07-05-2023 – ఆదివారం మొదటి ఆరాధన – అసాధ్యమైనది జరగడానికి

మెయిన్ మెసేజ్

ఈరోజు “అసాధ్యమైనది జరగటానికి” అనే విషయము గూర్చి ధ్యానిద్దాము. ఏమి చేస్తే అసాధ్యమైనది జరుగుతుంది? ఈ విషయము గూర్చి బైబిల్ గ్రంథము లో ఏమి వ్రాయబడింది? అనే విషయాలు తెలుసుకుందాము.

అందుకు యేసు వారితో ఇట్లనెను–మీరు దేవునియందు విశ్వాసముంచుడి. -మార్కు 11:22

దేవుని యందు విశ్వాసముంచితే ఏమి జరుగుతుంది? దీని గూర్చి అదే మార్కు సువార్త 11 వ అధ్యాయము 12వ వచనము నుండి నేర్చుకుందాము. యేసు మరియు ఆయన శిష్యులు, బేతనియనుండి వెళ్లుచుండగా ఆకలిగొని ఒక అంజూరపు చెట్టువద్దకు వచ్చి చూడగా అక్కడ అంజూరపు పండ్లు ఏమియు లేకపోయెను. ఆ సమయములో యేసు, ఆ అంజూరపు చెట్టును చూసి, నీ పండ్లు ఎవరూ ఎన్నటికినీ తినకుందురు గాక అని పలికినప్పుడు, సాయంకాలమునకు ఆ చెట్టు ఎండిపోయింది. ఆ విషయమును గమనించిన పేతురు “బోధకుడా, యిదిగో నీవు శపించిన అంజూరపుచెట్టు ఎండిపోయెనని ఆయనతో చెప్పెను”. అప్పుడు ఆ సందర్భములో యేసయ్య చెప్పిన మాటలు, “మీరు దేవునియందు విశ్వాసముంచుడి”. ఎందుకు ఇలా చెప్పాడు అని ఆలోచిస్తే, అక్కడ ఒక అసాధారణమైన కార్యము జరిగింది. ఆ కార్యము యేసయ్య పలికి మాటలను బట్టి జరిగింది అనే సంగతి పేతురు గమనించాడు. అయితే ఆ సందర్భములో “దేవుని యందు విశ్వాసముంచుడి” అని చెప్పడములో అర్థము, మనకు సహితము అదేవిధముగా ఉండాలి అనే మాదిరి అని అర్థము చేసుకోవాలి.

తీర్పుదినమందు మనకు ధైర్యము కలుగునట్లు దీనివలన ప్రేమ మనలో పరిపూర్ణము చేయబడి యున్నది; ఏలయనగా ఆయన ఎట్టివాడై యున్నాడో మనము కూడ ఈ లోకములో అట్టివారమై యున్నాము.౹ -1 యోహాను 4:17

నీ నామమును నా సహోదరులకు ప్రచురపరతును, సమాజముమధ్య నీ కీర్తిని గానము చేతును అనెను. మరియు –నే నాయనను నమ్ముకొనియుందును అనియు –ఇదిగో నేనును దేవుడు నాకిచ్చిన పిల్లలును అనియు చెప్పుచున్నాడు – హెబ్రీ 2:11.

యేసయ్య మాటలు ఇంకొంచెం విపులీకరిస్తే, “నేను దేవుని యందు విశ్వాసముంచి నేను ఆ అసాధ్యమైన కార్యము జరిగించాను, మీరు కూడా దేవుని యందు విశ్వాసముంచిన యెడల ఆసాధ్యమైన కార్యములు జరిగించగలుగుతారు అని అర్థము”.

యేసు–రాయి తీసివేయుడని చెప్పగా చనిపోయినవాని సహోదరియైన మార్త–ప్రభువా, అతడు చనిపోయి నాలుగు దినములైనది గనుక ఇప్పటికి వాసనకొట్టునని ఆయనతో చెప్పెను.౹ అందుకు యేసు–నీవు నమ్మినయెడల దేవుని మహిమ చూతువని నేను నీతో చెప్పలేదా అని ఆమెతో అనెను;౹ -యోహాను 11:39-40

అప్పటికే లాజరు చనిపోయి 4 రోజులు అయినది గనుక స్వాభావికముగా ఆ మృతశరీరము నిజముగానే వాసన వస్తుంది. అయితే యేసయ్య చెప్తున్నాడు, “నీవు నమ్మినయెడల దేవుని మహిమ చూతువని”. అనగా యేసయ్య ఏమి చూస్తున్నాడు, ఏమి చేస్తున్నాడు అంటే? దేవుని యందలి విశ్వాసము ద్వారా దేవుని మహిమను చూస్తున్నాడు. అనగా దేవుని యందలి విశ్వాసమును బట్టి అసాధ్యమైన కార్యములు జరిగించబడతాయి.

అంతట వారు ఆ రాయి తీసివేసిరి. యేసు కన్నులు పైకెత్తి–తండ్రీ, నీవు నా మనవి వినినందున నీకు కృత జ్ఞతాస్తుతులు చెల్లించుచున్నాను.౹ నీవు ఎల్లప్పుడును నా మనవి వినుచున్నావని నేనెరుగుదును గాని నీవు నన్ను పంపితివని చుట్టు నిలిచియున్న యీ జనసమూహము నమ్మునట్లు వారి నిమిత్తమై యీ మాట చెప్పితిననెను.౹ -యోహాను 11:41-42

ఈ వాక్యము ద్వారా యేసయ్య దేవుని యందలి నమ్మిక, విశ్వాసము కలిగి జీవించాడు అని చూడగలము. యేసయ్య మనుష్య స్వరూపము ధరించుకుని వారికి మాదిరికరమైన జీవితమునే జీవించాడు. అయితే మరొక సత్యము మనము గ్రహించవలసినది ఏమిటి అంటే, ఆ విశ్వాసము ద్వారా మనకు కలిగిన ఆధిక్యత దేవుని మహిమ పరచడానికే వినియోగించాలి. నీ జీవితములో నీకు అడ్డుగా వచ్చిన అసాధ్యకరమైన విషయములో విశ్వాసముంచిన యెడల, అసాధ్యమైన కార్యము జరుగుతుంది అని అర్థము. అంతే కానీ, నీకు సంబంధములేని ప్రతి అసాధ్యమైన విషయములోను, కార్యము జరిగించుమని కాదు.

అయితే మనము నేర్చుకొనవలసిన సత్యము, “విశ్వాసము అనేది అసాధ్యమైన సందర్భములలో దేవుని శక్తిని ప్రత్యక్షపరచబడునట్లు చేసేది”.

మరలా మనము మార్కు 11:22 లో చూస్తే, “మీరు దేవునియందు విశ్వాసముంచుడి” అని యేసయ్య చెప్తున్నారు. అంటే దాని అర్థము మీరు కూడా విశ్వాసము ద్వారా అసాధ్యమైన కార్యము చేయునట్లు సిద్ధపరచుకొనుడి అని అర్థము.

ఎవడైనను ఈ కొండను చూచి–నీవు ఎత్తబడి సముద్రములో పడవేయబడుమని చెప్పి, తన మనస్సులో సందే హింపక తాను చెప్పినది జరుగునని నమ్మినయెడల వాడు చెప్పినది జరుగునని మీతో నిశ్చయముగా చెప్పుచున్నాను. అందుచేత ప్రార్థన చేయునప్పుడు మీరు అడుగుచున్న వాటినెల్లను పొందియున్నామని నమ్ముడి; అప్పుడు అవి మీకు కలుగునని మీతో చెప్పుచున్నాను. -మార్కు 11:23-24

ఈ మాటల ద్వారా ప్రభువు తన శిష్యులను సహితము అట్టి ప్రకారము సిద్ధపరచుకొనుమని యేసయ్య చెప్పుచున్నాడు. అదే విధానములో, మనము కూడా అదేవిధమైన విశ్వాసము కనపరచినయెడల అసాధ్యమైన కార్యములు జరిగించగలమని వాక్యము ద్వారా తెలుసుకోగలము.

పౌలును గమనిస్తే, “నన్ను బలపరచువానియందు నేను సమస్తము చేయగలను” అని చెప్తున్నాడు, అంటే, యేసయ్య బలము కలవాడు అనే కదా! అలాగే “విశ్వసించిన యెడల అసాధ్యమైన కార్యములు చేయగలుగుతావు” అనగా, యేసయ్య కూడా విశ్వాసము కనపరిచారు అనే కదా! యేసయ్య తాను చెప్పినదే చేసి, మనకు మాదిరిగా ఉన్నాడు.