గదా! అయితే ఆయన మనలో ఉండకుండా, మనమే అడ్డు పెడతాము. ఎలా అంటే, పాపము చేయుట ద్వారా. మన అవయవములను నీతి సాధనములుగా మాత్రమే ఉపయోగించబడాలి అనే రోషము కలిగి సిద్ధపరచుకోవాలి. నీవు ఇలా నిన్ను సిద్ధపరచుకున్నప్పుడు దేవుడు నీలో నిలిచి ఉంటాడు, నీవు అడగక మునుపే, నీవు అవసరమైన ప్రతీదీ నీకి దయచేసేవాడుగా ఉంటాడు.

ఇవన్నియు మీకు కావలెనని మీ పరలోకపు తండ్రికి తెలియును. కాబట్టి మీరు ఆయన రాజ్యమును నీతిని మొదట వెదకుడి; అప్పుడవన్నియు మీకనుగ్రహింపబడును. -మత్తయి 6:32-33

కాబట్టి, మొట్టమొదట ఆత్మీయమైనదానికొరకు సిద్ధపడితే, భౌతికమైన అవసరములన్నీ ఖచ్చితముగా దేవుడే చూసుకుంటాడు.

నేను వారిని ఉపవాసముతో తమ ఇండ్లకు పంపివేసినయెడల మార్గములో మూర్ఛపోవుదురు; వారిలో కొందరు దూరము నుండి వచ్చియున్నారని వారితో చెప్పెను. -మార్కు 8:3

మూడు రోజులనుండి ఆయన దగ్గర ఉన్నవారు ఎటువంటి పరిస్థితులలో ఉన్నారో, ఎరిగినవాడుగా ఆయన ఉన్నాడు. వారి స్థితి మార్చబడకపోతే, నీ బ్రతుకు పోగొట్టుకుంటావు అనే సత్యము కూడా ఆయన ఎరిగినవాడుగా ఉన్నాడు. అయితే నీవున్న సందర్భము ఎంతో అననుకూలమైనది అయ్యి ఉండవచ్చు. అయితే నీలో ఉన్నవాడు ఎటువంటివాడో అది ఎరిగి ఉండాలి.

అందు కాయన శిష్యులు–ఈ అరణ్యప్రదేశములో ఒక డెక్కడ నుండి రొట్టెలు తెచ్చి, వీరిని తృప్తిపరచగలడని ఆయన నడిగిరి. ఆయన–మీయొద్ద ఎన్ని రొట్టెలున్నవని వారి నడుగగా వారు – ఏడనిరి. అప్పుడాయన – నేలమీద కూర్చుండుడని జనులకాజ్ఞాపించి ఆ యేడు రొట్టెలు పట్టుకొని కృతజ్ఞతాస్తుతులు చెల్లించి, విరిచి, వడ్డించుటకై తన శిష్యులకిచ్చెను, వారు జనసమూహమునకు వడ్డించిరి. -మార్కు 8:4-6
వారు భోజనముచేసి తృప్తిపొందినమీదట, మిగిలిన ముక్కలు ఏడు గంపలనిండ ఎత్తిరి. -మార్కు 8:8

వారు అరణ్యప్రదేశములో ఉన్నప్పటికీ, భోజనము చేసారు. అంటే, మన పరిస్థితులు ఎంత అననుకూలముగా ఉన్నప్పటికీ, అసాధ్యముగా కనబడుతున్నప్పటికీ, ఆయన మనలో నిలిచి ఉన్నట్టయితే, ఖచ్చితముగా తృప్తిపరచబడతాము.

నన్ను బలపరచువాని యందే సమస్తము నేను చేయగలను అని పౌలు చెప్పుచున్నాడు. ఆ బలపరచువాడు నాలో, నీలో ఉన్నాడు. అంటే, మనము కూడా సమస్తము చేయగలిగినవారుగా ఉండాలి. అయితే ఒకటే మనము పరీక్షించుకోవాలి – మనము యేసు అనే ద్రాక్షావల్లికి తీగెలుగా ఉన్నామా లేదా?

నా శరీరము తిని నా రక్తము త్రాగువాడు నాయందును నేను వానియందును నిలిచియుందుము.౹ -యోహాను 6:56
దానిని విరిచి–యిది మీకొరకైన నా శరీరము; నన్ను జ్ఞాపకము చేసికొనుటకై దీనిని చేయుడని చెప్పెను.౹ -1 కొరింథీయులకు 11:24

యేసయ్య నీకొరకు నా కొరకు తన శరీరమును నలగగొట్టబడి, నీ, నా పాపములనుండి విడిపించుటకొరకు తన రక్తమును చిందించాడు అనే సత్యము మనము ఎరిగి, ఆ బల్లలో మనము చేయి వెయ్యాలి. అందుకే మనలను మనమే పరీక్షించుకుని ఒప్పుకుని అప్పుడు ఆ బల్లలో మనము చేయివేయాలి. అతిక్రమములను దాచిపెట్టువాడు వర్థిల్లడు గానీ, ఆ అతిక్రమములను ఒప్పుకుని విడిచిపెట్టువాడు వర్థిల్లును. మనము పాపము ఒప్పుకొని విడిచిపెట్టకుండా ప్రభువుబల్లలో చెయ్యివేస్తే, “ఇందువలననే మీలో అనేకులు బలహీనులును రోగులునై యున్నారు; చాలమంది నిద్రించుచున్నారు.౹ -1 కొరింథీయులకు 11:30” అని వాక్యము చెప్పుచున్నది.

జీవముగల తండ్రి నన్ను పంపెను గనుక నేను తండ్రి మూలముగా జీవించుచున్నట్టే నన్ను తినువాడును నా మూలముగా జీవించును.౹ -యోహాను 6:57

మనము ఫలించేవారిగానూ, సమస్తము చేయగలిగినవారిగాను, జీవము గలిగినవారిగాను ఉండగలుగుతాము.