18-06-2023 – ఆదివారం మొదటి ఆరాధన – పరలోకమందున్న తండ్రి 

మెయిన్ మెసేజ్

ఈరోజు నీ తండ్రి గూర్చి తెలుసుకో అని నీకు పిలుపు ఇవ్వబడుతుంది. పరలోకమందున్న తండ్రి గూర్చి తెలుసుకోవడానికి అనేకములు ఉన్నాయి అయితే కొన్ని విషయాలు ఈరోజు తెలుసుకుందాము.

మీ పరలోకపు తండ్రి పరిపూర్ణుడు గనుక మీరును పరిపూర్ణులుగా ఉండెదరు. -మత్తయి 5:48

“నా పరలోకపు తండ్రి పరిపూర్ణుడు గనుక నేనును పరిపూర్ణునిగా ఉండెదను, పరిపూర్ణమైన జీవితమునే కలిగి ఉందును” అని దేవుని సత్యమును ఎరిగి ఉంటే, ఖచ్చితముగా ఈ విధముగా ప్రకటిస్తావు.

అయితే అపవాది నిన్ను అసత్యములతో మోసపుచ్చడానికి ఎంతో ప్రయత్నిస్తాడు. నీ హృదయములో ఇది కాదు, ఇది జరగదు అని ఆలోచనలు పుట్టించి నిన్ను దేవుని అనుమానించేవాడిగా చేస్తాడు. అయితే నీ పరలోకపు తండ్రి గూర్చి నీవు సత్యమును ఎరిగి ఉన్నట్టయితే, నీవు ఆ ఉచ్చులో పడవు.

–ఈయన సమస్తమును బాగుగా చేసియున్నాడు; చెవిటి వారు వినునట్లుగాను మూగవారు మాటలాడునట్లుగాను చేయుచున్నాడని చెప్పుకొని అపరిమితముగా ఆశ్చర్యపడిరి. -మార్కు 7:37

అయితే నీ తండ్రి ఏమై ఉన్నాడో నీవు తెలుసుకొనే వరకు తండ్రికి కలిగినది నీవు అనుభవించలేవు.

మరియు నేను చెప్పునదేమనగా, వారసుడు అన్ని టికిని కర్తయైయున్నను బాలుడైయున్నంతకాలము అతనికిని దాసునికిని ఏ భేదమును లేదు.౹ -గలతీయులకు 4:1

తండ్రి కుమారులకే తన రహస్యములను వెల్లడిపరుస్తాడు కానీ, దాసునికి వెల్లడి చేయడు. నీ పరలోకపు తండ్రి కూడా నీకు తన మర్మములను వెల్లడిపరచువాడుగా ఉన్నాడు. ఒక ఉదాహరణకొరకు ఒక వ్యక్తికి ఒక వ్యాపారము ఉంది. దానిలో కుమారుడు, మరియు పనివాడు కూడా పనిచేస్తున్నారు. తన వ్యాపారానికి సంబంధించిన రహస్యములన్నీ కుమారునికే తెలియచేస్తాడు. మన జీవితములో చూస్తే, భూలోకములో యాత్రికులుగా ఉన్నాము, పరలోకము నివాస స్థానముగా కలిగి ఉన్నాము. ఇప్పుడు ఆ పరలోక నివాసము చేరుకోగలుగులాగున అవసరమైన ప్రతీ మర్మము కుమారునివైన నీకు మాత్రమే తెలియచేయబడుతుంది.

కాబట్టి యేసు వారికి ఇట్లు ప్రత్యుత్తరమిచ్చెను– తండ్రి యేది చేయుట కుమారుడు చూచునో, అదే కాని తనంతట తాను ఏదియు చేయనేరడు; ఆయన వేటిని చేయునో, వాటినే కుమారుడును ఆలాగే చేయును.౹ -యోహాను 5:19

తండ్రి ఏ విధముగా చెప్పుచున్నాడో, అదే విధముగా చెయ్యడానికి మనము సిద్ధపడి ఉండాలి.

ఇందునుగూర్చి దేవుడు తన్ను ప్రేమించువారికొరకు ఏవి సిద్ధపర చెనో అవి కంటికి కనబడలేదు, చెవికి వినబడలేదు, మనుష్య హృదయమునకు గోచరముకాలేదు అని వ్రాయబడియున్నది.౹ మనకైతే దేవుడు వాటిని తన ఆత్మ వలన బయలుపరచియున్నాడు; ఆ ఆత్మ అన్నిటిని, దేవుని మర్మములను కూడ పరిశోధించుచున్నాడు.౹ -1 కొరింథీయులకు 2:9-10

ఆయన తాను ప్రేమించినవారికొరకు సిద్ధపరచినది కంటికి కనబడలేదు, చెవికి వినబడలేదు అంటే మర్మము గా ఉన్నాయి అని అర్థము. అయితే ఆ “సిద్ధపరచినవి మరియు పరిపూర్ణమైనవి” మనకొరకు బయలు పరచబడ్డాయి. అందుకే నీ తండ్రి ఏమై ఉన్నాడో అనే సంగతి నీవు ఖచ్చితముగా ఎరిగి ఉండాలి.

అడుగుడి మీకియ్యబడును, వెదకుడి మీకు దొరకును, తట్టుడి మీకు తీయబడును. అడుగు ప్రతివాడును పొందును, వెదకువానికి దొరకును,తట్టువానికి తీయబడును. -మత్తయి 7:7-8

అడగడానికి నిబంధనలు ఏమి లేవు ఒక్క కుమారుడు అనే సంబంధము తప్ప. నీవు దేవుని కుమారునిగా నీవు ఉన్నట్టయితే నీవు అడిగినప్పుడు ఖచ్చితముగా ఇచ్చేవాడుగా ఉన్నాడు. అయితే ఆయన వెల్లడి పరచిన దానిని నీవు అడిగేవాడిగా సిద్ధపడాలి. ఎలా వెల్లడి పరచబడుతుంది? అంటే, ఆత్మ ద్వారా వెల్లడి పరచబడుతుంది.

మీరు చెడ్డ వారై యుండియు మీ పిల్లలకు మంచి యీవుల నియ్య నెరిగి యుండగా పరలోకమందున్న మీ తండ్రి తన్ను అడుగువారికి అంతకంటె ఎంతో నిశ్చయముగా మంచి యీవుల నిచ్చును. -మత్తయి 7:10

దేవుడు నీకొరకు సిద్ధపరచినది, దాచినది అంతా మంచిదే అయి ఉన్నది. అయితే మన జీవితములలో “అసూయ” అనేది అపవాది ఆయుధముగా వెంటాడుతుంది. లూకా సువార్తలో 15 వ అధ్యాయములో తప్పిపోయిన కుమారుని గూర్చిన భాగములో ఆస్తిని పంచిపెట్టమని చిన్నకుమారుడు అడిగినప్పుడు, తన కుమారులిద్దరికీ పంచిపెట్టాడు. అయితే చిన్న కుమారుడు తాను కలిగినదంతా పాడుచేసికొని, అంతా పోగొట్టుకొని, తిరిగి తండ్రి దగ్గరకు చిన్న కుమారుడు వచ్చినప్పుడు తండ్రి ఏమి చేసాడు?

వాడింక దూరముగా ఉన్నప్పుడు తండ్రి వానిని చూచి కనికరపడి, పరుగెత్తి వాని మెడమీదపడి ముద్దుపెట్టుకొనెను. -లూకా 15:20

తండ్రి తిరిగి వచ్చిన కుమారుడు చేసినది జ్ఞాపకము చేసుకోవట్లేదు గానీ, కనికరపడుతున్నాడు. అపవాది యొక్క దుర్వ్యాపారము వలన దేవుడిచ్చిన ఆధిక్యతను పాడు చేసుకుంటున్నాము. అయితే అపవాది మార్గములో ఉండినప్పటికీ, నీవు సత్యము తెలుసుకుని తిరిగి నీ తండ్రి యొద్దకు వచ్చినప్పుడు ఖచ్చితముగా నిన్ను చేర్చుకోనే వాడు.

ఆ దాసుడు అతనితో–నీ తమ్ముడు వచ్చియున్నాడు, అతడు తన యొద్దకు సురక్షితముగా వచ్చినందున నీ తండ్రి క్రొవ్విన పశువును వధించెననెను. అయితే అతడు కోపపడి లోపలికి వెళ్లనొల్లక పోయెను గనుక అతని తండ్రి వెలుపలికి వచ్చి (లోపలికి రమ్మని) బతిమాలుకొనెను. -లూకా 15:27-28

ఇక్కడ పెద్దకుమారుడు అసూయతో ఇంటిలోనికి వెళ్ళకుండా కోపగించుకున్నపుడు, తండ్రి “వెలుపలకు” వచ్చి “లోపలికి” రమ్మని బ్రతిమలాడుతున్నాడు. “వెలుపలకు” అంటే, అపవాది చేత పట్టబడి, నడిపించబడుతున్న పరిస్థితి. పెద్దకుమారుడు తన తండ్రి గూర్చి, తన తండ్రి కలిగినది ఎరగని స్థితిలో ఉన్నాడు. నిజానికి ఆస్తి పంచినప్పుడు పెద్ద కుమారునికి కూడా తన వాటా ఇచ్చినవాడుగా ఉన్నాడు. అయితే పెద్దకుమారుడు అనుభవించే జ్ఞానము లేనివాడుగా ఉన్నాడు.

అందుకతడు–కుమారుడా, నీ వెల్లప్పుడును నాతోకూడ ఉన్నావు; నావన్నియు నీవి, -లూకా 15:31

అయితే తండ్రి మాటలు గమనిస్తే, పెద్ద కుమారుడికి పంచినదే కాదు గానీ, ఆయన కలిగి ఉన్నదంతా తనకే కదా అని సత్యము వెల్లడి చేస్తున్నాడు. నీవు తప్పిపోయి తిరిగి వస్తే నిన్ను చేర్చుకొనేవాడు. ఆయనతోనే నీవు ఉంటే, ఆయన కలిగినదంతా కూడా నీకు ఇచ్చేవాడుగా ఉన్నాడు. ఈ సత్యము నీవు గ్రహిస్తే, నీవు ఎంతో సంతోషము కలిగి జీవించేవాడివిగా ఉంటావు. “అసూయ” అనే విషయము నిన్ను లోబరుచుకోకుండా నిన్ను నీవు జాగ్రత్త చేసుకోవాలి. “అపవాదికి సంబంధిచిన దానిని” విడిచి లోపలికి రమ్మని తండ్రి బతిమాలుతున్నాడు.

అయితే ఒక సత్యము గమనిస్తే, పోగొట్టుకుని వస్తున్నవాడి దగ్గరకి పరిగెట్టుకొని వెళ్ళాడు. తండ్రి గూర్చిన విషయములో నెగటివ్ ఆలోచనలను తొలగించడానికి వెంటనే వచ్చేవాడుగా ఉన్నాడు. తండ్రి ప్రేమ ఎంత గొప్పదో గమనించి, సరిచేసుకొని, తండ్రి నీకొరకు సిద్ధపరచినది అనుభవించి దేవుని మహిమపరుద్దాము.