12-02-2023 ఆదివారం మొదటి ఆరాధన

Main message| మెయిన్ మెసేజ్

మనమందరము దేవుని బిడ్డలము కనుక దేవుడు మననుండి కొన్ని కార్యములు ఎదురుచూస్తున్నారు. దాని అర్థము, ఆ కార్యము చెయ్యగల సామర్థ్యము మనకు ఇవ్వబడింది.

మీరు క్రీస్తుతోకూడ లేపబడినవారైతే పైనున్న వాటినే వెదకుడి, అక్కడ క్రీస్తు దేవుని కుడిపార్శ్వమున కూర్చుండియున్నాడు. పైనున్న వాటిమీదనేగాని, భూసంబంధమైనవాటిమీద మనస్సు పెట్టుకొనకుడి; ఏలయనగా మీరు మృతిపొందితిరి, మీ జీవము క్రీస్తుతోకూడ దేవునియందు దాచబడియున్నది. మనకు జీవమై యున్న క్రీస్తు ప్రత్యక్షమైనప్పుడు మీరును ఆయనతోకూడ మహిమయందు ప్రత్యక్షపరచబడుదురు. – కొలస్సీ 3:1-4.

“మీరు క్రీస్తుతోకూడ లేపబడినవారైతే” అనగా మీరు యేసు ప్రభువును అంగీకరించి ఆయన చేసిన సిలువయాగమును విశ్వసించి, మారు జన్మ పొందినవారైతే. ఈ విషయము ఎంతో ప్రాముఖ్యము లేదా మిగతా అన్ని విషయములకూ మూలము.

మనము చేసే ప్రార్థనలో మన అవసరముల గూర్చి అడుగుతాము, మన కుటుంబము గూర్చి అడుగుతాము. అయితే పౌలు “పైన ఉన్నవాటి మీద” వెతకమని చెప్పుచున్నాడు. పరలోకములో దేవుడు మన మీద కలిగి ఉన్న “చిత్తము” గూర్చి వెతికి తెలుసుకుని దానిని నెరవేర్చాలి. దీని గూర్చే ప్రభువు ఎదురుచూస్తున్నారు.

అయితే దేవుని చిత్తము మనము ఎలా తెలుసుకోగలము? లోకములో ఉన్న తల్లిదండ్రులు పిల్లలనుండి ఏమి ఆశిస్తున్నారు? అని పిల్లలకు తెలియదా? ఖచ్చితముగా తెలుస్తుంది. అలాగే దేవుని బిడ్డలుగా ఆయన ఏమి కోరుకుంటున్నారు అనేది కూడా మనము ఎరిగి ఉండాలి.

పేతురు జీవితములో జరిగిన ఒక కార్యమునుండి ఈ విషయాలి నేర్చుకుందాము.

అయితే ఆయన పేతురు వైపు తిరిగిసాతానా, నా వెనుకకు పొమ్ము; నీవు నాకు అభ్యంతర కారణమైయున్నావు; నీవు మనుష్యుల సంగతులనే తలంచుచున్నావు గాని దేవుని సంగతులను తలంపకయున్నావు అని పేతురుతో చెప్పెను. – మత్తయి 16:23

ఇక్కడ చూస్తే, యేసుక్రీస్తుతోనే పేతురు ఉన్నాడు. అయితే యేసు ప్రభువు చెప్పిన మాటను అలా కాదు అని ప్రభువునే గద్దిస్తున్నాడు. మన నిమిత్తము దేవుడు కలిగిన ఉద్దేశ్యములు అవి ఎంతో ఉన్నతమైనది. అయితే ఆ వాక్యము నాకు సరిపోయే విధముగా ఉందా? నా ఇష్టాలకు సరిపోయేవిధముగా ఉందా అని ఆలోచించి దేవుని చిత్తమునకు వ్యతిరేకముగా మాట్లాడి గద్దించి దేవుని చిత్తమును నెరవేర్చకుండా తప్పిపోతున్నాము.

మనుష్యుల రీతిగా పేతురు ప్రభువుకు కీడు కలుగకూడదు అనే ఆలోచన మనుష్యరీతిగా చెప్పాడు. అయితే దేవుని చిత్తము, యేసు ప్రభువు ద్వారా దేవుడు నిర్ణయించిన ప్రణాళిక ఎరుగక ఆ విధముగా మాట్లాడాడు. అయితే ఈరోజు మనము నష్టమును తెచ్చుకోవాలి అని గాని, మనము చనిపోవాలి అని కాదు గానీ, దేవుని చిత్తమును ఎరిగి, తెలుసుకుని ఆయన చిత్తము జరుగులాగున మనము అవకాశము ఇవ్వాలి. అలా కాక పోతే, మనము సాతాను బిడ్డలుగా అయిపోతాము. “దేవుని సంగతులను ఆలోచించలేని” జీవితమ్ను ఎంతో నష్టకరమైనది.

క్షణమాత్రముండు మా చులకని శ్రమ మాకొరకు అంత కంతకు ఎక్కువగా నిత్యమైన మహిమ భారమును కలుగ జేయుచున్నది. ఏలయనగా దృశ్యమైనవి అనిత్యములు; అదృశ్యమైనవి నిత్యములు. 2 కొరింథీ 4:17-18

దేవుడు మనకొరకు కలిగిన చిత్తము మనకు ఎదురుగా కనబడదు. మన కంటి ఎదురుగా కనబడే విషయాలు అయిన మన అవసరాలు, కష్టాలు అనే వాటి కొరకే రాత్రి పగలు కష్టపడతాము. అయితే దేవుడు మనకొరకు కలిగిన చిత్తము కొరకు వెతికి, తెలుసుకుని మనము జీవించాలి.

ఆత్మానుసారమైన మనస్సు జీవమును సమాధానమునై యున్నది. ఏలయనగా శరీరానుసారమైన మనస్సు దేవునికి విరోధమైయున్నది; అది దేవుని ధర్మ శాస్త్రమునకు లోబడదు, ఏమాత్రమును లోబడనేరదు. కాగా శరీరస్వభావము గలవారు దేవుని సంతోషపరచనేరరు. రోమా 8:6-8

ఈ లోకములో మంచి ఉన్నతమైన స్థితిలో ఉండాలి, సమాజములో ఉన్నతముగా ఎంచబడాలి అని కోరుకోవడము మంచిదే కానీ ప్రభువును సంతోషపెట్టడము అనేది ప్రధానమైనదిగా లేకపోతే అవన్నీ వ్యర్థమే.

అయితే దేవుని ఆత్మ కలిగినవారికి ఆయన చిత్తమే ప్రధానము.

దేవుని ఆత్మ మీలో నివసించియున్నయెడల మీరు ఆత్మస్వభావము గలవారే గాని శరీర స్వభావము గలవారు కారు. ఎవడైనను క్రీస్తు ఆత్మ లేనివాడైతే వాడాయనవాడు కాడు – రోమా 8:9.

మన అంతరంగపురుషుడు అనగా మన ఆత్మను బలపరచకపోతే, శరీరము బలముగా మారి, ఆత్మానుసారముగా మనము జీవించలేము. పరిశుద్ధాత్మదేవుడు బయలుపరిచే విషయములు మనము ఆలోచించగలిగే విధానములో ఉండవు. అయితే దేవుని పరిశుద్ధాత్మ కార్యము జరిగించబడాలి అంటే ఆ పరిశుద్ధాత్మకు నీవు అవకాశము ఇవ్వాలి. ఒక్కోసారి, ఆయన నడిపించే విధానములో అనూహ్యమైన సంఘటనలు జరగవచ్చు. అయితే మన దృష్టి దేవుని మీదే, ఆయన చిత్తము మీదే ఉండాలి. అప్పుడు ఆయన మనము ఊహించని రీతిలో మనలను నడిపిస్తాడు.

మనలను అనవసరమైన విషయములలో ముంచివేసి చిక్కులపెట్టే విధానములో అపవాది ప్రయత్నిస్తాడు. అయితే పైనున్న వాటిని అనగా దేవుని చిత్తమును వెతికే వారిగా ఉన్నట్టయితే ఆ చిక్కులో పడకుండా మనలను మనము కాపాడుకోగలుగుతాము.

మీరు ఈ లోక మర్యాదను అనుసరింపక, ఉత్తమమును, అనుకూలమును, సంపూర్ణమునై యున్న దేవుని చిత్తమేదో పరీక్షించి తెలిసికొనునట్లు మీ మనస్సు మారి నూతనమగుటవలన రూపాంతరము పొందుడి – రోమా 12:2.

ఈ లోకములో అనేకమైన మర్యాదలు, వ్యవహారములు ఉన్నాయి. అయితే వాటి ప్రకారము కాకుండా, దేవుని చిత్తప్రకారము ఏది మచిది? ఏది ఉత్తమమైనది అని తెలుసుకుని ఆ ప్రకారము చెయ్యాలి! మన శరీరములను సజీవ యాగముగా సమర్పించుకోవాలి. బలిగా అర్పించుట అనేదానిని గమనించినపుడు, ఒకసారి అర్పించినతరువాత దానిలో ఇక ఏ మాత్రము జీవము ఉండదు. అలాగే మనము సజీవ యాగముగా మనము అర్పించినప్పుడు, మన జీవితములో ఇంతకు ముందు ఉన్న లోకానుసారమైన సంగతులు ఇక జీవించకూడదు.