21-04-2024 – ఆదివారం మొదటి ఆరాధన

ఆరాధన వర్తమానము

ప్రభువైన యేసుక్రీస్తు నామములో శుభాభివందనములు తెలియచేస్తున్నాము. మరొక దినము ప్రభువు ఇచ్చారు. ఇహ లోకములో ఉన్నవారు వారి వ్యక్తిగతమైన విషయములకొరకు ఉపయోగించుకుంటారు.

శెలవు దినము వచ్చింది అనుకోండి, ఇహలోకములో విశ్రాంతి తీసుకోవడానికి, సరదాగా గడపడానికి ఉపయోగిస్తారు. అయితే దేవునిని ఎరిగిన వారు, ఈ దినము యొక్క ప్రాముఖ్యత తెలిసినవారు మాత్రము ఆయన సన్నిధిని పోగొట్టుకొనరు.

దేవుని సన్నిధిలో పూర్ణ సంతోషము ఉంది. అయితే లోకములో ఉన్నవారు ఈ దినమును సంతోషముగా ఉండటానికే ప్రయత్నిస్తారు. అయితే దేవుని సన్నిధిలోని శక్తి, ప్రభావము లేదా బలము, నీ ప్రయత్నములు లేకుండా దేవుడే నీవు సంతోషించునట్లు తన కార్యములు జరిగిస్తాడు.

నేను యీవిని అపేక్షించి యీలాగు చెప్పుటలేదు గాని మీ లెక్కకు విస్తారఫలము రావలెనని అపేక్షించి చెప్పు చున్నాను.౹ -ఫిలిప్పీయులకు 4:17

“మీ లెక్క” అనగా మనము చేస్తున్న ప్రతీ పనికీ ఒక లెక్క లిఖించబడుతుంది. కాబట్టి ఈ దినము కొరకు నీవు సిద్ధపడే విధానము కూడా ప్రభువు గమనిస్తాడు.

నా విశ్రాంతిదినమున వ్యాపారము చేయకుండ నాకు ప్రతిష్ఠితమైన దినమని నీవు ఊరకుండినయెడల విశ్రాంతిదినము మనోహరమైనదనియు యెహోవాకు ప్రతిష్ఠితదినమనియు ఘనమైనదనియు అనుకొని దాని ఘనముగా ఆచరించినయెడల నీకిష్టమైన పనులు చేయకయు వ్యాపారము చేయ కయు లోకవార్తలు చెప్పుకొనకయు ఉండినయెడల నీవు యెహోవాయందు ఆనందించెదవు దేశముయొక్క ఉన్నతస్థలములమీద నేను నిన్నెక్కించెదను నీ తండ్రియైన యాకోబు స్వాస్థ్యమును నీ యనుభవ ములో ఉంచెదను యెహోవా సెలవిచ్చిన వాక్కు ఇదే. -యెషయా 58:13-14

ఈ దినము చాలా ప్రశస్తమైన దినము అనేది కేవలము మాటలలో కాక, మన క్రియలలో కూడా కనపరచాలి. దేవుని సన్నిధి యొక్క ప్రాముఖ్యత తెలియనప్పుడు, మన అలసట, అవసరములు మాత్రమే ఎక్కువగా కనపడతాయి. అదే దేవుని సన్నిధి యొక్క ప్రశస్తత ఎరిగి, ఆదివారము పోగొట్టుకొనకుండా, రాత్రంతా నిద్రలేకపోయినా సరే, తిరిగి ఆయన సన్నిధిలో ఆయనను ఆరాధించడానికి నీవు సిద్ధపడితే, నిన్ను తృప్తిపరచడానికి ప్రభువు ఎల్లప్పుడూ సిద్ధముగానే ఉంటాడు. మనము చేసే ప్రతీ పనికీ ఒక లెక్క రాయబడుతుంది.

మనలను తృప్తిపరచాలి అనేది తండ్రిగా ఆయన కోరిక. మనము దేవుని కొరకు చేసే ప్రతి పనికీ ఒక లెక్క ఉంటుంది. ఆ లెక్క ప్రకారము నీ తండ్రి ప్రతిఫలము ఇచ్చేవాడుగా ఉన్నాడు. ఆ ఫలము ఎలా ఉంటుంది అంటే, “మీ లెక్కకు విస్తారమైన ఫలము”. నాటిన విత్తనము యొక్క ఫలము సరైన సమయములో సిద్ధపరచబడుతుంది.

యెహోవాయే నిజమైన దేవుడు, ఆయనే జీవముగల దేవుడు, సదాకాలము ఆయనే రాజు, ఆయన ఉగ్రతకు భూమి కంపించును, జనములు ఆయన కోపమును సహింపలేవు. -యిర్మీయా 10:10
యాకోబునకు స్వాస్థ్యమగువాడు వాటివంటివాడు కాడు; ఆయన సమస్తమును నిర్మించువాడు, ఇశ్రాయేలు ఆయనకు స్వాస్థ్యముగానున్న గోత్రము; సైన్యములకధిపతియగు యెహోవాయని ఆయనకు పేరు. -యిర్మీయా 10:16

మనము ఎవరి సన్నిధిలో ఉంటున్నామో అనే సంగతి మనము గమనించాలి. అలాగే మన దేవుడు ఎటువంటివాడో అనే సంగతి మనము గమనించాలి. ఆయన నిజమైన దేవుడు, జీవముగల దేవుడు, సదాకాలము ఆయనే రాజు, ఆయన సమస్తమును నిర్మించువాడు, ఏర్పరచబడిన నీవు నేను ఆయనకు స్వాస్థ్యము, మరియు సైన్యములకధిపతియగు యెహోవాయని ఆయనకు పేరు.

వయస్సు వచ్చినవారు అభ్యాసముచేత మేలు కీడులను వివేచించుటకు సాధకముచేయబడిన జ్ఞానేంద్రియములు కలిగియున్నారు గనుక బలమైన ఆహారము వారికే తగును. -హెబ్రీయులకు 5:14

నీవు సంతోషముగా ఉండునట్లు, ఉన్న్నతమైన స్థలములలో ఎక్కించబడునట్లు అవసరమైన సమస్తమును అనగా మార్గమైనా, రిసోర్స్ అయినా, నిర్మించువాడు. ఈ సత్యమును ఎరిగి మనము ఆరాధించినపుడు మన కొరకు మార్గము సిద్ధపరచబడుతుంది.

స్తుతియాగము అర్పించువాడు నన్ను మహిమ పరచుచున్నాడు నేను వానికి దేవుని రక్షణ కనుపరచునట్లు వాడు మార్గము సిద్ధపరచుకొనెను. -కీర్తనలు 50:23

మనము దేవుని ఆరాధన చేస్తున్నపుడు, ఖచ్చితముగా కొన్ని క్రియలు కనపరచబడతాయి. “ఉన్నతమైన స్థలములపైన నిన్ను నిలబెడతాను” అని ప్రభువు ఇచ్చిన వాగ్దానము కొరకైన దేవుని క్రియలు ఖచ్చితముగా, నమ్మిన మీ జీవితములో కనపరచబడతాయి.

మనము దేవుని ఆరాధన చేస్తుండగా వెనుక దేవుని క్రియలు నీ జీవితమును వృద్ధిలోనికి తెచ్చునట్లుగా కనపరచబడతాయి. మన జీవితము ఎప్పుడూ దేవునికి మహిమకరముగానే ఉంటుంది. ఈ నిరీక్షణ నుండి మనము తొలగిపోకూడదు.

నీ జీవితము గురించి బయటివాళ్ళకు తెలిసినదానికంటే, నీ ప్రభువుకే యెక్కువగా తెలుసు. నీవు సైతము దేవునికి ప్రియ కుమారుడవే, కుమార్తెవే కదా!

మన దేవుడు నిజమైన వాడు అనగా ఖచ్చితముగా ఆయన చేయు కార్యములు మనకు కనపరచువాడు. మనలను నిర్మించువాడు అనుదినము ఆయనలో మనము నడుస్తున్నపుడు, ఉన్నతముగా నిర్మించబడతాము.

మన అందరికీ కోరికలు ఉంటాయి అయితే దేవుని తీర్మానమే స్థిరము. నా ఇష్టము కాదు కానీ దేవుని చిత్తమే నా జీవితములో ఫైనల్ అని మనము సిద్ధపడినప్పుడు ఆయన సూపర్నేచురల్ కార్యములు చూడగలుగుతావు.

సాక్ష్యములతో ఈ సంఘమును కడతాను అని జీసస్ కేర్స్ యూ మినిస్ట్రీ గురించి ప్రభువు చెప్పాడు. గనుక ఈ మినిస్ట్రీ తో జతపరచబడిన మన అందరమూ సూపర్నేచురల్ సాక్ష్యములను ఖచ్చితముగా అనుభవిస్తాము, ప్రకటిస్తాము. దేవుడు నీ గురించి మాట్లాడటము అనేది నీ ధన్యత! ఈ సత్యము ఎరిగి నీవు చేసే ఆరాధన వ్యర్థము కాదు!

మన మధ్య ఉన్న దేవుడు నిజమైన దేవుడు, నీ హృదయపు లోతులలోనుండి ఈ దినము నీవు ఆరాధించినపుడు, ఏ జీవమైతే ఎండిన స్థితిలో ఉందో, దానిని జీవముతో ఈ దినము నీ దేవుడు నింపుతాడు.

ఆరాధన గీతము

నీవు చేసిన మేళ్ళకు – నీవు చూపిన కృపలకు
అనుపల్లవి:వందనం యేసయ్య – వందనం యేసయ్య

ఏ పాటివాడను నేను – నన్నెంతగానో ప్రేమించావు
అంచెలంచెలుగా హెచ్చించి – నన్నెంతగానో దీవించావు

బలహీనులమైన మమ్ము – నన్నెంతగానో బలపరచారు
క్రీస్తేసు మహిమైశ్వరములో – ప్రతి అవసరమును తీర్చావు

ఈ దినము ఇంకా మనము జీవించి ఉన్నాము అంటేనే, మన యేదల దేవుని ఉద్దేశ్యము ఏమైతే ఉందో అది ఖచ్చితముగా నెరవేర్చబడుతుంది. అది నెరవేర్చబడేవరకు నీవు మరణించవు.

నీవు ఈ దినము 30 యంతల వరకు ఎదిగావా? 60 యంతల వరకు ఎదుగుతావు. 60 యంతల వరకు ఎదిగావా? సంపూర్ణము చేయబడతావు. నీ యందలి దేవుని ఉద్దేశ్యము నెరవేరకుండా నీ జీవితము ముగించబడదు.