29-03-2024 – శుభ శుక్రవారం ఆరాధన – నీ విమోచన దినము

శుభశుక్రవారపు వర్తమానము

ఆజ్ఞాతిక్రమమే పాపము, అయితే ఈరోజునుండి మనము ప్రభువు సిలువకు సాక్ష్యము. నీవు నిలబడగలిగితే, నీ చేయి పట్టి నడిపించగలిగినవాడుగా ఆయన ఉన్నాడు.

సిలువ యొక్క ప్రాముఖ్యత మనకు తెలిసినట్టయితే, ఆ సిలువకు సాక్షిగా మనము జీవించగలుగుతాము.

దేవుడు నిశ్చయించిన సంకల్పమును ఆయన భవిష్యద్ జ్ఞానమును అనుసరించి అప్పగింపబడిన యీయనను మీరు దుష్టులచేత సిలువ వేయించి చంపితిరి.౹ -అపొస్తలుల కార్యములు 2:23

ఆయన నిశ్చయించిన సంకల్పము “మనమే” అని తెలుసుకున్నాము.

ఏ భేదమును లేదు; అందరును పాపముచేసి దేవుడు అను గ్రహించు మహిమను పొందలేక పోవుచున్నారు.౹ -రోమా 3:23

దేవుని సంకల్పము మన జీవితమే, అయితే ఆ జీవితము ఎలా ఉండాలి? రోమా 3:23 ప్రకారము, పాపమును బట్టి దేవుడు అనుగ్రహించు మహిమను పొందలేకపోతున్నాము. మరొక వాక్యము కూడా చూసి కొన్ని విషయాలు తెలుసుకుందాము.

మరియు అపరాధముల వలనను, శరీరమందు సున్నతిపొందక యుండుటవలనను, మీరు మృతులై యుండగా, దేవుడు వ్రాతరూపకమైన ఆజ్ఞలవలన మనమీద ఋణముగాను మనకు విరోధముగాను నుండిన పత్రమును మేకులతో సిలువకు కొట్టి, దానిమీది చేవ్రాతను తుడిచివేసి, మనకు అడ్డములేకుండ దానిని ఎత్తి వేసి మన అపరాధములనన్నిటిని క్షమించి, ఆయనతోకూడ మిమ్మును జీవింపచేసెను; ఆయన ప్రధానులను అధికారులను నిరాయుధులనుగాచేసి, సిలువచేత జయోత్సవముతో వారిని పెట్టి తెచ్చి బాహాటముగా వేడుకకు కనుపరచెను. -కొలొస్సయులకు 2:13

మనము దేవునికి విరోధముగా మనము చేసిన ప్రతి పాపపు చిట్టా సిద్ధపరచబడి ఉంది. ఈ చిట్టాను బట్టి మనము ఆ పాపపు దాసత్వములోనికి, బానిసత్వములోనికి వెళ్ళిపోయాము. బానిసత్వము అంటే, యజమాని ఏమి చెప్తే అది చెయ్యవలసినదే.

అలాగే మనలను ప్రేరేపించే అపవాది మనకు యజమానిగా ఉండటానికి మనము చేసిన పాపముల యొక్క చిట్టా ఒక సాక్ష్యముగా ఉంది. అందుకే మనలను ప్రేరేపించగలుతున్నాడు. అయితే దాని నుండి మనము విడిపించబడాలి అంటే, ఆ పాపములకు వెల చెల్లించాలి.

మన పాపముల చిట్టా ప్రకారము, మనము మరణపాత్రులము అయ్యాము. మనము జీవించే అవకాశము లేదు. ముగించబడవలసిన స్థితిలో మనము ఉన్నప్పుడు, ఆ పాపపు చిట్టాను మేకులతో సిలువకు కొట్టెను. ఎందుకంటే, రక్తము చిందించబడితేనే గానీ పాప క్షమాపణ లేదు. ప్రభువు యొక్క రక్తము ఆ సిలువలోనే కార్చబడింది గనుక, ఆ చిట్టా మేకులతో కొట్టబడింది.

“మనకు అడ్డములేకుండ దానిని ఎత్తి వేసి మన అపరాధములనన్నిటిని క్షమించి”. మనము చేసిన పాపము దేవుడు మనకు అనుగ్రహించు మహిమకు అడ్డముగా నిలబడుతుంది. దీని ద్వారా అసలు ఏమి కోల్పోతున్నాము అని మనము తెలుసుకోవాలి.

దేవుడు అనుగ్రహించు మహిమ దేని కొరకు? అసలు మహిమ ఎప్పుడు ఉంది? పాపము చెయ్యనంతవరకు దేవుని మహిమ మనతో ఉంది. ఆదాము పాపము చెయ్యనంతవరకు, దేవుని మహిమ అతనితో ఉంది. ఆదాము ఏమి పలికితే అది జరిగింది. ఇది ఆదాముకు దేవుడు అనుగ్రహించు మహిమను బట్టి జరిగింది.

అంటే, దేవుని మాట ప్రకారము మనము చేసినప్పుడు, దేవుని మహిమ మనకు అనుగ్రహించబడుతుంది. మన జీవితము కొనసాగించబడుతుండగా అది దేవుని మహిమ చేతనే అది కొనసాగించబడాలి.

మోషే కొండమీద దేవునితో సహవాసము కలిగి ఉన్నప్పుడు, దేవుని మహిమతో నిండిపోయినవాడుగా ఉన్నాడు. అప్పుడు మోషే క్రిందకు వచ్చిన తరువాత ఎవ్వరూ అతని ముఖమును చూడలేకపోయారు.

దేవుని మహిమ మనకు అనుగ్రహించబడితే, మనకు ఎదురుగా వ్యతిరేకముగా నిలబడిన ఏది నిలువదు.

మనము దేవుని మాటను పాటించకపోతే, పాపము చేసినట్టు. అదే దేవుని మాటను బట్టి మనము చేయగలిగితే, దేవుని మహిమ పొందుకుంటాము, ఆ మాట ప్రకారము జరగడానికి కార్యము జరుగుతుంది

నేను క్రీస్తుతోకూడ సిలువ వేయబడియున్నాను; ఇకను జీవించువాడను నేను కాను, క్రీస్తే నాయందు జీవించుచున్నాడు. నే నిప్పుడు శరీరమందు జీవించుచున్న జీవితము నన్ను ప్రేమించి, నా కొరకు తన్నుతాను అప్పగించుకొనిన దేవుని కుమారుని యందలి విశ్వాసమువలన జీవించుచున్నాను – గలతీయులకు 2:20

“నేను క్రీస్తుతోకూడ సిలువ వేయబడియున్నాను” అని చెప్పాలి అంటే మనము ఎలా ఉండాలి? “ఇకను జీవించువాడను నేను కాను, క్రీస్తే నాయందు జీవించుచున్నాడు” అన్నట్టుగా మన జీవితము ఉండాలి. మన యొక్క అహము మనలో ఇంకా మిగిలి ఉంటే, క్రీస్తువలే జీవించలేము.

పాపము విషయములో నేను సిలువ వేయబడి ఉన్నాను, నేను పాపము విషయములో చనిపోయాను, ఇంక జీవించేది నేను కాదు గానీ, క్రీస్తే నాలో జీవిస్తున్నాడు. అంటే, దేవుని మాట ప్రకారము నేను చేయగలిగినట్టుగా నేను బలపరచబడతాను.

క్రీస్తే నాయందు జీవిస్తున్నాడు, అంటే దేవుని వాక్యమే క్రీస్తు. దేవుని యొక్క వాక్యమే నా జీవితము అనే తీర్మానము మనము కలిగి ఉండాలి. ఇంతవరకు ఏమైనా గానీ, ఈరోజు గనుక నీ దేవుని మాటలు విని, ఇప్పటినుండి అయినా సరే దేవుని మాటలే నా జీవితము అని తీర్మానము తీసుకుంటే, దేవుని కే మహిమ కలుగును గాక!

“మీరు కారా నా పత్రికలు” అని పౌలు చెప్పుచున్నాడు. ఆ పత్రికలు క్రీస్తుని మాత్రమే ప్రకటిస్తున్నాయి. అనగా మనము పత్రికలైతే, మనము, మన జీవితము క్రీస్తుని ప్రకటిస్తుంది.

అందుకే మనం పరీక్షించుకుందాము ఎక్కడ మనము దేవుని వాక్యము ప్రకారము ఉండట్లేదో పరీక్షించుకుందాము. మన నడక, పడక, ఆలోచన, చూపు, మాట, తిండి అన్ని విషయాలలో సరిచేసుకుందాము.

ఆ కలువరి సిలువ యొక్క త్యాగము మనము కనుపరచాలి అంటే, మనమే దేవుని వాక్యమై ఉండాలి. అలా మనము ఉన్నప్పుడు ఏమి జరుగుతుంది అంటే –

ఆయన మనలను అంధకారసంబంధమైన అధికారములోనుండి విడుదలచేసి, తాను ప్రేమించిన తన కుమారునియొక్క రాజ్యనివాసులనుగా చేసెను.౹ -కొలొస్సయులకు 1:13

నీ జీవితము వాక్యము అయి ఉన్నట్టయితే, నీవు దేవుని మహిమచేత నింపబడతావు. అలాగే, వాక్యము వెలుగై ఉన్నది, మన జీవితము వాక్యమైతే, మన జీవితము వెలుగుగా మారుగుతుంది. వెలుగు ఉన్నచోట చీకటి ఉండదు.

మరొక విషయము చూస్తే, మనము ప్రభువును అంగీకరించనపుడు తప్పు చేయడానికి ప్రేరేపించాడు. ప్రభువును అంగీకరించిన తరువాత కూడా ప్రేరేపించబడుతున్నాము కదా! అయితే ఇప్పుడు, ఆ సిలువ మనము పాపములోనికి వెళ్ళకుండా అడ్డుపడుతుంది.

ఈ మాట నీ జీవితములో నెరవేర్చబడాలి అంటే, ఖచ్చితముగా నీవు దేవుని వాక్యము ప్రకారమే మనము జీవించాలి. “అంధకారసంబంధమైన అధికారము” అంటే, అంధకారమునకు ఒక అధికారము ఉంది. ఆ అధికారమునకు లోబడవలసిన స్థితిలో ఉన్నవారికి, వేరే ఆప్షన్ లేదు. అయితే దేవువి వాక్యము ప్రకారము మనము జీవిస్తే, దాని అధికారము కూడా మనపై పని చేయదు.

అంధకార సంబంధమైనది అంటే, నీ జీవితమును నాశనము చేసేది. నీవు దేవుని వాక్యమై జీవిస్తే, నీ జీవితమును నాశనము చేయ్యడానికి అంధకారమునకు ఉన్న అధికారము సరిపోదు.

మరియు నీవు పేతురువు; ఈ బండమీద నా సంఘమును కట్టుదును, పాతాళలోక ద్వారములు దాని యెదుట నిలువనేరవని నేను నీతో చెప్పుచున్నాను. పరలోకరాజ్యముయొక్క తాళపుచెవులు నీకిచ్చెదను, నీవు భూలోకమందు దేని బంధించుదువో అది పరలోకమందును బంధింపబడును, భూలోకమందు దేని విప్పుదువో అది పరలోకమందును విప్పబడునని అతనితో చెప్పెను. -మత్తయి 16:18-19

బండ అంటే, క్రీస్తు. క్రీస్తు అంటే వాక్యము. ఆ వాక్యము నీ జీవితము అయితే, పాతాళ లోక ద్వారములు, నిన్ను నాశనము చేసే ఏదీ నీ జీవితములో పనిచేయదు.

ఆయనయందు సర్వసంపూర్ణత నివసింపవలెననియు, ఆయన సిలువరక్తముచేత సంధిచేసి, ఆయనద్వారా సమస్తమును, అవి భూలోకమందున్నవైనను పరలోకమందున్నవైనను, వాటినన్నిటిని ఆయనద్వారా తనతో సమాధానపరచుకొనవలెననియు తండ్రి అభీష్టమాయెను.౹ -కొలొస్సయులకు 1:19

మన పౌరస్థితి పరలోకములో ఉంది. మనకు కావలసిన ప్రతీదీ పరలోకమునుడే అనుగ్రహించబడతాయి. అయితే మనము చేసిన పాపము అవి మనము పొందకుండా అడ్డుపడింది.

యేసయ్య కలువరి సిలువలో అర్పించబడినతరువాత, దేవుడు యేసులో సమాధానపరచబడి, ఆగిపోయిన పరలోకమైన ఆశీర్వాదము, భూసంబంధమైన ఆశీర్వాదము క్రీస్తు సిలువను బట్టే మనకు అనుగ్రహించబడుతుంది.

సిలువకు నీవు సాక్షివి అయితే, సిద్ధపరచబడిన ప్రతి ఆశీర్వాదము మనము పొందుకుంటాము.

వారు–రండి మన దేవుడైన యెహోవాయందు భయభక్తులు కలిగియుందము, ఆయనే తొలకరి వర్షమును కడవరి వర్షమును దాని దాని కాలమున కురిపించు వాడు గదా; నిర్ణయింపబడిన కోతకాలపు వారములను ఆయన మనకు రప్పించునని తమ మనస్సులో అనుకొనరు.౹ -యిర్మీయా 5:24

మొదటినుండి చివరి వరకు ఏమి జరగాలో అనే ఒక క్రమము దేవుడు నిర్ణయించి నియమించాడు. ఈ ఆగిపోయిన ఆశీర్వాదపు క్రమమును తిరిగి ప్రారంభించిందే క్రీస్తు సిలువ.

మరలా ప్రభువు ఆరాధిద్దాము

ఆశ్చర్యమైన ప్రేమ – కల్వరిలోని ప్రేమ
మరణము కంటే బలమైన ప్రేమది
నన్ను జయించే నీ ప్రేమ

నా స్థితి జూచిన ప్రేమ
నాపై జాలిని జూపిన ప్రేమ
నాకై పరుగెత్తి శ్రమనోర్చి
రక్తముకార్చి నాకు జీవమిచ్చెన్

నా స్థితి జూచిన ప్రేమ
నాపై జాలిని జూపిన ప్రేమ
నాకై పరుగెత్తి శ్రమనోర్చి
రక్తముకార్చి నన్ను లేవనెత్తెన్

నా స్థితి జూచిన ప్రేమ
నాపై జాలిని జూపిన ప్రేమ
నాకై పరుగెత్తి శ్రమనోర్చి
రక్తముకార్చి ఆశీర్వాదమిచ్చెన్

యేసయ్య ఆ సిలువలో వేలాడుతున్నంతసేపు నీ రిస్టొరేషన్ జరుగుతూ వచ్చింది. ఆగిపోయిన ఆశీర్వాద క్రమము తిరిగి ఆరంభించబడింది.

సిలువలో ఆ సిలువలో ఆ ఘోర కల్వరిలో
తులువల మధ్యలో వేలాడిన యేసయ్యా
వెలియైన యేసయ్య బలియైన యేసయ్య
నిలువెల్ల నలిగితివా నీవెంతో అలసితివా

నేరము చేయని నీవు ఈ ఘోర పాపి కొరకు
భారమైన సిలువ మోయలేక మోసావు
కొరడాలు చెల్లని చీల్చెనే నీ సుందర దేహమునే
తడిపెను నీ తనువునే రుధిరంబు ధారలే

—————–

ఇదిగో దేవా నా హృదయం
ఇదిగో దేవా నా మనసు
ఇదిగో దేవా నా దేహం
ఈ నీ ఆత్మతో నడుపుమా
పరిశుద్ధ ఆత్మతో నడుపుమా

పనికిరాని తీగలున్నవి
ఫలమివ్వ అడ్డుచున్నవి
ఫలియించే ఆశ నాకుంది

ఓ నా తోటమాలి
ఇంకో ఏడాది గడువు కావాలి
ఫలియించే ఆశ నాకుంది