16-07-2023 – ఆదివారం మొదటి ఆరాధన

ఈ వారము కొరకైన వాక్యము

మనము గాడి తప్పిపోయే పరిష్తితిలో ఉన్నప్పుడు వెంటనే పరిశుద్ధాత్మ దేవుడు మన ఆత్మను సంధిస్తాడు. ఆయన సంధించినప్పుడు గద్దింపుకు లోబడినప్పుడు రక్షించబడతాము. మన హృదయములు బహు ఘోరమైనవి, రహస్యపు పాపములను సహితము ఎరిగినవాడు గనుక ఆయనను తప్పించుకుని వెళ్ళలేము. ఆయన యెదుట మనము చేసే ప్రతీదీ, మనము ఆలోచించే ప్రతీదీ తేటగా కనబడుతుంది. మనము భయము కలిగి సరిచేసుకుందాము. మన దేవుడు ప్రేమ కలిగినవాడు మాత్రమే కాదు గానీ, అవిధేయతను బహు రౌద్రముతో శిక్షించేవాడు కూడా దేవుడే. అందుకే భయభక్తులు కలిగి జీవించాలి. సాక్ష్యమును పోగొట్టుకొనుట ఎంతో భయంకరమైనది – దేవుని గద్దింపు ప్రేమపూర్వకమైనది. స్వీకరిద్దాము.

మాటలతో ప్రభువు చెప్పినప్పుడు మనము సరిచేసుకొందాము. ప్రభువు చేతలవరకు వస్తే మనము తట్టుకోలేము. అయినప్పటికీ ఏ విధమునైననూ నిన్ను సరిచేయాలి అనేదే ఆయన ఆశ. మాటలైనా చేతలైనా నిన్ను నిలబెట్టడానికే.

మన జీవితమునకు అవసరమైనది, ముఖ్యమైనది ఏమిటి అనేది ఈరోజు తెలుసుకుందాము.

అంతట వారు ప్రయాణమై పోవుచుండగా, ఆయన యొక గ్రామములో ప్రవేశించెను. మార్త అను ఒక స్ర్తీ ఆయనను తన యింట చేర్చుకొనెను. ఆమెకు మరియ అను సహోదరి యుండెను. ఈమె యేసు పాదములయొద్ద కూర్చుండి ఆయన బోధ వినుచుండెను. మార్త విస్తారమైన పని పెట్టుకొనుటచేత తొందరపడి, ఆయనయొద్దకు వచ్చి–ప్రభువా, నేను ఒంటరిగా పనిచేయుటకు నా సహోదరి నన్ను విడిచి పెట్టినందున, నీకు చింతలేదా? నాకు సహాయము చేయుమని ఆమెతో చెప్పుమనెను. అందుకు ప్రభువు –మార్తా, మార్తా, నీవనేకమైన పనులనుగూర్చి విచారముకలిగి తొందరపడుచున్నావు గాని అవసరమైనది ఒక్కటే మరియ ఉత్తమమైనదానిని ఏర్పరచుకొనెను, అది ఆమె యొద్దనుండి తీసివేయబడదని ఆమెతో చెప్పెను. -లూకా 10:38-42

ఇక్కడ మార్త, మరియల జీవితము ద్వారా నీకు నాకు కొన్ని విషయాలు బోధిస్తున్నాడు. “ఉత్తమమైనదానిని” ఏర్పరచుకోవలసిన అవసరము ఉన్నది. కొన్ని సందర్భములలో మార్త లాంటి జీవితము, కొన్ని సందర్భములలో మరియ లాంటి జీవితము కలిగి ఉంటాము. అయితే, మనము దేవుని సన్ణిధిలో ఆయన మాటలు వినుట అనేది”ఉత్తమమైనది”.

దేవుని కృపను బట్టి, మన సంఘములలో భోజనము సిద్ధపరచే సహోదరీలు, సహోదరులు దాని విషయమై దేవుని వాక్యమును పోగొట్టుకొనేవారుగా లేరు. ఈ విధానము మన వ్యక్తిగతమైన జీవితములలో కూడా అవసరమైనది.

మార్తతోనే మరియ ఉన్నది అయితే మరియ యేసయ్య పాదముల వద్ద బోధ వింటుంది. మార్త మాత్రము పనిపెట్టుకుంది గనుక తాను ఒంటరిగా ఉంది అని చింతపడుతుంది. దేవుని మనము వదిలి పెట్టినప్పుడు వారి, వీరి సహాయముకొరకు ఎదురుచూసేవారుగా, ప్రాకులాడేవారిగా ఉంటాము. అయితే దేవుని సన్నిధిలో ఆయన బోధను వినుటద్వారా మన ప్రతీ పరిస్థితిలోనూ జీవము కలిగి ఉంటాము.

సీమోను పేతురు– ప్రభువా, యెవనియొద్దకు వెళ్లుదుము? నీవే నిత్యజీవపు మాటలు గలవాడవు;౹ -యోహాను 6:68

మరియ యేసయ్య పాదముల చెంత, “నిత్య జీవపు” మాటలు వింటుంది. ఆ మాటలలో దేవుని మహత్తు ఉంటుంది. ఆయన ఒక మాట పలుకగా ఆ మాట ప్రకారము ఆయెను అని వాక్యము చెప్పుచున్నది. నీవు ఆయన సన్నిధిలో ఉన్నప్పుడు వెల్లడి పరచే మాటలు, నీ ప్రస్తుత జీవితము కొరకైనవో, నీ భవిష్యత్తును సంబంధించినవో, నిన్ను సరిచేయుటకు అవసరమైతే గతమునకు సంబంధించినవో “నిత్య జీవపు మహత్తు గల” మాటలు విడుదల అవుతాయి.

పేతురుకు అర్థమైంది, “నిత్య జీవపు” మాటలు యేసయ్య దగ్గరే అని. నీకు అర్థమవుతుందా? అలా అయితే దేవుని సన్నిధిలో ఉండే అవకాశమును పోగొట్టుకొనవు. కేవలము పాస్టరుగారికే దేవుని మాటలు అందించబడవు. నీవు దేవుని సన్నిధిలో నీవు కనిపెడితే, నీవు ఆయన బోధను గ్రహిస్తే, నీకు కూడా దేవుని మాటలు అందించబడతాయి. మన జీవితమునకు ముఖ్యమైనది ఆయన సన్నిధి, ఆ సన్నిధిలో అందించబడే జీవపు మాటలు.

నీ వాక్యములు వెల్లడి అగుటతోడనే వెలుగుకలుగును అవి తెలివిలేనివారికి తెలివి కలిగించును -కీర్తనలు 119:130

దేవుడు బోధిస్తున్నప్పుడు నీవు ఆ మాటలు విని స్వీకరించినప్పుడు, వెంటనే నీ చీకటిగా ఉన్న నీ పరిస్థితి ఆయన వెలుగుచే నింపబడుతుంది. “బుద్ధి జ్ఞాన సర్వసంపదలూ” ఆయనయందే ఉన్నవి. నీవు నేను సత్యమును గ్రహించునట్లు, సత్యమునే ప్రకటించువాడు. నీవు ఏ విషయములలో నీవు సహాయము కొరకు ఎదురుచూస్తున్నావో, ఆ మాటలే నీకు బోధిస్తాడు. ఆ మాటలు నీవు స్వీకరించినప్పుడు నీకు జ్ఞానము కలుగుతుంది. ఆ పరిస్థితిలో నీవు ఎలా చేయాలో, ఎలా చక్కబడాలో తెలియచేయబడుతుంది. అప్పుడు మనము నూతనపరచబడిన బలముచేత మన ప్రతీ పరిస్థితిలో జీవమును స్వతంత్రించుకుంటాము.

నీ వాక్యము నన్ను బ్రదికించియున్నది నా బాధలో ఇదే నాకు నెమ్మది కలిగించుచున్నది. -కీర్తనలు 119:50

దేవుడు బోధ చేసే సమయములో మనము ఆయన సన్నిధిని పోగొట్టుకోకూడదు. ఆ సమయములో విడుదల అయ్యే మాట, నిన్ను బ్రదికించేది, నీకు నెమ్మది కలిగించేది. నీ జీవితములో మరేదీ దీనికంటే ముఖ్యమైనది కాదు.

నీవు నాకు బోధించితివి గనుక నీ న్యాయవిధులనుండి నేను తొలగకయున్నాను. -కీర్తనలు 119:102

మనము తొలగిపోకుండా దేవుని బోధ మనకు సహాయకరముగా ఉంటుంది. “నీవు నాకు బోధించితివి గనుక నీ న్యాయవిధులనుండి నేను తొలగకయున్నాను” అంటే ఏమిటి? పాపము చేయకుండా వాక్యము సహాయకరము గా ఉంది అని మనము సాధారణముగా చూస్తాము. ఆయన బోధించినదానిని బట్టి మన జీవితమునకు అవసరమైనది తెలియచేయబడుతుంది. ఒకవేళ నీ జీవితమును ఆశీర్వదించెదను అని ప్రభువు చెప్పాడు అనుకోండి, ఆయన పలికిన మాట నెరవేర్చబడకుండా ఆయన యొద్దకు వెళ్ళదు. నీ ఆశీర్వాదమును పొందుకోకుండా తొలగిపోవు.

నా జనులారా, నా బోధకు చెవియొగ్గుడి నా నోటిమాటలకు చెవియొగ్గుడి -కీర్తనలు 78:1

దేవుడు తన పులిపిట్ మీదనుండి విడుదల అయ్యే ప్రతి మాటకు మనము చెవి యొగ్గాలి అంటే, ఆ మాటను పట్టుకునే ముందుకు వెళ్ళాలి.

అనుదినము నా గడపయొద్ద కనిపెట్టుకొని నా ద్వారబంధములయొద్ద కాచుకొని నా ఉపదేశము వినువారు ధన్యులు. నన్ను కనుగొనువాడు జీవమును కనుగొనును యెహోవా కటాక్షము వానికి కలుగును. -సామెతలు 8:34-35

నీవు ఈరోజు సిద్ధపడతావా! ఆయన విడుదల చేసే మాటలు కనుగొనువాడు జీవమును కనుగొనును. ఆయన సన్నిధిలో లేకుండా ఎలా ఆయన మాటలు మనము వినగలము? చింతతో ఉండుటకొరకైన జీవితములు కాదు గానీ, జీవము కలిగి, ధన్యకరమైన స్థితిలో ఉండవలసిన జీవితములు. దేవుని సన్నిధిలో కాచుకొనే ఆశ కలిగిన వారిగా మనము మనలను మార్చుకొందాము. ఇశ్రాయేలు ప్రజలు ఒక జాము అంతా వారి పాపములను ఒప్పుకొన్నారు, ఆయనను ఆరాధించారు. మనము ఎంతసేపు ఆయన సన్నిధిలో ప్రార్థనలో కనిపెడుతున్నాము? దేవా నీ మాట రాకపోతే నేను బ్రతకలేను అనే ధోరణిలోకి మనము మారాలి. అప్పుడు మనము అనేకమందికి ఆశీర్వాదకరముగా మార్చబడతాము. దేవుని మాట నిన్ను బ్రతికిస్తుంది అని నీవు గ్రహిస్తేనే గానీ, దానిని కనుగోవడానికి నిన్ను నీవు సిద్ధపరచుకోలేవు. అటువంటి మంచి తీర్మానము ఈరోజు తీసుకుంటావా?

అయినను పరిశుద్ధాత్మ మీ మీదికి వచ్చునప్పుడు మీరు శక్తినొందెదరు గనుక మీరు యెరూషలేములోను, యూదయ సమరయ దేశములయందంతటను భూదిగంతముల వరకును, నాకు సాక్షులైయుందురని వారితో చెప్పెను.౹ -అపొస్తలుల కార్యములు 1:8

యెరూషలేములోను అనగా మీరు ఆరాధించే స్థలము. యూదయ దేశము అంటే చుట్టుపక్కల ప్రదేశములలో, భూదిగంతములు అనగా మీ ప్రయాణము ఎక్కడికైతే కొనసాగించబడుతుందో, అంతమేరా దేవునికి సాక్షులుగా ఉంటారు. మీ ప్రతీ పరిస్థితిలో దేవుడు మిమ్మును విడుదలచేసి మిమ్మును ఆయన మహిమకు సాక్షులుగా ఆయన చేస్తాడు. కాబట్టి మంచి తీర్మానము తీసుకుందామా? దేవుని సన్నిధిలో లేకుండా నా దినాన్ని నేను ముగించను అని తీర్మానము తీసుకుంటావా?