06-08-2023 – ఆదివారం రెండవ ఆరాధన

వారముకొరకైన వాక్యము

నీ కొరకు దేవుడు ప్రకటించిన మాటలు “కట్టడము, సమకూర్చడము, బాగుచేయడము”.

మరియు ఎవరిని ముందుగా నిర్ణయించెనో వారిని పిలిచెను; ఎవరిని పిలిచెనో వారిని నీతిమంతులుగా తీర్చెను; ఎవరిని నీతిమంతులుగా తీర్చెనో వారిని మహిమ పరచెను. -రోమా 8:30

ఈ మాటలో మన జీవితమును వెతికితే, ఈరోజున నీవు నేను పిలువబడ్డాము. అంటే మనము నిర్ణయించబడ్డాము అని అర్థము. దేవుడు నీ ద్వారా ఏమి నిర్ణయించాడు? అంటే నీ ద్వారా ఏమి జరిగించాలి అని నిర్ణయించాడు? అనేది మనము తెలుసుకోవాలి. దేనికొరకు నన్ను పిలిచాడు అనే సంగతి మనము తప్పక తెలుసుకోవాలి. ఎందుకు పిలువబడ్డామో తెలిసినప్పుడే ఆ పనికొరకు సిద్ధపడి, ఆ పని చెయ్యగలుతాము.

ఒకసారి జ్ఞాపకము చేసుకుంటే ఈ లోకములో అటు ఇటు తిరుగుతున్నవారిగా ఉన్నప్పుడు ఆయన సన్నిధికి రానిచ్చారు. దానిని బట్టి ఇప్పుడు మనము విశ్వాసులుగా పిలువబడుతున్నాము.

పరిశుద్ధులగుటకే దేవుడు మనలను పిలిచెనుగాని అపవిత్రులుగా ఉండుటకు పిలువలేదు.౹ -1 థెస్సలొనీకయులకు 4:7

ఈ లోకములో ఉన్న సంగతులు మనలను అపవిత్రపరచే విధానములోనే ఉంటాయి. అయితే నీ పిలుపు పరిశుద్ధుడుగా ఉండుటకు పిలువబడ్డాను అనే సంగతి గుర్తెరిగి ఉన్నప్పుడు ని పిలుపుకు తగిన న్యాయము చెయ్యగలుగుతావు. నీ పిలుపులో నమ్మకముగా ఉన్నట్టయితే, “నీతిమంతుడు” అనే ముద్ర నీకు వెయ్యబడుతుంది. అనగా నీకు ఒక సాక్ష్యము ఇవ్వబడుతుంది.

ఇలా సాక్ష్యము సిద్ధపరచుకొని సాక్ష్యము సంపాదించుకొనిన తరువాత, నీ సిద్ధపాటుకు తగిన ఫలము దేవుడు దయచేసేవాడుగా ఉన్నాడు. అందుకే నేను పరిశుద్ధత కొరకే పిలవబడ్డాను, పాపము కొరకు నేను పిలివబడలేదు అనే సత్యము ఎరిగి ఉండాలి, దానికొరకు ప్రయాస పడాలి.

రక్షణ పొందినప్పుడు నీకు పరిశుద్ధతను నీకు ధరింపచేసాడు. ఇప్పుడు నీవు ఆ పరిశుద్ధతను నీ జీవితములో నీవే కొనసాగించాలి. ఒకవేళ లోకము వైపుకు మళ్ళినప్పుడు నీ పై ధరింపచేయబడిన పరిశుద్ధత నిలిచి ఉండదు. మరలా నీవు దేవుని యెదుట సరిచేసుకున్నపుడే మరలా నీకు పరిశుద్ధత తిరిగి ధరింపచేయబడుతుంది.

విశ్వాససంబంధమైన మంచి పోరాటము పోరాడుము, నిత్యజీవమును చేపట్టుము. దాని పొందుటకు నీవు పిలువబడి అనేక సాక్షులయెదుట మంచి ఒప్పుకోలు ఒప్పుకొంటివి.౹ -1 తిమోతికి 6:12

పోరాడటానికి మనలను ప్రభువు ఎన్నుకున్నాడు. మన జీవితములలో వచ్చే పరిస్థితులలో మనము డీలా పడిపోతాము. అయితే మనము పోరాటము చేసేవానిగా మనలను ప్రభువు ఎన్నుకున్నాడు. పోరాటము చేసేవాడు భయపడడు. మనము కూడా శరీర సంబంధమైన విషయాలపై పోరాటము చేసేటప్పుడు మనకు ఇబ్బంది, గాయము కలిగినా సరే నిజమైన యోధుడు యుద్ధము ఆపడు.

పరలోకరాజ్యము ఒక యజమానుని పోలి ఉంది. ఆ యజమానుడు తన దగ్గర ఉన్న తలాంతులను తన దాసులకు ఇచ్చి వెళ్ళాడు. ఎవరైతే వాటిని రెండింతలుగా చేసారో వారిని ఇంకా ఉన్నతమైన స్థానమునకు వారిని తీసుకువెళ్ళారు. అలా చెయ్యని వాడు విడువబడ్డాడు.

నీవు పిలువబడిన పిలుపు ప్రకారము సిద్ధపరచుకుంటావో, అప్పుడు సాక్ష్యము పొందుకుంటావు. అప్పుడు పోరాటము చేయవలసిన లెవెల్ కి నీవు ఎదుగుతావు. ఎప్పుడైతే నిలబడి పోరాడతావో అప్పుడు విజయము పొందుకొని, విజయవీరుడు అని మహిమ పరచబడతావు.

రాజ్యములో ఎంతో మంది ఉన్నప్పటికీ యుద్ధము చేయటానికి కొంతమందినే ఏర్పాటు చేయబడతారు. ఎవరిలో ఆ సామర్థ్యము ఉంటుందో వారినే పరీక్షించి ఆ పనికొరకు సిద్ధపరచుకుంటారు. అయితే నీలో ఉన్నవాడు, నీముందర ఉన్న పోరాటము కంటే బలవంతుడు. ఆయనను బట్టే నీవు పోరాటము చేసేవాడిగా సిద్ధపరచబడతావు.

మొట్టమొదట నీ పిలుపును ఎరిగి ఉండుట అనేది ఎంతో ప్రాముఖ్యమైనది. అటుపై నీ పిలుపు ప్రకారము జీవించుటకు సిద్ధపడితే, అప్పుడు పోరాటము చేసే నెక్స్ట్ లెవెల్ కి ప్రభువు తీసుకెళతాడు.

క్రీస్తు కూడ మీకొరకు బాధపడి, మీరు తన అడుగుజాడలయందు నడుచుకొనునట్లు మీకు మాదిరి యుంచి పోయెను.౹ -1 పేతురు 2:21

క్రీస్తు అన్యాయముగా మాటలు పడ్డాడు, అన్యాయముగా శ్రమ పొందినవాడుగా ఉన్నాడు. లోకము నన్ను ఎరుగదు గనుక మిమ్మును హింసించును అని ప్రభువు చెప్పాడు. అయినప్పటికీ ధైర్యము తెచ్చుకొనుడి అని ప్రభువు చెప్పుచున్నాడు. అనగా మనము కూడా క్రీస్తువలే అన్యాయముగా శ్రమను అనుభవించిన తరువాత, ఆ శ్రమలో భయపడక నిలిచి ఉన్నప్పుడు మనము మహిమ పరచబడతాము.

ఆశీర్వాదమునకు వారసులవుటకు మీరు పిలువబడితిరి గనుక కీడుకు ప్రతికీడైనను దూషణకు ప్రతి దూషణయైనను చేయక దీవించుడి. -1 పేతురు 3:9

మన జీవితము దేని కొరకు ఎన్నిక చేసుకున్నాడు అనే సంగతి తెలియట్లేదు. మన పిలుపు ఆసీర్వాదము కొరకు పిలువబడ్డాము. ఏదైతే ఆశీర్వాదము అని దేవుని చేత నిర్ణయైంచబడిందో, ఆ ప్రతీ ఆశీర్వాదమునకు వారసుడవు. అయితే కండిషన్ ఏమిటి అంటే ప్రతి దూషణ చేయకూడదు. అంటే ఉదాహరణకు కష్టములు, నష్టములు, అప్పులు బాధలు చుట్టుముట్టినప్పుడు, మనలో వచ్చే మాటలు, “ఎందుకొచ్చిన జీవితము? నా జీవితము వృధా అని మనకు మనమే శపించుకుంటాము”. అలా మనము పరిస్థితులకు ప్రతి దూషణ మనము చేయకూడదు. అయితే అలాకాక ఆ పరిస్థితిలో సహితము, “దీవించుడి” అంటే నా జీవితము మహిమ పరచబడే జీవితము. దేవుని చేత ఎన్నిక చేయబడినది అని పలకాలి. అప్పుడు సాక్ష్యము పొందుకుంటాము చివరికి మహిమపరచబడతాము. నీ జీవితము దేవుని చేత ఎన్నిక చేయబడింది. నిన్ను ఎన్నిక చేసిన దేవుడు సామాన్యుడు కాదు.

1. పరిశుద్దత కొరకు పిలువబడ్డాము
2. పోరాటము చేయడానికి పిలువబడ్డాము
3. మహిమపరచబడటానికి పిలువబడ్డాము
4. ఆశీర్వాదము కొరకు పిలువబడ్డాము

కాబట్టి ఈరోజు నిన్ను నీవు సిద్ధము చేసుకో. ఇంక నేను అపవిత్రతకు చోటివ్వను ప్రభువా అని తీర్మానము చేసుకుందాము.