19-05-2024 – ఆదివారం మొదటి ఆరాధన

ఆరాధన వర్తమానము

దేవుని నామములో మీ అందరికీ శుభములు. మరొక దినము తన సన్నిధిలో మనలను నిలబెట్టిన ప్రభువుకే మహిమ కలుగును గాక, ఆమేన్!

కావునమునుపటి ప్రవర్తన విషయములోనైతే, మోసకరమైన దురాశవలన చెడిపోవు మీ ప్రాచీనస్వభావమును వదలుకొని౹ మీ చిత్తవృత్తియందు నూతనపరచబడినవారై,౹ నీతియు యథార్థమైన భక్తియుగలవారై, దేవుని పోలికగా సృష్టింప బడిన నవీనస్వభావమును ధరించుకొనవలెను. -ఎఫెసీయులకు 4:22-24

గడచిన సంవత్సరములు వచ్చి దేవుని వాక్యమును విని వెళ్ళిపోయేవారముగా ఉన్నామేమో. అయితే ఈసారి మాత్రము, విన్న వాక్యమును మరువక, ఆ వాక్యము ప్రకారము మన జీవితమును కట్టుకొని, దేవునికి మహిమకరముగా సిద్ధపడదాము.

మన దేవునిని ఆరాధించడానికి ఎల్లప్పుడు జ్ఞాపకము పెట్టుకోవలసిన విషయము, మన దేవుడు ఏమై ఉన్నాడో ఎరిగి ఉండుట. ఇశ్రాయేలు ప్రజలు దేవునిని తెలుసుకోలేకపోవడము చేత, వారు దేవుని అద్భుతములు కోల్పోయినవారుగా ఉన్నారు. వారు తమ దేవుడు ఏమై ఉన్నాడో ఎరగని కారణము చేత, ఎంతో ఆశ్చర్యకరమైన రీతిలో ఫరో చేతిలోనుండి విడిపించి, నడిపించిన దేవుని మరచి, ఒక దూడను చేసుకొని, వారిని నడిపించింది ఆ దూడయే అని వారు దేవుని విసిగించినవారుగా ఉన్నారు.

ఈరోజు పెంతెకోస్తు దినము. మోషే దినములలో ధర్మశాస్త్రము ఇచ్చిన తరువాత 50 వ రోజుల తరువాత 3000 మంది చనిపోయారు. అయితే ప్రభువైన క్రీస్తు పునరుత్థానుడైన తరువాత 50 వ రోజుల తరువాత 3000 మంది రక్షించబడ్డారు.

యెహోవాయే దేవుడని తెలిసికొనుడి ఆయనే మనలను పుట్టించెను మనము ఆయన వారము మనము ఆయన ప్రజలము ఆయన మేపు గొఱ్ఱెలము. -కీర్తనలు 100:3

మనలను దేవుడే పుట్టించాడు. ఆయన చేతులు మనలను సృష్టింపచేయబడింది. ఆదామును మట్టితో చేసాడు, అయితే మనలను ప్రభువైన యేసుక్రీస్తు తన శరీరమును నలుగగొట్టుకొని మనలను నిర్మించారు. యేసు ప్రభువే మన గుర్తింపు. మనము ఆయన వారము, ఆయన మేపు గొర్రెలము అయి ఉన్నాము.

మన దేవుడు మన కాపరి గనుక, ఆయనను వెంబడించినంతకాలము, చక్కగా మేలైన మేత మేసి తృప్తిచెందేవారముగా ఉంటాము. ఎందుకనగా ఆయన మనలను జీవము వైపే నడిపించేవాడుగా ఉన్నాడు.

ఏలయనగా ఆకాశమందున్నవియు భూమియందున్న వియు, దృశ్యమైనవిగాని, అదృశ్యమైనవిగాని, అవి సింహాసనములైనను ప్రభుత్వములైనను ప్రధానులైనను అధికారములైనను, సర్వమును ఆయనయందు సృజింప బడెను, సర్వమును ఆయనద్వారాను ఆయననుబట్టియు సృజింపబడెను.౹ -కొలొస్సయులకు 1:16

సర్వమును ఆయనయందు సృజింప బడెను, సర్వమును ఆయనద్వారాను ఆయననుబట్టియు సృజింపబడెను. అనగా మనకు కావలసిన ప్రతీదీ, ఆయనను బట్టి, ఆయన ద్వారా కలుగుతుంది. అయితే ఇది ఎలా జరుగుతుంది? ఉదాహరణకు మనకు ఉద్యోగము కావాలి, ఆరోగ్యము కావాలి అంటే అది ఎలా జరుగుతుంది?

నీతిమంతుడు విశ్వాసము మూలముగా జీవించును. మరి దేవునిని విశ్వసించాలి అంటే ఆ విశ్వాసానికి పునాది ఏమిటి? నీ దేవుడు మృతమైనదానిని సజీవముగా చేయగలవాడు, లేనిదానిని ఉన్నట్టుగా చేయగలవాడు అనే సత్యమే!

దేవుడు కాపరిగా ఉండి, మనము గొర్రెలుగా ఉంటున్నాము. ఎలా అయితే కాపరి వెంట గొర్రెలు నడుస్తాయో అలాగే మనము కూడా యేసయ్య వెంట నడిచేవారిగా ఉండాలి. లోకమునకు యేసయ్యను గూర్చిన సత్యము తెలియలేదు గనుకనే ఆయనను పొందుకోలేని వారిగా ఉంటున్నారు.

ఒక కాపరి తన గొర్రెలను నడిపించే క్రమములో ఒక్కోసారి కొంతకాలము వ్యవధిలో ఇబ్బంది కలగవచ్చేమో గానీ, ఆ ఆటంకములలో, ఇబ్బందిలో, శ్రమలో నీవు ముగించబడవు కానీ, ఆయన సిద్ధపరచిన జీవమును ఖచ్చితముగా పొందుకుంటావు. ఎందుకనగా, ఆయనే సిద్ధపరచి ఇచ్చేవాడుగా ఉన్నాడు.

మన జీవితములో ప్రతీ క్షణము ఆయన మహిమపరచబడాలి అనేది ఆయన కోరిక. గనుకనే ఆయన మనలను తృప్తిపరచడానికి సమస్తము చేసేవాడుగా ఉన్నాడు. ఇశ్రాయేలు ప్రజలకు ఆయనే రాజుగా ఉండాలి అని కోరుకున్నాడు. అయితే వారు మాత్రము మరొక మనుష్యుడు వారికి రాజుగా ఉండాలి అని కోరుకున్నారు. ఈ లోకములో తల్లి ప్రేమకు సాటిలేదు, గానీ దానికి మించిన ప్రేమ యేసయ్య ప్రేమ.

తల్లి మరణమగునంతగా శ్రమపడటానికి సిద్ధపడి జన్మనిస్తుంది. యేసయ్య తన ప్రాణమంతా ధారపోసి మనలను కనినవాడై ఉన్నాడు.

కృతజ్ఞతార్పణలు చెల్లించుచు ఆయన గుమ్మములలో ప్రవేశించుడి కీర్తనలు పాడుచు ఆయన ఆవరణములలో ప్రవేశించుడి ఆయనను స్తుతించుడి ఆయన నామమును ఘనపరచుడి. యెహోవా దయాళుడు ఆయన కృప నిత్యముండును ఆయన సత్యము తరతరములుండును. -కీర్తనలు 100:4-5

గతవారమంతా మనకు కావలసిన సమస్తము సిద్ధపరచారు గనుక మనము మన హృదయమును కృతజ్ఞతగా అర్పించాలి. ఎలా అంటే, ప్రభువా నేను ఈరోజు ఈ స్థితిలో ఉండటానికి కారణము నా బలము, నా శక్తి కాదు గానీ, నీ కృపయే నీ దయయే అని ఒప్పుకొనుటయే కృతజ్ఞతార్పణ చెల్లించుట.

అన్నీ బాగా ఉన్నప్పుడు కృతజ్ఞత చెల్లించడము సులభమే! అయితే మరి పరిస్థితి బాగా లేనపుడు ఎలా కృతజ్ఞత చెప్పగలము?

శ్రమలోనూ నీ దేవునికి కృతజ్ఞత చెల్లించగలగాలి అంటే, నీ దేవుడు మృతమైనదానిని సజీవముగా చేయగలవాడు, లేనిదానిని ఉన్నట్టుగా చేయగలవాడు అనే సత్యమును ఎరిగిఉండాలి. ఆయన నమ్మదగినవాడు, పోషించువాడు, విడిచిపెట్టేవాడు కాదు. నీకున్న వెలితిని తీర్చగలవాడు నీ దేవుడు.

ఈ సత్యమును గ్రహించాడు గనుకనే, గొల్యాతు రూపములో శ్రమ మరణ భయము ఎదురుగా ఉన్నపుడు, దావీదు సింహము, ఎలుగుబంటి నోటినుండి తప్పించిన దేవుడు ఈ సున్నతిలేని ఫిలిష్తీయుడి చేతిలోనుండి తప్పిస్తాడు అని చెప్పగలిగాడు.

మనము దేవుని సన్నిధికి కానుకలు తీసుకుని వస్తాము. అయితే దానికి ఎలా అర్పించాలి. గతవారమంతా నా జీవితములో నీవు చూపిన నమ్మకత్వమును బట్టి, ఆయనకు కృతజ్ఞతాపూర్వకముగా, ఆయన ఇచ్చినదానిలోనుండే అర్పిస్తున్నాను అనే హృదయముతో మనము అర్పించినపుడు అది దేవుని దృష్టికి అనుకూలముగా ఉంటుంది.

చిన్న మేలు ఒకరి ద్వారా పొందుకున్నపుడు, వారికి ఎదో ఒకటి కృతజ్ఞతాపూర్వకముగా ఇచ్చేవారముగా ఉంటాము. అలాగే మనము పొందిన మేలును బట్టి మనము చూపించే కృతజ్ఞత కూడా వేరుగా ఉంటుంది. ఆ కృతజ్ఞతాభావముతో స్పందించినపుడు ఆ సహాయము చేసినవాడి హృదయములో మంచి స్థానము ఇస్తాడు. మారలా ఎపుడైనా మరొక అవసరము వచ్చినపుడు చేయడానికి సిద్ధముగా ఉంటాడు.

గనుక ఈ రోజు మనము మన దేవునికి హృదయపూర్వకముగా, కృతజ్ఞతా స్తుతులు చెల్లించి మహిమపరచి ఆరాధిద్దాము.

ఆరాధన గీతము

నీలోనే ఆనందం నా దేవా నీలోనే నాకు జీవం
నిన్న నేడు నిరంతరం మారని దేవా
ఈ లోకమంతా నేను వెతదకినా
నాకు లేదయ్యా ఎక్కడా ఆనందం
నీ సన్నిధిలో ఒక్క క్షణం గడిపిన
నా హృదయం పొంగెను

ఈ లోకం ఒక మాయని తెలుసుకున్నాను
ఏది నా సొంతం కాదు అనుకున్నాను
తప్పిపోయిన కుమారుని నేనయితే
నా కొరకే నిరీక్షించే తండ్రి నా యేసు

ఏ ప్రేమ నీ ప్రేమకు సాటి రాదయ్య
ఎన్ని ఉన్నా నీతో సరి ఏది కాదయ్యా
నన్ను మరువని ప్రేమ నీ దయ్యా
నన్ను మార్చుకున్న ప్రేమ నీదే యేసయ్యా