13-Nov-2022 – ఆదివారము ఆరాధన – మీ వెలుగు ప్రకాశింపనీయుడి

Main Message | మెయిన్ మెసేజ్

ఈ సంవత్సరం ముగించబడే సంవత్సరము. గత సంవత్సరము ఏదైతే కొనసాగించబడి నీకు నష్టమో కష్టమో కలిగిందో, ఆ విషయములో దేవుని వాక్యమును బట్టి ఎవరైతే మార్చుకున్నారో, వారి జీవితములో ఆ నష్టము, కష్టము కలిగించిన విషయము ఈ సంవత్సరము ముగించబడవలసినదే! అటువంటివారి జీవితములో అడుగుపెట్టు ప్రతీ చోట నిన్ను ఆశీర్వదించువాడై ఉన్నాడు. మన దేవుడు నీతో వచ్చువాడు, నీ ముందర నడుచువాడు.

ఈరోజు “మీ వెలుగును ప్రకాశింపనియ్యుడి” అనే విషయము గురించి నేర్చుకుందాము. మనము ఎల్లప్పుడు సిద్ధపడి, ఆయన చిత్తమును కొనసాగించేవారుగా ఉండాలి. యేసు ప్రభువు లోకమునకు వెలుగు అయి ఉన్నారు, అలాగే మనము కూడా యేసు క్రీస్తును అంగీకరించిన దానిని బట్టి లోకమునకు వెలుగు అయి ఉన్నాము.

మీరు లోకమునకు వెలుగైయున్నారు – మత్తయి 5:14

ఎవడును దీపము వెలిగించి, చాటుచోటునైనను కుంచముక్రిందనైనను పెట్టడు గాని, లోపలికి వచ్చువారికి వెలుగు కనబడుటకు దీపస్తంభముమీదనే పెట్టును – లూకా 11:33.

పాత రోజులలో లాంతరు దీపాలు ఉండేవి. వాటిని వెలిగించి ఎత్తైన ప్రదేశములో పెట్టేవారు. అప్పుడే వాటి వెలుగు ఉపయోగపడుతుంది. మనలను దేవుడే వెలుగుగా చేసాడు. వెలుగుగా చెయ్యబడిన మనము ఎక్కడ ఉంటున్నాము? మంచము క్రిందనో, కుంచము క్రిందనో ఉంటున్నామా లేక దీప స్తంభముపై ఉంటున్నామా? మనము ప్రభువు ఏర్పాటుచేసిన ఆ ఉన్నత స్థానములో ఉన్నప్పుడే మన వెలుగు ప్రకాశిస్తుంది. ఆ వెలుగును బట్టి అనేకులు రక్షించబడి వెలిగించబడతారు. ఇదే మన దేవుని ఉద్దేశ్యము. ఈ సత్యము మనము గ్రహించాలి అప్పుడే సిద్ధపడగలము.

మనలో ధైర్యము గాని, జ్ఞానము కానీ ఉండదు. నేను చెప్తే ఎవరు వింటారు, ఎవరు మారతారు అని అనుకుంటాము. అయితే మనకు మనముగా చేసేది ఏమీ ఉండదు. దీపములో నూనె ఉండి, ఒత్తి ఆ నూనెలో ఉంటేనే వెలుగుతుంది. మనము దీపము మాత్రమే అయితే ఆ దీపమును ఉపయోగించేది దేవుడు. దీపములో నూనె తక్కువైనప్పుడు, ఒత్తి సరిగా లేనప్పుడు దానిని సరిచేయువాడు కూడా ఆయనే. నీ పని కేవలము “ప్రకాశించటమే”. అందుకే దేవుడు నీపై ఉన్న ఉద్దేశ్యమును గ్రహించాలి. అప్పుడే నీవు సిద్ధపడగలవు.

మనుష్యులు మీ సత్క్రియలను చూచి పరలోకమందున్న మీ తండ్రిని మహిమపరచునట్లు వారియెదుట మీ వెలుగు ప్రకాశింప నియ్యుడి – మత్తయి 5:16.

గదిలోనో, రహస్యముగానో కాదు కానీ, మనుష్యుల ఎదుట నీవు ప్రకాశించబడటానికి దేవుడు నిన్ను వెలుగుగా చేసాడు. సత్క్రియ అనగా దేవుని మహిమపరిచే ప్రతీదీ సత్క్రియయే! మనుష్యుని దృష్టిలో కాదు కానీ దేవుని దృష్టిలో సత్క్రియ.

నీ వాక్యము నా పాదములకు దీపమును నా త్రోవకు వెలుగునై యున్నది – కీర్తన 119:105.

దేవుని వాక్యమును బట్టి మనము నడిచినప్పుడు మన జీవితమంతా వెలుగుమయముగా ఉంటుంది. అప్పుడు మనలను చూచేవారు మీ ప్రకాశమును గమనించేవారుగా ఉంటారు. దానిని బట్టి వారు క్రీస్తును గుర్తించగలుగుతారు. ఎందుకంటే నీవు వెలుగుగా నడిచిన వాక్యము మన యేసు ప్రభువే అయి ఉన్నాడు. నీవు ఆ వాక్యము ప్రకారముగా నడిచినప్పుడు నీ జీవితము ద్వారా యేసు ప్రభువునే చూపించేవాడిగా ఉంటావు. దాని అర్థము నీవు చేసిన దానిని గురించి డంబములు పలకమని కాదు గానీ, నీ నడవడికను బట్టి నిన్ను చూసేవారు చెప్పగలగాలి, ఈ వ్యక్తిలో వాక్యము ఉంది అని చెప్పగలుగుతారు. దానిని బట్టి దేవుని నామము మహిమపరచబడుతుంది.

ఇలా నిన్ను బట్టి నీ తండ్రి మహిమపరచబడ్డాడు? ఒకసారో రెండు సార్లో కాదు కానీ, మన జీవితము చివరివరకు ఇలానే మనము ఉండాలి. మనము చివరి దినాలలో ఉన్నాము. మన ప్రభువు రాకడ సమీపముగా ఉంది. ఇన్ని రోజులు ఎలా ఉన్నాకూడా, ఈ రోజు దేవుడు నీతో మాట్లాడిన మాటను బట్టి సిద్ధపడు. నిన్ను వెలుగుగా చేసింది, నీ తండ్రి మహిమ పరచబడటానికి.

యెహోవానగు నేనే నీతివిషయములలో నిన్ను పిలిచి నీ చేయి పట్టుకొనియున్నాను నిన్ను కాపాడి ప్రజలకొరకు నిబంధనగాను అన్య జనులకు వెలుగుగాను నిన్ను నియమించి యున్నాను – యెషయా 42:7

వెలుగుగా చేయబడిన మనము నియమించబడినవారమే కదా! వెలుగుగా చేయబడిన నీవు అన్యజనులకొరకు నిన్ను నియమించాడు. అనగా దేవుని ఎరగనటువంటి వారికొరకు నియమించాడు. “నీతి విషయములలో” నిన్ను పిలిచాడు అనగా “దేవుని నీతిని” కనబరచడానికై నిన్ను పిలిచాడు.

వెలుగు ఫలము సమస్తవిధములైన మంచితనము, నీతి, సత్యమను వాటిలో కనబడుచున్నది – ఎఫెసీ 5:9

అన్యజనుల ఎదుట దేవుని యొక్క నీతి, సమస్తవిధమైన మంచితనము మరియు దేవుని సత్యము కనపరచాలి. సత్యమనగా యేసుక్రీస్తే. యేసుక్రీస్తు లేకుండా ఏమీ లేదు. కలిగి ఉన్నదేదీ ఆయన లేకుండా కలుగలేదు, మరియు సమస్తము ఆయన కొరకై అయి ఉన్నవి. ఈ సత్యము గ్రహించనంతవరకు అనేకులను పోగొట్టుకొనే వారిగా ఉంటున్నాము. దేవుని సత్యమును ప్రకటించడానికి పాస్టర్ అవ్వవలసిన అవసరము లేదు. ఇది క్రైస్తవ విశ్వాసి అయిన ప్రతివాడు కూడా దేవుని వెలుగును ప్రకాశించవల్సినవాడుగా ఉన్నాడు.

ఏలయనగా నీవు భూదిగంతములవరకు రక్షణార్థముగా ఉండునట్లు నిన్ను అన్యజనులకు వెలుగుగా ఉంచియున్నాను అని ప్రభువు మాకాజ్ఞాపించెననిరి – అపొస్తలులకార్యములు 13:47.

నాయందు విశ్వాసముంచు ప్రతివాడు చీకటిలో నిలిచి యుండకుండునట్లు నేను ఈ లోకమునకు వెలుగుగా వచ్చియున్నాను. – యొహాను 12: 46.

అన్యజనులు ఎక్కడ ఉన్నట్టు? చీకటిలో ఉన్నట్టేకదా! అయితే వారు చీకటిలో ఉండకుండునట్టు వారికి విశ్వాసాన్ని మనము ప్రకటించి మనయందు ఆ విశ్వాసాన్ని కనపరచినట్టయితే, వారు కలిగిన విశ్వాసాన్ని బట్టి వారు కూడా వెలిగించబడతారు. ఇది దేవుని ఉద్దేశ్యము అయి ఉన్నది.

దావీదును చూస్తే “దేవా అన్యజనులు వెలిగించబడునట్టు నీ ముఖకాంతిని నామీద ప్రకాశింపనియ్యుము” అని ప్రార్థించినాడు. అన్యజనులకు నిబంధనగా నిన్ను ఏర్పాటుచేసుకున్నాడు. నిబంధన అనగా ఇరువురి మధ్య ఒప్పందము. అన్యజనుల రక్షణ కొరకు నీవు నిబంధనగా అనగా ఒప్పందము చేయబడి ఉన్నావు.

దేవుడు నీలో నాలో మహిమ పరచబడాలి, అలాగే నీద్వారా నా ద్వారా అన్యజనులకు రక్షించాలి అనే ఉద్దేశ్యము కలిగిఉన్నాడు.

ఒబెదోదేము ఇంటిలో కొన్ని దినాలు మందసము ఉన్నందుకు, తన కుటుంబము, సొత్తు, తన ఇంటివారు అందరూ ఆశీర్వదించబడేవారుగా ఉన్నారు. పనివారు జీతమునకు పాత్రులు అనే సత్యమును కూడా జ్ఞాపకము చేసుకో. ఇలా దేవుని చిత్తము నెరవేరునట్టు నీవు సిద్ధపడునట్టుగా దేవుడు తోడుగా ఉండును గాక!