19-05-2024 – ఆదివారం రెండవ ఆరాధన

ఆరాధన వర్తమానము

ఈ సమయములో దేవుని సన్నిధిలో మన అందరము ధన్యులము. దేవుని ఆరాధించడానికి లోకమంతా ఒకవైపుకు వెళుతుంది, మనము మరొక వైపు ఉంటున్నాము. ఎందుకు మనము నమ్మిన దేవునిని వెంబడిస్తున్నాము అనేది మనము ఎరిగి ఉండాలి.

ఆయనను వెంబడించినంత కాలము, మనము పోషించబడతాము. గొర్రెలు కాపరిని వెంబడించినంత కాలము పోషించబడతాయి. మేత కొరకు స్థలము సిద్ధపరచుటలో కొంత సమయము కష్టము కలుగవచ్చు గానీ, మనము పోషింపబడటము మాత్రము ఖచ్చితము. పోషణ అంటే, నీ జీవితమునకు అవసరమైన ప్రతీదీ కేవలము ఆహారము మాత్రమే కాదు.

మన జీవితములు ఎండిన జీవితములు కానే కాదు! మన జీవితమునకు ఆధారము మన దేవుడే అయి ఉన్నాడు. సమస్తమును ఆయనను బట్టి, ఆయన ద్వారానే మనకు అనుగ్రహించబడుతున్నాయి.

కాపరి అందించే పోషణ కొరకు గొర్రెలు చేయవలసిన ఏకైక పని, ఆయనను వెంబడించడమే! ఒక్కోసారి రాళ్ళమీద నడిపించవలసి ఉంటుంది, అయితే ఆ సమయము అయిపోయిన తరువాత, మరల మంచినేల ఖచ్చితముగా వస్తుంది.

యెహోవాను స్తుతించుడి. ఆయన పరిశుద్ధాలయమునందు దేవుని స్తుతించుడి. ఆయన బలమును ప్రసిద్ధిచేయు ఆకాశవిశాలమందు ఆయనను స్తుతించుడి. -కీర్తనలు 150:1

మనము మన దేవుని సన్నిధికి నడిపించబడ్డాము, ఇప్పుడు ఆయనను స్తుతించాలి. ఆయన సన్నిధిలో ఉన్నపుడు ఆయనను స్తుతించకుండా మౌనముగా ఉండకూడదు. ఆయనను గూర్చిన సత్యమును ఎరిగిన వారు ఖచ్చితముగా మౌనముగా ఉండరు.

ఆయన ఆకాశమును మేఘములతో కప్పువాడు భూమికొరకు వర్షము సిద్ధపరచువాడు పర్వతములమీద గడ్డి మొలిపించువాడు పశువులకును అరచుచుండు పిల్ల కాకులకును ఆయన ఆహారమిచ్చువాడు. -కీర్తనలు 147:8-9

ఈ వాక్యమును బట్టి మన దేవుడు “సిద్ధపరచేవాడు” అని అర్థము చేసుకొనగలము. అరచుచుండు పిల్లకాకులకే ఆయన ఆహారమిచ్చువాడు అయితే వాటికంటే ఎంతో శ్రేష్టమైన మనకొరకు ఇంక ఎంత ఖచ్చితముగా సిద్ధపరుస్తాడు?

భూమి కొరకు ఎలా అయితే వర్షమును సిద్ధపరచాడో, అలాగే మనకొరకు కూడా ఆయన సిద్ధపరచినవాడుగా ఉన్నాడు. ఉదాహరణకు మనకు జన్మదినము గానీ, మరే దినమైనా గానీ మనము జరుపుకుంటున్నపుడు, నూతన దయాకిరీటము దయచేసాడు అని ఆరాధిస్తాము. అయితే ఆ సంవత్సరములో ఏమి జరగాలో ఎప్పుడు జరగాలో అంతా ముందే నిర్ణయించి ఆ దయా కిరీటము ధరింపచేసాడు. అలాగే, అపవాది మన జీవితములను లాక్కుపోవడానికి అనేకమైన ప్రయత్నములు చేస్తూనే ఉంటాడు. మనము దేవునికి స్తుతి ఆరాధన చేసినపుడు, కృతజ్ఞత చెల్లించినపుడు ఆ అపవాది ప్రయత్నములను లయము చేసేదిగా ఉంటుంది. ఒకవేళ నీ జీవితములో ఎండిన స్థితి ఉంటే, నీవు చేసే స్తుతి ఆరాధన ఆ ఎండిన స్థితిని జీవముతో నింపుతుంది.

అరచుచుండు పిల్లకాకులకు ఆయన ఆహారము ఇస్తున్నాడు అంటే, ఏమికావాలి అని అవి అరుస్తున్నాయో, ఆ కోరిక తీరులాగున వాటికొరకు సిద్ధపరచువాడుగా ఉన్నాడు. అలాగే మనము కూడా కోరినదానిని దయచేయువాడుగా మన దేవుడు ఉన్నాడు. అసలు దేవుని కృపను గూర్చి తెలిసినవాడు అలా నిలబడగలుగుతాడు. కృప మన వల్ల కానిదానిని సాధ్యము చేస్తుంది. మనము ఎప్పుడు కృపకొరకు కనిపెడతాము? మనకు కష్టము, శ్రమ ఉన్నప్పుడు కృప కొరకు కనిపెడతాము.

గుఱ్ఱముల బలమునందు ఆయన సంతోషించడు నరులకాలిసత్తువయందు ఆయన ఆనందించడు. తనయందు భయభక్తులుగలవారియందు తన కృపకొరకు కనిపెట్టువారియందు యెహోవా ఆనందించువాడైయున్నాడు. యెరూషలేమా, యెహోవాను కొనియాడుము సీయోనూ, నీ దేవుని కొనియాడుము. ఆయన నీ గుమ్మముల గడియలు బలపరచియున్నాడు నీమధ్యను నీ పిల్లలను ఆశీర్వదించియున్నాడు. -కీర్తనలు 147:10-13

మనము కృపకొరకు కనిపెడుతున్నపుడు ఆశీర్వాదము కలుగుతుంది. గుమ్మముల గడియలు బలపరచబడుతాయి, అంటే శత్రువు చేసే ప్రతీ దాడినుండి రక్షణ కలుగుతుంది. అలాగే నీ పిల్లలను దేవుడు ఆశీర్వదించియున్నాడు.

అటువంటి దేవునిని మనము స్తుతించకుండా ఎలా ఉండగలము? మన సంతోషమునకు వ్యతిరేకముగా ఏమి జరగనివ్వని దేవుడు మన దేవుడు. ఏ మానవుని అపవాది తన కుయుక్తి ద్వారా మోసముచేసి, దేవుడిచ్చిన దానిని పోగొట్టుకొనేలా చేసాడు. అప్పుడు నీ దేవుడు రోషము కలిగి, మానవ రూపములో వచ్చి ఆ మరణమును జయించి మనకు స్వాతంత్ర్యము ఇచ్చాడు. ఇంక మనకు విరోధముగా రూపింపబడిన ఏ ఆయుధము వర్థిల్లదు అని ప్రభువు చెప్పుచున్నాడు. అయితే మనము యదార్థముగా వెంబడించాలి.

యోబు యదార్థముగా దేవునిని వెంబడించాడు. సమస్తమును పోగొట్టుకున్న తరువాత కూడా యెహోవ ఇచ్చెను, యెహోవా తీసుకొనెను అని చెప్పగలిగాడు. దేవుని చేత ఆశీర్వాదము మాత్రమే అనుభవిస్తామా? శ్రమ అనుభవించమా? అని అడగగలిగాడు. అందుకే ఆ శ్రమ తీరిన తరువాత, రెండంతల ఆశీర్వాదము పొందగలిగాడు.

మన జీవితము దినదినము, అంతకంతకు వృద్ధి కలుగజేయబడే జీవితము. దేవుని వెంబడిస్తున్న మన జీవితములో మరణమే లేదు.

ఆరాధన గీతము

నీ కృప చాలును
నీ ప్రేమ చాలును
నీవు నాకు తోడుంటే చాలును యేసు
నీవు లేని జీవితం అంధకార బంధురం
నీవు నాకు తోడుంటే చాలును యేసు

శోధనలు ఎన్నియో వేదనలు ఎన్నియో
నన్ను కృంగదీయు సంకటములెన్నియో
నీ ప్రేమ వర్షం నా స్థితిని మార్చెగా
నా జీవితాంతము నీలోనే నిలిచెదన్
నా జీవితాంతము నీతోనే నడిచెదన్
నీవు నాకు తోడుంటే చాలును యేసు

నా ప్రేమ గీతం – నా దీన ప్రార్ధన
నా హృదయ ఆలాపన అందుకో దేవా
నిను పోలి నేను ఈ లోకమందు
నీ సాక్షిగాను నీ మహిమ చాటెదన్
నీ దివ్య వాక్యం ఈ జగాన చాటెదన్
నీ ఆత్మ అభిషేకం నాకు నొసగు దేవా (2)

నా ప్రేమ గీతం – నా దీన ప్రార్ధన
నా హృదయ ఆలాపన అందుకో దేవా (2)