27-Nov-2022 – ఆదివారము ఆరాధన – రాజమండ్రి

Main Message | మెయిన్ మెసేజ్

చాల సందర్భాలలో మన నోటి మాటలచేత మన ఆశీర్వాదాలను పోగొట్టుకునే వారిగా ఉంటాము. ఇదే మనము తెలుసుకోవలసిన విషయము. చాలా మంది వట్టిగనే వారి జీవితాలను పాడుచేసుకుంటున్నారు.

మూర్ఖపు మాటలు నోటికి రానియ్యకుము పెదవులనుండి కుటిలమైన మాటలు రానియ్యకుము – సామెతలు 4:24

ఇది ఎవరు చెయ్యాలి అంటే మనమే. మూర్కపు మాటలు రాకుండా మనమే జాగ్రత్త పడాలి.

నోటిని నాలుకను భద్రము చేసికొనువాడు శ్రమలనుండి తన ప్రాణమును కాపాడుకొనును. 21:23

అందుకే మనము చాలా జాగ్రత్తగా ఉండాలి. దేవుని వాగ్దానమునకు వ్యతిరేకముగా మీరు మాట్లాడకండి. మనము ఆయనను మన నోటి మాట ద్వారానే స్వీకరించినాము కదా! యేసు ప్రభువు అని, మృతులలోనుండి లేచెనని మన నోటితో ఒప్పుకొని రక్షణ పొందాము కదా! మరి అదే నోటితో ప్రభువు మాటను తృణీకరిచేవారిగా ఉంటున్నాము. మనకున్న పరిస్థితులలో, “ఎందుకు ఈ పాడు జీవితము” అని మనకు మనమే శపించుకుంటాము. అయితే మనకు ఇవ్వబడినది మహిమ తో కూడిన జీవితము. వాక్య జ్ఞానము లేక అపవాది ఉచ్చులో పడి మోసపోతున్నాము. ఈ రోజు కొన్ని సత్యాలు చూసి నేర్చుకుందాము.

మన జీవితానికి ప్రామాణికము వాక్యమే. ఏ సేవకుడూ కూడా ప్రామాణికము కాదు. అంత్య దినములలో అబద్ధబోధలు ఎక్కువ అవుతాయి. అందుకు పౌలు నేను ప్రకటించిన సువార్తకు వ్యతిరేకముగా నేనే చెప్పినా నమ్మకండి అని చెప్తున్నాడు. ఏ సేవకులకైనా మొత్తమంతా తెలుసా? దేవుని మర్మములను ఎరిగినవాడు, సర్వము ఎరిగినవాడు పరిశుద్ధాత్ముడే! ఎవరైన ఇద్దరు దేవుని విషయాలలో డిబేట్లు పెట్టుకుంటే అది వెర్రితనమే. అంత్య దినములలో ఈ అబద్ధపు బోధలు ఎక్కువ అవుతాయి అని వాక్యమే చెప్తుంది. అందుకే చాల జాగ్రత్తగా ఉండాలి. ఒక సింపుల్ లాజిక్ ఎమిటి అంటే, నీవు చేసేపని దేవునికి మహిమ కలిగిస్తుందా లేదా అని పరీక్షించండి. అది మహిమకరమైనదైతే నీవు సంపూర్ణముగా అర్థముకాకపోయినా కూడా ఆ ప్రకారమే చెయ్యి.

అయితే ఈరోజు మన నోటిమాటలు ఎలా దేవుని వాగ్దానములు పోగొట్టుకుంటున్నాము అని నేర్చుకుందాము. ఇశ్రాయేలు ప్రజలు ఐగుప్తులో ఫరో దగ్గర శ్రమ పడుతున్నప్పుడు దేవుడే వారి మూలుగులు విని వారిని విడిపించాడు.

ఐగుప్తు బాధలోనుండి పాలు తేనెలు ప్రవహించు దేశమునకు, అనగా కనానీయులు హిత్తీయులు అమోరీయులు పెరిజ్జీయులు హివ్వీయులు యెబూసీయులున్న దేశమునకు మిమ్ము రప్పించెదనని సెలవిచ్చితినని వారితో చెప్పుము. నిర్గమ 3:17

ఇది దేవుని వాగ్దానము. ఈ వాగ్దానము నెరవేర్పు కొరకై వారిని ఐగుప్తునుండి విడిపించి

యెహోవా మోషేకు ఈలాగున సెలవిచ్చెను నేను ఇశ్రాయేలీయులకు ఇచ్చుచున్న కనానుదేశమును సంచరించి చూచుటకు నీవు మనుష్యులను పంపుము. వారి పితరుల గోత్రములలో ఒక్కొక్క దాని నుండి ఒక్కొక్క మనుష్యుని మీరు పంపవలెను; వారిలో ప్రతివాడు ప్రధానుడై యుండవలెను. మోషే యెహోవా మాట విని, పారాను అరణ్యమునుండి వారిని పంపెను. వారందరు ఇశ్రాయేలీయులలో ముఖ్యులు సంఖ్యా 13:1-3

మోషే కనానుదేశమును సంచరించి చూచుటకు వారిని పంపి నప్పుడు వారితో ఇట్లనెనుమీరు ధైర్యము తెచ్చుకొని దాని దక్షిణదిక్కున ప్రవేశించి ఆ కొండ యెక్కి ఆ దేశము ఎట్టిదో. దానిలో నివసించు జనము బలముగలదో బలములేనిదో, కొంచెమైనదో విస్తారమైనదో వారు నివసించు భూమి యెట్టిదో అది మంచిదో చెడ్డదో, వారు నివసించు పట్టణములు ఎట్టివో, వారు గుడారము లలో నివసించుదురో, కోటలలో నివసించుదురో, ఆ భూమి సారమైనదో నిస్సారమైనదో, దానిలో చెట్లు న్నవో లేవో కనిపెట్టవలెను. మరియు మీరు ఆ దేశపు పండ్లలో కొన్ని తీసికొనిరండని చెప్పెను. అది ద్రాక్షల ప్రథమ పక్వకాలము సంఖ్యా 13:17-20.

వారు అతనికి తెలియపరచినదేమనగానీవు మమ్మును పంపిన దేశమునకు వెళ్లితివిు; అది పాలు తేనెలు ప్రవ హించు దేశమే; దాని పండ్లు ఇవి- సంఖ్యా 13:27

మొట్టమొదట దేవుడు ఇచ్చిన మాట “పాలు తేనెలు ప్రవహించే ప్రదేశము”. వీరు పరిశీలించి తెలుసుకున్నది కూడా అదే విషయము. అయితే వారు ఏమి గమనించారు?

అయితే ఆ దేశ ములో నివసించు జనులు బలవంతులు; వారి పట్టణములు ప్రాకారముగలవి అవి మిక్కిలి గొప్పవి; మరియు అక్కడ అనాకీయులను చూచితివిు. అమాలేకీయులు దక్షిణదేశ ములో నివసించుచున్నారు; హిత్తీయులు యెబూసీయులు అమోరీయులు కొండ దేశములో నివసించుచున్నారు; కనానీయులు సముద్రమునొద్దను యొర్దాను నదీప్రాంత ములలోను నివసించుచున్నారని చెప్పిరి. సంఖ్యా 13:28 – 29.

మరి దేవుడు ఏమి చెప్పారు? మీరు పాలు తేనెలు ప్రవహించే దేశములో మీరు ప్రవేశించుదురు అని చెప్పారు. అలాగే అక్కడ ఉన్న అమోరీయులు, హిత్తీయులు యెబుసీయులు అనే ప్రజలనుండి ఆ ప్రదేశమును మీకు ఇస్తాను అని దేవుడు చెప్పాడు. ఈ వాక్యములు మనము గమనిస్తే దేవుడు ఏమైతే చెప్పాడో అది సత్యము.

అయితే పదిమంది దృష్టి అక్కడ ఉన్నవారి బలముమీద ఉన్నది వారిని బట్టి భయపడుతున్నారు. వారు ఇలా చెప్తున్నారు.

అక్కడ నెఫీలీయుల సంబంధులైన అనాకు వంశపు నెఫీలీ యులను చూచితివిు; మా దృష్ఠికి మేము మిడతలవలె ఉంటిమి, వారి దృష్ఠికిని అట్లే ఉంటిమనిరి – సంఖ్యా 13:33.

అయితే ఇద్దరు మాత్రము ఇలా చెప్తున్నారు

కాలేబు మోషే యెదుట జనులను నిమ్మళ పరచిమనము నిశ్చయముగా వెళ్లుదుము; దాని స్వాధీనపరచుకొందుము; దాని జయించుటకు మన శక్తి చాలుననెను – సంఖ్యా 13: 30.

దానిని స్వాధీనపరుచుకుందుము అని చెప్తున్నారు. అయితే ఆ పన్నెండుమంది కూడా అదే విషయాలను చూసారు. అయితే పది మంది దృష్టిలో వారు మిడతలవలే ఉన్నారు కనుక గెలవలేము అని ఆలోచించారు. అయితే ఇద్దరు మాత్రము మన శక్తి చాలు అని విజయము కొరకైన ప్రోత్సాహకరమైన మాటలు చెప్పుచున్నారు.

దేవుడే అది పాలు తేనెలు ప్రవహించే దేశము అని ముందే చెప్పాడు. అయినా కూడా వారిని వెళ్ళి చూసి రమ్మని చెప్పారు. అయితే వారు వెళ్ళి దేవుని వాగ్దానము ను నమ్మని వారిగా అయిపోయారు.

మీరు ఆ దేశమును సంచరించి చూచిన నలుబది దినముల లెక్క ప్రకారము దినమునకు ఒక సంవత్సరము చొప్పున నలుబది సంవత్సరములు మీ దోషశిక్షను భరించి నేను మిమ్మును రోసివేసినట్టు తెలిసికొందురు – సంఖ్యా 14:34.

వారు వెళ్ళిన దేశములో బలమైన వారు ఉన్నారు అనేది సత్యమే. అయితే ఇశ్రాయేలీయుల విడుదల బలమైన ఫరో చేతిలోనుండి విడిపించబడే వచారు అని మర్చిపోయారు. అందుకే నలభై రోజులలో ముగించవలసిన ప్రయాణము నలభై సంవత్సరాలు పట్టింది. దేవుని ఉద్దేశ్యాన్ని గ్రహించకపోతే నీ పరిస్థితికూడా ఈ పదిమంది లాగానే ఉంటుంది. వాగ్దానము చేసినవాడు నమ్మదగినవాడు. మీ జ్ఞానాన్ని పక్కన పెట్టి జరగలేదు జరగలేదు ఇంక జరగదు అని నెగటివ్ మాటలు మాట్లాడక దేవుని వాగ్దానము నమ్మి ముందుకు వెళదాము. అలాకాకపోతే ఆలస్యము అనేది చూసేవారిగా అవుతాము. దీనికి కారణము, నీ నోటి మాటలే. దేవుని ఉద్దేశ్యము గ్రహించకపోతే మన నోటివెంట ఇలాంటిమాటలే వస్తాయి. అయితే యెహోషువ కాలేబుల వలే దేవుని శక్తిని ఎరిగినవారుగా పాజిటివ్ గా మన నోటివెంట మాటలు రావాలి. నీ జీవితములో ఆలస్యము కాకుండా ఉండాలి ఉంటే, దేవుని శక్తిమీద ఆధారపడి మన మాటలు ఉండాలి. ఎట్టి పరిస్థితిలోను మీ మనుష్య జ్ఞానమును పనిచేయనివ్వవద్దు.

ఆ దేశమునుగూర్చి చెడ్డ సమాచారము చెప్పిన మనుష్యులు యెహోవా సన్నిధిని తెగులుచేత చనిపోయిరి – సంఖ్యా 14:37.

మన పితరులు చాలమంది అనేకులు అలాగే చనిపోయినవారుగా ఉన్నారు. దేవుని వాగ్దానమునకు వ్యతిరేకముగా నోటిమాటలు పలికి వాగ్దానము అనుభవించలేకపోయారు.అయితే మనము అలా ఉండకూడదు. ఆ చనిపోయినవారు అందరూ దేవుని అంగీకరించినవారే. అయినప్పటికీ వారు దేవుని వాగ్దానమును నమ్మకపోవటము మాత్రమే కాక దానికి వ్యతిరేకముగా మాట్లాడినవారుగా ఉన్నారు. దానిని బట్టి తెగులు అనగా వ్యాధుల చేత శిక్షించబడ్డారు.

అది కొనసాగదు. యెహోవా మీ మధ్యను లేడు గనుక మీ శత్రువులయెదుట హతము చేయబడుదురు; మీరు సాగిపోకుడి. ఏలయనగా అమా లేకీయులు కనానీయులు మీకంటె ముందుగా అక్కడికి చేరియున్నారు; మీరు ఖడ్గముచేత కూలుదురు; మీరు యెహోవాను అనుసరించుట మానితిరి గనుక ఇక యెహోవా మీకు తోడైయుండడని చెప్పెను. అయితే వారు మూర్ఖించి ఆ కొండకొన కెక్కిపోయిరి; అయినను యెహోవా నిబంధన మందసమైనను మోషేయైనను పాళె ములోనుండి బయలు వెళ్లలేదు – సంఖ్యా 14:42-44

ఇక్కడ వారి నోటివెంట దేవుని వాగ్దానమునకు వ్యతిరేకముగా ఏమైతే పలికారో అదే జరిగింది. ఎందుకంటే దేవుడు వారు పలికిన దానిని బట్టి వారితో లేడు గాబట్టి. అయితే మనము ఈ సత్యము గ్రహించినవారమై మన నోటి మాటలు జాగ్రత్తగా రానిద్దాము.

అయితే ఆ దేశమును సంచరించి చూచిన మనుష్యులలో నూను కుమారుడగు యెహోషువయు యెఫున్నె కుమారుడగు కాలేబును బ్రదికిరి – సంఖ్యా 14:38

వేగు చూచుటకు వెళ్ళినవారిలో ఇద్దరు మాత్రమే దేవుని వాగ్దానమును గ్రహించి దేవుని చిత్తానుసారమైన మాటలు విశ్వాససహితమైన మాటలు మాట్లాడిన దానిని బట్టి, వారు మాత్రమే బ్రతికినవారుగా ఉన్నారు. “నా కొరకు ఏమైనా చేస్తాడు, నా దేవుడు నన్ను సిగ్గు పడనివ్వడు” అనే మాటలు మీ జీవితములో ప్రతి సమయములో పలకడము నేర్చుకో. నీ మాటగా స్వీకరిస్తున్నాను అని పలికిన మాట చాల శక్తిగలది అని గ్రహించు.