26-01-2025 – ఆదివారం రెండవ ఆరాధన – ఒకటి చేయుచున్నాను

ఆరాధన వర్తమానము

మన దేవుడు మంచి దేవుడు మరియు తన బిడ్డలను ఆదరించేవాడు, అక్కున చేర్చుకొనేవాడు. చాలా సందర్భాలలో మనము వెళుతున్న పరిస్థితులను బట్టి దేవుడు మనలను విడిచిపెట్టేసాడేమో అని అనిపిస్తుంది. అయితే మన దేవ దేవుడు మనలను విడిచిపెట్టేవాడు కాదు. నిత్యము ఆయన మనలను భద్రపరచేవాడు, మన పక్షమున నిలిచేవాడు అయి ఉన్నాడు.

అయితే సీయోను–యెహోవా నన్ను విడిచిపెట్టి యున్నాడు ప్రభువు నన్ను మరచియున్నాడని అనుకొనుచున్నది. -యెషయా 49:14

అసలు మన ప్రభువు మనలను విడిచిపెట్టడము అనేది జరగనే జరగదు. నిన్ను సృష్టించిన దేవుడు తాను నీ యెడల ఒక చిత్తాన్ని కలిగిన వాడుగా ఉన్నాడు. అయితే మధ్యలో అపవాది దేవుని దగ్గరనుండి మనుష్యులను దూరము చేసినప్పటికీ, దేవుడు వారిని విడిచిపెట్టలేదు కానీ, తాను ప్రేమించిన మనుష్యులను తిరిగి తన వద్దకు చేర్చుకోవడానికి తన ప్రియ కుమారుడైన యేసు క్రీస్తును ఈ లోకములోనికి పంపించాడు. గనుక ఆయన నిన్ను విడిచిపెట్టేవాడు కాదు అనే సంగతి నీవు గ్రహించాలి.

మహా ఘనుడును మహోన్నతుడును పరిశుద్ధుడును నిత్యనివాసియునైనవాడు ఈలాగు సెల విచ్చుచున్నాడు –నేను మహోన్నతమైన పరిశుద్ధస్థలములో నివసించు వాడను అయినను వినయముగలవారి ప్రాణమును ఉజ్జీవింప జేయుటకును నలిగినవారి ప్రాణమును ఉజ్జీవింపజేయుటకును వినయముగలవారియొద్దను దీనమనస్సుగలవారియొద్దను నివసించుచున్నాను. -యెషయా 57:15

నలిగిపోయిన వారిని ఉజ్జీవింపచేసి, తిరిగి నిలబెట్టడానికి ఆయన వారి యొద్దకు వచ్చి నివాసము చేసే దేవుడిగా ఉన్నాడు. మన పితరులు ఫరో వద్ద కఠినమైన బాధలు, శ్రమలు అనుభవిస్తున్నప్పుడు, వారిని విడిచిపెట్టక, అబ్రహాముతో చేసిన వాగ్దానము నిమిత్తమై, తన బిడ్డలనందరినీ విడిపించడానికి దిగి వచ్చినవాడుగా ఉన్నాడు.

నీవు ఏ స్థితిలో ఉన్నా సరే ఆయన నిన్ను విడిచిపెట్టేవాడు కాదు గానీ, ఆయన నీ యొద్దకు వచ్చి నిన్ను ఉజ్జీవింపచేసేవాడుగా ఉన్నాడు. నీవు నేను ఈ భూలోకములో ఉన్నాము అంటేనే ఆయన చిత్తము నెరవేర్చబడటానికే అని మనము గ్రహించాలి. ఈ లోకములో ఉన్నదంతా అపవాదికి సంబంధించినదిగా ఉంది. అయితే అటువంటి లోకములో నీ ద్వారా తన చిత్తమును నెరవేర్చడానికి నిన్న్ను సజీవుల లెక్కలో ఉంచాడు.

ఇశ్రాయేలీయుల శ్రమ దినములలో దేవుడు చేసిన వాగ్దానము వారిని పాలు తేనెలు ప్రవహించే దేశములోనికి వారిని తీసుకుని వెళతాను అనే! ఇప్పుడు నీవు దుఃఖములో ఉన్నా సరే నీ దుఃఖమును సంతోషముగా మారుస్తాడు. ఇశ్రాయేలీయుల పరిస్థితిలో విడిపించడానికి మోషేను ఏర్పరుచుకుని, సిద్ధపరచి, సంతోషముగా వారి స్థితిని మార్చాడు. ఆలాగే నీ పరిస్థితిలో కూడా నిన్ను విడిపించడానికి, అవసరమైన మార్గమును ఏర్పరచి, సిద్ధపరచి నీ వద్దకు పంపేవాడుగా ఉన్నాడు.

స్త్రీ తన గర్భమున పుట్టిన బిడ్డను కరుణింపకుండ తన చంటిపిల్లను మరచునా? వారైన మరచుదురు గాని నేను నిన్ను మరువను. -యెషయా 49:15

నీవు దేవుని సొత్తు ఆయన ప్రజ నీవు గనుక నిన్ను మరిచిపోయే అవకాశమే లేదు. ఈ లోకములో తల్లి మరిచినా సరే నీ దేవుడు మాత్రము నిన్ను మర్చిపోడు. నీవున్న స్థితిలోనే నీవు ఉండిపోవు, నీ స్థితి మార్చబడుతుంది.

చూడుము నా యరచేతులమీదనే నిన్ను చెక్కి యున్నాను నీ ప్రాకారములు నిత్యము నాయెదుట నున్నవి -యెషయా 49:16

సీయోను అంటే మనమే, ప్రాకారము అంటే మన జీవితమే. మన జీవితములో ఏ పరిస్థితి గుండా మనము వెళుతున్నామో, ఏ బాధ నీవు పడుతున్నావో, ఎందుకు కన్నీరు విడిస్తున్నావో అన్నీ ఎరిగినవాడు, చూసేవాడు. మరువని, విడువని నీ దేవుడు ఏమి చేస్తాడు?

యెహోవా సీయోనును ఆదరించుచున్నాడు దాని పాడైన స్థలములన్నిటిని ఆదరించి దాని అరణ్యస్థలములను ఏదెనువలె చేయుచున్నాడు దాని యెడారి భూములు యెహోవా తోటవలెనగు నట్లు చేయుచున్నాడు ఆనంద సంతోషములును కృతజ్ఞతాస్తుతియు సంగీతగానమును దానిలో వినబడును -యెషయా 51:3

విడువని, మరువని నీ దేవుడు ఆదరించేవాడుగా ఉన్నాడు. అరణ్యములో చూస్తే, ఏమీ దొరకదు ఏ సహాయము అందదు. అయితే అటువంటి జీవితమును ఏదేను తోటవలే చేసేవాడుగా ఉన్నాడు. ఏదేను తోట అంటే దేవుని చేత సిద్ధపరచి నిత్యము ఫలించే తోట, అంటే నీ జీవితము కొరకు సిద్ధపరచిన సమస్తము నీవు అనుభవించే జీవితము అని అర్థము.

నీ ధైర్యము ఏమిటి అంటే, ఆయన నిన్ను ఏర్పరచుకున్నాడు, నిర్ణయించుకున్నాడు, నీ యెడల ఆయన చిత్తమును కలిగి ఉన్నాడు. నీవున్న పరిస్థితిలో ఇంతవరకు నిన్ను నీ చుట్టూ ఉన్నవారు నిన్ను ఎగతాళి చేస్తున్నారేమో, నిందవేసేవారిగా ఉన్నరేమో, అయితే ఈ దినము నీ దేవుడు, నిన్ను విడువని మరువని నీ దేవుడు, నిన్ను ఆశీర్వాదముగా మార్చేవాడుగా ఉన్నాడు, సమస్తము నీకు అనుగ్రహించి నీ సాక్ష్యము మార్చేవాడుగా ఉన్నాడు.

నీ గురించి లోకము ఏమి నెగటివ్ గా మాట్లాడుకున్న ఇప్పుడు ఆ మాట మార్చబడుతుంది. ఇప్పుడు నీవు ఖాళీగా ఉన్నాసరే, నీ గిన్నె ఇప్పుడు నిండి పొర్లిపోయేదిగా ఉంటుంది. వారి కన్నుల యెదుట నిన్ను గొప్ప చేయడము మొదలు పెడుతున్నాడు.

బంధకములలో పడియుండియు నిరీక్షణగలవారలారా, మీ కోటను మరల ప్రవేశించుడి, రెండంతలుగా మీకు మేలు చేసెదనని నేడు నేను మీకు తెలియజేయుచున్నాను.౹ -జెకర్యా 9:12

బంధించబడిన స్థితిలో ఉన్నా సరే, నీవు నిరీక్షణ కలిగి ఉన్నట్టయితే, మరలా మీ కోటలో ప్రవేశించండి. రెండంతలుగా మీకు మేలు చేసెదనని నేడు నేను మీకు తెలియజేయుచున్నాను అని నీ ప్రభువు నీతో చెప్పుచున్నాడు.

నీవున్న నెగటివ్ పరిస్థితిలో నీవు నీ దేవునిని బట్టి నిరీక్షణ కోల్పోక నీవు నిలిచి ఉంటే, మరలా నీ కోట అయిన నీ దేవుని సన్నిధిలో ప్రవేశించు.

మీరు ఏడ్చి ప్రలాపింతురు గాని లోకము సంతోషించును; మీరు దుఃఖింతురు గాని మీ దుఃఖము సంతోషమగునని మీతో నిశ్చయముగా చెప్పుచున్నాను.౹ -యోహాను 16:20
అటువలె మీరును ఇప్పుడు దుఃఖపడుచున్నారు గాని మిమ్మును మరల చూచెదను, అప్పుడు మీ హృదయము సంతోషించును, మీ సంతోషమును ఎవడును మీయొద్దనుండి తీసివేయడు.౹ -యోహాను 16:22

ఇప్పుడు నీవున్న పరిస్థితిలో నీవు దుఃఖిస్తున్నావు, మరియు లోకము నీ దుఃఖముచూసి సంతోషిస్తుంది. అయితే నీ దుఃఖము సంతోషముగా మార్చబడుతుంది, అప్పుడు నీవు పొందిన సంతోషమును ఎవరూ నీ వద్దనుండి తీసివేయలేడు.

“ఇప్పుడు ఎవరూ నీ వద్దనుండి తీసివేయలేడు” అంటే ఇంతకుముందు ఎవరో దానిని తీసివేయగలిగాడు అనే కదా అర్థము? అయితే నీవు మరలా కోటలో ప్రవేశిస్తే, మరలా నిన్ను నీ దేవుడు చూస్తాను అని చెప్పుచున్నాడు. అప్పుడు నీ దుఃఖము సంతోషముగా మార్చబడుతుంది. ఆ సంతోషమును ఎవరూ నీ యొద్దనుండి తీసివేయలేడు.

ఈ దినము దేవుడు తన వాక్యము అనే విత్తనములు విత్తాడు. నీ హృదయము మంచి నేలగా ఉంటే, అనగా విశ్వాసము కలిగినదిగా ఉంటే, అప్పుడు ఆ విత్తనము నూరంతలుగా ఫలిస్తుంది.

ఆరాధన గీతము

స్థితిగతులన్నిటినీ మార్చువాడా
జీవితాలన్నిటినీ కట్టువాడా
యేసూ నీ సన్నిధిలో సాధ్యం
సమస్తము నీ సన్నిధిలో సాధ్యం

సమస్తము సాధ్యం
నీ యందే నా విశ్వాసం

దేవా నీకే నా స్తుతి పాడెదన్

నాలో ధైర్యం లేనపుడు, బలపరచే వాక్యము ఇస్తాడు, కోల్పోయినవాటన్నటినీ తిరిగి రెండంతలుగా దీవిస్తాడు. నా యేసు నాతో ఉన్నాడు, నా యేసు నన్ను విడువడు.

ఎవరూ లేని చోటలో, ఉంటాడు నా ప్రక్కనే! కనుమేర ఎవరూ లేనప్పుడు, కన్నులు మూస్తే కనిపిస్తాడు నా యేసు నాతో ఉన్నాడు, నా యేసు నన్ను విడువడు. నాతో ఉన్నాడు, నన్ను విడువడు