25-06-2023 – ఆదివారం రెండవ ఆరాధన – నా వెంబడి రండి

మెయిన్ మెసేజ్

పరలోకములో దేవుని నిర్ణయమును ఈ లోకములో మన జీవితములలో దేవుని కృపద్వారా జరిగించబడుతుంది.

ఈరోజు మనము “నా వెంబడి రండి” అనే మాటను గూర్చి నేర్చుకుందాము. “నా వెంబడి రండి” అని ఇక్కడ పిలుపు ఇవ్వబడింది. అయితే మనము ధ్యానించవలసినవి –

1. ఎవరు పిలిచారు?
2. ఎందుకు పిలిచారు?

ఆయన గలిలయ సముద్రతీరమున వెళ్లుచుండగా సీమోనును సీమోను సహోదరుడగు అంద్రెయయు, సముద్రములో వలవేయుట చూచెను; వారు జాలరులు. యేసు నా వెంబడి రండి, నేను మిమ్మును మనుష్యులను పట్టు జాలరులనుగా చేసెదనని వారితో చెప్పెను. వెంటనే వారు తమ వలలు విడిచి ఆయనను వెంబడించిరి. -మార్కు 1:16-18

ఇక్కడ పిలువబడినవారు జాలరులు. వారి వృత్తి వారు చేసుకుంటున్నపుడు, నా వెంబడి రండి అని యేసయ్య పిలిస్తున్నాడు. మరొక వాక్యములో కూడా ఒకసారి చూద్దాము.

సీమోను – ఏలినవాడా, రాత్రి అంతయు మేము ప్రయాసపడితిమి గాని మాకేమియు దొరకలేదు; అయినను నీ మాటచొప్పున వలలు వేతునని ఆయనతో చెప్పెను. -లూకా 5:5

వారిని పిలిచిన సందర్భము వట్టి సందర్భము కాదు గానీ, ప్రయాసముతో కూడిన సందర్భము. ప్రయాసము అంటే ఎటువంటి ప్రయాసము అయి ఉంటుంది? పేతురు చేపలు పట్టే విషయములో చూస్తే, మొదటి జాములో ప్రయత్నము ఫలించలేదు, రెండవ చేసిన జాములో ప్రయత్నములో ఏమి జరగలేదు, మూడవ జాములో ప్రయత్నము ఫలించలేదు. మన జీవితాలలో చూస్తే, ఎన్ని సార్లు ప్రయత్నించినా సరే ఏమీ ఫలించట్లేదు. మరొక విషయము చూస్తే, సాధారణముగా ఈ చేపలు రాత్రి సమయములో వస్తాయి అయినప్పటికీ ఆరోజున ఏమీ రాలేదు. మన జీవితాలలో చూస్తే, మనకు రావలసిన ఆశీర్వాదములు కూడ రావట్లేదు. అటువంటి సందర్భములో “నా వెంబడి రండి” అని పిలుస్తున్నాడు.

ప్రయాసపడి భారము మోసికొనుచున్న సమస్త జనులారా, నా యొద్దకు రండి; నేను మీకు విశ్రాంతి కలుగ జేతును. -మత్తయి 11:28

మనము ప్రయాసముతో ఉన్నాము, అటువంటి సందర్భములో మనలను పిలుస్తున్నాడు అంటే, ఈయన ఎవరై ఉంటారు? ప్రయాసమును తొలగించలేని వాడైతే, ఎందుకు పిలుస్తాడు? సమరయ స్త్రీ విషయములో చూస్తే, “నేనిచ్చు నీళ్ళు తాగు వాడు ఎప్పుడునూ దప్పిగొనడు” అని చెప్పాడు. అంటే, ఆయన విశ్రాంతి కలిగించువాడై ఉన్నాడు.

పేతురుతో చెప్తున్నాడు, ఇంతవరకు నీవు ప్రయాసము పడి చేపలు పట్టావు గానీ, ఇకనుండి నిన్ను ఉన్నతమైన స్థితికి నడిపిస్తాను అని చెప్పి నా వెంబడి రండి అని చెప్పి పిలిచాడు. ప్రభువు తిరిగి లేచిన తరువాత, పేతురు ఒకరాసి 3000 మందిని, మరొకసారి 5000 మందిని అలా వేల వేల మంది మనుష్యులను ప్రభువుకొరకు పట్టిన జాలరిగా మార్చబడ్డాడు.

కాగా నా ప్రియ సహోదరులారా, మీ ప్రయాసము ప్రభువునందు వ్యర్థముకాదని యెరిగి, స్థిరులును, కదలనివారును, ప్రభువు కార్యాభివృద్ధియందు ఎప్పటికిని ఆసక్తులునై యుండుడి. -1 కొరింథీయులకు 15:58
అయినను నేనేమైయున్నానో అది దేవుని కృపవలననే అయి యున్నాను. మరియు నాకు అనుగ్రహింపబడిన ఆయన కృప నిష్ఫలము కాలేదు గాని, వారందరికంటె నేనెక్కు వగా ప్రయాసపడితిని. ప్రయాసపడినది నేను కాను, నాకు తోడైయున్న దేవుని కృపయే.౹ -1 కొరింథీయులకు 15:10

శరీర సంబంధమైన విషయములలో ప్రయాసము పడినప్పుడు మనమే ప్రయాసపడేవారముగా ఉంటాము. అయితే ఆత్మీయ విషయములలో ప్రయాస పడినప్పుడు మనము బాహ్యముగా ప్రయాసపడినట్టు కనపడినప్పటికీ, నిజానికి ప్రయాస పడినది దేవుని కృపయే! అనగా ఆత్మీయ విషయముల కొరకు నిలబడినప్పుడు, దేవుని కృప నీ పరిస్థితిలో విడుదల అయి, ప్రతి పరిస్థితిలో నీ పక్షాన దేవుని కార్యము జరిగిస్తుంది. ఆ విధముగా నిజమైన ప్రయాస మనము కాదు గానీ, దేవుని కృపయే ప్రయాస పడుతుంది. ఈ కృప యేసయ్యనుండి కలుగుతుంది. మన పరిస్థితిలో కృప విడుదల అవ్వాలి అంటే, మన పరిస్థితిని యేసయ్య గమనించి ఉండాలి. యేసయ్య కనికరపూర్ణుడు గనుక, ఆయన బిడ్డలము అయి ఉన్నాము గనుక, మనము అనుభవిస్తున్న శ్రమ, బాధ ఆయన కూడా అనుభవించేవాడుగా ఉంటాడు. అందుకే మన జీవితములో కార్యము జరుగునట్లుగా తన కృపను విడుదల చేసేవాడుగా యేసయ్య ఉన్నాడు. నిన్ను “నా వెంబడి రా” అని పిలుస్తున్నాడు. పేతురు వాళ్ళైతే సమస్తమును విడిచిపెట్టి వెళ్ళారు. మరి నీవు ఎలా స్పందిస్తావు? నీ ప్రయాసముతో కూడిన జీవితము ముగించడానికే ప్రభువు పిలిస్తున్నాడు అని గమనిస్తున్నావా?

మరునాడు ఆయన గలిలయకు వెళ్లగోరి ఫిలిప్పును కనుగొని–నన్ను వెంబడించుమని అతనితో చెప్పెను.౹ -యోహాను 1:43

ఈరోజు ప్రభువు నిన్ను కనుగొంటున్నాడు. ఎందుకు అనే సత్యము నీవెరిగితే, నీ ముందు ఉన్న గొలియాతును సహితము హతమార్చేవాడివిగా ఉంటావు. ఫిలిప్పును ఎందుకు వెంబడించమని అడిగాడు? ఫిలిప్పు ఏమి చేసాడు అని చూస్తే, మొదట ఫిలిప్పు యేసును వెంబడించి, నతానియేలును యేసు యొద్దకు తీసుకువచ్చాడు. అప్పుడు యేసయ్యకు నతానియేలు మధ్య సంభాషణ వింటున్నాడు.

యేసు నతనయేలు తన యొద్దకు వచ్చుట చూచి–ఇదిగో యితడు నిజముగా ఇశ్రాయేలీయుడు, ఇతనియందు ఏ కపటమును లేదని అతనిగూర్చి చెప్పెను.౹ –నన్ను నీవు ఏలాగు ఎరుగుదువని నతనయేలు ఆయనను అడుగగా యేసు–ఫిలిప్పు నిన్ను పిలువకమునుపే, నీవు ఆ అంజూరపు చెట్టు క్రింద ఉన్న ప్పుడే నిన్ను చూచితినని అతనితో చెప్పెను.౹ -యోహాను 1:47-48

యేసయ్య ఎటువంటివాడో, ఆయన ఏమి కలిగి ఉన్నాడో అది ఫిలిప్పు ముందు ప్రకటించబడుతుంది, గనుక యేసయ్యను గూర్చిన సత్యమును ఎరిగేవానిగా మార్చబడుతున్నాడు. మరొక సందర్భములో చూస్తే,

కాబట్టి యేసు కన్నులెత్తి బహుజనులు తనయొద్దకు వచ్చుట చూచి–వీరు భుజించుటకు ఎక్కడనుండి రొట్టెలుకొని తెప్పింతుమని ఫిలిప్పు నడిగెను గాని౹ యేమి చేయనై యుండెనో తానే యెరిగియుండి అతనిని పరీక్షించుటకు ఆలాగడిగెను.౹ -యోహాను 6:5-6

ఈ సందర్భములో ఈ ప్రశ్న ఫిలిప్పునే అడిగాడు ఎందుకు? పేతురు ఒకదానికొరకు పిలువబడ్డాడు, ఫిలిప్పు మరొకదానికి కొరకు పిలువబడ్డాడు. ఫిలిప్పు కళ్ళముందు ఒక అద్భుతము జరగవలసిన సందర్భము వచ్చింది. ఆ అద్భుతము అతని కళ్ళముందే ఆ అద్భుతము జరుగుతుంది. మొదటిగా నతానియేలు విషయములో సర్వము ఎరిగినవాడుగా యేసయ్య ప్రత్యక్షపరచుకున్నాడు, భోజనము విషయములో ఆశ్చర్య కరుడుగా ప్రత్యక్షపరచుకున్నాడు.

ప్రయాస పడే సందర్భములోనైనా, అద్భుతము జరగవలసిన సందర్భము అయినా సరే, ఆయన “నా వెంబడి రా” అని యేసయ్య పిలుస్తున్నాడు. పేతురును మొదట అద్భుతము చేసి ఆ తరువాత నా వెంబడి రమ్మని పిలిచాడు. మరి ఫిలిప్పును మొదటిగా పిలిచి తరువాత అద్భుతము చేసినవాడుగా ఉన్నాడు. మనము అడుగక మునుపే మన అవసరములు ఎరిగి తీర్చేవాడుగా ఉన్నాడు. మరి కొన్ని సందర్భాలలో మనము అడిగిన వాటిని తీర్చేవాడుగా ఉన్నాదు.

నా వెంబడి రండి అంటే, ఆయన ముందుగా వెళ్ళి చూపిన మార్గములో మనము కూడా వెళ్ళాలి అనే కదా! మనము అడకుండా చేసేవి, మనము అడిగినప్పుడు చేసేవి రెండూ ఆయనతో మనము ఉన్నప్పుడే మన జీవితములో స్థిరపరచబడతాయి.