20-10-2024 – ఆదివారం మొదటి ఆరాధన

ఆరాధన వర్తమానము

ఈ దినమున మన అందరినీ తన సన్నిధిలో నిలబెట్టిన దేవునికే సమస్త ఘనత, మహిమ కలుగును గాక. గడచిన దినములు అన్నీ ప్రభువు యొక్క కృపయే సంతోషింపచేసింది. ఆ దేవుని కృపను బట్టే మనము ఈరోజున ఆయనను స్తుతించవలసి ఉంది. మన స్తుతికి కారణభూతుడు మన దేవుడే, అనగా మనము స్తుతించగలడానికి కారణము ఆయనే.

దేవుని సన్నిధిలో పూర్ణ సంతోషము కలదు. ఈరోజు దేవుని సన్నిధికి వచ్చిన మనము అందరము ఆయనను ఎరిగి అనగా ఆయన ఏమై ఉన్నాడో ఎరిగి వచ్చాము. ఆయన శక్తి, మహిమ గ్రహించిన వారుగా మౌనముగా ఉండక ఉత్సహించి ఆరాధించేవారుగా ఉంటాము.

మనము అంత్య దినములలో ఉన్నాము. 666 అనే ముద్ర వేయబడితేనే గానీ, మనము ఏమీ పొందలేను, కొనలేని పరిస్థితిలోనికి వెళ్ళిపోతున్నాము. మనకు తెలియకుండానే చాలా త్వరగా పరిస్థితులు మారిపోతున్నాయి. గనుక మనము మన ఆత్మను సిద్ధపరచుకోవాలి. మన ఆత్మ మాత్రమే దేవుని స్వరమును వినగలుగుతుంది గనుక మన ఆత్మను సిద్ధపరచుకోవాలి.

దేవుని సన్నిధిలో మౌనముగా ఉండుట వలన ఏమీ ఉపయోగములేదు. మరణించినవాడే మౌనముగా ఉంటాడు. జీవించినవాడు మౌనముగా ఉండక స్తుతించేవాడుగా ఉంటాడు. మనము సజీవులమై ఉన్నందుకు దేవునికి స్తోత్రము. సజీవులే దేవుని స్తుతించేవారుగా ఉంటారు.

న్యాయాధిపతులు ఏలిన దినములయందు దేశములో కరవు కలుగగా యూదా బేత్లెహేమునుండి ఒక మనుష్యుడు తన భార్యను తన యిద్దరు కుమారులను వెంట బెట్టుకొని మోయాబుదేశమున కాపురముండుటకు వెళ్లెను – రూతు 1:1
వారికి ఆహారమిచ్చుటకు యెహోవా తన జనులను దర్శించెనని ఆమె మోయాబుదేశములో వినెను గనుక మోయాబు దేశము విడిచి వెళ్లుటకై ఆమెయు ఆమె కోడండ్రును ప్రయాణమైరి – రూతు 1:6

బెత్లెహేములో కరువు వచ్చిన కారణమున నయోమి కుటుంబము బెత్లెహేమునుండి బయటకు వెళ్ళారు. అయితే దేవుడు ఆ బెత్లెహేమును దర్శించినవాడుగా ఉన్నాడు. అదేవిధముగా మన పరిస్థితులలో కుడా మనలను దర్శించేవాడుగా ఉంటాడు, ఎందుకనగా మనము కూడా దేవుని బిడ్డలమే.

బెత్లెహేములో కరువు వచ్చింది, అయితే దేవుడు తన జనులను విడిచిపెట్టలేదు. ఇది ఎంతో గొప్ప సత్యము. దేవునిని తండ్రిగా కలిగిన మన జీవితములో ఏ కష్టము వచ్చినా సరే ఆయన మనలను విడిచిపెట్టడు. కొంతకాలము కష్టము ఉన్నప్పటికీ, దేవుడు తప్పక దర్శించి పరిస్థితి మార్చేవాడుగా ఉన్నాడు.

యెహోవా మోషేను చూచి–ఇదిగో నేను ఆకాశము నుండి మీ కొరకు ఆహారమును కురిపించెదను; వారు నా ధర్మశాస్త్రము ననుసరించి నడుతురో లేదో అని నేను వారిని పరీక్షించునట్లు ఈ ప్రజలు వెళ్లి ఏనాటి బత్తెము ఆనాడే కూర్చుకొనవలెను – నిర్గమకాండము 16:4

దేవునిలో మనము ఎలా ఎదుగుతున్నాము, ఆయనను గూర్చి ఏమి మనము తెలుసుకున్నాము? ఎలా వెంబడిస్తున్నాము అనేది పరీక్షించుటకే దేవుడు ఆలస్యమును అనుమతిస్తాడు.

మార్త మరియల ఇంటిలో లాజరు చనిపోకముందు, అనేకసార్లు బోధించినవాడుగా ఉన్నాడు. అయితే వారు ఎంతగా నేర్చుకున్నారో, ఎంతగా ఎదిగారో పరీక్షించడానికే లాజరు చనిపోయినప్పుడు ఆలస్యము చేసాడు. మరియ ప్రభువు పాదాల చెంత కూర్చుని వాక్యము వింటూ వచ్చింది. దానికొరకు ఉత్తమమైనదానిని ఎన్నుకుంది అనే సాక్ష్యము కూడా పొందింది. అయితే పరీక్ష సమయము వచ్చే సరికి మార్త వలెనే మరియకూడా స్పందించింది.

మనలను కూడా దేవుడు పరీక్షించేవాడుగా ఉన్నాడు. ఎప్పుడైతే మనము దేవుని గూర్చిన సత్యమును ఎరిగి ఉంటామో, అప్పుడు ఆయనను స్తుతించగలిగే విధముగా సిద్ధపడగలుగుతాము. అలా కాని యెడల, కేవలము హాజరు కోసమే ఆయన సన్నిధికి వచ్చేవారివిగా ఉంటావు.

ఆదివారము ఎంతో ప్రశస్తమైన దినము. ఈరోజు దేవుడు మనతో మాట్లాడే దినము. రాత్రి సమయములో ఈ దినము కొరకు ప్రార్థించేవారిగా ఉండాలి. నా ప్రియులు నిద్రించుచుండగా నేను వారికి ఇచ్చెదను అని ప్రభువు చెప్పుచున్నాడు. దినములు గడిచే కొద్దీ, మన ఆత్మీయమైన జీవితము బలముగా ఎదగాలి. లోకము వైపు చూడక దేవుని కొరకే మనము కనిపెట్టేవారిమిగా ఉండాలి.

మన దేవుడు ఎటువంటి దేవుడో అని జ్ఞాపకము చేసుకొంటే, తన జనులను దర్శించేవాడుగా ఉన్నాడు. మన దేవుడు మనలను దర్శించేవాడు. పౌలు తన కష్ట సమయములో సంతోషముగా ఉండటానికి కారణము, ఈ సత్యము ఎరిగి ఉండుటయే! మనము కూడా ఇటువంటి నిరీక్షణ కలిగి ఉండాలి. ఇది ఆయనను గూర్చి ఎరిగి ఉంటేనే గానీ, సాధ్యము కాదు.

నీ సరిహద్దులలో సమాధానము కలుగజేయువాడు ఆయనే మంచి గోధుమలతో నిన్ను తృప్తిపరచువాడు ఆయనే – కీర్తనలు 147:14

మనలను పోషించేవాడు, మనకు సమాధానము కలుగచేయువాడు ఆయనే. సరిహద్దు అంటే, మనకు కలిగిన సమస్తమును సూచించేది. ఆ సరిహద్దు లోపల ఎక్కడ ఏమి సమస్య ఉన్నప్పటికీ, అక్కడ సమాధానము కలుగచేసేవాడుగా ఉన్నాడు. అయితే మనము ఈ సత్య వాక్యమును పట్టుకొని నిలబడినప్పుడే సాధ్యమవుతుంది.

ఒకవేళ నీ జీవితములో వాక్యమును పట్టుకొని నిలబడినప్పటికీ ఇంకా ఏ మార్పు నీ జీవితములో లేకపోతే, ఈ సత్యమును జ్ఞాపకము పెట్టుకో –

ఎందుకనగా ఈ నిరీక్షణ మనలను సిగ్గుపరచదు. మనకు అనుగ్రహింపబడిన పరిశుద్ధాత్మద్వారా దేవుని ప్రేమ మన హృదయములలో కుమ్మరింపబడియున్నది – రోమా 5:5

ఈ నిరీక్షణ అంటే వాక్యమును పట్టుకొని నిరీక్షించుట. ఇలా వాక్యమును పట్టుకొని నిరీక్షించినపుడు నీవు సిగ్గుపడవు. నీ సరిహద్దులలో సమాధానమును కలుగచేయువాడు నీ దేవుడు. ఈ నిరీక్షణ నీ శక్తిని బట్టి సమాధానము కొరకు ఎదురుచూడటములేదు గానీ, దేవుని శక్తిని బట్టి, కృపను బట్టి నీవు ఎదురుచూస్తున్నావు. ఈ నిరీక్షణ సిగ్గుపరచదు అంటే, ఏ వాక్యము పట్టుకుని నిలబడ్డావో దాని ప్రకారము సమాధానము కలుగుట ఖచ్చితము.

వాక్యమునకు సృష్టించే శక్తి ఉందా? అని చూస్తే ఆదికాండములో సృష్టి విధానమంతా కూడా దేవుని వాక్కు వలననే జరిగింది. మన జీవితములో పరిస్థితులు ఎలా ఉన్నా సరే, దేవుని వాక్యమునకు శక్తి ఉన్నది. అటువంటి వాక్యము తప్పిపోయే చిన్న అవకాశము కూడా మనము ఇవ్వకూడదు. ఇటువంటి అవకాశము, మన ఆలోచనలలో ఇచ్చేవారముగా ఉంటాము. అందువలన, మన ఆలోచనలలో సహితము దేవుని వాక్కు మీద ఉన్న నిరీక్షణ తప్పిపోనివ్వకూడదు.

నయోమి విషయములో చూస్తే, దేవుడు నన్ను విడిచిపెట్టాడు, దేవుడు నన్ను శపించాడు అనే మాటలు పలికింది. అయితే, మనము ఆ విధముగా ఉండక, దేవుడు దర్శిస్తాడు అనే నిరీక్షణ కలిగి నిలబడి ఉండాలి. పరిస్థితి ఏదైనా, కొదువ ఏదైనా మన దేవుడు మనలను దర్శించేవాడు, తన ప్రేమను మాటి మాటికీ కనపరచేవాడు. చిన్న విషయాలలో ఆయన ప్రేమను గుర్తించినపుడు, గొప్ప విషయాలలో ఆయన ప్రేమను నమ్ముకుని ధైర్యముగా నిలబడేవారిగా ఉంటాము.

చాలామంది అనుకుంటారు, వారికి మంచి ఉద్యోగము ఉంది కాబట్టి తన జీవితమును మంచిగా జీవిస్తున్నాము అనుకుంటారు.

అన్నపానములు పుచ్చుకొనుటకంటెను, తన కష్టార్జి తముచేత సుఖపడుటకంటెను నరునికి మేలుకరమైనదేదియు లేదు. ఇదియును దేవునివలన కలుగునని నేను తెలిసి కొంటిని – ప్రసంగి 2:24

మనము మంచి ఉద్యోగము కలిగి ఉన్నాము అంటే, మన అవసరములు మనము తీర్చుకోగలుగుతున్నాము అంటే దాని అర్థము దేవుని కృప మనకు తోడుగా ఉంది అనే. ఆ ప్రేమను, కృపను పొందుకున్న మనము మనస్పూర్తిగా దేవునిని స్తుతించి ఆరాధించేవారిగా ఉండాలి.

ఆరాధన గీతము

నిను విడిచినను నీవు విడువవు