17-03-2024 – ఆదివారం మొదటి ఆరాధన – పాపము యొక్క ప్రభావం

వారము కొరకైన వాక్యము

ఈరోజు పాపము యొక్క ప్రభావము గురించి నేర్చుకుందాము. ప్రస్తుతము శ్రమదినముల కాలముగా పాటిస్తారు. ఈ 40 దినముల కాలములలో సిలువను గూర్చిన ధ్యానముచేసేవారిగా ఉంటారు.

మన ప్రభువైన యేసు క్రీస్తు యొక్క సిలువకార్యము మన అందరి పాపముల కోసమే. అయితే యేసు ప్రభువు యొక్క సిలువ త్యాగము వ్యర్థము కాకూడదు అంటే, పాపము యొక్క ప్రభావము మనము ఎరిగి ఉండాలి.

ఇట్లుండగా ఒక మనుష్యునిద్వారా పాపమును పాపము ద్వారా మరణమును లోకములో ఏలాగు ప్రవేశించెనో, ఆలాగుననే మనుష్యులందరు పాపము చేసినందున మరణము అందరికిని సంప్రాప్తమాయెను. ౹ -రోమా 5:12

ఆదాము అనే మనుష్యుని ద్వారా పాపము ప్రవేశించింది. దానిని బట్టి మరణము కూడా ప్రవేశించింది. అలా ప్రారంభమైన పాపము మనుష్యులందరూ పాపము చేయడానికి ప్రేరేపించి విస్తరించింది.

అనగా కేవలం ఆదాము చేసిన పాపము విస్తరించడము మాత్రమే కాదు కానీ, మనము చేసిన పాపము కూడా విస్తరింపచేయబడుతుంది గనుక చాల భయము కలిగి ఉండాలి. మన పిల్లలను ఖచ్చితముగా దేవుని భయములో పెంచవలసిన అవసరము ఎంతో ఉంది.

ఈరోజున చిన్న చిన్న పిల్లలు ఏమి తెలియని వయసులో అశ్లీలముగా అర్థము వచ్చే పాటలకు నాట్యము చేస్తుంటే, తల్లిదండ్రులు అది గమనించక వారిని ప్రోత్సహించేవారిగా ఉంటున్నారు.

ఈ పాపము అనేది దాచబడేది కాదు. రహస్యముగా చేసిన పాపము అయినా సరే అది బయటపడవలసినదే. ఈ పాపము అనేది విస్తరించేది గనుక ఆదిలోనే దానిని ఆపవలసిన అవసరము ఉంది.

అందుకే మన పిల్లల విషయములో అపవాది క్రియలు కనబడుతున్నపుడు మొదట్లోనే వాటిని ఖండించి దానిని సరిచేయాలి. పాపము ప్రభావము వెంటనే కనబడదు. పాపము గర్భము ధరించి, మరణమును కనును. పాపము యొక్క ప్రభావము ఆ కనుపరచబడే మరణము.

అందుకే పాపము నుండి పారిపొమ్మని లేఖనములు చెప్పుచున్నవి. యోసేపు కూడా నేను ఎలా యేహోవా సన్నిధిని ఎలా పాపము చేయగలను? అని తాను పాపమునుండి పారిపోయాడు.

శరీర సంబంధములో మన పిల్లలకు మన నుండి శారీరకమైన విషయములు సంక్రమిస్తాయి. అలాగే మనము చేసిన పాపము యొక్క ప్రభావము కూడా మన పిల్లలకు సంక్రమిస్తుంది.

అందుకే మనము చూసే చూపు, వినే మాటలు చాలా జాగ్రత్తగా ఉండాలి. మొబైల్ లో మనము దేవునికి మహిమకరము కానిది చూసేది, వినేది అది ఏమైనా సరే, దాని ప్రభావము మన తరువాత మన పిల్లలపై ప్రభావము పడుతుంది.

పాపము అనేది ఒక చిక్కుముడిలాంటిది. ఒకదానికొకటి అది చిక్కులు పడుతుంది. ఒకసారి మొదలై, నీ జీవితములో అనేకమైన వాటితో ముడిపడిపోయి నాశనము చేస్తుంది.

ఇంతవరకు పాపము ప్రభావము తెలియక ఒకవేళ అజ్ఞానముగా ప్రవర్తించినప్పటికీ, ఈరోజున దేవుని మాటను బట్టి ఆ పాపమునుండి మనము దూరముగా వెళ్ళిపోవాలి, వెళ్ళిపోదాము.

ఏ భేదమును లేదు; అందరును పాపముచేసి దేవుడు అను గ్రహించు మహిమను పొందలేక పోవుచున్నారు.౹ -రోమా 3:23

మనము పాపములో ఉన్నప్పుడు దేవుని మహిమను పోగొట్టుకుంటున్నాడు. మనము పాపము చేయడానికి సిద్ధపడుతున్నపుడు, నేను ఏదో విషయములో దేవుని మహిమను పోగొట్టుకుంటున్నాను అనే భయము మనకు కలగాలి. ఎందుకంటే మన జీవితము మహిమా జీవితము.

అటువంటి మహిమా జీవితాన్ని హాస్యాస్పదమైన కారణములతో, పాపమునకు ఆస్కారమిచ్చి పోగొట్టుకుంటున్నాము. పాపము, దేవుని మహిమను మన జీవితమునుండి దొంగిలిస్తుంది.

నేను పిండమునై యుండగా నీ కన్నులు నన్ను చూచెను నియమింపబడిన దినములలో ఒకటైన కాకమునుపే నా దినములన్నియు నీ గ్రంథములో లిఖితము లాయెను . -కీర్తనలు 139:16

మన భవిష్యత్తు ఎలా ఉంటుందో ఎవరికీ తెలియదు. అయితే దేవుడు నియమింపబడిన దినములు ఆరంభము కాక మునుపే, అనగా మనము పుట్టిన దినము మొదలుకొని, మన దినములన్నియు కూడా కాకమునుపే, ఆ దినములలో ఏమి జరగాలో అవి గ్రంథములో వ్రాయబడ్డాయి.

దేవుడు సిద్ధపరచిన సమాధానకరమైన, సంతోషకరమైన దినములు. ఈ దినములు దేవుడు మహిమకరముగా ఉండునట్లు దేవుడు సిద్ధపరచాడు.

అయితే, మన జీవితములో మనము పాపము చేసినప్పుడు ఏమి జరుగుతుంది అని చూస్తే, మన జీవితములో దేవుడు సిద్ధపరచిన అద్భుతమును మనము చేసిన పాపము మింగివేస్తుంది. పాపముతో ఉన్నంతసేపు దేవుడు సిద్ధపరచిన మహిమ చూడలేవు.

అయ్యో నా ప్రజలు నా మాట వినినయెడల ఇశ్రాయేలు నా మార్గముల ననుసరించినయెడల ఎంతమేలు! -కీర్తనలు 81:13

మనము పాపముతో మన జీవితమును కొనసాగించుచుండగా, దేవుని మాట విని పాపమునుండి మనము దూరముగా వెళ్ళి, దేవుని మాటకు లోబడితే, దేవుడు ఎంతో మేలు నేను చేస్తాను అని ఆశపడి పిలుస్తున్నాడు.

అది ఎంతమేలు అంటే, అది వివరించడానికి కూడా సాధ్యము కాదు.

అప్పుడు నేను వేగిరమే వారి శత్రువులను అణగ ద్రొక్కుదునువారి విరోధులను కొట్టుదును. యెహోవాను ద్వేషించువారు వారికి లొంగుదురువారి కాలము శాశ్వతముగా నుండును. అతిశ్రేష్ఠమైన గోధుమల ననుగ్రహించి నేను వారిని పోషించుదును కొండ తేనెతో నిన్ను తృప్తిపరచుదును. -కీర్తనలు 81:14-16

మనము దేవుని మాటను బట్టి పాపము ఒప్పుకుని విడిచిపెట్టినప్పుడు, ఆయన ఆలస్యము చేయకుండా ఆయన మేలు చేయుటకు సిద్ధముగా ఉన్నాడు. ఆయన ఎంతగా మనలను కోరుకుంటున్నాడో కదా!

మనకు వ్యతిరేకమైన శత్రువును, దేవుడు సూపర్ నేచురల్ గా అణగద్రొక్కుటకు దేవుడు సిద్ధమే, అయితే పాపమును విడిచిపెట్టి దేవుని మాటను బట్టి నిలబడితేనే గాని ఇది సాధ్యముకాదు.

దేవుని మహిమ మనతో ఉన్నంతసేపు, ప్రతీదీ మనకు లోబడే ఉంటుంది. మరణకరమైనది ఏదైనా సరే, అది మనకే లోబడి ఉంటుంది.

పాపము మొదట చిన్నగా ప్రారంభమవుతుంది. మెల్లిమెల్లిగా అది అనేకమైనవాటికి చుట్టుకుని నాశనము చేస్తుంది. దేవుని మహిమ మన జీవితములో ప్రత్యక్షపరచబడకుండా దొంగిలిస్తుంది.

ఇదిగో జనులు పక్ష వాయువుతో మంచముపెట్టియున్న యొకని ఆయన యొద్దకు తీసికొనివచ్చిరి. యేసు వారి విశ్వాసముచూచి –కుమారుడా ధైర్యముగా ఉండుము, నీ పాపములు క్షమింపబడియున్నవని పక్షవాయువు గల వానితో చెప్పెను. -మత్తయి 9:2

ఇక్కడ పక్షవాయువుతో ఉన్న వ్యక్తి శరీర బలహీనతతో ఉన్నాడు. అయితే యేసయ్య అతనితో నీ పాపములు క్షమించబడి ఉన్నవి అని చెప్పుచున్నాడు. అంటే, అతను చేసిన పాపమును బట్టి అవిటివాడుగా వాడు చేయబడ్డాడు.

అంటే మనము పాపము చేసినపుడు, అలాగే అదే పాపములో కొనసాగించబడుతున్నపుడు మన జీవితము అకస్మాత్తుగా స్తంభించిపోతుంది. ఇది ఎంతో భయంకరమైన పరిస్థితి. అందుకే అసలు పాపమును మన దరి చేరనివ్వవద్దు.

అటుతరువాత యేసు దేవాలయములో వానిని చూచి– ఇదిగో స్వస్థతనొందితివి; మరి యెక్కువ కీడు నీకు కలుగకుండునట్లు ఇకను పాపము చేయకుమని చెప్పగా -యోహాను 5:14

ఒకసారి స్వస్థపరచబడిన తరువాత మనము పాపం చేయుటనుబట్టి ఇంతకుముందుకన్నా మరి ఎక్కువ కీడు కలిగించేదిగా ఈ పాపము ఉంది.

క్షేమకరమైన జీవితము మనము అనుభవించాలి అంటే, ఖచ్చితముగా మనము పాపమును దూరముగా పెట్టాలి, ఆ పాపము చేయుటకు ప్రేరేపించే ప్రతి అవకాశమునుండి పారిపోవాలి. ఒకవేళ అలా కాకపోతే, మనము చేసే పాపము మన పిల్లల జీవితముపై ప్రభావము చూపిస్తుంది.

అయితే ఇప్పటివరకు జగించిన పాపము యొక్క ప్రభావమునుండి తప్పించబడాలి అంతే ఏమి చెయ్యాలి?

ఆమె విస్తారముగా ప్రేమించెను గనుక ఆమెయొక్క విస్తార పాపములు క్షమించబడెనని నీతో చెప్పుచున్నాను. ఎవనికి కొంచెముగా క్షమింపబడునో, వాడు కొంచెముగా ప్రేమించునని చెప్పి -లూకా 7:47
మీరు నన్ను ప్రేమించినయెడల నా ఆజ్ఞలను గైకొందురు.౹ -యోహాను 14:15

ఆమె విస్తారముగా దేవునిని ప్రేమించింది, ఆమె పాపములు క్షమించబడ్డాయి. ఇప్పుడు మనము దేవునిని ప్రేమిస్తే ఆయన ఆజ్ఞలు, ఆయన వాక్యమును గైకొనడమే. విస్తారముగా ప్రేమించడము అంటే, ప్రతివిషయములో ఆయన మాటను గైకొనాలి.

నా ఆజ్ఞలను అంగీకరించి వాటిని గైకొనువాడే నన్ను ప్రేమించువాడు; నన్ను ప్రేమించువాడు నా తండ్రివలన ప్రేమింపబడును; నేనును వానిని ప్రేమించి, వానికి నన్ను కనబరచుకొందు నని చెప్పెను.౹ -యోహాను 14:21

దేవుని మాటలను అంగీకరించి మనము నడిచినపుడు తండ్రి చేత ప్రేమించబడేవాడిగా ఉంటాము. పాపము ప్రతీ దోషమును కప్పును గనుక, ఎప్పుడైతే మనము దేవుని వాక్యము బట్టి ప్రతీ పరిస్థితిలో నడుస్తామో, ఇంతవరకు మనము చేసిన పాపదోషము కప్పబడి, తిరిగి మహిమా జీవితము పొందుకుంటాము.

అప్పుడు ఆ కుమారుడు అతనితో–తండ్రీ, నేను పరలోకమునకు విరోధముగాను నీ యెదుటను పాపము చేసితిని; ఇకమీదట నీ కుమారుడనని అనిపించుకొనుటకు యోగ్యుడను కాననెను. -లూకా 15:21

చిన్న కుమారుడు పాపము చేసి సమస్తము పోగొట్టుకొనిన తరువాత, తండ్రి దగ్గరకు వచ్చి తన పాపమును ఒప్పుకున్నాడు. అప్పుడు ఏమి జరిగింది అంటే –

అయితే తండ్రి తన దాసులను చూచి –ప్రశస్త వస్త్రము త్వరగా తెచ్చి వీనికి కట్టి, వీని చేతికి ఉంగరము పెట్టి, పాదములకు చెప్పులు తొడిగించుడి; -లూకా 15:22

అంటే, పాపము చేయక మునుపు ఎటువంటి జీవితము అనుభవించాడో, అదే జీవితము మరలా వీడికి అనుగ్రహించబడింది.

ఈరోజు దేవుడు పాపము ప్రభావము గూర్చి మనకు తెలియచేసాడు. ఎలా దానినుండి తప్పించబడాలో కూడ తెలియచేసాడు. అప్పుడు ఏమి జరుగుతుందో కూడా తెలియచేసాడు. ఇక నిర్ణయము నీదే!

ఇంతకు ముందు ఈ సత్యము సంపూర్ణముగా తెలియక పాపము చేసామేమో, అయితే ఈరోజు మనం ప్రేమ గలిగిన ప్రభువు చెంతకు తిరిగి పరుగిడి వచ్చి, మన జీవితమును ఆయన మహిమలో కట్టుకుందాము.