26-11-2023 – ఆదివారం రెండవ ఆరాధన

వారము కొరకైన వాక్యము

మన దేవునిని ఆనుకొని మనము వెళ్ళాలి. ఆనుకొని వెళ్ళుట అంటే ఏమిటి?

ఎవనిమనస్సు నీమీద ఆనుకొనునో వానిని నీవు పూర్ణశాంతిగలవానిగా కాపాడుదువు. ఏలయనగా అతడు నీయందు విశ్వాసముంచి యున్నాడు. -యెషయా 26:3

ఆనుకొనుట అంటే, ఆయన ఏ రీతిగా తెలియచేస్తున్నాడో, అనగా వాక్యము తెలియచేస్తున్న ప్రకారముగా నిలబడి కొనసాగించుటయే. అందుకే ఆయన వాక్యానుసారముగా నిలబడి జీవించుటకు మనలను మనమే సిద్ధపరచుకోవాలి.

మరియు యెహోషువ–రేపు యెహోవా మీ మధ్య అద్భుతకార్యములను చేయును గనుక మిమ్మును మీరు పరిశుద్ధపరచు కొనుడని జనులకు ఆజ్ఞ ఇచ్చెను.౹ -యెహోషువ 3:5

అద్భుత కార్యములకు, పరిశుద్ధపరచుకొనుటకు ఏమైనా సంబంధము ఉందా? ఒకవేళ ఎవడైనా పాపములో ఉన్నయెడల అతనితో పరిశుద్ధపరచుకొమ్ము అని అంటే అది సబబే. మరి మీ మధ్య అద్భుత కార్యము చేయాలి అనుకుంటున్నాడు గనుక పరిశుద్ధపరచుకొండి అంటే ఏమిటి? అంటే మన జీవితములలో పరిశుద్ధత ఎంతో ప్రాముఖ్యము అని అర్థముచేసుకోవచ్చు. మనలో పరిశుద్ధత లేని కారణము చేత అనేకమైన మేలులు మనము కోల్పోయాము.

మోషే అరణ్యమందు గొర్రెలు మేపుతున్న సందర్భములో మండుతున్న పొదలో దేవుడు మాట్లాడాడు. అంతకంటే ముందు నీ చెప్పులు విడిచిపెట్టు, ఇది పరిశుద్ధ స్థలము అని దేవుడు చెప్పాడు. ఇది ఏమి సూచిస్తుంది అంటే, మన జీవితములో అపవిత్రత కలిగించే ప్రతీదీ విడిచిపెట్టి దేవుని సమీపించినప్పుడే దేవుడు తన ఉద్దేశ్యము బయలుపరుస్తాడు.

పేతురుతో నా వెంబడిరా నిన్ను మనుష్యులు పట్టే జాలరిగా చేస్తాను అని చెప్పినప్పుడు, పేతురు ఎదుట విస్తారమైన సంపద చేపల రూపములో ఉంది. అయితే ఆ లోకమునకు సంబందించినది విడిచిపెట్టినప్పుడే అది జరిగింది.

ప్రియులారా, మనకు ఈ వాగ్దానములు ఉన్నవి గనుక దేవుని భయముతో పరిశుద్ధతను సంపూర్తిచేసికొనుచు, శరీరమునకును ఆత్మకును కలిగిన సమస్త కల్మషము నుండి మనలను పవిత్రులనుగా చేసికొందము. -2 కొరింథీయులకు 7:1

ఇక్కడ వాగ్దానానికి పరిశుద్ధతకు సంబంధము ఏమిటి? దేవుడు ఇచ్చిన పరిశుద్ధమైన జీవితమును సంపూర్ణముగా జీవిస్తూ ఉన్నప్పుడు వాగ్దానమును స్వతంత్రించుకొంటాము.

సమూయేలు ప్రతిష్ట చేయబడ్డాడు, తన జీవితకాలమంతా దేవుని సేవలో ఉంటాడు అని, క్షౌరపు కత్తి తలమీదికి రానియ్యక ఉంటాడు అని ప్రతిష్ట చేయబడ్డాడు. అనగా దేవుడు పాపమంతా తొలగించి ఇచ్చిన పరిశుద్ధమైన జీవితమును అదే పరిశుద్ధతలో కొనసాగించుకోవాలి. అప్పుడే మనకొరకు ఉన్న వాగ్దానములు నెరవేరబడతాయి.

పరిశుద్ధమైన జీవితము అంటే, దేవుని ఉద్దేశ్యము నెరవేర్చుట కొరకు, ఆయన వాక్యమునకు లోబడుట ద్వారా ప్రత్యేకించబడిన జీవితము అని అర్థము. మరియ కన్యకగా ఉన్నప్పుడు దేవదూత నీవు గర్భవతివి కాబోతున్నావు అంటే, నీ చిత్తమే జరుగును గాక అని చెప్పింది. అది పరిశుద్ధత కలిగి ఉండుట ను సూచిస్తుంది.

అబ్రాము తొంబదితొమ్మిది యేండ్లవాడైనప్పుడు యెహోవా అతనికి ప్రత్యక్షమై–నేను సర్వశక్తిగల దేవుడను; నా సన్నిధిలో నడుచుచు నిందారహితుడవై యుండుము.౹ -ఆదికాండము 17:1

అబ్రాహాము దేవునికి వ్యతిరేకముగా ఏమి చెయ్యలేదుగానీ, ఆలోచనలలో మాత్రము సంతానము విష్యములో దేవుని వాగ్దానమునకు వ్యతిరేకమైన ఆలోచనలు కలిగి ఉన్నాడు. అయితే, వాగ్దానము చేసిన దేవుడి యెడల మాత్రము సందేహింపక విశ్వాసము కలిగి ఉన్నాడు.

మరియు అతడు విశ్వాసమునందు బలహీనుడు కాక, రమారమి నూరేండ్ల వయస్సుగలవాడైయుండి, అప్పటికి తన శరీరము మృతతుల్యమైనట్టును, శారాగర్భమును మృతతుల్యమైనట్టును ఆలోచించెను గాని,౹ అవిశ్వాసమువలన దేవుని వాగ్దానమునుగూర్చి సందేహింపక౹ దేవుని మహిమపరచి, ఆయన వాగ్దానము చేసినదానిని నెరవేర్చుటకు సమర్థుడని రూఢిగా విశ్వసించి విశ్వాసమువలన బలమునొందెను.౹ -రోమా 4:19-21

వ్యతిరేకమైన ఆలోచన వచ్చినప్పటికీ, దానిని కార్య రూపము దాల్చనివ్వలేదు అబ్రహాము. దీనినిబట్టి ఆలోచనలు పరిశుద్ధతను కోల్పోయేలా చేస్తాయి అని అర్థము చేసుకోవచ్చు. అందుకే దేవుడు శరీరమునకు, ఆత్మకు పట్టిన కల్మషమునుండి పవిత్రపరచుకోవాలి అని వ్రాయబడింది.

ఉదాహరణకు దేవుడు నీ జీవితములో ఒక అద్భుతము చేస్తాను అని మాట ఇచ్చడు అనుకోండి. అసాధ్యముగా కనబడే పరిస్థితిలో ఇచ్చిన వాగ్దానము అని. అప్పుడు నీ పరిస్థితులను బట్టి అసలు ఇది జరగదు అని అనుకొంటే, అది శరీరమునకు పట్టిన కల్మషము. ఒకవేళ జరుగుతుంది అని నమ్మినప్పటికీ, పరిస్థితులను బట్టి ఇది ఎలా జరుగుతుంది అని ఆలోచనలద్వారా వచ్చే సందేహమును అనుమతించినట్టయితే, అది ఆత్మకు పట్టిన కల్మషము. ఇప్పుడు మనము వీటినుండి పవిత్రపరచుకోవాలి అయితే ఎలా? విశ్వసించుట ద్వారా నీ శరీరమునకు, ఆత్మకు పట్టిన కల్మషమునుండి పరిశుద్ధపరచబడతారు.

మరియు యెహోషువ–రేపు యెహోవా మీ మధ్య అద్భుతకార్యములను చేయును గనుక మిమ్మును మీరు పరిశుద్ధపరచు కొనుడని జనులకు ఆజ్ఞ ఇచ్చెను.౹ -యెహోషువ 3:5

మన ఆలోచనల చేత గానీ, రెఫు కనబడే పరిస్థితులను బట్టిగానీ దేవుని వాగ్దానమును సందేహిస్తే, పరిశుద్ధత కోల్పొతాము. అపుడు దేవుని కార్యమునకు అడ్డువేసినవారము అవుతాము. గనుక పరిశుద్ధపరచుకొమ్మన్నాడు.

ఇశ్రాయేలు ప్రజలకు కానానులోనికి తీసుకువెళతాను అనే దేవుని వాగ్దానము ఉంది. అయితే వారు సగము దూరము వచ్చినతరువాత చెప్పిన మాటలు చూస్తే,

మనయొద్దకు తీసికొని వచ్చి–మన దేవుడైన యెహోవా మన కిచ్చుచున్న దేశము మంచిదని మనకు తెలియజెప్పిరి.౹ అయితే మీరు వెళ్లనొల్లక మీ దేవుడైన యెహోవా సెలవిచ్చిన మాటకు తిరుగబడి మీ గుడారములలో సణుగుచు–యెహోవా మనయందు పగపెట్టినందున మనలను సంహరించునట్లు అమోరీయుల చేతికి మనలను అప్పగించుటకు ఐగుప్తుదేశములోనుండి మనలను రప్పించియున్నాడు.౹ మనమెక్కడికి వెళ్లగలము? మన సహోదరులు–అక్కడి జనులు మనకంటె బలిష్ఠులును ఎత్తరులునై యున్నారు; ఆ పట్టణములు గొప్పవై ఆకాశము నంటు ప్రాకారములతో నున్నవి; అక్కడ అనాకీయులను చూచితిమని చెప్పి మా హృదయములను కరగజేసిరని మీరు చెప్పితిరి.౹ -ద్వితీయోపదేశకాండము 1:25-28

అంటే వాగ్దానము ఉన్నప్పటికీ, సగము దూరము వచ్చినతరువాత వేగు చూసిన తరువాత, దేవుడు చేసిన వాగ్దానము ప్రకారమే ఆ ప్రదేశము ఉంది. అయినప్పటికీ, దేవునికి ఆయన వాగ్దానమును వ్యతిరేకముగా సణుగుకున్నారు. ఎందుకంటే, అక్కడ ఉన్న ప్రజలు వీరికంటే బలవంతులు అనే మాట వీరి ధైర్యమును కోల్పోచేసి, దేవునికి వ్యతిరేకమైన మాటలు మాటలాడుతున్నారు.

అందుకే యెహోషువ వారితో రేపు మీ మధ్య అద్భుతకార్యము చేయబోతున్నాడు గనుక మిమ్మును మీరు పరిశుద్ధపరచుకోండి అని చెప్పుచున్నాడు. ఈ విషయము గ్రహించినవారమై 2024 లో ప్రభువు జరిగించబోయే, అద్భుతకార్యములకొరకు మనలను పరిశుద్ధపరచుకొందాము.