26-02-2023 ఆదివారం రెండవ ఆరాధన – మీరు దేవుని వారసులై ఉన్నారు

Main message| మెయిన్ మెసేజ్

మనకు క్షేమకరమైన మార్గాల కొరకు నానా రకాల ప్రయత్నాలు చేస్తాము. లోకము అటువెళ్ళు ఇటువెళ్ళు అని పరిగెట్టిస్తుంది. అయితే నీ ప్రభువు “నా వద్దకు రా, నీకు విశ్రాంతిని ఇస్తాను” అని చెప్తున్నాడు. మీరు ఒప్పుకున్నది నీ దేవుడు స్థిరపరుస్తాడు. “నా తండ్రీ, నా దేవా! నీ ఒడిలోనే నాకు సుఖము” అని ఒప్పుకున్నావుకదా! ఆయన ఒడిలో నీకొరకు సిద్ధపరచబడినది స్థిరపరచబడుతుంది.

ఈరోజు మన ధ్యానము, “మీరు దేవుని వారసులై ఉన్నారు”. దేవుని వాక్యము పరలోకమును తెరిచే తాళపుచెవిగా ఉంది. పరలోకము తెరువబడింది అంటే, నీవు నిలబడిన వాక్యము నెరవేరబడుటకు పరలోకమునుండి మహిమ వెడలుతుంది. ప్రభువు ప్రత్యక్షత దినదినము నూతనముగా మన జీవితములలో కనుపరచబడుతుంది. యేసుప్రభువు చెప్పిన మాటలు పరిసయ్యులు, సద్దూకయ్యులు కూడా విన్నారు, అయితే స్వీకరించలేదు. అయితే సామాన్య ప్రజలు ఆయన మాట విని స్వీకరించి, ఆశీర్వదించబడ్డారు.

మీరు క్రీస్తు సంబంధులైతే ఆ పక్షమందు అబ్రాహాముయొక్క సంతానమైయుండి వాగ్దాన ప్రకారము వారసులైయున్నారు – గలతీ 3:29

అనగా విశ్వాసము ఉంచిన ప్రతీవారు కుమారులుగా చేయబడ్డారు. దానిని బట్టి వారు వారసులుగా చేయబడ్డారు. వారసత్వము అనగా తండ్రి కలిగియున్నదానిని అనుభవించటానికి అర్హత కలిగినవారు. ఈరోజు మనమందరము దేవుని పిల్లలమే అయితే దేవుడు కలిగియున్న సమస్తములో ఎంతవరకు మనము అనుభవించగలుగుతున్నాము?

మరియు నేను చెప్పునదేమనగా, వారసుడు అన్నిటికిని కర్తయైయున్నను బాలుడైయున్నంతకాలము అతనికిని దాసునికిని ఏ భేదమును లేదు – గలతీ 4:1

బాలుడుగా ఉన్నంతకాలము తండ్రి యొక్క స్వాస్థ్యమును అధికారముతో అనుభవించలేని స్థితిలో ఉంటాడు. మనము ఆత్మీయముగా చూస్తే, మనము కూడా దేవుని కుమారులుగా వారసులమే అయినప్పటికీ, మన ఆత్మీయ స్థితి ఇంకా బాల్య దశలోనే ఉంటుంది గనుక. ఈరోజు మనము ఎలా వృద్ధి కలుగచేయబడి మనము తండ్రి స్వాస్థ్యమును సూపర్నేచురల్ ను అనుభవించగలము.

యెహోవా నియమించిన భయంకరమైన ఆ మహాదినము రాకమునుపు నేను ప్రవక్తయగు ఏలీయాను మీయొద్దకు పంపుదును. నేను వచ్చి, దేశమును శపించకుండునట్లు అతడు తండ్రుల హృదయములను పిల్లల తట్టును పిల్లల హృదయములను తండ్రుల తట్టును త్రిప్పును – మలాకీ 4:5-6

ఇది బాప్తీస్మము ఇచ్చు యోహాను గూర్చిన మాటలు. ఇదే మాట లూకాలో చూస్తే,

మరియు అతడు తండ్రుల హృదయములను పిల్లల తట్టునకును, అవిధేయులను నీతి మంతుల జ్ఞానము ననుసరించుటకును త్రిప్పి, ప్రభువు కొరకు ఆయత్తపడియున్న ప్రజలను సిద్ధ పరచుటకై ఏలీయాయొక్క ఆత్మయు శక్తియు గలవాడై ఆయనకు ముందుగా వెళ్లును గనుక నీకు సంతోషమును మహా ఆనంద మును కలుగును; అతడు పుట్టినందున అనేకులు సంతోషింతురనెను – లూకా 1:17

మన శరీరము దేని కొరకు చేయబడింది? ఆత్మ నివసించడానికి చేయబడింది. ఏలియా ఆత్మ నివసించడానికి, బాప్తీస్మమిచ్చు యోహాను శరీరము సిద్ధపరచబడింది.

అయినను ఏలీయా యిదివరకే వచ్చెను; వారతనిని ఎరుగక తమ కిష్టము వచ్చినట్టు అతని యెడల చేసిరి. మనుష్యకుమారుడు కూడ ఆలాగే వారి చేత శ్రమలు పొందబోవుచున్నాడని మీతో చెప్పుచున్నాను. అప్పుడాయన బాప్తిస్మమిచ్చు యోహా నునుగూర్చి తమతో చెప్పెనని శిష్యులు గ్రహించిరి. – మత్తయి 17:12,13.

ఇక్కడ చూస్తే, ఏలియా వచ్చాడు అని యూదా ప్రజలు గుర్తించలేదు. ఏలియా ఆత్మ యోహానులో ఉంది అని ఎలా గుర్తించగలము? ఏలియా తాను బ్రతికి ఉన్నంత కాలము మారుమనస్సు గూర్చి ప్రకటించారు.

ఏలీయా జనులందరి దగ్గరకు వచ్చి యెన్నాళ్ల మట్టుకు మీరు రెండు తలంపుల మధ్య తడబడుచుందురు? యెహోవా దేవుడైతే ఆయనను అనుస రించుడి,బయలు దేవుడైతే వాని ననుసరించుడని ప్రక టన చేయగా, జనులు అతనికి ప్రత్యుత్తరముగా ఒక మాటైనను పలుకక పోయిరి – 1 రాజులు 18:21

అలాగే వీరి రూపురేఖలు చూస్తే, “అందుకు వారు అతడు గొంగళి ధరించుకొని నడుమునకు తోలుదట్టి కట్టుకొనినవాడని ప్రత్యుత్తరమియ్యగాఆ మనుష్యుడు తిష్బీయుడైన ఏలీయా అని అతడు చెప్పెను – 2 రాజులు 1:8”. యోహాను ఎలా ఉన్నాడు? “ఈ యోహాను ఒంటె రోమముల వస్త్రమును, మొలచుట్టు తోలుదట్టియు ధరించుకొనువాడు; మిడతలును అడవి తేనెయు అతనికి ఆహారము – మత్తయి 3:4”.

ఏలియా ఆహాబు రాజును ఎదిరించాడు, యోహాను హేరోదు రాజును ఎదిరించాడు. ఏలియా యెజెబెలు చేత శ్రమ పరచబడ్డాడు, యోహాను కూడా హేరోదియ చేత శ్రమపరచబడినాడు.

ఇవన్నీ “మహా దినముల రాక” కొరకైన గురుతులు. అవి గ్రహించి ఉన్నట్టయితే, ఆ ప్రజలు యోహానును ఏలియా గా స్వీకరించి ఆ దినములకొరకు సిద్ధపడేవారు.

“మరియు మీరు కుమారులై యున్నందుననాయనా తండ్రీ, అని మొఱ్ఱపెట్టు తన కుమారుని ఆత్మను దేవుడు మన హృదయములలోనికి పంపెను – గలతీ 4:6”.

ఏలియా ఆత్మ బాప్తీస్మమిచ్చు యోహానులో ఉన్నప్పుడు యోహాను జీవితములో ఏలియా తాలూకు గుర్తులు కనబడుతున్నాయి. మనలో క్రీస్తు ఆత్మ ఉంది అంటే, మనలో కూడా ఆ తాలూకు గుర్తులు కనబడాలి కదా! యోహానులోని ఏలియా ఆత్మను ప్రజలు గుర్తించలేదు గనుక వారు సిద్ధపడలేదు. మనలో ఉన్నది యేసు ఆత్మ అని గ్రహించలేదు కనుక దేవుని వారసత్వమును అనుభవించలేకపోతున్నాము. అందుకే ఇంకా మనము బాల్య దశలో ఉన్నాము అని అర్థము అవుతుంది. అయితే ఎప్పుడైతే ఈ సత్యము గ్రహించావో, నీలో ఉన్న క్రీస్తు ఆత్మలో నీవు ఎదగడానికి ప్రయత్నించాలి. ఎలా అంటే, క్రీస్తువలే ప్రవర్తించడము ప్రారంభించుట చేతనే. అప్పుడు నీవు బాల్య దశదాటి వృద్ధిపొందుతావు.

సమస్తమును నా తండ్రిచేత నా కప్పగింపబడి యున్నది. తండ్రిగాక యెవడును కుమారుని ఎరుగడు; కుమారుడు గాకను, కుమారు డెవనికి ఆయనను బయలుపరచ నుద్దేశిం చునో వాడు గాకను మరి ఎవడును తండ్రిని ఎరుగడు. – మత్తయి 11:27

యేసయ్య ఎప్పుడూ కూడా నేను తండ్రి ఏకమై ఉన్నామనే చెప్పేవాడు. యేసయ్యను చూస్తే తండ్రి చిత్తము నెరవేర్చడానికే వచ్చాను అని చెప్పేవారు. అలాగే యేసయ్య ఆత్మను కలిగి ఉన్న మనము కూడా తండ్రి చిత్తమును నెరవేర్చడానికే ప్రయాసపడాలి. “నేనునూ తండ్రియు ఏకమై ఉన్నామని మీరు నమ్ముటలేదా, అయితే ఈ క్రియలను బట్టి అయినా నమ్ముడి” అని యేసు చెప్పాడు, అంతే మన క్రియలద్వారా మనము తండ్రితో ఏకమై ఉన్నామని కనపరచగలుగుతాము. అలాగే యేసయ్య ఎప్పుడూ పరిశుద్ధమైన జీవితము జీవించాడు. అలాగే క్రీస్తు ఆత్మ కలిగిన మనము కూడా పరిశుద్ధత కొరకు ప్రయాస పడిన యెడల నీవు బాల్య దశనుండి ఎదుగుతావు. అలాగే యేసయ్య ఎప్పుడూ తండ్రి కి విధేయత చూపినవాడుగా ఉన్నాడు. అయితే మరి మనము ఎలా ఉంటున్నాం? దేవుని మాటకు విధేయత చూపక పోతే, ఇంకా మనము బాల్య దశలో ఉన్నట్టే.

క్రీస్తు ఆత్మ యొక్క లక్షణములు
1. తండ్రి చిత్తమే నెరవేర్చుట.
2. పరిశుద్ధత కలిగి జీవించుట.
3. దేవుని మాటకు విధేయత చూపుట.

దేవుని విషయములలో ఏమాత్రము రాజీ పడవద్దు. సాతాను ఎప్పుడూ నిన్ను పడగొట్టడానికి ప్రయత్నిస్తుంది. యేసయ్య శ్రమలో దేవుని మాటపై నిలబడినప్పుడు అపవాది ఎటువంటి అపాయము కలుగచేయలేకపోయాడు. అలాగే నీలో క్రీస్తు ఆత్మ ఉంటే, నీలో ఉన్న క్రీస్తు ఆత్మలో నీవు ఎదిగి ఉంటే, నీకు కలిగిన శ్రమలో నీవు దేవుని మాటపైనే నిలబడతావు. అప్పుడు ఖచ్చితముగా అపవాది నీకు అపాయము కలుగజేయలేడు.