26-11-2023 – ఆదివారం మొదటి ఆరాధన – దేవుని యొక్క స్వరం వినడానికి

ఆరాధన వర్తమానము

నీతిమంతుడు విశ్వాసము మూలమున జీవించును. మనందరము యేసుక్రీస్తు సిలువ కార్యము చేత నీతిమంతులుగా తీర్చబడ్డాము. అయితే మనలను జీవింపచేయునది యేసుక్రీస్తు ద్వారా దేవుని యందలి విశ్వాసము. దేవుని సన్నిధిలో ఆయన మాటలు వెల్లడి అగును. ఆ మాటలను బట్టియే విశ్వాసము కలుగుతుంది.

కాగా వినుటవలన విశ్వాసము కలుగును; వినుట క్రీస్తునుగూర్చిన మాటవలన కలుగును.౹ -రోమా 10:17
మనుష్యుడు రొట్టెవలన మాత్రము కాదుగాని దేవుని నోటనుండి వచ్చు ప్రతిమాటవలనను జీవించును అని వ్రాయబడియున్నదనెను. -మత్తయి 4:4

అనగా కేవలము భౌతికము గా తీసుకునే ఆహారమును బట్టి మాత్రమే మనము జీవించము గానీ, దేవుని మాటలను బట్టి మాత్రమే మన జీవితము కొనసాగించబడుతుంది అని అర్థము. ఆ కృప గల దేవుని మాటలు అనుగ్రహించబడినప్పుడు మనము ఎంతో ధన్యులము గనుక ఆయన సన్నిధిని ఎన్నడూ పోగొట్టుకోకూడదు. కీర్తనాకారుడు కూడా ఎప్పుడుడెప్పుడు ఆయన సన్నిధి కి వెల్తానా అని ఎదురుచూసే ఆసక్తి కలిగినవాడుగా మనము గమనించగలము. అయితే ఆచారయుక్తమైన భక్తి ఏమాత్రము ప్రయోజనము చేకూర్చదు. అయితే ఆయన ఏమై ఉన్నాడో ఎరిగి అనుభవించిన వాడి హృదయములోనుండి నిజమైన ఆరాధన వస్తుంది.

మన దేవుడు నిన్న, నేడు మరియు రేపు ఏకరీతిగా ఉన్నాడు.

యెహోవా, వేల్పులలో నీవంటివాడెవడు పరిశుద్ధతనుబట్టి నీవు మహానీయుడవు స్తుతికీర్తనలనుబట్టి పూజ్యుడవు అద్భుతములు చేయువాడవు నీవంటివాడెవడు -నిర్గమకాండము 15:11

మన పితరులు దేవుని గూర్చి చెప్పే సాక్ష్యము చూస్తే, “దేవుళ్ళుగా కొలవబడేవారిలో నీవంటివాడు లేడు” అనే సాక్ష్యము ఇస్తున్నారు. ఎందుకంటే, దేవుని యొక్క ప్రేమ, శక్తి మరియు కార్యములు చూసి అనుభవించినవారు గనుక అలా చెప్పగలుగుతున్నారు.

ప్రభువా, నీవు మహాత్మ్యముగలవాడవు ఆశ్చర్యకార్యములు చేయువాడవు నీవే అద్వితీయ దేవుడవు. ప్రభువా, దేవతలలో నీవంటివాడు లేడు నీ కార్యములకు సాటియైన కార్యములు లేవు. -కీర్తనలు 86:8-9
యెహోవా, నిన్ను పోలినవాడెవడును లేడు, నీవు మహా త్మ్యము గలవాడవు, నీ శౌర్యమునుబట్టి నీ నామము ఘనమైనదాయెను.౹ -యిర్మీయా 10:6

కీర్తనాకారుడికంటే అనేక సంవత్సరములకు ముందుగా మన పితరులు ఇచ్చిన సాక్ష్యము – “దేవా నీవంటివాడు లేడు”. అలాగే కీర్తనాకారుడి సమయములో ఇస్తున్న సాక్ష్యము కూడా “దేవా నీవంటివాడు లేడు”. అటు పిమ్మట అనేక సంవత్సరముల తరువాత యిర్మీయా ఇస్తున్న సాక్ష్యము – “నిన్ను పోలినవాడెవడును లేడు”.

అంతే కాక సామాన్యురాలైన హన్నా ఇస్తున్న సాక్ష్యము చూస్తే – “యెహోవావంటి పరిశుద్ధ దేవుడు ఒకడునులేడు నీవు తప్ప మరి ఏ దేవుడును లేడు మన దేవునివంటి ఆశ్రయదుర్గమేదియులేదు. -1 సమూయేలు 2:2”.

ఇలా తరములు మారినప్పటికీ మారనిది దేవుని యొక్క లక్షణము, కార్యము మరియు మహాత్మ్యము. అందుకే మన దేవుడు నిన్న నేడు రేపు ఏకరీతిగా ఉన్నవాడు అని ఈ వాక్యములద్వారా మనము అర్థము చేసుకోగలము. ఇప్పుడు మన తరము అయినప్పటికీ ఆయన మారనివాడు, ఆయన తనను తానే మనకు ప్రత్యక్షపరచుకుంటాడు. అందుకే ఆయనను మనము ఆరాధించడానికి అర్హుడు.

మన దేవుడైన యెహోవాను ఘనపరచుడి ఆయన పాదపీఠము ఎదుట సాగిలపడుడి ఆయన పరిశుద్ధుడు. -కీర్తనలు 99:5

మన పితరులు గ్రహించినదానిని బట్టి ఆయనను స్తుతించారు. ఈరోజు మనము కూడా ఈ సత్యము గ్రహిస్తే మనము కూడా ఆయనను స్తుతిస్తాము. అయితే దానికొరకు ఆయనను స్వీకరించుట అనేది ఎంతో ప్రాముఖ్యము. ఆయనను ఆయనన మాటలను స్వీకరించని యెడల ఆయనను స్తుతించలేము.

విశ్రాంతిదినము వచ్చినప్పుడు ఆయన సమాజమందిరములో బోధింపనారంభించెను. అనేకులు ఆయన బోధ విని ఆశ్చర్యపడి–ఈ సంగతులు ఇతనికి ఎక్కడనుండి వచ్చెను? ఇతనికియ్యబడిన ఈ జ్ఞానమెట్టిది? ఇతని చేతుల వలన ఇట్టి అద్భుతములు చేయబడుచున్నవి? ఇదేమి? ఇతడు మరియ కుమారుడు కాడా? ఇతడు యాకోబు, యోసే, యూదా, సీమోను అనువారి సహోదరుడగు వడ్లవాడు కాడా? ఇతని సోదరీమణులందరు మనతో నున్నారు కారా? అని చెప్పుకొనుచు ఆయన విషయమై అభ్యంతరపడిరి. -మార్కు 6:2-3

ఇక్కడ చూస్తే, యేసయ్య అద్భుతముల ద్వారా ప్రత్యక్షపరచుకొన్నాడు. జ్ఞానముతో కూడిన మాటల ద్వారా ప్రత్యక్షపరచుకున్నాడు. తాను బోధించుట ద్వారా ప్రత్యక్షపరచుకున్నాడు అయినప్పటికీ, వారు తమ హృదయములను కఠినపరచుకున్నారు ఆయనను అగీకరించక అభ్యంతరపడ్డారు. అయితే నీవు నేను ఆయనను స్వీకరిస్తున్నామా? ఆయన విషయమై అభ్యంతరపడుతున్నామా?

ఆయన అదృశ్యలక్షణములు, అనగా ఆయన నిత్యశక్తియు దేవత్వమును, జగదుత్పత్తి మొదలుకొని సృష్టింపబడిన వస్తువులను ఆలోచించుటవలన తేటపడుచున్నవి గనుక వారు నిరుత్తరులై యున్నారు.౹ మరియు వారు దేవుని నెరిగియు ఆయనను దేవునిగా మహిమపరచ లేదు, కృతజ్ఞతాస్తుతులు చెల్లింపనులేదు గాని తమ వాదములయందు వ్యర్థులైరి.౹ -రోమా 1:20-21

ఆయన చేసిన సృష్టిని గమనిస్తే, దేవుడు కలిగిన శక్తిని మనము తెలుసుకోవచ్చు. అనగా దేవుని శక్తి మన ముందు ప్రత్యక్షపరచబడింది. అంతే కాక, ఆయన చేసిన సృష్టిని చూస్తే, ఆయన దేవత్వమును కూడా అర్థము చేసుకోగలము. అయితే ఈ సంగతి గమనించలేని దుస్థితిలో వాదములచేత వ్యర్థులవుతున్నారుగానీ, సత్యము గ్రహించడములేదు.

దేవుని ఆలయమునకు విగ్రహములతో ఏమిపొందిక? మనము జీవముగల దేవుని ఆలయమై యున్నాము; అందుకు దేవుడీలాగు సెలవిచ్చుచున్నాడు. –నేను వారిలో నివసించి సంచరింతును, నేను వారి దేవుడనై యుందును వారు నా ప్రజలైయుందురు. –కావున మీరు వారి మధ్యనుండి బయలువెడలి ప్రత్యేకముగా ఉండుడి; అపవిత్రమైనదానిని ముట్టకుడని ప్రభువు చెప్పుచున్నాడు. –మరియు నేను మిమ్మును చేర్చుకొందును, మీకు తండ్రినై యుందును, మీరు నాకు కుమారులును కుమార్తెలునై యుందురని సర్వశక్తిగల ప్రభువు చెప్పుచున్నాడు. -2 కొరింథీయులకు 6:16

మనము జీవముగల దేవుని ఆలయమై యున్నాము. “నేను వారిలో నివసించి సంచరింతును, నేను వారి దేవుడనై యుందును వారు నా ప్రజలైయుందురు” అని దేవుడే చెప్పుచున్నాడు. ఆయనే దేవుడు అని ఎరిగి స్తుతించకపోతే ఏమి జరుగుతుంది అని చూస్తే –

అందువలన కొద్దిమంది రోగులమీద చేతులుంచి వారిని స్వస్థపరచుట తప్ప మరి ఏ అద్భుతమును ఆయన అక్కడ చేయజాలకపోయెను. ఆయన వారి అవిశ్వాసమునకు ఆశ్చర్యపడెను. -మార్కు 6:5

ఆయనే దేవుడు అని ఎరిగి స్తుతించకపోతే, తన శక్తిని కనబరచలేకపోయాడు. అదే ఒకవేళ ఆయనను అంగీకరించి స్తుతిస్తే, ఏమి జరుగుతుంది? ఖచ్చితముగా ఆయన బోధ, జ్ఞానము విడుదల అవుతుంది, అద్భుతములు కనపరచబడతాయి, ప్రత్యక్షపరచబడతాయి. అనగా ఆయన ఏమై ఉన్నాడో అది మన జీవితములలో స్థిరపరచబడుతుంది. అందుకే ఈరోజున మనకు దేవుని గూర్చి తెలియచేయబడిన సత్యములను స్వీకరిద్దాము, ఆత్మతో ఆరాధిద్దాము.

మరియు హన్నా విజ్ఞాపనచేసి యీలాగనెను– నా హృదయము యెహోవాయందు సంతోషించుచున్నది. యెహోవాయందు నాకు మహా బలముకలిగెను నీవలని రక్షణనుబట్టి సంతోషించుచున్నాను నావిరోధులమీద నేను అతిశయపడుదును. -1 సమూయేలు 2:1

హన్న దేవుని సన్నిధిలో ప్రార్థన చేసింది, అప్పుడు తన హృదయము యెహోవా యందు సంతోషించింది. అప్పుడు తనకు మహా బలము కలిగింది. దేవుని రక్షణను బట్టి సంతోషించుచున్నాను అని సాక్ష్యము ఇస్తుంది. అంతే కాక నా విరోధులమీద అతిశయపడుదును అని ప్రకటిస్తుంది. అనగా దేవుని మాటను స్వీకరిస్తే, మొదట సంతోషము, తరువాత బలము అటుతరువాత సంతోషకరమైన నిరీక్షణ కలుగుతాయి. ఈ అనుభవము కలిగినవారు ఆత్మతో సత్యముతో ప్రభువును ఆరాధిస్తారు.

మన పితరుల కాలము అయిపోయింది. ఈరోజు మన సమయము. ఏ గుంపులో ఉంటున్నాము? స్వీకరించిన గుంపా, తృణీకరించిన గుంపా? మనలను పరీక్షించుకుని ఆయనను ఆరాధించడానికి సిద్ధపడదాము.

ఆరాధన గీతము

ఎల్షడ్డాయ్ ఎల్షడ్డాయ్
ఎల్షడ్డాయ్ ఎల్షడ్డాయ్
నీలాంటి దేవుడులేడు మాకిలలో
నీలాంటి దేవుడులేడు

మృతులను సజీవులుగా
లేనివి ఉన్నట్టుగా
చేసినదేవా స్తోత్రం
ఆశ్చర్యకరుడా స్తోత్రం
నీలాంటి దేవుడులేడు

వేదనలో మాకు శాంతి
కన్నీళ్ళలో సంతోషం
ఇచ్చినదేవా స్తోత్రం
అద్భుతకరుడా స్తోత్రం
నీలాంటి దేవుడులేడు

రోగములో మాకు స్వస్థత
బాధలలో నెమ్మది
ఇచ్చినదేవా నీకు స్తోత్రం
యెహోవా రాఫా స్తోత్రం
నీలాంటి దేవుడులేడు

కుటుంబములను కట్టువాడా
విజయమునిచ్చువాడా
యెహోవా షాలోం స్తోత్రం
యెహోవా నిస్సీ స్తోత్రం
నీలాంటి దేవుడులేడు

కార్యము రూపము దాల్చునట్టుగా
చేసిన దేవా స్తోత్రం
నెరవేర్చే దేవా స్తోత్రం
ఆశ్చర్యకరుడా స్తోత్రం

దేవుని శక్తి కనపరచబడే సమయములో ఉంటున్నాము. ఇది దేవుని సమయము గనుక మనము ఆయన యందలి భయభక్తులతో ఆయన సన్నిధిలో ఆయనను ఆరాధిద్దాము.

“మృతులను సజీవులుగా లేనివి ఉన్నట్టుగా చేసినదేవా” అనేది మన అనుభవము అయిఉండాలి. దానికి, మొదట మనము స్వీకరించాలి, విశ్వసించాలి, ఆరాధించాలి అప్పుడు ఆ మృతమైన పరిస్థితులు జీవింపచేయబడటము చూడగలుగుతాము.

అనుభవముతో కూడిన ఆరాధన ఆశీర్వాదముగా మార్చబడుతుంది.

జీసస్ కేర్స్ యూ మినిస్ట్రీ ద్వారా ప్రభువు యొక్క శక్తి బహిరంగముగా కనపరచబడే దినములు ఇవి గనుక, ఈరోజు నీవు హృదయపూర్వకముగా ఈరోజు సత్యముతో ఆత్మతో స్తుతించి ఇంటికి వెళ్ళి నీ పరిస్థితిలు గమనించు, అనుభవముకొరకు ఆశకలిగి స్తుతించు. Decide and Declare.