20-Nov-2022 – ఆదివారము ఆరాధన – నీవు క్షేమంగా ఉండటానికి

Main Message | మెయిన్ మెసేజ్

బహు భయంకరమైన అంత్య దినాలలో, క్షేమము కనబడని, అపాయకరమైన దినాలలో నీవు క్షేమముగా ఎలా ఉండగలము? ఏమి చేస్తే మనము క్షేమముగా ఉండగలము.

రూతు గ్రంథము మొదటి అధ్యాయములో నయోమి జీవితము ద్వారా మనము ఈ విషయాన్ని నేర్చుకుందాము.

న్యాయాధిపతులు ఏలిన దినములయందు దేశములో కరవు కలుగగా యూదా బేత్లెహేమునుండి ఒక మనుష్యుడు తన భార్యను తన యిద్దరు కుమారులను వెంట బెట్టుకొని మోయాబుదేశమున కాపురముండుటకు వెళ్ళెను. ఆ మనుష్యునిపేరు ఎలీమెలెకు, అతని భార్యపేరు నయోమి; అతని యిద్దరు కుమారుల పేళ్లు మహ్లోను కిల్యోను; వారు యూదా బేత్లెహేమువారైన ఎఫ్రాతీయులు; వారు మోయాబు దేశమునకు వెళ్లి అక్కడ కాపురముండిరి.- రూతు 1:2

కరువు కారణము చేత బెత్లెహేము విడిచిపెట్టి అక్కడ నుండి మోయాబు దేశమున కాపురముండుటకై ఈ మనుష్యుడు తన కుటుంబముతో కలిసి వెళ్ళెను.

నయోమి పెనిమిటియైన ఎలీమెలెకు చనిపోయిన తరువాత ఆమెయు ఆమె యిద్దరు కుమాళ్లును నిలిచియుండిరి. వారు మోయాబుస్త్రీలను పెండ్లి చేసికొనిరి. వారిలో ఒకదానిపేరు ఓర్పా రెండవదానిపేరు రూతు. వారు ఇంచుమించు పది సంవత్సరములు అక్కడ నివసించిన తరువాత మహ్లోను కిల్యోనను ఇద్దరును చనిపోయిరి; కాగా ఆ స్త్రీ తాను కనిన యిద్దరు కుమారులును తన పెనిమిటియు లేనిదాయెను – రూతు 1:3-5.

మోయాబులో ఉన్న పది సంవత్సరాలలో మొదట నయోమి భర్త చనిపోయాడు. ఇద్దరు కుమారులుకూడా చనిపోయారు. వీరు ఎక్కడనుండి బయలుదేరారు అని గమనిస్తే “బెత్లెహేము” ను విడిచి వెళ్ళారు. “బెత్లెహేము” అనగా “రొట్టెల గృహము” అని అర్థము. అయితే బెత్లెహేము గురించి ఏమి వ్రాయబడింది?

కాబట్టి రాజు ప్రధాన యాజకులను ప్రజలలోనుండు శాస్త్రులను అందరిని సమ కూర్చిక్రీస్తు ఎక్కడ పుట్టునని వారినడిగెను. అందుకు వారుయూదయ బేత్లెహేములోనే; ఏల యనగాయూదయదేశపు బేత్లెహేమా నీవు యూదా ప్రధానులలో ఎంతమాత్రమును అల్పమైనదానవు కావు;ఇశ్రాయేలను నా ప్రజలను పరిపాలించు అధిపతి నీలోనుండి వచ్చును – మత్తయి 2:4.5.

నయోమి కుటుంబముకు బెత్లెహేము విషయములో దేవుని ఉద్దేశ్యము ఎరగని వారుగా కరువు రాగానే అక్కడి నుండి వెళ్ళిపోయారు. నీ జీవితములో దేవుని ఉద్దేశ్యము నీవు ఎరగకుండా ఉన్నట్టయితే, నీవు కూడా కరువు సమయములో దేవుని ఉద్దేశ్యమును విడిచిపెట్టేవాడవుగా ఉంటావు. నయోమి కూడా దేవుని గూర్చి మంచి విషయాలు చెప్పినదే కానీ, దేవుని ఉద్దేశ్యము ఎరగనిదిగా ఉంటుంది.

నయోమి తన యిద్దరు కోడండ్రను చూచిమీరు మీ తల్లుల యిండ్లకు తిరిగి వెళ్లుడి; చనిపోయిన వారి యెడలను నా యెడలను మీరు దయచూపినట్లు యెహోవా మీ యెడల దయచూపునుగాక – రూతు 1:8

తన కరువులో కూడా దేవుడు దయచూపించువాడు అని ఎరగనిదిగా తన దేశమును విడిచిపెట్టి మోయాబు దేశమునకు వెళ్ళిపోతుంది. మనము కూడా దేవుని అంగీకరించిన మొదటిలో ఉన్నంత ఆసక్తి, ఆశ, సమయము గడిచే కొద్దీ మొదట కలిగిన ప్రేమను మర్చిపోయేవారిగా అయిపోతున్నాము. అందుకే మన జీవితములో దేవుని ఉద్దేశ్యము ఏమి అయిందో దానిని ఎరిగి ఉండాలి.

మరియు ఎవరిని ముందుగా నిర్ణయించెనో వారిని పిలిచెను; ఎవరిని పిలిచెనో వారిని నీతిమంతులుగా తీర్చెను; ఎవరిని నీతిమంతులుగా తీర్చెనో వారిని మహిమ పరచెను – రోమా 8:30.

మనలను పిలిచి నీతిమంతులుగా తీర్చాడు. దీనిని బట్టి ఆయన మన ద్వారా మహిమ పరచబడాలి అని దేవుని చిత్తము అయి ఉంది.

అబ్రాహాము దినములలో వచ్చిన మొదటి కరవు గాక మరియొక కరవు ఆ దేశములో వచ్చెను. అప్పడు ఇస్సాకు గెరారులోనున్న ఫిలిష్తీయుల రాజైన అబీమెలెకు నొద్దకు వెళ్లెను. అక్కడ యెహోవా అతనికి ప్రత్యక్షమైనీవు ఐగుప్తులోనికి వెళ్లక నేను నీతో చెప్పు దేశమందు నివసించుము – ఆదికాండము 26:1-2.

కరువు వచ్చిన సమయములో ఇస్సాకు కూడా తన దేశమును విడిచి వెళ్ళుటకు ఆలోచన కలిగి ఉన్నప్పుడు, దేవుడు ఇస్సాకును వెళ్ళనీయలేదు.

ఏలయనగా నీకును నీ సంతానమునకును ఈ దేశములన్నియు ఇచ్చి, నీ తండ్రియైన అబ్రాహాముతో నేను చేసిన ప్రమాణము నెరవేర్చి, ఆకాశ నక్షత్రములవలె నీ సంతానమును విస్తరింపచేసి ఈ దేశములన్నియు నీ సంతానమునకు ఇచ్చెదను. నీ సంతానమువలన సమస్త భూలోకములోని సమస్త జనులు ఆశీర్వదింపబడుదురు.- ఆదికాండము 26:4.

ఇక్కడ అబ్రహాముతో చేసిన వాగ్దానమును ఇస్సాకుకు జ్ఞాపకము చేస్తున్నాడు. అయితే ఇప్పుడు అక్కడ కరువు ఉంది. మరి దేవుడు కరువు కలిగిన ప్రదేశాన్ని వాగ్దానము చేస్తాడా? దేవునిగూర్చిన సరైన అనుభవము కలిగి ఉన్నప్పుడు సత్యము గ్రహించగలుగుతాము. అసలు దేవుని ఉద్దేశ్యము నీకు మొదటిగా తెలియపరచబడినప్పుడు దేవుడు ఏమి చెప్పాడు? అనేది నీవు జ్ఞాపకము కలిగే ఉండాలి. నీవు పడిపోకుండా, నీవు దేవుని ఉద్దేశ్యము మరిచిపోకుండా ఆయన చిత్తమును దైనందిన జీవితములో గ్రహించులాగున ఆ వాగ్దానములు ఇవ్వబడ్డాయి.

అయితే మన జీవితములలో ధన్యత ఏమిటి అంటే, నీవు కుడికైనను ఎడమకైనను తిరిగినప్పుడు పరిశుద్ధాత్మదేవుడు సరైన విధానమును బోధిస్తాడు. మన దేవుడు అన్యాయము చేయుట అసంభవము. నీవు పిలువబడ్డావు, నీతిమంతునిగా తీర్చబడ్డావు అటువంటి నీ జీవితములో మహిమపరచబడటమే దేవుని చిత్తము.

లాజరు చనిపోయి సమాధి చేయబడినప్పుడు, మార్తతో చెప్తున్న మాటలు ఏమిటి? ఇప్పుడైనను నీవు నమ్మిన యెడల నీవు అద్భుతము చూస్తావు అని. నీ జీవితములో కూడా మృతమైన నీ పరిస్థితులలో అద్భుతము చేయాలి అని దేవుని ఉద్దేశ్యము. మరి నీవు నమ్మగలుగుతావా?

ఇస్సాకు కూడా తాను ఆ దేశాన్ని విడిచిపెట్టాలి అనే ఆలోచన కలిగి ఉన్నప్పుడు, దేవుడు చెప్పిన మాట ప్రకారము ఆ దేశములోనే ఉండి నూరంతల ఫలము పొందాడు. మన జీవితములో కూడా కష్ట పరిస్థితులు ఉన్నప్పటికీ, ఎండిన జీవితము కలిగి ఉన్నప్పటికీ ఆయన సమృద్ధియైన జీవము ఇవ్వడానికి వచ్చాడు కనుక ఆయనను ఆయన మాటను నమ్మి ఆశీర్వదించబడతాము. మన కరువులో దేవుని విడిచిపెట్టడము అంటే, మనము దేవుని అనుసరించే విధానములో మార్పు వస్తుంది. ఆదివారము వెళ్ళినా కూడా ఆచార యుక్తముగా మాత్రమే చేసేవారిగా అవ్వటము, దేవుని ఉద్దేశ్యమునుండి తొలగిపోవడమే.

రూతును గమనిస్తే తాను బెత్లెహేమును విడిచిపెట్టిన తరువాత, మోయాబులో నివాసము ఉండుటకు వచ్చింది. కొన్ని దినాలు అక్కడ బాగానే ఉంది. అక్కడ మొదట తన భర్తను కోల్పోయింది. అయినా బాగానే ఉంది, తన బిడ్డలకు వివాహము చేసింది. మన జీవితములో కూడా ఆచారయుక్తమైన భక్తి మాత్రమే కలిగి ఉంటే, మన జీవితములో కొంతవరకు బాగానే ఉండవచ్చు కానీ, ఎదో ఒక పరిస్థితిలో నీ ఆధారాన్ని కోల్పోయేవారముగా ఉంటాము.

యెహోవా యెడల భయభక్తులు కలిగిఉన్నవారి యెడల దేవుని దూత కావలిగా ఉండును. అయితే ఎప్పుడైతే నీవు దేవుని ఉద్దేశ్యమును ఎరగక చేసిన కార్యములను బట్టి దేవుని విసర్జించినప్పుడు నీకు నీవే నష్టము కలిగించుకుంటావు.

దేవుడైన యెహోవా నిన్ను మార్గములో నడిపించుచుండగా నీవు ఆయనను విసర్జించుట వలన నీకు నీవే యీ బాధ కలుగజేసికొంటివి గదా – యిర్మీయా 2:17.

దేవుని విడిచిపెట్టిన తరువాత కొన్ని దినాలు బాగానే ఉంటుందేమో కానీ ఖచ్చితముగా కష్టము నష్టము కలుగుతుంది. నీవు చేసిన కార్యమును బట్టి అపవాదికి అవకాశము దొరుకుతుంది. రూతు కూడా అలాగే సమస్తము పోగొట్టుకుంది. దేవునితో ఉన్నప్పుడు సమృద్ధీయిన జీవితము. కరువైనా కూడా దానిలో సమృద్ధిని దయచేయువాడు అయిన వాడు మన దేవుడు.

వారికి ఆహారమిచ్చుటకు యెహోవా తన జనులను దర్శించెనని ఆమె మోయాబుదేశములో వినెను గనుక మోయాబు దేశము విడిచి వెళ్లుటకై ఆమెయు ఆమె కోడండ్రును ప్రయాణమైరి – రూతు 1:6.

“వారికి” అనగా ఎవరికి? కరువులో కూడా దేవుని మీద ఆనుకుని, దేవుని నమ్మిన వారికి. ఇప్పుడు రూతుకు ఈ విషయము తెలిసినప్పుడు, ఏ బెత్లెహేమును విడిచిపెట్టిందో అదే బెత్లెహేమునకు తిరిగి వెళ్ళాలి అని నిర్ణయించుకుంది. అనగా దేవుని ఉద్దేశ్యము మాత్రమే ఆయనను నమ్ముకున్నవారి జీవితములో నెరవేరుతుంది.

దావీదు జీవితములో అనేకమైన మరణకరమైన పరిస్థితులు ఉన్నప్పుడు దేవుని సన్నిధిలో కనపడటానికి అత్యంత ఆసక్తి కనపరిచాడు.

నా ప్రాణము దేవునికొరకు తృష్ణగొనుచున్నది జీవము గల దేవునికొరకు తృష్ణగొనుచున్నది దేవుని సన్నిధికి నేనేప్పుడు వచ్చెదను? ఆయన సన్నిధిని నేనెప్పుడు కనబడెదను? – కీర్తన 42:2
యెహోవా నాకు ఎత్తయిన కోట నా దేవుడు నాకు ఆశ్రయదుర్గము – కీర్తన 94: 22.

ఎప్పుడైతే నీవు ఆత్మీయ జీవితాన్ని జాగ్రత్తగా దేవుని యందలి విశ్వాసముచేత భద్రపరచుకుంటావో అప్పుడు నీవు దేవుని ఆశ్చర్యకరమైన అద్భుతములు చూడగలుగుతావు. నీవు దేవునికి ప్రత్యేకమైనవాడవు. రూతువలే దేవుని కార్యముల గూర్చి, ఆయనను నమ్మి నిలబడినవారి జీవితములో దేవుడు చేసిన అద్భుతములగూర్చిన సాక్ష్యము నీవు విన్నప్పుడైనా సరే నీ జీవితము సరిచేసుకోవడానికి సిద్ధపడండి. అలాగే నీవు ప్రభువును వెంబడించే విధానములో మార్పు వస్తుందా? ఈరోజు దేవుడు చెప్పిన మాటలకు స్పందించు.