06-08-2023 – ఆదివారం మొదటి ఆరాధన

వారము కొరకైన వాక్యము

జీవగ్రంధములోనుండి మనము అనేకమైన సత్యములను మనము నేర్చుకోవాలి. ఆ సత్యములను వెంబడించినప్పుడు దేవుని యొక్క కార్యములను చూసేవారిగా ఉంటాము. రాజు చేసిన బంగారు ప్రతిమకు మొక్కమని రాజు ఆజ్ఞాపించగా! షద్రకు మేషాకు అబెద్నెగో అనేవారు తప్ప మిగతావారు అందరూ మొక్కినారు. అగ్నిగుండములో వెస్తారు అని తెలిసినప్పటికీ షద్రకు, మేషాకు మరియు అబెద్నెగో అనువారు దేవుని గూర్చిన సత్యమును సమయము వచ్చినప్పుడు ప్రకటించినవారుగా ఉన్నారు.

మనము కూడా దేవుని ప్రేమించేవారము అని చెప్పుచుంటాము గానీ, సమయము వచ్చేసరికి చతికిలపడిపోతాము. సత్యములో నాటబడకుండా నీవు ఫలించలేవు, సత్యములోని స్వాతంత్రమును అనుభవించలేవు. అందుకే జీసస్ కేర్స్ యూ మినిస్ట్రీ ద్వారా దేవుని సత్యములను నేర్చుకుంటున్న మనము మాత్రము దేవుని గూర్చిన సత్యములపై మాత్రమే మనము నిలబడాలి.

“నా దేవుడు రక్షించ సమర్థుడై ఉన్నాడు!” – ఇది సత్యము, ఇదే సత్యము! అయితే దేవుని చేత పరీక్షించబడే సమయము ఖచ్చితముగా ఉంటుంది. పరీక్షా సమయము వచ్చింది అనే సత్యము గ్రహించినప్పుడు దేవుని మాట ప్రకారము నిలబడు!

ఈ రోజు “దేహము” గూర్చి నేర్చుకుందాము. యేసు క్రీస్తు రక్షణ సువార్తను అంగీకరించిన మనము అందరము మారు జన్మ పొందాము. అప్పటినుండి నీ దేహము యొక్క ఉద్దేశ్యము మారిపోయింది.

మీ దేహము దేవునివలన మీకు అనుగ్రహింపబడి, మీలో నున్న పరిశుద్ధాత్మకు ఆలయమై యున్నదని మీరెరుగరా? మీరు మీ సొత్తు కారు,౹ -1 కొరింథీయులకు 6:19

ఈరోజు నీవు నేను దేవునికి ఆలయముగానూ, పరిశుద్ధాత్మకు ఆలయముగానూ ఉన్నది. ఈ సత్యము ఎరుగకపోతే అసహ్యకరమైన కర్యములు మనము చేసేవారిగా ఉండిపోతాము. అయితే ఈరోజు సత్యము ప్రకటించబడుతుంది, గ్రహిస్తావా!

భోజనపదార్థములు కడుపునకును కడుపు భోజనపదార్థములకును నియమింపబడి యున్నవి; దేవుడు దానిని వాటిని నాశనము చేయును. దేహము జారత్వము నిమిత్తము కాదు గాని, ప్రభువు నిమిత్తమే; ప్రభువు దేహము నిమిత్తమే.౹ -1 కొరింథీయులకు 6:13

ప్రభువా నా దేహము నీకొరకే అపవాదికి కొరకు, లోకము కొరకు కాదు నాయనా అని ఒప్పుకుంటావా! నా దేహము ద్వారా నీవే మహిమపరచబడాలి ప్రభువా అని తీర్మానము ప్రకటిద్దామా! అట్టి రీతిగా మన దేహమును సిద్ధపరచుకుందాము.

జీవించువారికమీదట తమకొరకు కాక, తమ నిమిత్తము మృతిపొంది తిరిగి లేచినవానికొరకే జీవించుటకు ఆయన అందరికొరకు మృతిపొందెననియు నిశ్చయించు కొనుచున్నాము.౹ -2 కొరింథీయులకు 5:15

నా దేహము ప్రభువు నిమిత్తమే, ఇక నా జీవితము నా కొరకు కాదు కానీ నాకొరకు ప్రాణము పెట్టిన నా ప్రభువు కొరకే అని మనము తీర్మానము తీసుకుందాము.

మీ దేహములు క్రీస్తునకు అవయవములై యున్నవని మీరెరుగరా? నేను క్రీస్తుయొక్క అవయవములను తీసికొని వేశ్యయొక్క అవయవములుగా చేయుదునా? అదెంతమాత్రమును తగదు.౹ -1 కొరింథీయులకు 6:15

మీ దేహములు క్రీస్తునకు అవయవములై ఉన్నవి అని చెప్పబడింది. ఎంత గొప్ప ఆధిక్యత మనది? ఈ సత్యము నీ హృదయములో నాటబడాలి అని అంతగానో దేవుడు ఆశ కలిగి ఉన్నాడు. వేశ్యను గమనిస్తే, తను చేసే అన్ని పనులు అపవాదికి సంబంధించినవే. క్రీస్తు అవయవములుగా చేయబడిన మన దేహములతో వేశ్య కార్యములు, అపవాది కార్యములు ఎలా చేయగలము? అలా చేయతగదు అని ప్రభువు ప్రేమపూర్వకముగా తెలియచేస్తున్నాడు.

మరియు మీ అవయవములను దుర్నీతి సాధనములుగా పాపమునకు అప్పగింపకుడి, అయితే మృతులలోనుండి సజీవులమనుకొని, మిమ్మును మీరే దేవునికి అప్పగించుకొనుడి, మీ అవయవములను నీతిసాధనములుగా దేవునికి అప్పగించుడి.౹ -రోమా 6:13

ఈ సత్యము అర్థము చేసుకుని మన దేహమును నీతి సాధనముగా ప్రభువు మహిమ కొరకు సిద్ధపరచుకుందాము.

దేవుని ఆలయమునకు విగ్రహములతో ఏమిపొందిక? మనము జీవముగల దేవుని ఆలయమై యున్నాము; అందుకు దేవుడీలాగు సెలవిచ్చుచున్నాడు. –నేను వారిలో నివసించి సంచరింతును, నేను వారి దేవుడనై యుందును వారు నా ప్రజలైయుందురు. –కావున మీరు వారి మధ్యనుండి బయలువెడలి ప్రత్యేకముగా ఉండుడి; అపవిత్రమైనదానిని ముట్టకుడని ప్రభువు చెప్పుచున్నాడు. –మరియు నేను మిమ్మును చేర్చుకొందును, మీకు తండ్రినై యుందును, మీరు నాకు కుమారులును కుమార్తెలునై యుందురని సర్వశక్తిగల ప్రభువు చెప్పుచున్నాడు. -2 కొరింథీయులకు 6:16

ఎప్పుడైతే మన దేహమును ఆయన కొరకు సిద్ధపరచుకుంటామో అప్పుడు ఆయన ఈ దేహములో ప్రభువు నివసించేవాడుగా ఉన్నాడు. నీ దేహము ఆయన కొరకైన నీతి సాధనముగా సిద్ధపరచుకున్నపుడు, నీలో ఆయన సంచరించేవాడుగా ఉంటాడు. ఎక్కడ సంచరిస్తాడు అంటే, ఎక్కడైతే చీకటి ఉంటుందో, అక్కడ వెలుగు సాధనముగా నిన్ను వాడుకొనుట ద్వారా ఆయన సంచరించేవాడుగా ఉంటాడు. అయితే ఇది జరగాలి అంటే నీవు నీ దేహము ప్రభువు కొరకే అనే ఉజ్జీవము కలిగి ఉండాలి. అంతే కాదు గాని, మన జీవితములకు దేవుడుగానూ, వేరేవారికి మనలను వెలుగుగాను ప్రభువు చేసేవాడుగా ఉంటాడు.

దేహమునకు దీపము కన్నే గనుక నీ కన్ను తేటగా ఉండినయెడల నీ దేహమంతయు వెలుగు మయమైయుండును. -మత్తయి 6:22

మనమున్న ప్రస్తుత పరిస్థితులలో మన కన్ను చెడిపోవడానికి అపవాది అనేకమైన ఉచ్చులు బిగించింది. దానికొరకు మన చేతిలో ఉన్న మొబైల్ ని ఒక సాధనముగా అపవాది వాడుకుంటున్నాడు. మనము ఏది చూస్తే చెడిపోతామో, దానిని చూడటానికి తహతహలాడే పరిస్థితిలోనికి మనము వెళ్ళిపోతాము. అయితే ఈ సత్యము ఎరిగినవారమై మనము ప్రభువుకొరకు సిద్ధపరచుకుంటే ఆ ఉచ్చులో పడకుండా మనము కాపాడబడగలుగుతాము.

దేహము ప్రభువు కొరకు సిద్ధపరచబడాలి అంటే మన కన్ను దేనిని చూస్తుందో గమనించుకుని, సరిచేసుకోవాలి. దేవుడు ప్రేమిస్తున్నాడు కాబట్టే, తాను ప్రేమించినవారిని హెచ్చరించి సరిచేయటానికి ఈ మాటలు మనతో మాట్లాడుతున్నాడు. గనుక ప్రభువు మాటలు స్వీకరిద్దాము.

నీ కన్ను చెడినదైతే నీ దేహమంతయు చీకటిమయమై యుండును; నీలోనున్న వెలుగు చీకటియైయుండినయెడల ఆ చీకటి యెంతో గొప్పది. -మత్తయి 6:23

ఆత్మీయమైన ఆరంభము ఎంతో బాగుంటుంది. అయితే నీ కంటిముందుకు అపవాది ఒక ఉచ్చు తీసుకువచ్చి ప్రలోభపరచగానే, ఆ ఉచ్చులో పడిపోయామా, మనలో ఉన్న వెలుగు చీకటిగా అయిపోతుంది. అందుకే అపవాది తంత్రములను ఎరిగిఉండాలి. మనమందరము డిక్లేర్ చేద్దాము! “నా చూపు నీ మహిమ కొరకే భద్రపరచుకుంటాను ప్రభువా”. అంతే కాదు మన శరీరమంతా, అన్ని అవయవములు కూడా ప్రభువుయొక్క నీతి సాధనములుగా సిద్ధపరచుకుందాం.

ఎందుకనగా తాను జరిగించిన క్రియలచొప్పున, అవి మంచివైనను సరే చెడ్డైవెనను సరే, దేహముతో జరిగించిన వాటి ఫలమును ప్రతివాడును పొందునట్లు మనమందరమును క్రీస్తు న్యాయపీఠము ఎదుట ప్రత్యక్షము కావలయును. -2 కొరింథీయులకు 5:10

నన్ను నేను సిద్ధపరచుకొని నీతి సాధనముగా నిలబడితే, ఒక ప్రతిఫలము ఖచ్చితముగా ఉంటుంది. అదే ఒకవేళ ఈ దేహమును అపవాదికి సంబంధించిన సాధనముగా సిద్ధపరచుకుంటే దానికి సంబంధించిన ప్రతిఫలము కూడా ఖచ్చితముగా ఉంటుంది. అందుకే అపవాదికి సంబంధించిన క్రియలు చెయ్యకుండా మనలను మననే కాపాడుకోవాలి. మనలో దేవునికొరకైన రోషము రగిలించబడాలి.

ప్రభువు నీలో ఉన్నాడు అంటే ఆయన క్రియలు ఖచ్చితముగా కనబడతాయి. క్రియలు లేకుండా మనము ఎంత మాటలాడినా అది వ్యర్థమే! మాటలు ఆత్మీయముగా మాట్లాడుతూ, దేహమును మాత్రము అపవాది క్రియలకొరకు వదిలిపెడితే అది ఎంతో దుర్భరమైన స్థితి.

కాబట్టి శరీర దురాశలకు లోబడునట్లుగా చావునకు లోనైన మీ శరీరమందు పాపమును ఏలనియ్యకుడి.౹ -రోమా 6:12

శరీరమును పాపముచేత ఏలనివ్వకుడి. నీ శరీరము చావునకు లోనైనది గనుక ఆ శరీర ప్రేరేపణకు లోబడవద్దు. అందుకే మొదట నీ దేహమునకు కన్నే గనుక మొదట నీ కన్ను సరిచేసుకో. మన జీవితమునకు దీపము వాక్యమే గనుక, ఆ వాక్యము ఎంత తేటగా నీకు తెలిస్తే అంతగా జీవముతో నింపబడుతుంది.

చాలా సందర్భములలో పరిశుద్ధాత్మ ప్రేరేపణను మనము నిర్లక్ష్యము చేసి శరీరానుసారముగా క్రియలు జరిగించేవారముగా ఉంటాము. అయితే మనము ఇకమీదట, ఈ సత్యము వినిన తరువాత అలా ఉండకూడదు.

కాబట్టి సహోదరులారా, పరిశుద్ధమును దేవునికి అనుకూలమునైన సజీవ యాగముగా మీ శరీరములను ఆయనకు సమర్పించుకొనుడని దేవుని వాత్సల్యమునుబట్టి మిమ్మును బతిమాలుకొనుచున్నాను. ఇట్టి సేవ మీకు యుక్తమైనది.౹ -రోమా 12:1

సజీవయాగముగా అంటే ఇంక స్వంత ఆశ, కోరిక అనేవి ఇక ఉండవు. అటువంటి విధానములో నిన్ను నీవు సమర్పించుకుంటావా!

అందువలన నేను మీతో చెప్పునదేమనగా–ఏమి తిందుమో యేమి త్రాగు దుమో అని మీ ప్రాణమునుగూర్చియైనను, ఏమి ధరించుకొందుమో అని మీ దేహమునుగూర్చియైనను చింతింపకుడి; ఆహారముకంటె ప్రాణమును, వస్త్రము కంటె దేహమును గొప్పవి కావా? -మత్తయి 6:25

సజీవయాగముగా నీ దేహమును నీవు ప్రభువుకు సమర్పించుకున్నప్పుడు, నీ దేహమునకు అవసరమైనది ప్రభువే చూసుకునేవాడుగా ఉన్నాడు. ఒకవేళ ప్రభువు నీతో మాట్లాడితే ఆయనతో ఒప్పుకో!