29-01-2023 ఆదివారం మొదటి ఆరాధన – దేవుని బట్టి నిలబడు

ఆరాధన వర్తమానం

మనలను దేవుని సన్నిధిలోని ఉంచిన దేవుని కృపకై స్తోత్రములు. ఈ దినము ఆయనను స్తుతించి మహిమ పరచే దినము. మన ఆత్మీయ జీవితాలు మెరుగుపరచబడాలి, వృద్ధిలోనికి తీసుకురాబడాలి. పాటలు, ఆరాధన అవసరములేదు వాక్యము సమయానికి వెళితే సరిపోతుంది అనుకుంటాము. వాక్యము ఒక విత్తనము అనుకోండి, ఆ విత్తనము ఎలా పెరుగుతుంది? మొదట భూమి దున్నబడాలి, నీరు అందించబడాలి ఆ తరవాత విత్తనము వేస్తారు. అలాగే వాక్యము ఫలించాలి అంటే మొదట నీ హృదయము సిద్ధపరచబడాలి. ఆదివారము ఆయనను ఆరాధించేవారు, మరిముఖ్యముగా ఆన్లైన్ సర్వీస్ లో ఆయనను ఆరాధించేవారు, చర్చ్ కి వెళ్ళినప్పుడు ఎలా ఉంటారో అంతే భక్తి శ్రద్ధలతో ఉండాలి. మనము భయంకరమైన చివరి దినాలలో ఉన్నాము.

దేవుని పాటలు నీ హృదయాన్ని దున్నుతాయి. ఆరాధన నీరు కడుతుంది. అప్పుడు నీవు వినే వాక్యము లోతుగా నాటబడి శత్రువు ఎత్తుకుపోకుండా కాపాడబడుతుంది.

కాబట్టి విశ్వాసమూలమున మనము నీతిమంతులముగా తీర్చబడి, మన ప్రభువైన యేసుక్రీస్తుద్వారా దేవునితో సమాధానము కలిగియుందము. మరియు ఆయనద్వారా మనము విశ్వాసమువలన ఈ కృపయందు ప్రవేశముగల వారమై, అందులో నిలిచియుండి, దేవుని మహిమను గూర్చిన నిరీక్షణనుబట్టి అతిశయ పడుచున్నాము. – రోమా 5:1-2

యేసుక్రీస్తు ప్రభువు మన జీవితాలలో లేకపోతే మన జీవితాలు వ్యర్థము. అందుకే ఎప్పుడు ఆయనను కలిగి ఉండుటకే ప్రయాసపడాలి. కృప యేసు క్రీస్తు ద్వారా మాత్రమే అనుగ్రహించబడుతుంది. యేసుక్రీస్తు ప్రభువుయే శ్రేష్టమైన వాడుగా మనము జీవించాలి.

అయితే దేవుడు మనయెడల తన ప్రేమను వెల్లడిపరచుచున్నాడు; ఎట్లనగా మనమింకను పాపులమై యుండగానే క్రీస్తు మనకొరకు చనిపోయెను. కాబట్టి ఆయన రక్తమువలన ఇప్పుడు నీతిమంతులముగా తీర్చబడి, మరింత నిశ్చయముగా ఆయన ద్వారా ఉగ్రతనుండి రక్షింప బడుదుము – రోమా 5:8-9

దేవుడు తన ప్రేమను నీ యెడల వెల్లడిపరచుచున్నాడు. నీవు ఆ ప్రేమను రుచి చూసినట్టయితే నీవు ఖచ్చితముగా సిద్ధపడతావు. రోమా 5:8 లో మనము చూసిన మాటలు కేవలము మనము మొదట రక్షించబడిన స్థితికొరకైన మాటలుమాత్రమే కాదు. ఈ లోకములో ఏదీ కుడా నిన్ను కాపాడలేదు. కేవలము యేసుక్రీస్తు మాత్రమే నిన్ను కాపాడగలిగిన వాడు. నీవు పాపిగా ఉన్నప్పుడు నిన్ను యేసు రక్తము ద్వారా పాపమునుండి రక్షించిన దేవుడు ఇప్పుడుకూడా నిన్ను ప్రేమించి యేసుక్రీస్తు ద్వారా తన కృప అనుగ్రహించి నిన్ను రక్షిస్తున్నాడు.

యేసయ్యతో నీవు ఉన్నప్పుడు ఎటువంటి ఉగ్రత గుండా నీవు వెళుతున్నప్పటికీ ఆ ఉగ్రతనుండి తప్పించి నిన్ను సంతోషపరుస్తాడు. మనుష్యులకు అసాధ్యమే కానీ నీవు ఆరాధిస్తున్న నీన్ను ప్రేమిస్తున్న నీ దేవునికి సమస్తము సాధ్యమే.

“భయము” అనేది చాలా శక్తికలిగినది. నాశనకరమైన స్థితిలోనికి జారిపోవడానికి ఈ భయము ఒక కారణము. అందుకే దేవుడు కూడా “భయపడకు” అని అనేకసార్లు చెప్పారు. ఆయన నిన్ను ప్రేమించేవాడు గనుక నిన్ను తప్పిస్తాడు, అదే నీ ధన్యత.

యేసయ్య మార్గమై ఉన్నాడు. దేనికి మార్గము? “నా మాట విని నన్ను పంపినవానియందు విశ్వాసముంచువాడు నిత్య జీవము గలవాడు; వాడు తీర్పులోనికి రాక మరణములో నుండి జీవములోనికి దాటియున్నాడని మీతో నిశ్చ యముగా చెప్పుచున్నాను. – యోహాను 5:24”. మనము పాపులగా ఉన్నప్పుడు రక్షణకు మార్గముగా ఉన్నాడు. మన పాపమును బట్టి నరకములోనికి వెళ్ళాలి, అయితే ఆయనను మార్గముగా కలిగి నిత్యజీవము లోనికి వెళ్ళాము. అంటే మరణము లోనుండి జీవములోనికి వెళ్ళగలుగుటకు యేసయ్యే మార్గము. మరణపు స్థితి అనగా నీవు సంతోషముగా ఉండలేని స్థితి అది ఏదైనా సరే, ఆ మరణపు స్థితి నుండి, జీవము లోనికి అనగా నీవు సంతోషించే స్థితిలోనికి రాగలుగుటకు యేసయ్యే మార్గము.

ఏలయనగా శత్రువులమై యుండగా, ఆయన కుమారుని మరణముద్వారా మనము దేవునితో సమాధాన పరచబడిన యెడల సమాధానపరచబడిన వారమై, ఆయన జీవించుటచేత మరి నిశ్చయముగా రక్షింపబడుదుము – రోమా 5:10.

యేసయ్య మరణము ద్వారా నీవు పాపమునుండి తప్పించబడి నరకమునుండి తప్పించబడి దేవునితో సమాధానము కలిగి ఉన్నావు. ఇప్పుడు యేసయ్య జీవించుటచేత నీ జీవితములో నీవు వెళ్ళే పరిస్థితులలో ఆయన క్రియలు కనపరచబడి, నీవు ఖచ్చితముగా తప్పించబడతావు.

స్తుతియాగము అర్పించువాడు నన్ను మహిమ పరచు చున్నాడు నేను వానికి దేవుని రక్షణ కనుపరచునట్లు వాడు మార్గము సిద్ధపరచుకొనెను – కీర్తన 50:23

 

ఆరాధన గీతము

నాప్రతి అవసరము తీర్చువాడవు నీవే యేసయ్యా..
నాప్రతి ఆశ నెరవేర్చువాడవు నీవే యేసయ్యా..
ఆకలితో నే అలమటించినప్పుడు అక్కరనెరిగి ఆదుకున్నావు//2//
వందనం యేసయ్యా నీకే వందనం యేసయ్యా//నాప్రతిఅవసరము//

ఊహించలేని ఆశ్చర్యకార్యములతో ఏ కొదువలేక నను కాచుచుంటివి//2//
కష్టాలెన్నివచ్చినా కరువులెన్నికలిగినా–నీచేతి నీడ ఎప్పుడు నను దాటిపోదు
వందనం యేసయ్యా నీకే వందనం యేసయ్యా//నాప్రతిఅవసర//

తప్పిపోయినా త్రోవమరచిన…నీ కృప నన్ను విడచివెళ్ళదు.. //2//
నీకృప…విడచివెళ్ళదు… //2//ననుఎప్పుడూ… యేసయ్యా..

నా ప్రతి విన్నపం నీ చెంతచేరును యేసయ్యా(యేసయ్యా)
నా ప్రతి ప్రార్థనకు జవాబు నీవే యేసయ్య (యేసయ్యా)//2//
వందనం యేసయ్యా నీకే వందనం యేసయ్యా
ఏమివ్వగలను ఎనలేనిప్రేమకై యేసయ్యా..వందనము

నీ ముందు ఉన్న యేసయ్యతో, మనసారా చెప్తావా? “నాప్రతి అవసరము తీర్చువాడవు నీవే” అని?

నీవు ఏ వేదన కలిగి ఉన్నాసరే, ఏ శోధన కలిగి ఉన్నాసరే, “నా ప్రతి శోధన తీసివేయువాడవు నీవే, నా ప్రతి వేదన తొలగించువాడవు నీవే యేసయ్యా” అని నీ ముందున్న నీ యేసయ్య తో చెప్పు మనఃస్పూర్తిగా

వాగ్దానము నెరవేర్చబడాలి అని నీవు ఆశపడితే, “నా ప్రతీ వాగ్దానము నెరవేర్చువాడవు నీవే యేసయ్యా, నా అవిశ్వాసము తొలగించువాడవు నీవే యేసయ్యా” అని గొంతెత్తి విశ్వాసముతో ప్రకటించు”

నేను నీకు తోడై ఉన్నాను అని నీ దేవుడు చెప్తున్నాడు. నీకు రాజ్యము అనుగ్రహించడానికి నీ తండ్రికి ఇష్టమై ఉన్నది భయపడకు