30-07-2023 – ఆదివారం మొదటి ఆరాధన – నిన్ను నీవు ప్రత్యేకపరచుకొనుము

వారము కొరకైన వాక్యము

ఎప్పుడైతే నీ మనసును ఆయనపై లగ్నము చేస్తావో అప్పుడు ఖచ్చితముగా ఆత్మపూర్ణుడుగా మార్చబడతావు! ఆమేన్! వాక్యము ద్వారా ప్రభువు ఏమి తెలియచేస్తున్నాడో, ఆ ప్రకారము మన జీవితము ఖచ్చితముగా అలాగే ఉండాలి అని తీర్మానము కలిగి జీవించడమే అంతే! ఈరోజు “నిన్ను నీవు ప్రత్యేకపరుచుకో” అని ప్రభువు చెప్పుచున్నాడు.

యెహోవా–నీవు లేచి నీ దేశమునుండియు నీ బంధువుల యొద్దనుండియు నీ తండ్రి యింటినుండియు బయలుదేరి నేను నీకు చూపించు దేశమునకు వెళ్లుము.౹ నిన్ను గొప్ప జనముగా చేసి నిన్ను ఆశీర్వదించి నీ నామమును గొప్ప చేయుదును, నీవు ఆశీర్వాదముగా నుందువు.౹ -ఆదికాండము 12:1-2

అబ్రహామును కూడా ప్రత్యేకపరచుకొమ్మని ప్రభువు చెప్పాడు. నిన్ను నీవు ప్రత్యేకముగా సిద్ధపరచుకొమ్మని అంటున్నాడు. ఆదివారపు వాక్యము మన ఆత్మకు కలిగిన కల్మషమునుండి పరిశుద్ధపరచే వాక్యము!

అప్పటి వరకు జాలరిగా ఉన్న పేతురును నన్ను వెంబడించు అని చెప్పుచున్నాడు. అబ్రహామును, పేతురును, జబదయి కుమారులను పిలుచుకున్న దేవుడు నిన్ను నన్ను పిలుచుకున్నాడు. ప్రత్యేకపరచుకోమంటున్నాడు అంటే ఆయనకు మన మీద ఒక ఉద్దేశ్యము ఉంది. ఎలా ప్రత్యేక పరచుకోవాలి? లేఖనములు ఏమి చెప్పుచున్నాయి అని చూస్తే, లోకమునుండి నిన్ను నీవు ప్రత్యేక పరచుకో!

మీరు లోక సంబంధులైనయెడల లోకము తన వారిని స్నేహించును; అయితే మీరు లోకసంబంధులు కారు; నేను మిమ్మును లోకములోనుండి ఏర్పరచుకొంటిని; అందుచేతనే లోకము మిమ్మును ద్వేషించుచున్నది.౹ -యోహాను 15:19

నేను లోకసంబంధిని కాదు! నేను లోకమున్నట్టుగా ఉండను నేను ప్రత్యేకముగా ఉంటాను. నేను సజీవుడైన యేసయ్యను పోలి ఉంటాను అని తీర్మానము చేసుకొంటావా! యదార్థముగా ఆయనతో చెప్పు!

యవ్వనస్థులకు స్నేహితులు ఎక్కువగా ఉంటారు. ఒకవేళ వారు ప్రభువుకొరకు సిద్ధపడినప్పటికీ, వారి స్నేహితులు వారిని లోకసంబంధమైన కార్యములవైపు ప్రేరేపిస్తారు.

మోసపోకుడి. దుష్టసాంగత్యము మంచి నడవడిని చెరుపును.౹ -1 కొరింథీయులకు 15:33
దుష్టుల ఆలోచనచొప్పున నడువక పాపుల మార్గమున నిలువక అపహాసకులు కూర్చుండు చోటను కూర్చుండక యెహోవా ధర్మశాస్త్రమునందు ఆనందించుచు దివారాత్రము దానిని ధ్యానించువాడు ధన్యుడు. -కీర్తనలు 1:1-2

గతవారము ఎక్కడైనా ఇక్కడ చెప్పబడిన మాటలు మన జీవితములో ఉంటే ఇప్పుడే ప్రభువుతో ఒప్పుకుందాము విడిచిపెడదాము! ఒకవేళ ప్రభువు ఈరోజు సూటిగా అడిగితే ఏంటి మన సమాధానము!

ఈరోజు లోకములో సరదాగా ఉండటము అంటే డ్యాన్సులు, మందులు విందులు, అపహాస్య పూరితమైన కామెడీ షోలు కలిగి ఉండటము. అయితే మనము దేవునిచేత పిలువబడినవారము గనుక మనము వీటన్నిటినుండి ప్రత్యేకపరచుకోవాలి.

వ్యభిచారిణులారా, యీ లోకస్నేహము దేవునితో వైరమని మీరెరుగరా? కాబట్టి యెవడు ఈ లోకముతో స్నేహము చేయగోరునో వాడు దేవునికి శత్రువగును.౹ -యాకోబు 4:4

లోకముతో స్నేహముచేయాలి అనిగానీ, లోకములో ఉన్నట్టుగా ఉండటానికి నీవు ప్రేరేపించబడితే, దేవునితో వైరము పెట్టుకుంటున్నావు అని నీకు తెలుస్తుందా! దేవుని యందలి భయము లేకపోతే మన జీవితము పోగొట్టుకుంటాము.

దేవుని సన్నిధిలో గడపడానికి ఆశకలిగి తహతహలాడే హృదయము కలిగి ఉండుట అనేది ప్రత్యేకపరచుకున్నవాని లక్షణము! దావీదు ఏడుమారులు ప్రార్థించేవాడుగా ఉన్నప్పటికీ ఆయన సన్నిధిలో ఎప్పుడు కనబడతానో అనే ఆశ కలిగి ఉండేవాడు.

అపవాది పొంచి ఉన్నది అనే సంగతి మరచిపోకు. అపవాది దాడి చేసే అవకాశము మనమే ఇస్తాము. ఎప్పుడైతే లోకము వైపు ఆశగా చూస్తామో అప్పుడు అపవాదికి అవకాశము ఇచ్చినట్టే. దేవుని భయము లేక దేవునిని విసర్జిస్తావో అప్పుడు దేవుడితో వైరమే! ఒక్కోసారి మనము ఆత్మీయముగా బలముగా ఆరంభిస్తాము కానీ చివరికి శరీరరీతిగా ముగించబడేవారముగా మారిపోతాము. అలా ఉండకూడదు!

నామట్టుకైతే బ్రదుకుట క్రీస్తే, చావైతే లాభము.౹ అయినను శరీరముతో నేను జీవించుటయే నాకున్న పనికి ఫలసాధనమైనయెడల నేనేమి కోరుకొందునో నాకు తోచలేదు. అయినను నేను శరీరమునందు నిలిచి యుండుట మిమ్మునుబట్టి మరి అవసరమైయున్నది.౹ -ఫిలిప్పీయులకు 1:21-22,24

నేను చనిపోతే లాభమే కానీ నేను జీవించుట మరి అవసరము. మన జీవితము ద్వారా దేవుని ఘనత, మహిమ ప్రకటించబడాలి. గనుక నేను జీవించుట మరి అవసరము! అపవాది మనలను ఖచ్చితముగా ఉచ్చులో బిగించడానికి ప్రయత్నిస్తాడు. అందుకే మనము మరి జాగ్రత్త గలిగి ఉండాలి.

మీరు లోకమునకు ఉప్పయి యున్నారు-మత్తయి 5:13

ప్రభువు నీ గురించి చెప్పుచున్న మాటలు ఇవి. ఉదాహరణకు మనము వంట చేసేటప్పుడు రుచి కొరకు ఉప్పు వెయ్యవలసినదే. ఆ వంట లోకమైతే, మీరు ఉప్పు అయి ఉన్నారు. ఈ లోకమునకు ఉప్పుగా మనము జతచేయబడితే ఆ లోకము రుచికరముగా, అనగా సంతోషముగా మార్చబడుతుంది.

లోకములో ఉన్నవారు రక్షణ లేనివారుగాను, అపవాది క్రియలకు లోబడి జీవిస్తారు. మనము ఆ ప్రదేశములో ప్రత్యేకముగా మనము కనపరచుకున్నప్పుడు ఆ ప్రదేశము దేవునికొరకైన రుచిని నింపేవారిగా ఉంటాము. ఉప్పు ఎలాగైతే కరిగితేనేగానీ కూరకు రుచి రాదో, అలాగే మనము మనతో ఉన్న లోకములో మనము ప్రత్యేకమైన వారం అని గ్రహిచులాగున మనము నిలబడితేనే గానీ వారి జీవితములో వారు దేవుని రుచి ఎరిగేవారుగా మార్చబడలేరు.

దేవుని సన్నిధిలో ఎంత సమయము నీవు గడిపితే అంతగా నీవు ఆశీర్వదించబడతావు. యెహోవా ధర్మశాస్త్రమునందు ఆనందించుచు దివారాత్రము దానిని ధ్యానించువాడు ధన్యుడు. నీ నడక, పడక, ఆలోచన దేవునికి అంగీకారముగా ఉండులాగున నిన్ను నీవే సిద్ధపరచుకోవాలి, ప్రత్యేకపరచుకోవాలి. అనగా ఏ మాటలైతే నీవు ధ్యానము చేస్తున్నావో ఆ మాటలు, మాటల ప్రభావము మన జీవితములో ప్రతీ సమయములో కనపరచబడాలి. మెలకువ కలిగి ఉన్నప్పుడు మనము చదివిన వాక్యము, మెలకువలేని సమయములో నీవు జారిపోయే సమయములో వెంటనే నిన్ను తట్టిలేపే విధానములో నిన్ను నీవు సిద్ధపరచుకోవాలి.

మీరు లోకమునకు వెలుగైయున్నారు; కొండమీదనుండు పట్టణము మరుగై యుండనేరదు. -మత్తయి 5:14

మన ఆధిక్యత ఎంత గొప్పది? మనము ఉప్పుగానూ, వెలుగుగాను ఉండులాగున ప్రభువు మనలను ఎన్నుకొన్నాడు. ఎక్కడ మనము వెలుగై ఉన్నాము? అంటే లోకమునకు వెలుగై ఉన్నాము, అనగా చీకటిలో ఉన్నవారిని వెలుగులోనికి నడిపించులాగున నిన్ను నన్ను ప్రభువు వెలుగుగా ఏర్పరచుకున్నాడు.

మనము ప్రత్యేకపరచబడినవారము. దేనినైతే మనము విడిచిపెట్టామో మరలా వాటివైపుకు వెళ్ళకూడదు. సాక్ష్యము అస్సలు పోగొట్టుకోకూడదు!

ఒకసారి వెలిగింపబడి, పరలోకసంబంధమైన వరమును రుచిచూచి, పరిశుద్ధాత్మలో పాలివారై౹ దేవుని దివ్యవాక్యమును రాబోవు యుగ సంబంధమైన శక్తుల ప్రభావమును అనుభవించిన తరువాత తప్పిపోయినవారు, తమ విషయములో దేవుని కుమారుని మరల సిలువవేయుచు, బాహాటముగా ఆయనను అవమానపరచుచున్నారు గనుక మారుమనస్సు పొందునట్లు అట్టి వారిని మరల నూతనపరచుట అసాధ్యము.౹ -హెబ్రీయులకు 6:4-5

దీనికంటే చచ్చిపోవటము మేలు అనే రోషము మనము కలిగి ఉండాలి. యేసయ్యను రుచిచూసి, పరిశుద్ధాత్మలో పాలివాడవై, తప్పిపోయినట్టయితే, యేసయ్యను మరలా బాహాటముగా సిలువ వేసినవారుగా అవమానపరచేవారిగా అయిపోతాము. దయచేసి అలా ఉండకూడదు. అందుకే అపవాదికి ఏ మాత్రము అవకాశము ఇవ్వకూడదు! నీ దేవుడు రక్షకుడుగా నీ వెంటే ఉన్నాడు. నీ దేవుడు సజీవుడు. నీవొక్కడివే జయించలేవు కాబట్టే, నీకు తోడుగా ఆయన ఉన్నాడు. అందుకే ఆయనకొరకు నీవు ప్రత్యేకపరచుకుంటే ఆయన ఉద్దేశ్యము నెరవేరుతుంది.

దేవుని ప్రేమపూర్వకమైన గద్దింపు దయచేసి తృణీకరించవద్దు. ప్రేమించు కుమారినినే తండ్రి గద్దిస్తాడు.