25-Dec-2022 – ఆదివారము మొదటి ఆరాధన – ఇమ్మానుయేలు దేవా నీకే నా స్తోత్రం

Main Message | మెయిన్ మెసేజ్

ఈ దినము మన అందరికి శుభవర్తమానము. నెగటివ్ కాదు కానీ మన జీవితాలలో ఇంక పాజిటివ్ మాత్రమే.

తన ప్రజలను వారి పాపములనుండి ఆయనే రక్షించును గనుక ఆయనకు యేసు అను పేరు పెట్టుదువనెను. ఇదిగో కన్యక గర్భవతియై కుమారుని కనును ఆయనకు ఇమ్మానుయేలను పేరు పెట్టుదురు అని ప్రభువు తన ప్రవక్తద్వారా పలికిన మాట నెరవేరు నట్లు ఇదంతయు జరిగెను. ఇమ్మానుయేలను పేరునకు భాషాంతరమున దేవుడు మనకు తోడని అర్థము. – మత్తయి 1:21-23.

ఈరోజు క్రిస్మస్ యొక్క ఉద్దేశ్యమును మనము గ్రహించాలి. యేసయ్య భూలోకమునకు వచ్చి మనకు తోడుగా ఉండేవాడు అందుకే ఆయన పేరు ఇమ్మానుయేలు అయి ఉన్నది. యేసు పుట్టకమునుపు మన జీవితాలు ఒకలా ఉండేవి అయితే యేసు పుట్టిన తరువాత అద్భుతముగా మార్చబడ్డాయి.

అప్పుడు దేవుడైన యెహోవా స్త్రీతోనీవు చేసినది యేమిటని అడుగగా స్త్రీసర్పము నన్ను మోసపుచ్చి నందున తింటిననెను – ఆదికాండము 3:13.

ఈ సందర్భము మన అందరికి తెలిసినదే. మానవజాతి దేవుడిచ్చు మహిమను పొందలేకపోవడానికి కారణము, మోసము. అయితే దేవుడు మనలను ప్రేమించాడని లేఖనాలు మనకు తెలియచేస్తున్నాయి. అందుకే యేసయ ఈ లోకమునకు ఈరోజు వచ్చాడని మనకందరికీ తెలుసు. మన యేసు ప్రభువు మనకు తోడుగా ఉంటాడు. అంతకుముందు ఆదాము రోజులలో, ఒక సాయంకాలము పూట దేవుడు వారితో మాట్లాడుతుండేవాడు. అయితే దేవుడు వారితోలేని సందర్భములో అపవాది వారిని మోసపుచ్చినట్టుగా మనము చూడవచ్చు.

నిబ్బరమైన బుద్ధి గలవారై మెలకువగా ఉండుడి; మీ విరోధియైన అపవాది గర్జించు సింహమువలె ఎవరిని మింగుదునా అని వెదకుచు తిరుగుచున్నాడు. 1 పేతురు 5:8.
విరోధి అయినవాడు మన జీవితాలకు నష్టము కలిగించడానికే చూస్తాడు. అయితే ఇమ్మానుయేలుగా వచ్చి మనకు తోదుగా ఉండే ఆయన మనము అపవాది మొసమునకు లోనవకుండా తోదుగ ఉంటున్నాడు. క్రిస్మస్ యొక్క ఉద్దేశ్యము ఆయన నీకు తోడుగా ఉంటాడు. ఈ మాట క్రిస్మస్ రోజు కొరకు మాత్రమే కాదు కాని, నీ జీవితమంతా కూడా ఆయన ఇమ్మానుయేలు దేవుడుగానే ఉన్నాడు. దానిని బట్టి అపవాది నీ జీవితాన్ని లోబరుచుకోలేదు. నీ జీవితము యేసును బట్టి మహిమ కరముగా మార్చబడుతుంది.

మహోన్నతుని చాటున నివసించువాడే సర్వశక్తుని నీడను విశ్రమించువాడు – కీర్తన 91:1

ఆయన మనకు తోడుగా ఉంటే, మనము విశ్రమించేవారిగా ఉంటాము. మనకు సమాధానము లేని స్థితిలో సమాధానము కలుగచేసి, బలహీనతలో ఉంటే బలము కలుగచేసి మనలను విశ్రమింపచేసేవాడిగా ఉన్నాడు. ఈ సత్యమును గ్రహించి, ఆయనను అంగీకరించినట్టయితే నీ జీవితములో సంతోషము సమాధానమే.

ఇమ్మానుయేలు దేవుడుగా నాకొరకు వచ్చావు దేవా అందునుబట్టి నీకే స్తోత్రము. నీవు నాకు తోడుగా ఉన్నావు కాబట్టి నాజీవితమంతా సంతోషమే అని ప్రార్థించి స్తుతిద్దామ?

అపవాది అనేకరకాలుగా మనలను పట్టడానికి ప్రయత్నిస్తున్నాడు. లూకాలో ఒక మాట చూద్దాము.

సీమోనూ, సీమోనూ, ఇదిగో సాతాను మిమ్మును పట్టి గోధుమలవలె జల్లించుటకు మిమ్మును కోరుకొనెను గాని నీ నమ్మిక తప్పిపోకుండునట్లు నేను నీకొరకు వేడుకొంటిని; నీ మనసు తిరిగిన తరువాత నీ సహోదరులను స్థిరపరచుమని చెప్పెను.లూకా 22:31.

సీమోనుకు ఈ విషయము తెలియదు కానీ ఇమ్మానుయేలుగా ఉన్న యేసయ్య ఈ విషయమును బట్టి దేవునికి ప్రార్థించి పేతురు సమకూర్చబడులాగా మార్గము సిద్ధపరచినాడు. సీమోనుకు ఎలా అయితే రక్షకుడుగా ఉన్నాడో, నీకు కూడా ఆయన రక్షకుడుగా ఉన్నాడు. అపవాది చేసే అనేకమైన ప్రయత్నాలను అడ్డుకుని, నిన్ను నిలబెట్టేవాడిగా ఉన్నాడు.

ఆదియందు వాక్యముండెను, వాక్యము దేవునియొద్ద ఉండెను, వాక్యము దేవుడై యుండెను. ఆ వాక్యము శరీరధారియై, కృపాసత్యసంపూర్ణు డుగా మనమధ్య నివసించెను; తండ్రివలన కలిగిన అద్వితీయకుమారుని మహిమవలె మనము ఆయన మహిమను కనుగొంటిమి – యోహాను 1:1, 14.

ఆయనలో జీవముండెను; ఆ జీవము మనుష్యులకు వెలుగైయుండెను – యోహాను 1:4.

పరలోకములో ఉన్న ఆయన భూలోకములో మనతో కలసి నివసించడానికి వచ్చాడు. వచ్చ్చిన ఆయనన్లో జీవము ఉన్నది. ఆయన కృపాసత్య సంపూర్ణత కలవానిగా ఉన్నాడు. ఆ వెలుగు అయిన ప్రభువు మన జీవితాలలో చీకటి ప్రవేశించడానికి అవకాశము లేదు. వెలుగు అనేది ప్రకాశించబడేదిగా ఉంటుంది. యేసును అంగీకరించిన మన జీవితాలు ఖచ్చితముగా ప్రకాశించేవిగా ఉంటాయి. ఇంతకుముందు బలహీనత కలిగి ఉన్నా, ఇప్పుడు ఆయన బలమును బట్టి వచ్చిన మార్పును బట్టి ప్రకాశిస్తావు. నీ క్రియలలో మార్పు ఖచ్చితముగా వస్తుంది.

చాల సందర్భాలలో అపవాది నిన్ను కృంగదీసేవిధముగా ప్రయత్నిస్తుంది. దేవుడు చెప్పిన మాటనే ఉపయోగించి మోసగించింది. నీ జీవితము ప్రకాశించబడుతుంది అని వాక్యము చెప్తుంది. అదే మాటను ఉపయోగించి అపవాది నిన్ను మోసగించేప్రయత్నిస్తుంది. ఎదో ఒక మెలిక, ఏదో వెలితి కలిపి, ఆ వాక్యాన్ని అనుమానించి విశ్వసించలేని విధానములో నిన్ను మోసగించి చెడగొట్టడానికి ప్రయత్నిస్తుంది అపవాది. అయితే దేవుని వాక్యము సత్యము, ఆయన పుట్టుక సత్యము కనుక మీరు నమ్మి విశ్వాసముతో నిలబడి అపవాదిని జయించండి.

జెబూలూను దేశమును, నఫ్తాలిదేశమును, యొర్దానుకు ఆవలనున్న సముద్రతీరమున అన్యజనులు నివసించు గలిలయయు చీకటిలో కూర్చుండియున్న ప్రజలును గొప్ప వెలుగు చూచిరి. మరణ ప్రదేశములోను మరణచ్ఛాయలోను కూర్చుండియున్న వారికి వెలుగు ఉదయించెను మత్తయి 4:15.

చీకటిలో కూర్చుండియున్న ప్రజలకు వెలుగుగా వచ్చాడు. అదే యేసు ప్రభువును నీవు నమ్మినట్టయితే, నీ జీవితముకూడా వెలుగుమయముగా అవుతుంది. మరణచ్ఛాయ అనగా మరణము యొక్క ప్రభావము కలిగిన స్థితి. మరణ ప్రదేశము అనగా ప్రభువు నిర్ణయించిన ప్రకారముగా కాక పతనమైన స్థితిలో ఉండుట. అటువంటి స్థితిలో ఉన్నట్టయితే, ఈరోజు ధైర్యము తెచ్చుకో, ఆ వెలుగులో జీవము ఉంది. నీ మరణకరమైన పరిస్థితిలో ఆయన వెలుగును బట్టి జీవము నింపబడుతుంది. దానికొరకు ఆ వెలుగును స్వీకరిస్తే చాలు.

ఆ వెలుగు చీకటిలో ప్రకాశించుచున్నది గాని చీకటి దాని గ్రహింపకుండెను – యోహాను 1:5.
ఆదియందు వాక్యముండెను, వాక్యము దేవునియొద్ద ఉండెను, వాక్యము దేవుడై యుండెను.- యోహాను 1:1
ఆ వాక్యము శరీరధారియై, కృపాసత్యసంపూర్ణుడుగా మనమధ్య నివసించెను; – యోహాను 1:14
ఆయన పరిపూర్ణతలోనుండి మనమందరము కృప వెంబడి కృపను పొందితివిు. – యోహాన్ను 1:16
ఆయన ఆది యందు దేవునియొద్ద ఉండెను. సమస్తమును ఆయన మూలముగా కలిగెను – యోహాను 1:2.

అపవాది మనలను మాటిమాటికీ మోసగిస్తున్నప్పటికీ ఆయనే మనకు ఇమ్మానుయేలుగా తోడుండి విడిపించి నడిపించేవాడుగా ఉన్నాడు. ఆయన కలిగిన వెలుగును బట్టి మనలో ఉన్న మరణకరమైన స్థితిలో జీవము నింపుతున్నడు. ఇప్పుడు సమస్తము ఆయన మూలముగా కలిగెను అని వాక్యము చెప్తుంది.

ఉదాహరణకు ఒక మురికివాడ ఉంది అనుకోండి ఒక మంత్రి అటుగా వస్తున్నాడు అంటే, ఆయనను బట్టి ఆ మురికివాడను శుభ్రము చేస్తారు కదా? అలాగే మన జీవితములోనికి వచ్చిన ఆయనను బట్టి కృపవెంబడి కృప మనకు అనుగ్రహించబడుతుంది. ఆ కృపను బట్టి సమస్తము మనకు సమకూర్చబడతాయి. ఏమి వెలితి ఉన్నా, ఏమి కొరత ఉన్నా అది తీర్చబడుతుంది. నీ జీవితము పరిపూర్ణమయ్యేంతవరకు ఆ కృప నీకు అనుగ్రహించబడేదిగా ఉంటుంది. క్రీస్తును నీవు అంగీకరించినట్టయితే అప్పుడు నీవు నిజమైన క్రిస్మస్ నీవు జరుపుకోగలుగుతావు. దినదినము నీవు పరిపూర్ణతలోనికి నడిపించబడతావు. రేపేమవుతుంది అనే భయము నీకు ఉండనే ఉండదు. ఇమ్మానుయేలు దేవుడు నాకు తోడుగా ఉన్నాడు నా జీవితము పరిపూర్ణముగా ఉంటుంది అని నివు నిర్భయముగా ప్రకటించగలుతావు.

కాబట్టి ఆ పిల్లలు రక్తమాంస ములు గలవారైనందున ఆ ప్రకారమే మరణముయొక్క బలముగలవానిని, అనగా అపవాదిని మరణముద్వారా నశింపజేయుటకును, జీవితకాలమంతయు మరణభయము చేత దాస్యమునకు లోబడినవారిని విడిపించుటకును, ఆయనకూడ రక్తమాంసములలో పాలివాడాయెను. హెబ్రీ 2:14-15

నీ జీవితములో ఎటువంటి మరణభయము ఉన్నాసరే ఆ మరణభయమునుండి విడిపించేవాడుగా నీకు ఇమ్మానుయేలు దేవుడు నీకు తోడుగా ఉన్నాడు. కాబట్టి మనము భయపడనవసరములేదు.

దొంగ దొంగతనమును హత్యను నాశనమును చేయుటకు వచ్చును గాని మరిదేనికిని రాడు; గొఱ్ఱలకు జీవము కలుగుటకును అది సమృధ్ధిగా కలుగుటకును నేను వచ్చితినని మీతో నిశ్చయముగా చెప్పుచున్నాను – యోహాను 10:10.