18-02-2024 – ఆదివారం మొదటి ఆరాధన – ఆయన పూజింపదగినవాడు

ఆరాధన వర్తమానము

గతవారమంతా మన ప్రభువు మనతో ఉంటూ మనలను తిరిగి ఆయన సన్నిధికి నడిపించాడు. ఆయన చేసిన ఉపకారములలో దేనినీ మరచిపోకూడదు. మన జీవితములు దేవునిని ఆధారము చేసుకుని కొనసాగించబడే జీవితములు.

ఈ జీవితమును ప్రభువు సృష్టించాడు. ఆయనే మన సృష్టికర్త. మన అందరి యెడల ఆయన తన చిత్తమును, మంచి ఉద్దేశ్యమును కలిగిఉన్నాడు. గత వారములో మందిరపు పని ఆరంభించబడింది. ఆ పనిలో అనేకమైన అనేకమైన ఆటంకములు, అడ్డంకులు చూసిన తరువాత తెలుసుకున్న సత్యము, మన దేవుని ఆధారము చేసుకోకపోతే, ఆయన లేకపోతే మన జీవితములు శూన్యము. అయితే మనపై ఆయనకున్న ప్రణాళికనుబట్టి ప్రతి పరిస్థితిలో ఆయన మనలను విడిపించి నడిపించేవాడుగా ఉన్నాడు. అనేకమైన సందర్భములలో మనకు అడ్డుగా, ఆటంకముగా మన జీవితములను కోల్పోయేటట్లుచేయడానికి అనేకమైన ఉచ్చులు ఉన్నప్పటికీ, మన దేవుని ఉద్దేశ్యమును బట్టి మన జీవితములు నడిపించబడుతున్న్నాయి.

ద్రాక్షావల్లిని నేను, తీగెలు మీరు. ఎవడు నాయందు నిలిచియుండునో నేను ఎవనియందు నిలిచి యుందునో వాడు బహుగా ఫలించును; నాకు వేరుగా ఉండి మీరేమియు చేయలేరు.౹ -యోహాను 15:5

నేనే నీకు ఆధారము అని ప్రభువు చెప్పుచున్నాడు. ఏ జీవమైతే ఆ ద్రాక్షావల్లిలో ఉందో, ఆ జీవమే ఆ తీగెలలో కూడా ప్రవహిస్తుంది. మనము దేవునిలో నిలిచి నడుస్తున్నప్పుడు, ఏ ప్రణాళిక, ఉద్దేశ్యముతో దేవుడు మనలను సృష్టించాడో, అదే ఉద్దేశ్యము ప్రణాళికలే మన జీవితములో నెరవేరతాయి. ఈ సత్యము ఎరిగితే, మనము ఎంతో సంతోషముతో ప్రభువును స్తుతించేవారుగా ఉంటాము.మన జీవితమునకు ఆధారము ఆయనే గనుక మన జీవితమునకు ఏమి అడ్డు వచ్చినా నిలబడదు.

నేను మిమ్మునుగూర్చి ఉద్దేశించిన సంగతులను నేనెరుగుదును, రాబోవు కాలమందు మీకు నిరీక్షణకలుగునట్లుగా అవి సమాధానకరమైన ఉద్దేశములేగాని హానికరమైనవి కావు; ఇదే యెహోవా వాక్కు.౹ -యిర్మీయా 29:11

అనగా మన జీవితముల కొరకు సిద్ధపరచబడిన ఉద్దేశ్యము, చిత్తము దేవుడు ఎరిగే ఉన్నాడు అనే సత్యము మనము గ్రహించాలి. అప్పుడు మన ప్రస్తుత సందర్భములో ఎటువంటి అడ్డు వచ్చినా సరే ఈ సత్యము పై నిలబడి ముందుకు సాగగలుతాము. ఎందుకంటే, రాబోవు కాలమందు మీకు నిరీక్షణకలుగునట్లుగా అవి సమాధానకరమైన ఉద్దేశములే గనుక!

మన జీవిత్ములలో అనేకమైన కాలములు ఉంటాయి. కొన్ని ఆశీర్వాద సమయములు, కొన్ని విశ్వాస పరీక్షల సమయము, కొన్ని అగ్నివంటి శ్రమల కాలములు. అయితే మనము నమ్ముకొనదగిన ఒకే సత్యము – “నా యెడల దేవుడు మంచి ఉద్దేశ్యములు కలిగి ఉన్నాడు”. ఈ సత్యమే మనకు నిరీక్షణ కలిగిస్తుంది, అపవాది ఉచ్చునుండి తప్పించబడతాము. అందుకే మన దేవుడు మంచి దేవుడు. కీర్తనాకారుడి మాటలలో చూస్తే –

యెహోవా నా శైలము, నా కోట, నన్ను రక్షించు వాడు నా కేడెము, నా రక్షణ శృంగము, నా ఉన్నత దుర్గము, నా దేవుడు నేను ఆశ్రయించియున్న నా దుర్గము. -కీర్తనలు 18:2

సాధారణముగా మనము శ్రమల గుండా వెళుతున్నప్పుడు దేవుని జ్ఞాపకము చేసుకోలేని స్థితిలో ఉంటాము గానీ, ఆయనను తిరిగి జ్ఞాపకము చేసుకున్నప్పుడు ఎంత కఠినముగా శ్రమ ఉన్నప్పటికీ, ఆయన మాటను పట్టుకుని మనము నిలబడినప్పుడు ఒక్కొక్కటిగా మన పరిస్థితులు మనకు అనుకూలముగా మార్చబడతాయి.

కీర్తనాకారుడు చెప్తున్న మాటలు చూస్తే, దేవుడే బలము, దేవుడే కేడెము, దేవుడే కోట, దేవుడే శైలము, దేవుడే దుర్గము, దేవుడే నా ఆశ్రయము అని చెప్పుచున్నాడు. అనగా తనకంటూ దేవుడు తప్ప వేరే ఆధారము ఏమీ లేదు అని అర్థము.

షద్రకు మేషాకు అబెద్నగోల జీవితములలో “మా దేవుడు రక్షించగల సమర్థుడు, ఒకవేళ రక్షించకపోయినా సరే ఆయనే మా దేవుడు” అని రాజు ఎదుట వారు ధర్యముగా నిలబడ్డారు. అప్పుడు ఏమైతే నమ్మారో దానిని దేవుడు స్థిరపరచాడు.

మనము కలత చెందిన సమయము అపవాదికి మన మనసుపై ఆలోచనల ద్వారా దాడిచేయడానికి సరైన సమయము అయి ఉన్నది. ఎలాగైనా మన జీవితమును పోగొట్టుకోవాలి అనే ఆలోచన అపవాది కలిగి ఉంటాడు. ఆ క్రమములో మన దేవుడికి మనపై మంచి ఉద్దేశ్యము గలిగి ఉన్నాడు అనే సత్యమును మరిచిపోయేలాగా దాడి చేస్తాడు. అందుకే మనము కృంగి ఉన్నపుడు మరింత ఎక్కువగా మన దేవుడూ మాటను జ్ఞాపకము చేసుకోవాలి.

ఆయన నాకు కృపానిధి నా కోట నా దుర్గము నన్ను తప్పించువాడు నా కేడెము నే నాశ్రయించువాడు ఆయన నా జనులను నాకు లోబరచువాడైయున్నాడు. -కీర్తనలు 144:2

నిధి అంటే భవిష్యత్తు గురించి సిద్ధపరచబడి దాచబడినది అని అర్థము. కృపానిధి అనగా మన జీవితము యొక్క ప్రతీ పరిస్థితిలో దేవునిచేత సిద్ధపరచబడి మనకొరకు దాచబడిన దేవుని కృప!

మనము కృప ద్వారానే రక్షించబడ్డాము. కృపద్వారానే కొనసాగించబడుతున్నాము. మన ప్రస్తుత కష్ట కాలములో కూడా మనకు ఆధారము ఆయ్న కృపయే గనుక మన జీవితములో ఆయన కృప ఒక నిధిగా ఉంది.

మనలను రక్షించువాడు ఆయనే, మనలను తప్పించువాడు ఆయనే ఇంక మనలను అడ్డుకోగల శక్తి దేనికి ఉంది? ఈ సత్యము ఎరిగితే మన జీవితము ఎంతో శక్తిమంతమైనది. అపవాది యొక్క భయంకరమైన దాడిలో ఇంకా మనము ముగించబడకుండా ఇంకా కొనసాగించబడుతున్నాము అంటేనే మన దేవుడు తన కృపచేత రక్షించి, తప్పించి, నడిపించి కొనసాగిస్తున్నాడు అని గమనించగలము.

నా దుర్గము, నేను ఆయనను ఆశ్రయించుదును. నా కేడెము నా రక్షణశృంగము నా ఉన్నతదుర్గము నా ఆశ్రయస్థానము. ఆయనే నాకు రక్షకుడు బలాత్కారులనుండి నన్ను రక్షించువాడవు నీవే. -2 సమూయేలు 22:3

బలాత్కారులు అంటే బలహీనమైనవాడిపై తన బలమును ప్రయోగించి లోబరుచుకునేవారు. మన జీవితములో పరిస్థితులే బలాత్కారులుగా ఉంటున్నాయి. అయితే ఆ ప్రతి పరిస్థితులనుండి రక్షించువాడు ఆయనే! అందుకే ఆయనే మనజీవితమునకు ఆధారము. ఆలా మనలను నడిపిస్తూ తన మహిమను మన జీవితముల ద్వారా వెదజల్లేవాడుగా ఉన్నాడు.

ఆరాధన గీతము

ఆధారం నీవేనయ్యా
కాలం మారినా కష్టాలు తీరినా
కారణం నీవేనయ్యా
||ఆధారం||

నీ దీప స్థంభమై నేను
జీవించ చిరకాల ఆశ
నీ దరికి చేరి
నను నీకర్పించి
సాక్షిగా జీవింతును (నా దేవా)
||ఆధారం||

నీ మహిమ కొరకే నేను
జీవించ చిరకాల ఆశ
నీ దరి కి చేరి
నను నీకర్పించి
సాక్షిగా జీవింతును (నా దేవా)
||ఆధారం||