27-08-2023 – ఆదివారం మొదటి ఆరాధన – దేవుని అభిషేకము

వారము కొరకైన వాక్యము

దేవుని సన్నిధిని అనుభవించాలి అనే ఆశ మనము కలిగి ఉండాలి. మనము ఇంకా వాక్యము చదువుట వరకే ఉండిపోయాము. అయితే వాక్యానుభవములోనికి మనము రావాలి.

దేవుని పరిశుద్ధాత్మ యొక్క పరిచర్య యొక్క అనుభవము లేకుండా ఆయన ప్రత్యక్షతలను మనము అర్థము చేసుకోలేము, తీర్పు తీర్చలేము. ఆ అనుభవము కొరకు, యదార్థమైన సంపూర్ణమైన సమర్పణతో ఆయన సన్నిధిలో మొదటగా ఒప్పుకోని ప్రార్థనలో ఆశ కలిగి వేచిచూసినప్పుడు ఖచ్చితముగా దేవుని ప్రత్యక్షత పొందుకొనగలుగుతాము. మనలో ఉన్న కల్మషము ఆత్మ పరిచర్యలో కడుగబడినతరువాత ఆత్మతో ఖచ్చితముగా నింపబడతాము. ఆత్మ పరిచర్య వాక్యము ద్వారానే జరుగుతుంది. నీవు వాక్యము చదవడము మాత్రమే కాక, ఆ వాక్యానికి లోబడుట ద్వారా వాక్యానుభవములోనికి రాగలుగుతావు. అప్పుడు నీ ముందరకు ఏది వచ్చినప్పటికీ నిన్ను మాత్రము ఏమీ చెయ్యలేదు.

భాషలు ఉన్నాయా? ఒకవేళ నీకు ఈ ప్రశ్న ఉంటే, ప్రార్థనాపూర్వకముగా ప్రభువు సన్నిధిలో కనిపెట్టు. ఆ అనుభవము గలిగినవారిని అడుగు! అడుగువారికి మరి నిశ్చయముగా పరిశుద్ధాత్మను అనుగ్రహించును కదా అని వాక్యము చెప్పుచున్నది కదా! అందుకే ఆశ కలిగి ప్రభువు సన్నిధిలో కనిపెట్టాలి. మనము పోరాడుచున్నది అంధకార సంబంధులగు నాథులతో పోరాడుచున్నాము. మన జీవితములను నాశనము చేయడానికి అపవాది అనేకములైన విధానములలో ప్రయత్నిస్తున్నాడు.

ఏలయనగా మనము పోరాడునది శరీరులతో కాదు, గాని ప్రధానులతోను, అధికారులతోను, ప్రస్తుత అంధకారసంబంధులగు లోక నాథులతోను, ఆకాశమండలమందున్న దురాత్మల సమూహములతోను పోరాడుచున్నాము.౹ -ఎఫెసీయులకు 6:12

మనము ఆదివారము దేవుని సన్నిధికి రావడము మూలముగా విడుదల అయిన వాక్కును బట్టి ఆ పోరాటములో నిలబడగలుగుతున్నావు. అపవాది తంత్రములను మనము ఎరిగి ఉండాలి. అలా ఎరగాలి అంటే మొదట మనకు సహాయము కావాలి కదా! ఆ సహాయము మనలో ఉన్న పరిశుద్ధాత్మ దేవుడే చేస్తాడు. అయితే ఆ సహాయమును ఎరిగి ఆ ప్రకారము సిద్ధపరచుకోవాలి అంటే అసలు పరిశుద్ధాత్మ దేవుడు ఎలా మాట్లాడతాడో మనము ఎరిగి ఉండాలి.

నీ దైవ జనుని కొరకు ప్రార్థన చేయుట దేవుడు వాక్యానుసారముగా నీకిచ్చిన బాధ్యత.

ఈరోజు దేవుని అభిషేకము గూర్చి నేర్చుకొందాము. అసలు అభిషేకము అంటే ఏమిటి? పాత నిబంధనలో చూస్తే, దేవుని పరిచర్య కొరకైన పాత్రలను, మనుష్యులను, రాజులను, ప్రవక్తలను అభిషేకించినట్టుగా మనము చూడగలము. అభిషేకము అనగా ఒక వ్యక్తినిగాని, వస్తువును గానీ, ఒక ప్రత్యేకమైన ప్రయోజనముకొరకు సిద్ధపరచుట. ఇది తైలము చేత జరిగేదిగా పాత నిబంధలో మనము చూడగలము.

అయితే మీరు చీకటిలోనుండి ఆశ్చర్యకరమైన తన వెలుగులోనికి మిమ్మును పిలిచిన వాని గుణాతిశయములను ప్రచురముచేయు నిమిత్తము, ఏర్పరచబడిన వంశమును, రాజులైన యాజకసమూహమును, పరిశుద్ధ జనమును, దేవుని సొత్తయిన ప్రజలునై యున్నారు.౹ -1 పేతురు 2:9

అభిషేకమునకు ఒక ప్రత్యేకమైన ప్రయోజనము లేదా ఉద్దేశ్యము ఉన్నది. మనము యేసయ్యను అంగీకరించి మారుమనస్సు పొందినప్పుడు మనము ప్రత్యేకపరచబడ్డాము. దేనికొరకు ప్రత్యేకించబడ్డాము? అనేది 1 పేతురు 2:9 లో చూసాము.

ఆ సమయమున యోహానుచేత బాప్తిస్మము పొందుటకు యేసు గలిలయనుండి యొర్దాను దగ్గర నున్న అతనియొద్దకు వచ్చెను. అందుకు యోహాను –నేను నీచేత బాప్తిస్మము పొందవలసినవాడనై యుండగా నీవు నాయొద్దకు వచ్చుచున్నావా? అని ఆయనను నివారింపజూచెను గాని యేసు–ఇప్పటికి కానిమ్ము; నీతి యావత్తు ఈలాగు నెరవేర్చుట మనకు తగియున్నదని అతనికి ఉత్తరమిచ్చెను గనుక అతడాలాగు కానిచ్చెను. -మత్తయి 3:13-15

“నీతి యావత్తు ఈలాగు నెరవేర్చుట” అనగా ఒక విధానమును యేసయ్య సిద్ధపరచినట్టుగా మనము అర్థముచేసుకోగలము.

యేసు బాప్తిస్మము పొందిన వెంటనే నీళ్లలోనుండి ఒడ్డునకు వచ్చెను; ఇదిగో ఆకాశము తెరవబడెను, దేవుని ఆత్మ పావురమువలె దిగి తనమీదికి వచ్చుట చూచెను. మరియు–ఇదిగో ఈయనే నా ప్రియ కుమారుడు, ఈయనయందు నేనానందించుచున్నానని యొక శబ్దము ఆకాశమునుండి వచ్చెను. -మత్తయి 3:16-17

బాప్తీస్మము ఇలాగు జరగాలి అని ఒక నియమము యేసయ్య ఇచ్చినప్పుడు ఆయన బాప్తీస్మము తీసుకున్న తరువాత ఎలా అయితే పరిశుద్ధాత్మ దేవుడు యేసయ్యలో నివసించినాడో, మనము బాప్తీస్మము తీసుకున్న తరువాత మనము కూడా పరిశుద్ధాత్మ దేవునిని కలిగి ఉండుట అనేది కూడా నియమము. పరిశుద్ధాత్మ దేవుడు అభిషేకించబడినవాడు, ఆయన మనలో ఉండుటను బట్టి, మనము కూడా అభిషేకించబడినవారముగా మారుతున్నాము. అయితే దేనికొరకు అభిషేకించబడ్డాము? అనేది మనము తెలుసుకోవాలి. ఉదాహరణకు అహరోనును ప్రధాన యాజకుడుగా అభిషేకించాడు అంటే తరువాత ఆయన అదే పనిలో ఆయన కొనసాగించబడ్డాడు.

నీవు నేను ప్రవక్తవలే ఉండుట కొరకు అభిషేకించబడ్డాము. ప్రవక్త అంటే దేవుని సన్నిధిలో ఉండి, దేవుని వాక్కును పొందుకొని, ఆ వాక్కును ప్రకటించేవాడు. అయితే ఎక్కడ దేవుని మాటను ప్రకటించాలి? వాక్యము వెలుగై ఉన్నది గనుక ఎక్కడ చీకటి ఉన్నదో అక్కడ ప్రకటించాలి. పాత నిబంధన గ్రంథములో చూస్తే ఇశ్రాయేలు ప్రజలు బంధకములలో ఉన్నప్పుడు, ప్రవర్తన సరిలేనప్పుడు అక్కడ ప్రవక్తలను దేవుడు పంపించేవాడు. అంతేకాక, ప్రవక్త దేవుని యొద్ద గోజాడేవాడిగా ఉంటాడు.

ఎప్పుడైతే దేవుని వాక్యమును అంగీకరించామో అప్పుడు మనము వెలుగుమయముగా చేయబడతాము. వెలుగుమయముగా చేయబడిన మనము ప్రకాశింపచేయబడతాము. అనగా చెప్పుటకంటే ముందు, మనము ఆచరించేవారిగా ఉన్నప్పుడు ఫలితము దక్కుతుంది. మనలను మనము వాక్యానుసారముగా చీకటిని పారద్రోలి, సిద్ధపరచుకున్నప్పుడు, నీ అభిషేకము అనుసరించి పనిచేయగలుగుతావు. అనగా చీకటిలో ఉన్నవారికి వెలుగుగా ఉండగలుగుతాము.

మనలను యాజకత్వము చేయుటకు మనలను దేవుడు అభిషేకము చేసాడు. యాజకుడు దేవుని పరిశుద్ధ సన్నిధిలో నిలువబడి ఆయనను ఆరాధించేవాడు. ఆ యాజకుడు చేసే ఆరాధనలను సింహాసనముపై ఆసీనుడై అంగీకరించి సంతోషించేవాడిగా దేవుడు ఉన్నాడు.

యాజకుడు దేవునికి వచ్చిన ప్రజలకు మధ్యవర్తిగా ఉంటాడు. దేవుని ఆరాధించుట, ప్రజలకు దేవునికి మధ్యవర్తిగా ఉండుట కొరకు ఏర్పరచబడ్డవారు.

అ తరువాత రాజులుగా అభిషేకించబడ్డాము. దావీదును చూస్తే, గొర్రెల కాపరిగా ఉన్న అతను రాజుగా అభిషేకించబడ్డాడు. మనము రాజులైన యాజక సమూహముగా చేయబడ్డాము. రాజు అనగా రాజ్యము ఉంటుంది. రెండు రాజ్యములు ఉన్నాయి. ఒకటి చీకటి రాజ్యము మరొకటి వెలుగు రాజ్యము. రాజు రాజ్యమును పరిపాలించేవాడిగా ఉన్నాడు గనుక మనము కూడ పరిపాలించేవారిగా ఉంటాము. మనము చీకటి రాజ్యమును పరిపాలించాలి అనగా మనము దానిపై అధికారము కలిగి ఉండాలి.

అయితే ఆ చీకటి రాజ్యములో – “ప్రధానులు, అధికారులు, అంధకార సంబంధులగు లోక నాథులు” ఉంటారు. వారితో మనము పోరాడాలి. భయపడుట కొరకు కాదు గానీ, పోరాడుట కొరకే మనము అభిషేకించబడ్డాము.

ప్రవక్తగా, యాజకునిగా, రాజుగా మనము అభిషేకించబడ్డాము.