30-04-2023 – ఆదివారం మొదటి ఆరాధన – నీ జీవితం హెచ్చించబడటానికి

మెయిన్ మెసేజ్

“నీ జీవితము హెచ్చించబడటానికి” అనే విషయము గూర్చి ధ్యానిద్దాము. మనలో ప్రతి ఒక్కరికీ జీవితములో ఎదగాలి, మంచిగా వృద్ధిలోనికి రావాలి అనే ఆశ కలిగే ఉంటాము. ఉదాహరణకు ఒక ఉద్యోగి తన ప్రమోషన్ కొరకు తన పై అధికారిని సంతోషపరచడానికి శతవిధాలా ప్రయత్నిస్తాడు. అయితే ఆత్మసంబంధమైన వారమైన మనము మనుష్యుల ఆలోచనల ప్రకారము కాదు గానీ, సర్వశక్తిమంతుడైన మన దేవుని నియమముల ప్రకారము మనము హెచ్చింపబడుతాము. ఏలయనగా ఒకని హెచ్చించుట దేవుని వశము. అలాగే మన పౌరస్థితి పరలోకమందున్నది. ఆ పరలోక నాథుడైన దేవుని పరిపాలనలో మనము.

దేవుడే తీర్పు తీర్చువాడు ఆయన ఒకని తగ్గించును ఒకని హెచ్చించును -కీర్తనలు 75:7

నీవు హెచ్చించబడుట అనే దానిని నిర్ణయించువాడు దేవుడే. మరి ముఖ్యముగా యేసయ్యను అంగీకరించి, దేవుని పరిపాలనలో నేనున్నాను అనే సత్యము ఎరిగినవారి జీవితములో ఇది సత్యము. దానిని బట్టి లోకసంబంధులు ఎంత ప్రయత్నించినా దేవుని నిర్ణయమును అడ్డగించలేరు.

అతనికంటె ఇతడు నీతిమంతుడుగా తీర్చబడి తన యింటికి వెళ్లెనని మీతో చెప్పుచున్నాను. తన్ను తాను హెచ్చించుకొనువాడు తగ్గింపబడుననియు తన్ను తాను తగ్గించుకొనువాడు హెచ్చింపబడుననియు చెప్పెను. -లూకా 18:14

ఇక్కడ ఇద్దరు వ్యక్తులున్నారు. ప్రార్థనచేయుటకై ఈ యిద్దరు మనుష్యులు దేవాలయమునకు వెళ్లిరి. వారిలో ఒకడు పరిసయ్యుడు, ఒకడు సుంకరి. పరిసయ్యుడు నిలువబడి ప్రార్థన చేస్తూ – దేవా, నేను చోరులును అన్యా యస్థులును వ్యభిచారులునైన యితర మనుష్యులవలెనైనను, ఈ సుంకరివలెనైనను ఉండనందుకు నీకు కృతజ్ఞతాస్తుతులు చెల్లించుచున్నాను అని చెప్పి ప్రార్థించెను. తన ప్రార్థనలో తాను చేసే మంచి కార్యములనే తాను ప్రస్తావిస్తూ దేవునికి ప్రార్థించాడు. అలాగే ఇంకా తన ఆత్మీయ స్థితిని గూర్చి కూడా తాను ప్రార్థించాడు. వారమునకు రెండు మారులు ఉపవాసము చేయుచు నా సంపాదన అంతటిలో పదియవ వంతు చెల్లించుచున్నానని తనలోతాను ప్రార్థించు చుండెను.

మరి సుంకరిని చూస్తే, దూరముగా నిలుచుండి, ఆకాశమువైపు కన్నులెత్తుటకైనను ధైర్యముచాలక రొమ్ము కొట్టుకొనుచు–దేవా, పాపినైన నన్ను కరుణించుమని పలికెను. ఈ ఇద్దరిని గూర్చి యేసయ్య చెప్పిన మాటలు, “అతనికంటె ఇతడు నీతిమంతుడుగా తీర్చబడి తన యింటికి వెళ్లెనని మీతో చెప్పుచున్నాను, తన్ను తాను హెచ్చించుకొనువాడు తగ్గింపబడుననియు తన్ను తాను తగ్గించుకొనువాడు హెచ్చింపబడుననియు చెప్పెను”.

పరిసయ్యుడు దేవుని ఆజ్ఞల ప్రకారము చేస్తున్నాడు. అయితే సుంకరి తన ఉద్యోగములో ప్రజలను పీడిస్తూ ఉండిన కారణాన దేవుని ఆజ్ఞల ప్రకారము చెయ్యట్లేదు.

అయితే ఇక్కడ ఎవరు ఎక్కడ హెచ్చించుకొన్నారు? తగ్గించుకున్నారు అనే సత్యము మనము ఎరిగి ఉండాలి. పరిసయ్యుడు తనలో తాను హెచ్చించుకున్నాడు. సుంకరి తనలో తాను తగ్గించుకున్నాడు. అనగా వారి వారి “మనస్సాక్షి” ప్రకారము హెచ్చించుకోవడము, తగ్గించుకోవడము అనే విషయము ఉంటుంది. అందుకే దేవుడు మనలను హెచ్చించాలి అంటే, మన మనస్సాక్షి చాలా అవసరము. “స్వనీతి” అనేది చాలా ప్రమాదకరమైన స్థితి. మన హృదయములో ఉన్నదానిని బట్టి దేవుడు తీర్పు తీర్చేవాడు.

ఒకవేళ మన మనస్సాక్షి బలహీనముగా అయిపోతే, మనలో అసూయ, ద్వేషము వంటి దుర్గుణములు ప్రవేశిస్తాయి. ఈ మనస్సాక్షిని బట్టే మనము హెచ్చింపబడటము గానీ, తగ్గించబడటము గానీ జరుగుతుంది.

నాశనమునకు ముందు గర్వము నడచును. పడిపోవుటకు ముందు అహంకారమైన మనస్సు నడచును -సామెతలు 16:18

గర్వము, అహంకారము అనేది ఒక మనిషి హృదయములో, మనసులో జరిగే విషయాలు. అందుకే మన మనస్సాక్షి ఎంతో ప్రాముఖ్యము.

మొదటిగా మనలో మనము తగ్గింపు కలిగి ఉండుట. రెండవదిగా చూస్తే దేవుని యెదుట తగ్గింపు కలిగి ఉండుట.

ప్రభువు దృష్టికి మిమ్మును మీరు తగ్గించుకొనుడి. అప్పుడాయన మిమ్మును హెచ్చించును. -యాకోబు 4:10

పరిసయ్యుడు మంచి కార్యములను చేస్తున్నాడు కాబట్టి తాను అదే విషయములను గూర్చి చెప్పాడు. సుంకరి అయితే చెడ్డకార్యము జరిగించాడు కాబట్టి తాను ఒప్పుకొని తగ్గించుకున్నాడు. అయితే మనము ఎలా తీసుకోవాలి? ఉదాహరణకు ఒక ఉద్యోగి జీవితములో చూస్తే, తాను ఎలా తగ్గించుకోగలడు? “ప్రభువా నా జ్ఞానమును బట్టి కాదు గానీ, నీ కృపను బట్టే, నీవు నిర్ణయించిన దాని బట్టే నేను ఈ స్థితిలో ఉన్నాను” అనే విధానములో మనలను మనము ప్రభువు ఎదుట తగ్గించుకోవాలి. నీవు హెచ్చించబడుట అనేది ముందుగానే లిఖించబడింది. ఆ లిఖించబడినది స్థిరపరచుకోవాలి అంటే ప్రభువు ఎదుట మనలను మనము తగ్గించుకోవాలి.

మహాఘనుడును మహోన్నతుడును పరిశుద్ధుడును నిత్యనివాసియునైనవాడు ఈలాగు సెల విచ్చుచున్నాడు –నేను మహోన్నతమైన పరిశుద్ధస్థలములో నివసించు వాడను అయినను వినయముగలవారి ప్రాణమును ఉజ్జీవింప జేయుటకును నలిగినవారి ప్రాణమును ఉజ్జీవింపజేయుటకును వినయముగలవారియొద్దను దీనమనస్సుగలవారియొద్దను నివసించుచున్నాను. -యెషయా 57:15

ఎప్పుడైతే తగ్గింపు కలిగిన మనసుతో దేవుని యొద్దకు మనము వస్తామో, అప్పుడు ఆయన “ఉజ్జీవింపచేయుటకు” అనగా మనలను “హెచ్చించుటకు” ఆయన నీయొద్దకు వస్తాడు. అందుకే సుంకరి తగ్గింపు ప్రార్థనను బట్టి నీతిమంతునిగా తీర్చబడ్డాడు అనగా “హెచ్చించబడుటకు అనుకూలమైన స్థితిలోనికి మార్చబడ్డాడు”.

“నీతిమంతుడుగా తీర్చబడి తన యింటికి వెళ్లెనని” అనే మాటను అర్థము చేసుకోవడానికి తప్పిపోయిన కుమారుని జీవితము చూద్దాము.

అయితే బుద్ధి వచ్చినప్పుడు వాడు–నా తండ్రియొద్ద ఎంతోమంది కూలివాండ్రకు అన్నము సమృద్ధిగా ఉన్నది, నేనైతే ఇక్కడ ఆకలికి చచ్చిపోవు చున్నాను. నేను లేచి నా తండ్రియొద్దకు వెళ్లి–తండ్రీ, నేను పరలోకమునకు విరోధముగాను నీ యెదుటను పాపము చేసితిని; ఇకమీదట నీ కుమారుడనని అని పించుకొనుటకు యోగ్యుడను కాను; నన్ను నీ కూలి వారిలో ఒకనిగా పెట్టుకొనుమని అతనితో చెప్పుదుననుకొని, లేచి తండ్రియొద్దకు వచ్చెను. -లూకా 15:17-19

ఈ కుమారుడు మొదట తన హృదయములో పశ్చాత్తాపముతో తగ్గింపు కలిగినవాడుగా తండ్రి ఇంటికి వెళ్ళాడు. అన్నీ పోగొట్టుకొని తన తండ్రి యెదుట నిలబడ్డాడు. అయితే తండ్రి తన మెడమీద ముద్దుపెట్టుకున్నాడు.

దాసుడెల్లప్పుడును ఇంటిలో నివాసముచేయడు; కుమారుడెల్లప్పుడును నివాసముచేయును.౹ -యోహాను 8:35

తప్పును ఎరిగి పశ్చాత్తాపముతో ఎదుట నిలిచిన కుమారుని నీతిమంతునిగా తీర్చి, అనగా “కుమారునిగా ఎంచి” ముద్దుపెట్టాడు. అలాగే కుమారునిగా తాను ఇంటిలోనికి వెళ్ళి నిత్యము కుమారునిగానే తాను ఆధిక్యత కలిగి ఉంటాడు. అయితే తండ్రి కుమారుడు మాటలాడక మునుపే ఎలా అంగీకరించి ముద్దు పెట్టుకున్నాడు? అని చూస్తే, తన కుమారుడు ఏ స్థితిలో ఉన్నాడో ఎరిగినవాడుగా ఉన్నాడు. అలాగే మనము కూడా దేవుని ఎదుట తగ్గింపు కలిగిన స్వభావము కనపరిస్తే చాలు, ఆయనే నిన్ను హెచ్చించుటకు నీకంటే ఎక్కువైన ఆసక్తి కలిగినవాడుగా ఉన్నాడు.